໕. ອປຣລກຸຓ຺ຑກຠທ຺ທິຍສຸຕ຺ຕວຓ຺ຓນາ

໖໕. ປຎ຺ຈເມ ສມ຺ພຫຸລານໍ ຠິກ຺ຂູນໍ ປິຏ຺ຐິໂຕ ປິຏ຺ຐິໂຕຕິ ອາຍສ຺ມາ ລກຸຓ຺ຑກຠທ຺ທິໂຍ ເອກທິວສໍ ສມ຺ພຫຸເລຫິ ຠິກ຺ຂູຫິ ສທ຺ຘິໍ ຄາມນ຺ຕເຣນ ປິຓ຺ຑາຍ ຈຣິຕ຺ວາ ກຕຠຕ຺ຕກິຈ຺ໂຈ ປຕ຺ຕໍ ໂວທກໍ ກຕ຺ວາ ຖວິກາຍ ປກ຺ຂິປິຕ຺ວາ ອໍເສ ລຄ຺ເຄຕ຺ວາ ຈີວຣໍ ສງ຺ຆຣິຕ຺ວາ ຕມ຺ປິ ວາມໍເສ ຐເປຕ຺ວາ ປາສາທິເກນ ອຠິກ຺ກນ຺ເຕນ ປຏິກ຺ກນ຺ເຕນ ອາໂລກິເຕນ ວິໂລກິເຕນ ສມິຎ຺ຊິເຕນ ປສາຣິເຕນ ໂອກ຺ຂິຕ຺ຕຈກ຺ຂຸ ອິຣິຍາປຖສມ຺ປນ຺ໂນ ອຕ຺ຕໂນ ສຕິປຎ຺ຎາເວປຸລ຺ລໍ ປກາເສນ຺ໂຕ ວິຍ ສຕິສມ຺ປຊຎ຺ຎໍ ສູປຏ຺ຐິຕໍ ກຕ຺ວາ ສມາຫິເຕນ ຈິຕ຺ເຕນ ປເທ ປທໍ ນິກ຺ຂິປນ຺ໂຕ ຄຈ຺ຉຕິ, ຄຈ຺ຉນ຺ໂຕ ຈ ຠິກ຺ຂູນໍ ປຈ຺ຉໂຕ ປຈ຺ຉໂຕ ຄຈ຺ຉຕິ ເຕຫິ ຠິກ຺ຂູຫິ ອສໍມິສ຺ໂສ. ກສ຺ມາ? ອສໍສຏ຺ຐວິຫາຣິຕາຍ. ອປິຈ ຕສ຺ສາຍສ຺ມໂຕ ຣູປໍ ປຣິຠູຕໍ ປຣິຠວຏ຺ຐານີຍໍ ປຸຖຸຊ຺ຊນາ ໂອຫີເຬນ຺ຕິ. ເຖໂຣ ຕໍ ຊານິຕ຺ວາ ປິຏ຺ຐິໂຕ ປິຏ຺ຐິໂຕ ຄຈ຺ຉຕິ ‘‘ມາ ອິເມ ມໍ ນິສ຺ສາຍ ອປຸຎ຺ຎໍ ປສວິໍສູ’’ຕິ. ເອວໍ ເຕ ຠິກ຺ຂູ ຈ ເຖໂຣ ຈ ສາວຕ຺ຖິໍ ປຕ຺ວາ ວິຫາຣໍ ປວິສິຕ຺ວາ ເຍນ ຠຄວາ ເຕນຸປສງ຺ກມນ຺ຕິ. ເຕນ ວຸຕ຺ຕໍ – ‘‘ເຕນ ໂຂ ປນ ສມເຍນ ອາຍສ຺ມາ ລກຸຓ຺ຑກຠທ຺ທິໂຍ’’ຕິອາທິ.

