໓. ປຐມສຕ຺ຕສຸຕ຺ຕວຓ຺ຓນາ

໖໓. ຕຕິເຍ ກາເມສູຕິ ວຕ຺ຖຸກາເມສຸ. ອຕິເວລນ຺ຕິ ເວລໍ ອຕິກ຺ກມິຕ຺ວາ. ສຕ຺ຕາຕິ ອໂຍນິໂສມນສິກາຣພຫຸລຕາຍ ວິຊ຺ຊມານມ຺ປິ ອາທີນວໍ ອໂນໂລເກຕ຺ວາ ອສ຺ສາທເມວ ສຣິຕ຺ວາ ສຊ຺ຊນວເສນ ສຕ຺ຕາ, ອາສຕ຺ຕາ ລຄ຺ຄາຕິ ອຕ຺ໂຖ. ຣຕ຺ຕາຕິ ວຕ຺ຖໍ ວິຍ ຣງ຺ຄຊາເຕນ ຈິຕ຺ຕສ຺ສ ວິປຣິຓາມກຣເຓນ ຉນ຺ທຣາເຄນ ຣຕ຺ຕາ ສາຣຕ຺ຕາ. ຄິທ຺ຘາຕິ ອຠິກງ຺ຂນສຠາເວນ ອຠິຊ຺ຌເນນ ຄິທ຺ຘາ ເຄຘໍ ອາປນ຺ນາ. ຄຘິຕາຕິ ຣາຄມຸຈ຺ຉິຕາ ວິຍ ທຸມ຺ໂມຈນີຍຠາເວນ ຕຕ຺ຖ ປຏິພທ຺ຘາ. ມຸຈ຺ຉິຕາຕິ ກິເລສວເສນ ວິສຎ຺ຎີຠູຕາ ວິຍ ອນຎ຺ຎກິຈ຺ຈາ ມຸຈ຺ຉໍ ໂມຫໍ ອາປນ຺ນາ. ອຊ຺ໂຌປນ຺ນາຕິ ອນຎ຺ຎສາຘາຣເຓ ວິຍ ກຕ຺ວາ ຄິລິຕ຺ວາ ປຣິນິຏ຺ຐເປຕ຺ວາ ຐິຕາ. ສມ຺ມຕ຺ຕກຊາຕາຕິ ກາເມສຸ ປາຕພ຺ຍຕໍ ອາປຊ຺ຊນ຺ຕາ ອປ຺ປສຸຂເວທນາຍ ສມ຺ມຕ຺ຕກາ ສຸຏ຺ຐຸ ມຕ຺ຕກາ ຊາຕາ. ‘‘ສມ຺ໂມທກຊາຕາ’’ຕິປິ ປາໂຐ, ຊາຕສມ຺ໂມທນາ ອຸປ຺ປນ຺ນປຫໍສາຕິ ອຕ຺ໂຖ. ສພ຺ເພຫິປິ ປເທຫິ ເຕສໍ ຕຓ຺ຫາຘິປນ຺ນຕໍເຍວ ວທຕິ. ເອຕ຺ຖ ຈ ປຐມໍ ‘‘ກາເມສູ’’ຕິ ວຕ຺ວາ ປຸນປິ ‘‘ກາເມສູ’’ຕິ ວຈນໍ ເຕສໍ ສຕ຺ຕານໍ ຕທຘິມຸຕ຺ຕິທີປນຕ຺ຖໍ. ເຕນ ສພ຺ພິຣິຍາປເຖສຸ ກາມຄຸຓສມງ຺ຄິໂນ ຫຸຕ຺ວາ ຕທາ ວິຫຣິໍສູຕິ ທສ຺ເສຕິ.

ຕສ຺ມິຎ຺ຫິ ສມເຍ ຐເປຕ຺ວາ ອຣິຍສາວເກ ສພ຺ເພ ສາວຕ຺ຖິວາສິໂນ ອຸສ຺ສວໍ ໂຆເສຕ຺ວາ ຍຖາວິຠວໍ ອາປານຠູມິໍ ສຊ຺ເຊຕ຺ວາ ຠຸຎ຺ຊນ຺ຕາ ປິວນ຺ຕາ ອາວິ ເຈວ ຣໂຫ ຈ ກາເມ ປຣິຠຸຎ຺ຊນ຺ຕາ ອິນ຺ທ຺ຣິຍານິ ປຣິຈາເຣນ຺ຕາ ກາເມສຸ ປາຕພ຺ຍຕໍ ອາປຊ຺ຊິໍສຸ. ຠິກ຺ຂູ ສາວຕ຺ຖິຍໍ ປິຓ຺ຑາຍ ຈຣນ຺ຕາ ຕຕ຺ຖ ຕຕ຺ຖ ເຄເຫ ອາຣາມຸຍ຺ຍານາທີສຸ ຈ ມນຸສ຺ເສ ອຸສ຺ສວໍ ໂຆເສຕ຺ວາ ກາມນິນ຺ເນ ຕຖາ ປຏິປຊ຺ຊນ຺ເຕ ທິສ຺ວາ ‘‘ວິຫາຣໍ ຄນ຺ຕ຺ວາ ສຓ຺ຫສຸຂຸມໍ ຘມ຺ມໍ ລຠິສ຺ສາມາ’’ຕິ ຠຄວໂຕ ເອຕມຕ຺ຖໍ ອາໂຣເຈສຸໍ. ເຕນ ວຸຕ຺ຕໍ – ‘‘ອຖ ໂຂ ສມ຺ພຫຸລາ ຠິກ຺ຂູ…ເປ… ກາເມສຸ ວິຫຣນ຺ຕີ’’ຕິ.

