໘. ຄຓິກາສຸຕ຺ຕວຓ຺ຓນາ

໕໘. ອຏ຺ຐເມ ທ຺ເວ ປູຄາຕິ ທ຺ເວ ຄຓາ. ອຎ຺ຎຕຣິສ຺ສາ ຄຓິກາຍາຕິ ອຎ຺ຎຕຣາຍ ນຄຣໂສຠິນິຍາ. ສາຣຕ຺ຕາຕິ ສຸຏ຺ຐຸ ຣຕ຺ຕາ. ປຏິພທ຺ຘຈິຕ຺ຕາຕິ ກິເລສວເສນ ພທ຺ຘຈິຕ຺ຕາ. ຣາຊຄເຫ ກິຣ ເອກສ຺ມິໍ ຉຓທິວເສ ພຫູ ຘຸຕ຺ຕປຸຣິສາ ຄຓພນ຺ຘເນນ ວິຈຣນ຺ຕາ ເອກເມກສ຺ສ ເອກເມກໍ ເວສິໍ ອາເນຕ຺ວາ ອຸຍ຺ຍານໍ ປວິສິຕ຺ວາ ຉຓກີຬໍ ກີຬິໍສຸ. ຕໂຕ ປຣມ຺ປິ ທ຺ເວ ຕໂຍ ຉຓທິວເສ ຕໍ ຕໍເຍວ ເວສິໍ ອາເນຕ຺ວາ ຉຓກີຬໍ ກີຬິໍສຸ. ອຖາປຣສ຺ມິໍ ຉຓທິວເສ ອຎ຺ເຎປິ ຘຸຕ຺ຕາ ຕເຖວ ຉຓກີຬໍ ກີຬິຕຸກາມາ ເວສິໂຍ ອາເນນ຺ຕາ ປຸຣິມຘຸຕ຺ເຕຫິ ປຸພ຺ເພ ອານີຕໍ ເອກໍ ເວສິໍ ອາເນນ຺ຕິ. ອິຕເຣ ຕໍ ທິສ຺ວາ ‘‘ອຍໍ ອມ຺ຫາກໍ ປຣິຄ຺ຄໂຫ’’ຕິ ອາຫໍສຸ. ເຕປິ ຕເຖວ ອາຫໍສຸ. ‘‘ເອວໍ ອມ຺ຫາກໍ ປຣິຄ຺ຄໂຫ, ອມ຺ຫາກໍ ປຣິຄ຺ຄໂຫ’’ຕິ ກລຫໍ ວຑ຺ເຒຕ຺ວາ ປາຓິປ຺ປຫາຣາທີນິ ອກໍສຸ. ເຕນ ວຸຕ຺ຕໍ – ‘‘ເຕນ ໂຂ ປນ ສມເຍນ ຣາຊຄເຫ ທ຺ເວ ປູຄາ’’ຕິອາທິ. ຕຕ຺ຖ ອຸປກ຺ກມນ຺ຕີຕິ ປຫຣນ຺ຕິ. ມຣຓມ຺ປິ ນິຄຈ຺ຉນ຺ຕີຕິ ພລວູປກ຺ກເມຫິ ມຣຓໍ ອຸປຄຈ຺ຉນ຺ຕິ, ອິຕເຣປິ ມຣຓມຕ຺ຕໍ ມຣຓປ຺ປມາຓທຸກ຺ຂໍ ປາປຸຓນ຺ຕິ.

ເອຕມຕ຺ຖໍ ວິທິຕ຺ວາຕິ ເອຕໍ ກາເມສຸ ເຄຘໍ ວິວາທມູລໍ ສພ຺ພານຕ຺ຖມູລນ຺ຕິ ສພ຺ພາກາຣໂຕ ວິທິຕ຺ວາ. ອິມໍ ອຸທານນ຺ຕິ ອນ຺ຕທ຺ວເຍ ຈ ມຊ຺ຌິມາຍ ປຏິປຕ຺ຕິຍາ ອາທີນວານິສໍສວິຠາວນໍ ອິມໍ ອຸທານໍ ອຸທາເນສິ.

