໔. ທຸຕິຍສຕ຺ຕສຸຕ຺ຕວຓ຺ຓນາ

໖໔. ຈຕຸຕ຺ເຖ ອນ຺ຘີກຕາຕິ ກາມາ ນາມ ອນນ຺ຘມ຺ປິ ອນ຺ຘໍ ກໂຣນ຺ຕິ.

ຍຖາຫ –

‘‘ລຸທ຺ໂຘ ອຕ຺ຖໍ ນ ຊານາຕິ, ລຸທ຺ໂຘ ຘມ຺ມໍ ນ ປສ຺ສຕິ;

ອນ຺ຘຕມໍ ຕທາ ໂຫຕິ, ຍໍ ໂລໂຠ ສຫເຕ ນຣ’’ນ຺ຕິ. (ອິຕິວຸ. ໘໘; ມຫານິ. ໕; ຈູຬນິ. ຂຄ຺ຄວິສາຓສຸຕ຺ຕນິທ຺ເທສ ໑໒໘) –

ຕສ຺ມາ ກາເມນ ອນນ຺ຘາປິ ອນ຺ຘາ ກຕາຕິ ອນ຺ຘີກຕາ. ເສສໍ ອນນ຺ຕຣສຸຕ຺ເຕ ວຸຕ຺ຕນຍເມວ. ຕຕ຺ຖ ຫິ ມນຸສ຺ສານໍ ປວຕ຺ຕິ ຠິກ຺ຂູຫິ ທິສ຺ວາ ຠຄວໂຕ ອາໂຣຈິຕາ, ອິຘ ຠຄວຕາ ສາມໍເຍວ ທິຏ຺ຐາຕິ ອຍເມວ ວິເສໂສ. ສຕ຺ຖາ ສາວຕ຺ຖິໂຕ ນິກ຺ຂມິຕ຺ວາ ເຊຕວນໍ ຄຈ຺ຉນ຺ໂຕ ອນ຺ຕຣາມຄ຺ເຄ ອຈິຣວຕິຍໍ ນທິຍໍ ມຈ຺ຉພນ຺ເຘຫິ ໂອຑ຺ຑິຕໍ ກຸມິນໍ ປວິສິຕ຺ວາ ນິກ຺ຂນ຺ຕຸໍ ອສກ຺ໂກນ຺ເຕ ພຫູ ມຈ຺ເຉ ປສ຺ສິ, ຕໂຕ ອປຣຠາເຄ ເອກໍ ຂີຣປກໍ ວຈ຺ຉໍ ໂຄຣວໍ ກຕ຺ວາ ອນຸພນ຺ຘິຕ຺ວາ ຖຎ຺ຎປິປາສາຍ ຄີວໍ ປສາເຣຕ຺ວາ ມາຕຸ ອນ຺ຕຣສຕ຺ຖິຍໍ ມຸຂໍ ອຸປເນນ຺ຕໍ ປສ຺ສິ. ອຖ ຠຄວາ ວິຫາຣໍ ປວິສິຕ຺ວາ ປາເທ ປກ຺ຂາເລຕ຺ວາ ປຎ຺ຎຕ຺ຕວຣພຸທ຺ຘາສເນ ນິສິນ຺ໂນ ປຈ຺ຉິມໍ ວຕ຺ຖຸທ຺ວຍໍ ປຸຣິມສ຺ສ ອຸປມານຠາເວນ ຄເຫຕ຺ວາ ອິມໍ ອຸທານໍ ອຸທາເນສິ.

ຕຕ຺ຖ ກາມນ຺ຘາຕິ ວຕ຺ຖຸກາເມສຸ ກິເລສກາເມນ ອນ຺ຘາ ວິຈກ຺ຂຸກາ ກຕາ. ຊາລສຎ຺ຉນ຺ນາຕິ ສກຕ຺ຕຠາວປຣຕ຺ຕຠາເວສຸ ອຊ຺ຌຕ຺ຕິກພາຫິຣາຍຕເນສຸ, ຕນ຺ນິສ຺ສິເຕສຸ ຈ ຘມ຺ເມສຸ ອຕີຕາທິວເສນ ອເນກເຠທຠິນ຺ເນສຸ ເຫຏ຺ຐຸປຣິຍວເສນ ອປຣາປຣໍ ອຸປ຺ປຕ຺ຕິຍາ ອນ຺ໂຕຄຘານໍ ອນຕ຺ຖາວຫໂຕ ຈ ຊາລຠູຕາຍ ຕຓ຺ຫາຍ ສຸຂຸມຈ຺ຉິທ຺ເທນ ຊາເລນ ປຣິວຸໂຕ ວິຍ ອຸທກຣຫໂທ ສຎ຺ຉນ຺ນາ ປລິຄຸຓ຺ຐິຕາ ອຊ຺ໂຌຕ຺ຖຏາ. ຕຓ຺ຫາຉທນຉາທິຕາຕິ ຕຓ຺ຫາສງ຺ຂາເຕນ ຉທເນນ ເສວາລປຓເກນ ວິຍ ອຸທກໍ ຉາທິຕາ, ປຏິຈ຺ຉນ຺ນາ ປິຫິຕາຕິ ອຕ຺ໂຖ. ປທທ຺ວເຍນາປິ ກາມຈ຺ຉນ຺ທນີວຣຓນິວາຣິຕກຸສລຈິຕ຺ຕາຈາຣຕໍ ທສ຺ເສຕິ.