ຕຕ຺ຖ ທຸພ຺ພຓ຺ຓນ຺ຕິ ວິຣູປໍ. ເຕນສ຺ສ ວຓ຺ຓສມ຺ປຕ຺ຕິຍາ ສຓ຺ຐານສມ຺ປຕ຺ຕິຍາ ຈ ອຠາວໍ ທສ຺ເສຕິ. ທຸທ຺ທສິກນ຺ຕິ ອປາສາທິກທສ຺ສນໍ. ເຕນສ຺ສ ອນຸພ຺ຍຎ຺ຊນສມ຺ປຕ຺ຕິຍາ ອາກາຣສມ຺ປຕ຺ຕິຍາ ຈ ອຠາວໍ ທສ຺ເສຕິ. ໂອໂກຏິມກນ຺ຕິ ຣສ຺ສໍ. ອິມິນາ ອາໂຣຫສມ຺ປຕ຺ຕິຍາ ອຠາວໍ ທສ຺ເສຕິ. ເຍຠຸຍ຺ເຍນ ຠິກ຺ຂູນໍ ປຣິຠູຕຣູປນ຺ຕິ ປຸຖຸຊ຺ຊນຠິກ຺ຂູຫິ ໂອຫີຬິຕຣູປໍ. ປຸຖຸຊ຺ຊນາ ເອກຈ຺ເຈ ຉພ຺ພຄ຺ຄິຍາທໂຍ ຕສ຺ສາຍສ຺ມໂຕ ຄຸຓໍ ອຊານນ຺ຕາ ຫຕ຺ຖກຓ຺ຓຈູຬິກາທີສຸ ຄຓ຺ຫນ຺ຕາ ປຣາມສນ຺ຕາ ກີຬນ຺ຕາ ປຣິຠວນ຺ຕິ, ນ ອຣິຍາ, ກລ຺ຍາຓປຸຖຸຊ຺ຊນາ ວາ.

ຠິກ຺ຂູ ອາມນ຺ເຕສີຕິ ກສ຺ມາ ອາມນ຺ເຕສິ? ເຖຣສ຺ສ ຄຸຓໍ ປກາເສຕຸໍ. ເອວໍ ກິຣ ຠຄວໂຕ ອໂຫສິ ‘‘ອິເມ ຠິກ຺ຂູ ມມ ປຸຕ຺ຕສ຺ສ ມຫານຸຠາວຕໍ ນ ຊານນ຺ຕິ, ເຕນ ຕໍ ປຣິຠວນ຺ຕິ, ຕໍ ເນສໍ ທີຆຣຕ຺ຕໍ ອຫິຕາຍ ທຸກ຺ຂາຍ ຠວິສ຺ສຕິ, ຫນ຺ທາຫໍ ອິມສ຺ສ ຄຸເຓ ຠິກ຺ຂູນໍ ປກາເສຕ຺ວາ ປຣິຠວໂຕ ນໍ ໂມເຈສ຺ສາມີ’’ຕິ.

ປສ຺ສຖ ໂນຕິ ປສ຺ສຖ ນຸ. ນ ຈ ສາ ສມາປຕ຺ຕິ ສຸລຠຣູປາ, ຍາ ເຕນ ຠິກ຺ຂຸນາ ອສມາປນ຺ນປຸພ຺ພາຕິ ຣູປສມາປຕ຺ຕິ ອຣູປສມາປຕ຺ຕິ ພ຺ຣຫ຺ມວິຫາຣສມາປຕ຺ຕິ ນິໂຣຘສມາປຕ຺ຕິ ຜລສມາປຕ຺ຕີຕິ ເອວໍ ປເຠທາ ສາວກສາຘາຣຓາ ຍາ ກາຈິ ສມາປຕ຺ຕິໂຍ ນາມ, ຕາສຸ ເອກາປິ ສມາປຕ຺ຕິ ນ ສຸລຠຣູປາ, ທຸລ຺ລຠາ, ນຕ຺ຖິເຍວ ສາ ເຕນ ລກຸຓ຺ຑກຠທ຺ທິເຍນ ຠິກ຺ຂຸນາ ອສມາປນ຺ນປຸພ຺ພາ. ເອເຕນສ຺ສ ຍໍ ວຸຕ຺ຕໍ. ‘‘ມຫິທ຺ຘິໂກ ມຫານຸຠາໂວ’’ຕິ, ຕຕ຺ຖ ມຫິທ຺ຘິກຕໍ ປກາເສຕ຺ວາ ອິທານິ ມຫານຸຠາວຕໍ ທສ຺ເສຕຸໍ ‘‘ຍສ຺ສ ຈຕ຺ຖາຍາ’’ຕິອາທິມາຫ. ຕໍ ເຫຏ຺ຐາ ວຸຕ຺ຕນຍເມວ. ເອຕ຺ຖ ຈ ຠຄວາ ‘‘ເອໂສ, ຠິກ຺ຂເວ, ຠິກ຺ຂູ’’ຕິອາທິນາ, ‘‘ຠິກ຺ຂເວ, ອຍໍ ຠິກ຺ຂຸ ນ ໂຍ ວາ ໂສ ວາ ທຸພ຺ພຓ຺ໂຓ ທຸທ຺ທສິໂກ ໂອໂກຏິມໂກຕິ ຠິກ຺ຂູນໍ ປິຏ຺ຐິໂຕ ປິຏ຺ຐິໂຕ ອາຄຈ຺ຉຕີຕິ ຈ ເອຕ຺ຕເກນ ນ ໂອຎ຺ຎາຕພ຺ໂພ, ອຖ ໂຂ ມຫິທ຺ຘິໂກ ມຫານຸຠາໂວ, ຍໍກິຎ຺ຈິ ສາວເກນ ປຕ຺ຕພ຺ພໍ, ສພ຺ພໍ ຕໍ ເຕນ ອນຸປ຺ປຕ຺ຕໍ, ຕສ຺ມາ ຕໍ ປາສາຓຈ຺ຉຕ຺ຕໍ ວິຍ ຄຣຸໍ ກຕ຺ວາ ໂອໂລເກຖ, ຕໍ ໂວ ທີຆຣຕ຺ຕໍ ຫິຕາຍ ສຸຂາຍ ຠວິສ຺ສຕີ’’ຕິ ທສ຺ເສຕິ.

