໖. ຕຓ຺ຫາສງ຺ຂຍສຸຕ຺ຕວຓ຺ຓນາ

໖໖. ຉຏ຺ເຐ ອຎ຺ຎາສິໂກຓ຺ຑຎ຺ໂຎຕິ ເອຕ຺ຖ ໂກຓ຺ຑຎ຺ໂຎຕິ ຕສ຺ສາຍສ຺ມໂຕ ໂຄຕ຺ຕໂຕ ອາຄຕນາມໍ. ສາວເກສຸ ປນ ສພ຺ພປຐມໍ ອຣິຍສຈ຺ຈານິ ປຏິວິຊ຺ຌີຕິ ຠຄວຕາ ‘‘ອຎ຺ຎາສິ ວຕ, ໂຠ, ໂກຓ຺ຑຎ຺ໂຎ’’ຕິ (ມຫາວ. ໑໗; ສໍ. ນິ. ໕.໑໐໘໑) ວຸຕ຺ຕອຸທານວເສນ ເຖໂຣ ສາສເນ ‘‘ອຎ຺ຎາສິໂກຓ຺ຑຎ຺ໂຎ’’ຕ຺ເວວ ປຎ຺ຎາຍິຕ຺ຖ. ຕຓ຺ຫາສງ຺ຂຍວິມຸຕ຺ຕິນ຺ຕິ ຕຓ຺ຫາ ສງ຺ຂີຍຕິ ປຫີຍຕິ ເອຕ຺ຖາຕິ ຕຓ຺ຫາສງ຺ຂໂຍ, ນິພ຺ພານໍ. ຕສ຺ມິໍ ຕຓ຺ຫາສງ຺ຂເຍ ວິມຸຕ຺ຕິ. ຕຓ຺ຫາ ວາ ສງ຺ຂີຍຕິ ປຫີຍຕິ ເອເຕນາຕິ ຕຓ຺ຫາສງ຺ຂໂຍ, ອຣິຍມຄ຺ໂຄ. ຕສ຺ສ ຜລຠູຕາ, ປຣິໂຍສານຠູຕາ ວາ ວິມຸຕ຺ຕີຕິ ຕຓ຺ຫາສງ຺ຂຍວິມຸຕ຺ຕິ, ນິປ຺ປຣິຍາເຍນ ອຣຫຕ຺ຕຜລສມາປຕ຺ຕິ. ຕໍ ປຈ຺ຈເວກ຺ຂມາໂນ ນິສິນ຺ໂນ ໂຫຕິ. ອຍຎ຺ຫິ ອາຍສ຺ມາ ພຫຸລໍ ຜລສມາປຕ຺ຕິໍ ສມາປຊ຺ຊຕິ, ຕສ຺ມາ ອິຘາປິ ເອວມກາສິ.

ເອຕມຕ຺ຖໍ ວິທິຕ຺ວາຕິ ເອຕໍ ອຎ຺ຎາສິໂກຓ຺ຑຎ຺ຎຕ຺ເຖຣສ຺ສ ອຄ຺ຄຜລປຈ຺ຈເວກ຺ຂຓໍ ວິທິຕ຺ວາ ຕທຕ຺ຖທີປນໍ ອິມໍ ອຸທານໍ ອຸທາເນສິ.