ປມຕ຺ຕພນ຺ຘຸນາ ພທ຺ຘາຕິ ກິເລສມາເຣນ ເທວປຸຕ຺ຕມາເຣນ ຈ ພທ຺ຘາ. ຍທຄ຺ເຄນ ຫິ ກິເລສມາເຣນ ພທ຺ຘາ, ຕທຄ຺ເຄນ ເທວປຸຕ຺ຕມາເຣນປິ ພທ຺ຘາ ນາມ ໂຫນ຺ຕິ. ວຸຕ຺ຕຎ຺ເຫຕໍ –

‘‘ອນ຺ຕລິກ຺ຂຈໂຣ ປາໂສ, ຍ຺ວາຍໍ ຈຣຕິ ມານໂສ;

ເຕນ ຕໍ ພາຘຍິສ຺ສາມິ, ນ ເມ ສມຓ ໂມກ຺ຂສີ’’ຕິ. (ສໍ. ນິ. ໑.໑໕໑; ມຫາວ. ໓໓);

ນມຸຈິ ກຓ຺ໂຫ ປມຕ຺ຕພນ຺ຘູຕິ ຕີຓິ ມາຣສ຺ສ ນາມານິ. ເທວປຸຕ຺ຕມາໂຣປິ ຫິ ກິເລສມາໂຣ ວິຍ ອນຕ຺ເຖນ ປມຕ຺ເຕ ສຕ຺ເຕ ພນ຺ຘຕີຕິ ປມຕ຺ຕພນ຺ຘຸ. ‘‘ປມຕ຺ຕາ ພນ຺ຘເນ ພທ຺ຘາ’’ຕິປິ ປຐນ຺ຕິ. ຕຕ຺ຖ ພນ຺ຘເນຕິ ກາມຄຸຓພນ຺ຘເນຕິ ອຕ຺ໂຖ. ພທ຺ຘາຕິ ນິຍມິຕາ. ຍຖາ ກິໍ? ມຈ຺ຉາວ ກຸມິນາມຸເຂ ຍຖາ ນາມ ມຈ຺ຉພນ຺ຘເກນ ໂອຑ຺ຑິຕສ຺ສ ກຸມິນສ຺ສ ມຸເຂ ປວິຏ຺ຐາ ມຈ຺ຉາ ເຕນ ພທ຺ຘາ ຫຸຕ຺ວາ ມຣຓມນ຺ເວນ຺ຕິ ປາປຸຓນ຺ຕິ, ເອວເມວ ມາເຣນ ໂອຑ຺ຑິເຕນ ກາມຄຸຓພນ຺ຘເນນ ພທ຺ຘາ ອິເມ ສຕ຺ຕາ ຊຣາມຣຓມນ຺ເວນ຺ຕິ. ວຈ຺ໂຉ ຂີຣປໂກວ ມາຕຣໍ ຍຖາ ຂີຣປາຍີ ຕຣຸຓວຈ຺ໂຉ ອຕ຺ຕໂນ ມາຕຣໍ ອນ຺ເວຕິ ອນຸຄຈ຺ຉຕິ, ນ ອຎ຺ຎໍ ເອວໍ ມາຣພນ຺ຘນພທ຺ຘາ ສຕ຺ຕາ ສໍສາເຣ ປຣິພ຺ຠມນ຺ຕາ ມຣຓເມວ ອນ຺ເວນ຺ຕິ ອນຸຄຈ຺ຉນ຺ຕິ, ນ ອຊຣໍ ອມຣຓໍ ນິພ຺ພານນ຺ຕິ ອຘິປ຺ປາໂຍ.

ຈຕຸຕ຺ຖສຸຕ຺ຕວຓ຺ຓນາ ນິຏ຺ຐິຕາ.