໗. ປປຎ຺ຈຂຍສຸຕ຺ຕວຓ຺ຓນາ

໖໗. ສຕ຺ຕເມ ປປຎ຺ຈສຎ຺ຎາສງ຺ຂາປຫານນ຺ຕິ ປປຎ຺ເຈນ຺ຕິ ຍຕ຺ຖ ສຍໍ ອຸປ຺ປນ຺ນາ, ຕໍ ສນ຺ຕານໍ ວິຕ຺ຖາເຣນ຺ຕິ ຈິຣໍ ຐເປນ຺ຕີຕິ ປປຎ຺ຈາ, ກິເລສາ. ວິເສສໂຕ ຣາຄໂທສໂມຫຕຓ຺ຫາທິຏ຺ຐິມານາ. ຕຖາ ຫິ ວຸຕ຺ຕໍ –

‘‘ຣາໂຄ ປປຎ຺ໂຈ, ໂທໂສ ປປຎ຺ໂຈ, ໂມໂຫ ປປຎ຺ໂຈ, ຕຓ຺ຫາ ປປຎ຺ໂຈ, ທິຏ຺ຐິ ປປຎ຺ໂຈ, ມາໂນ ປປຎ຺ໂຈ’’ຕິ. –

ອປິຈ ສໍກິເລສຏ຺ໂຐ ປປຎ຺ຈຏ຺ໂຐ, ກຈວຣຏ຺ໂຐ ປປຎ຺ຈຏ຺ໂຐ. ຕຕ຺ຖ ຣາຄປປຎ຺ຈສ຺ສ ສຸຠສຎ຺ຎາ ນິມິຕ຺ຕໍ, ໂທສປປຎ຺ຈສ຺ສ ອາຆາຕວຕ຺ຖຸ, ໂມຫປປຎ຺ຈສ຺ສ ອາສວາ, ຕຓ຺ຫາປປຎ຺ຈສ຺ສ ເວທນາ, ທິຏ຺ຐິປປຎ຺ຈສ຺ສ ສຎ຺ຎາ, ມານປປຎ຺ຈສ຺ສ ວິຕກ຺ໂກ ນິມິຕ຺ຕໍ. ເຕຫິ ປປຎ຺ເຈຫິ ສຫຄຕາ ສຎ຺ຎາ ປປຎ຺ຈສຎ຺ຎາ. ປປຎ຺ຈສຎ຺ຎານໍ ສງ຺ຂາ ຠາຄາ ໂກຏ຺ຐາສາ ປປຎ຺ຈສຎ຺ຎາສງ຺ຂາ. ອຕ຺ຖໂຕ ສທ຺ຘິໍ ນິມິຕ຺ເຕຫິ ຕໍຕໍປປຎ຺ຈສ຺ສ ປກ຺ຂິໂຍ ກິເລສຄໂຓ. ສຎ຺ຎາຄຫຓຎ຺ເຈຕ຺ຖ ຕສ຺ສ ເນສໍ ສາຘາຣຓເຫຕຸຠາເວນ. ວຸຕ຺ຕຎ຺ເຫຕໍ – ‘‘ສຎ຺ຎານິທານາ ຫິ ປປຎ຺ຈສງ຺ຂາ’’ຕິ (ສຸ. ນິ. ໘໘໐). ເຕສໍ ປຫານໍ, ເຕນ ເຕນ ມຄ຺ເຄນ ຣາຄາທິກິເລສານໍ ສມຸຈ຺ເຉທນນ຺ຕິ ອຕ຺ໂຖ.

ຕທາ ຫິ ຠຄວາ ອຕີຕາສຸ ອເນກໂກຏິສຕສຫສ຺ສສງ຺ຂາສຸ ອຕ຺ຕໂນ ຊາຕີສຸ ອນຕ຺ຖສ຺ສ ນິມິຕ຺ຕຠູເຕ ກິເລເສ ອິມສ຺ມິໍ ຈຣິມຠເວ ອຣິຍມຄ຺ເຄນ ໂພຘິມຓ຺ເຑ ສວາສເນ ປຫີເນ ປຈ຺ຈເວກ຺ຂິຕ຺ວາ ສຕ຺ຕສນ຺ຕານຎ຺ຈ ກິເລສຈຣິຕໍ ຣາຄາທິກິເລສສໍກິລິຏ຺ຐໍ ກຎ຺ຊິຍປຸຓ຺ຓລາພຸໍ ວິຍ ຕກ຺ກຠຣິຕຈາຏິໍ ວິຍ ວສາປີຕປິໂລຕິກໍ ວິຍ ຈ ທຸພ຺ພິນິໂມຈິຍໍ ທິສ຺ວາ ‘‘ເອວໍ ຄຫນໍ ນາມິທໍ ກິເລສວຏ຺ຏໍ ອນາທິກາລຠາວິຕໍ ມຍ຺ຫໍ ອນວເສສໍ ປຫີນໍ, ອໂຫ ສຸປ຺ປຫີນ’’ນ຺ຕິ ອຸປ຺ປນ຺ນປີຕິປາໂມຊ຺ໂຊ ອຸທານໍ ອຸທາເນສິ. ເຕນ ວຸຕ຺ຕໍ – ‘‘ອຖ ໂຂ ຠຄວາ ອຕ຺ຕໂນ ປປຎ຺ຈສຎ຺ຎາສງ຺ຂາປຫານໍ ວິທິຕ຺ວາ ຕາຍໍ ເວລາຍໍ ອິມໍ ອຸທານໍ ອຸທາເນສີ’’ຕິ.