ເອຕມຕ຺ຖໍ ວິທິຕ຺ວາຕິ ເອຕໍ ອາຍສ຺ມໂຕ ລກຸຓ຺ຑກຠທ຺ທິຍສ຺ສ ມຫິທ຺ຘິກຕາມຫານຸຠາວຕາທິເຠທໍ ຄຸຓຣາສິໍ ສພ຺ພາກາຣໂຕ ຊານິຕ຺ວາ ຕທຕ຺ຖທີປນໍ ອິມໍ ອຸທານໍ ອຸທາເນສິ.

ຕຕ຺ຖ ເນລງ຺ໂຄຕິ ເອລໍ ວຸຈ຺ຈຕິ ໂທໂສ, ນາສ຺ສ ເອລນ຺ຕິ ເນລໍ. ກິໍ ປນ ຕໍ? ສຸປຣິສຸທ຺ຘສີລໍ. ຕຎ຺ຫິ ນິທ຺ໂທສຏ຺ເຐນ ອິຘ ‘‘ເນລ’’ນ຺ຕິ ອຘິປ຺ເປຕໍ. ຕໍ ເນລໍ ປຘານຠູຕໍ ອງ຺ຄໍ ເອຕສ຺ສາຕິ ເນລງ຺ໂຄ. ໂສ ຍໍ ‘‘ຣໂຖ’’ຕິ ວກ຺ຂຕິ, ເຕນ ສມ຺ພນ຺ໂຘ, ຕສ຺ມາ ສຸປຣິສຸທ຺ຘສີລງ຺ໂຄຕິ ອຕ຺ໂຖ. ອຣຫຕ຺ຕຜລສີລຎ຺ຫິ ອິຘາຘິປ຺ເປຕໍ. ເສໂຕ ປຈ຺ຉາໂທ ເອຕສ຺ສາຕິ ເສຕປຈ຺ຉາໂທ. ປຈ຺ຉາໂທຕິ ຣຖສ຺ສ ອຸປຣິ ອຕ຺ຖຣິຕພ຺ພກມ຺ພລາທິ. ໂສ ປນ ສຸປຣິສຸທ຺ຘຘວລຠາເວນ ເສໂຕ ວາ ໂຫຕິ ຣຕ຺ຕນີລາທີສຸ ວາ ອຎ຺ຎຕໂຣ. ອິຘ ປນ ອຣຫຕ຺ຕຜລວິມຸຕ຺ຕິຍາ ອຘິປ຺ເປຕຕ຺ຕາ ສຸປຣິສຸທ຺ຘຠາວໍ ອຸປາທາຍ ‘‘ເສຕປຈ຺ຉາໂທ’’ຕິ ວຸຕ຺ຕໍ ຍຖາ ອຎ຺ຎຕ຺ຣາປິ ‘‘ຣໂຖ ສີລປຣິກ຺ຂາໂຣ’’ຕິ. ເອໂກ ສຕິສງ຺ຂາໂຕ ອໂຣ ເອຕສ຺ສາຕິ ເອກາໂຣ. ວຕ຺ຕຕີຕິ ປວຕ຺ຕຕິ. ຣໂຖຕິ ເຖຣສ຺ສ ອຕ຺ຕຠາວໍ ສນ຺ຘາຍ ວທຕິ.