ຕຕ຺ຖ ຍສ຺ສ ມູລໍ ຉມາ ນຕ຺ຖີຕິ ຍສ຺ສ ອຣິຍປຸຄ຺ຄລສ຺ສ ອຕ຺ຕຠາວຣຸກ຺ຂມູລຠູຕາ ອວິຊ຺ຊາ, ຕສ຺ສາວ ປຕິຏ຺ຐາ ເຫຕຸຠູຕາ ອາສວນີວຣຓອໂຍນິໂສມນສິກາຣສງ຺ຂາຕາ ຉມາ ປຖວີ ຈ ນຕ຺ຖິ ອຄ຺ຄມຄ຺ເຄນ ສມຸຄ຺ຆາຕິຕຕ຺ຕາ. ປຓ຺ຓາ ນຕ຺ຖິ ກຸໂຕ ລຕາຕິ ນຕ຺ຖິ ລຕາ ກຸໂຕ ປຓ຺ຓາຕິ ປທສມ຺ພນ຺ໂຘ. ມານາຕິມານາທິປເຠທາ ສາຂາປສາຂາທິສງ຺ຂາຕາ ລຕາປິ ນຕ຺ຖິ, ກຸໂຕ ເອວ ມທປ຺ປມາທມາຍາສາເຐຍ຺ຍາທິປຓ຺ຓານີຕິ ອຕ຺ໂຖ. ອຖ ວາ ປຓ຺ຓາ ນຕ຺ຖິ ກຸໂຕ ລຕາຕິ ຣຸກ຺ຂງ຺ກຸຣສ຺ສ ວຑ຺ຒມານສ຺ສ ປຐມໍ ປຓ຺ຓານິ ນິພ຺ພຕ຺ຕນ຺ຕິ. ປຈ຺ຉາ ສາຂາປສາຂາສງ຺ຂາຕາ ລຕາຕິ ກຕ຺ວາ ວຸຕ຺ຕໍ. ຕຕ຺ຖ ຍສ຺ສ ອຣິຍມຄ຺ຄຠາວນາຍ ອສຕິ ອຸປ຺ປຊ຺ຊນາຣຫສ຺ສ ອຕ຺ຕຠາວຣຸກ຺ຂສ຺ສ ອຣິຍມຄ຺ຄສ຺ສ ຠາວິຕຕ຺ຕາ ຍໍ ອວິຊ຺ຊາສງ຺ຂາຕໍ ມູລໍ, ຕສ຺ສ ປຕິຏ຺ຐານຠູຕໍ ອາສວາທິ ຈ ນຕ຺ຖິ. ມູລຄ຺ຄຫເຓເນວ ເຈຕ຺ຖ ມູລກາຣຓຕ຺ຕາ ພີຊຏ຺ຐານິຍໍ ກມ຺ມໍ ຕທຠາໂວປິ ຄຫິໂຕເຍວາຕິ ເວທິຕພ຺ໂພ. ອສຕິ ຈ ກມ຺ມພີເຊ ຕໍນິມິຕ຺ໂຕ ວິຎ຺ຎາຓງ຺ກຸໂຣ, ວິຎ຺ຎາຓງ຺ກຸຣນິມິຕ຺ຕາ ຈ ນາມຣູປສຬາຍຕນປຕ຺ຕສາຂາທໂຍ ນ ນິພ຺ພຕ຺ຕິສ຺ສນ຺ຕິເຍວ. ເຕນ ວຸຕ຺ຕໍ – ‘‘ຍສ຺ສ ມູລໍ ຉມາ ນຕ຺ຖິ, ປຓ຺ຓາ ນຕ຺ຖິ ກຸໂຕ ລຕາ’’ຕິ.

ຕໍ ຘີຣໍ ພນ຺ຘນາ ມຸຕ຺ຕນ຺ຕິ ຕໍ ຈຕຸພ຺ພິຘສມ຺ມປ຺ປຘານວີຣິຍໂຍເຄນ ວິຊິຕມາຣຕ຺ຕາ ຘີຣໍ, ຕໂຕ ເອວ ສພ຺ພກິເລສາຠິສງ຺ຂາຣພນ຺ຘນໂຕ ມຸຕ຺ຕໍ. ໂກ ຕໍ ນິນ຺ທິຕຸມຣຫຕີຕິ ເອຕ຺ຖ ນ຺ຕິ ນິປາຕມຕ຺ຕໍ. ເອວໍ ສພ຺ພກິເລສວິປ຺ປມຸຕ຺ຕໍ ສີລາທິອນຸຕ຺ຕຣຄຸຓສມນ຺ນາຄຕໍ ໂກ ນາມ ວິຎ຺ຎຸຊາຕິໂກ ນິນ຺ທິຕຸໍ ຄຣຫິຕຸໍ ອຣຫຕິ ນິນ຺ທານິມິຕ຺ຕສ຺ເສວ ອຠາວໂຕ. ເທວາປິ ນໍ ປສໍສນ຺ຕີຕິ ອຎ຺ຎທຕ຺ຖຸ ເທວາ ສກ຺ກາທໂຍ ຄຸຓວິເສສວິທູ, ອປິສທ຺ເທນ ມນຸສ຺ສາປິ ຂຕ຺ຕິຍປຓ຺ຑິຕາທໂຍ ປສໍສນ຺ຕິ. ກິຎ຺ຈ ຠິຍ຺ໂຍ ພ຺ຣຫ຺ມຸນາປິ ປສໍສິໂຕ ມຫາພ຺ຣຫ຺ມຸນາປິ ອຎ຺ເຎຫິປິ ພ຺ຣຫ຺ມນາຄຍກ຺ຂຄນ຺ຘພ຺ພາທີຫິປິ ປສໍສິໂຕ ໂຖມິໂຕເຍວາຕິ.

ຉຏ຺ຐສຸຕ຺ຕວຓ຺ຓນາ ນິຏ຺ຐິຕາ.