ຕຕ຺ຖ ຍສ຺ສ ປປຎ຺ຈາ ຐິຕິ ຈ ນຕ຺ຖີຕິ ຍສ຺ມາ ຠຄວາ ອຕ຺ຕານເມວ ປຣໍ ວິຍ ກຕ຺ວາ ນິທ຺ທິສຕິ ຕສ຺ມາ ຍສ຺ສ ອຄ຺ຄປຸຄ຺ຄລສ຺ສ ວຸຕ຺ຕລກ຺ຂຓາ ປປຎ຺ຈາ, ເຕຫິ ກຕາ ສໍສາເຣ ຐິຕິ ຈ ນຕ຺ຖິ. ເນຕ຺ຕິຍໍ ປນ ‘‘ຐິຕິ ນາມ ອນຸສໂຍ’’ຕິ (ເນຕ຺ຕິ. ໒໗) ວຸຕ຺ຕໍ. ອນຸສໂຍ ຫິ ຠວປວຕ຺ຕິຍາ ມູລນ຺ຕິ. ສຕ຺ເຕ ສໍສາເຣ ປປຎ຺ເຈນ຺ຕີຕິ ປປຎ຺ຈາ. ‘‘ປປຎ຺ຈຏ຺ຐິຕີ’’ຕິ ຈ ປາໂຐ. ຕສ຺ສຕ຺ໂຖ – ປປຎ຺ຈານໍ ຐິຕິ ວິຊ຺ຊມານຕາ ມຄ຺ເຄນ ອສມຸຈ຺ເຉໂທ ປປຎ຺ຈຏ຺ຐິຕິ, ປປຎ຺ຈາ ເອວ ວາ ອວສິຏ຺ຐກຸສລາກຸສລວິປາການໍ ປວຕ຺ຕິຍາ ເຫຕຸຠາວໂຕ ວຏ຺ຏສ຺ສ ຐິຕິ ປປຎ຺ຈຏ຺ຐິຕິ, ສາ ຍສ຺ສ ອຄ຺ຄປຸຄ຺ຄລສ຺ສ ນຕ຺ຖິ. ສນ຺ທານໍ ປລິຆຎ຺ຈ ວີຕິວຕ຺ໂຕຕິ ໂຍ ພນ຺ຘນຏ຺ເຐນ ສນ຺ຕານສທິສຕ຺ຕາ ‘‘ສນ຺ທານ’’ນ຺ຕິ ລທ຺ຘນາມາ ຕຓ຺ຫາທິຏ຺ຐິໂຍ, ນິພ຺ພານນຄຣປເວສນິເສຘນໂຕ ປລິຆສທິສຕ຺ຕາ ປລິຆສງ຺ຂາຕໍ ອວິຊ຺ຊຎ຺ຈ ວີຕິວຕ຺ໂຕ ສວາສນປຫາເນນ ວິເສສໂຕ ອຕິກ຺ກນ຺ໂຕ. ອປເຣ ປນ ໂກຘໍ ‘‘ສນ຺ທານ’’ນ຺ຕິ ວທນ຺ຕິ, ຕໍ ນ ຄເຫຕພ຺ພໍ. ໂສ ຫິ ‘‘ປຣາຠິສຊ຺ຊນີ’’ຕິ ວຸຕ຺ໂຕຕິ.

ຕໍ ນິຕ຺ຕຓ຺ຫໍ ມຸນິໍ ຈຣນ຺ຕນ຺ຕິ ຕໍ ສພ຺ພຖາປິ ຕຓ຺ຫາຠາເວນ ນິຕ຺ຕຓ຺ຫໍ, ອຸຠຍໂລກມຸນນໂຕ ອຕ຺ຕຫິຕປຣຫິຕມຸນນໂຕ ຈ ມຸນິໍ, ເອກນ຺ເຕເນວ ສພ຺ພສຕ຺ຕຫິຕຕ຺ຖໍ ຈຕູຫິ ອິຣິຍາປເຖຫິ ນານາສມາປຕ຺ຕິຈາເຣຫິ ອນຎ຺ຎສາຘາຣເຓນ ຎາຓຈາເຣນ ຈ ຈຣນ຺ຕໍ. ນາວຊານາຕິ ສເທວໂກປິ ໂລໂກຕິ ສພ຺ໂພ ສປຎ຺ຎຊາຕິໂກ ສຕ຺ຕໂລໂກ ສເທວໂກປິ ສພ຺ຣຫ຺ມໂກປິ ນ ກທາຈິປິ ອວຊານາຕິ ນ ປຣິໂຠຕິ, ອຖ ໂຂ ອຍເມວ ໂລເກ ອຄ຺ໂຄ ເສຏ຺ໂຐ ອຸຕ຺ຕໂມ ປວໂຣຕິ ຄຣຸໍ ກໂຣນ຺ໂຕ ສກ຺ກຈ຺ຈໍ ປູຊາສກ຺ກາຣນິຣໂຕ ໂຫຕີຕິ.

ສຕ຺ຕມສຸຕ຺ຕວຓ຺ຓນາ ນິຏ຺ຐິຕາ.