ເອຕມຕ຺ຖໍ ວິທິຕ຺ວາຕິ ເອຕໍ ເຕສໍ ມນຸສ຺ສານໍ ອາປານຠູມິຣມຓີເຍສຸ ມຫາປຣິຬາເຫສຸ ອເນການຕ຺ຖານຸພນ຺ເຘສຸ ໂຆຣາສຍ຺ຫກຏຸກຜເລສຸ ກາເມສຸ ອນາທີນວທສ຺ສິຕໍ ສພ຺ພາກາຣໂຕ ວິທິຕ຺ວາ ກາມານຎ຺ເຈວ ກິເລສານຎ຺ຈ ອາທີນວວິຠາວນໍ ອິມໍ ອຸທານໍ ອຸທາເນສິ.

ຕຕ຺ຖ ກາເມສຸ ສຕ຺ຕາຕິ ວຕ຺ຖຸກາເມສຸ ກິເລສກາເມນ ຣຕ຺ຕາ ມຕ຺ຕາ ສຕ຺ຕາ ວິສຕ຺ຕາ ລຄ຺ຄາ ລຄ຺ຄິຕາ ສໍຍຸຕ຺ຕາ. ກາມສງ຺ຄສຕ຺ຕາຕິ ຕາເຍວ ກາມສຕ຺ຕິຍາ ວຕ຺ຖຸກາເມສຸ ຣາຄສງ຺ເຄນ ເຈວ ທິຏ຺ຐິມານໂທສອວິຊ຺ຊາສງ຺ເຄຫິ ຈ ສຕ຺ຕາ ອາສຕ຺ຕາ. ສໍໂຍຊເນ ວຊ຺ຊມປສ຺ສມານາຕິ ກມ຺ມວຏ຺ຏໍ ວິປາກວຏ຺ເຏນ, ຠວາທິເກ ວາ ຠວນ຺ຕຣາທີຫິ, ສຕ຺ເຕ ວາ ທຸກ຺ເຂຫິ ສໍໂຍຊນໂຕ ພນ຺ຘນໂຕ ສໍໂຍຊນນາມເກ ກາມຣາຄາທິກິເລສຊາເຕ ສໍໂຍຊນີເຍສຸ ຘມ຺ເມສຸ ອສ຺ສາທານຸປສ຺ສິຕາຍ ວຏ຺ຏທຸກ຺ຂມູລຠາວາທິກໍ ວຊ຺ຊໍ ໂທສໍ ອາທີນວໍ ອປສ຺ສນ຺ຕາ. ນ ຫິ ຊາຕຸ ສໍໂຍຊນສງ຺ຄສຕ຺ຕາ, ໂອຆໍ ຕເຣຍ຺ຍຸໍ ວິປຸລໍ ມຫນ຺ຕນ຺ຕິ ເອວໍ ອາທີນວທສ຺ສນາຠາເວນ ສໍໂຍຊນສຠາເວສຸ ສງ຺ເຄສຸ, ສໍໂຍຊນສງ຺ຂາເຕຫິ ວາ ສງ຺ເຄຫິ ເຕສໍ ວິສເຍສຸ ເຕຠູມກຘມ຺ເມສຸ ສຕ຺ຕາ ວິປຸລວິສຍຕາຍ ອນາທິກາລຕາຍ ຈ ວິປຸລໍ ວິຕ຺ຖິຓ຺ຓໍ ມຫນ຺ຕຎ຺ຈ ກາມາທິໂອຆໍ, ສໍສາໂຣຆເມວ ວາ ນ ກທາຈິ ຕເຣຍ຺ຍຸໍ, ເອກໍເສເນວ ຕສ຺ສ ໂອຆສ຺ສ ປາຣໍ ນ ຄຈ຺ເຉຍ຺ຍຸນ຺ຕິ ອຕ຺ໂຖ.

ຕຕິຍສຸຕ຺ຕວຓ຺ຓນາ ນິຏ຺ຐິຕາ.