ອນີຆນ຺ຕິ ນິທ຺ທຸກ຺ຂໍ, ໂຂຠວິຣຫິຕໍ ຍານໍ ວິຍ ກິເລສປຣິໂຂຠວິຣຫິຕນ຺ຕິ ອຕ຺ໂຖ. ອາຍນ຺ຕນ຺ຕິ ສມ຺ພຫຸລານໍ ຠິກ຺ຂູນໍ ປິຏ຺ຐິໂຕ ປິຏ຺ຐິໂຕ ອາຄຈ຺ຉນ຺ຕໍ. ຉິນ຺ນໂສຕນ຺ຕິ ປຈ຺ຉິນ຺ນໂສຕໍ. ປກຕິຣຖສ຺ສ ຫິ ສຸຂປວຕ຺ຕນຕ຺ຖໍ ອກ຺ຂສີເສສຸ ນາຠິຍຎ຺ຈ ອຸປລິຕ຺ຕານໍ ສປ຺ປິເຕລາທີນໍ ໂສໂຕ ສວນໍ ສນ຺ທນໍ ໂຫຕິ, ເຕນ ໂສ ອຈ຺ຉິນ຺ນໂສໂຕ ນາມ ໂຫຕິ. ອຍໍ ປນ ຉຕ຺ຕິໍສຕິຍາ ໂສຕານໍ ອນວເສສໂຕ ປຫີນຕ຺ຕາ ຉິນ຺ນໂສໂຕ ນາມ ໂຫຕິ, ຕໍ ຉິນ຺ນໂສຕໍ. ນຕ຺ຖິ ເອຕສ຺ສ ພນ຺ຘນນ຺ຕິ ອພນ຺ຘໂນ. ຣຖູປຕ຺ຖຣສ຺ສ ຫິ ອກ຺ເຂນ ສທ຺ຘິໍ ນິຈ຺ຈລຠາວກຣຓຕ຺ຖໍ ພຫູນິ ພນ຺ຘນານິ ໂຫນ຺ຕິ, ເຕນ ໂສ ສພນ຺ຘໂນ. ອຍໍ ປນ ສພ຺ພສໍໂຍຊນພນ຺ຘນານໍ ອນວເສສໂຕ ປຣິກ຺ຂີຓຕ຺ຕາ ອພນ຺ຘໂນ, ຕໍ ອພນ຺ຘນໍ. ປສ຺ສາຕິ ຠຄວາ ເຖຣສ຺ສ ຄຸເຓຫິ ໂສມນສ຺ສປ຺ປຕ຺ໂຕ ຫຸຕ຺ວາ ອຕ຺ຕານໍ ວທຕິ.

ອິຕິ ສຕ຺ຖາ ອາຍສ຺ມນ຺ຕໍ ລກຸຓ຺ຑກຠທ຺ທິຍໍ ອຣຫຕ຺ຕຜລສີເສນ ສຸຈກ຺ກໍ, ອຣຫຕ຺ຕຜລວິມຸຕ຺ຕິຍາ ສຸອຸຕ຺ຕຣຈ຺ຉທໍ, ສູປຏ຺ຐິຕາຍ ສຕິຍາ ສ຺ວາຣໍ, ກິເລສປຣິໂຂຠາຠາເວນ ອປຣິໂຂຠໍ, ຕຓ຺ຫູປເລປາຠາເວນ ອນຸປເລປໍ, ສໍໂຍຊນາທີນໍ ອຠາເວນ ອພນ຺ຘນໍ ສຸປຣິກ຺ຂິຕ຺ຕໍ ສຸຍຸຕ຺ຕໍ ອາຊຎ຺ຎຣຖໍ ກຕ຺ວາ ທສ຺ເສຕິ.

ປຎ຺ຈມສຸຕ຺ຕວຓ຺ຓນາ ນິຏ຺ຐິຕາ.