ຕຕ຺ຖ ຍຎ຺ຈ ປຕ຺ຕນ຺ຕິ ຍໍ ຣູປາທິປຎ຺ຈກາມຄຸຓຊາຕໍ ປຕ຺ຕໍ ‘‘ນຕ຺ຖິ ກາເມສຸ ໂທໂສ’’ຕິ ທິຏ຺ຐິໍ ປຸຣກ຺ຂຕ຺ວາ ວາ ອປຸຣກ຺ຂຕ຺ວາ ວາ ເອຕຣຫິ ລທ຺ຘໍ ອນຸຠຸຍ຺ຍມານໍ. ຍຎ຺ຈ ປຕ຺ຕພ຺ພນ຺ຕິ ຍຎ຺ຈ ກາມຄຸຓຊາຕເມວ ‘‘ຠຸຎ຺ຊິຕພ຺ພາ ກາມາ, ປຣິຠຸຎ຺ຊິຕພ຺ພາ ກາມາ, ອາເສວິຕພ຺ພາ ກາມາ, ປຏິເສວິຕພ຺ພາ ກາມາ, ໂຍ ກາເມ ປຣິຠຸຎ຺ຊຕິ, ໂສ ໂລກໍ ວຑ຺ເຒຕິ, ໂຍ ໂລກໍ ວຑ຺ເຒຕິ, ໂສ ພຫຸໍ ປຸຎ຺ຎໍ ປສວຕີ’’ຕິ ທິຏ຺ຐິໍ ອຸປນິສ຺ສາຍ ຕໍ ອນິສ຺ສຊ຺ຊິຕ຺ວາ ກເຕນ ກມ຺ມຸນາ ອນາຄເຕ ປຕ຺ຕພ຺ພໍ ອນຸຠວິຕພ຺ພຎ຺ຈ. ອຸຠຍເມຕໍ ຣຊານຸກິຓ຺ຓນ຺ຕິ ເອຕໍ ອຸຠຍໍ ປຕ຺ຕໍ ປຕ຺ຕພ຺ພຎ຺ຈ ຣາຄຣຊາທີຫິ ອນຸກິຓ຺ຓໍ. ສມ຺ປຕ຺ເຕ ຫິ ວຕ຺ຖຸກາເມ ອນຸຠວນ຺ໂຕ ຣາຄຣເຊນ ໂວກິຓ຺ໂຓ ໂຫຕິ, ຕຕ຺ຖ ປນ ສໍກິລິຏ຺ຐຈິຕ຺ຕສ຺ສ ຜເລ ອາຍຕິໍ ອາປນ຺ເນ ໂທມນສ຺ສຸປ຺ປຕ຺ຕິຍາ ໂທສຣເຊນ ໂວກິຓ຺ໂຓ ໂຫຕິ, ອຸຠຍຕ຺ຖາປິ ໂມຫຣເຊນ ໂວກິຓ຺ໂຓ ໂຫຕິ. ກສ຺ສ ປເນຕໍ ຣຊານຸກິຓ຺ຓນ຺ຕິ ອາຫ – ‘‘ອາຕຸຣສ຺ສານຸສິກ຺ຂໂຕ’’ຕິ ກາມປຕ຺ຖນາວເສນ ກິເລສາຕຸຣສ຺ສ, ຕສ຺ສ ຈ ຜເລນ ທຸກ຺ຂາຕຸຣສ຺ສ ຈ ອຸຠຍຕ຺ຖາປິ ປຏິກາຣາຠິລາສາຍ ກິເລສຜເລ ອນຸສິກ຺ຂໂຕ.

ຕຖາ ຍຎ຺ຈ ປຕ຺ຕນ຺ຕິ ຍໍ ອເຈລກວຕາທິວເສນ ປຕ຺ຕໍ ອຕ຺ຕປຣິຕາປນໍ. ຍຎ຺ຈ ປຕ຺ຕພ຺ພນ຺ຕິ ຍໍ ມິຈ຺ຉາທິຏ຺ຐິກມ຺ມສມາທານເຫຕຸ ອປາເຍສຸ ປຕ຺ຕພ຺ພໍ ຜລໍ. ອຸຠຍເມຕໍ ຣຊານຸກິຓ຺ຓນ຺ຕິ ຕທຸຠຍໍ ທຸກ຺ຂຣຊານຸກິຓ຺ຓໍ. ອາຕຸຣສ຺ສາຕິ ກາຍກິລມເຖນ ທຸກ຺ຂາຕຸຣສ຺ສ. ອນຸສິກ຺ຂໂຕຕິ ມິຈ຺ຉາທິຏ຺ຐິໍ, ຕສ຺ສາ ສມາທາຍເກ ປຸຄ຺ຄເລ ຈ ອນຸສິກ຺ຂໂຕ.

ເຍ ຈ ສິກ຺ຂາສາຣາຕິ ເຍຫິ ຍຖາສມາທິນ຺ນໍ ສີລພ຺ພຕາທິສງ຺ຂາຕໍ ສິກ຺ຂໍ ສາຣໂຕ ຄເຫຕ຺ວາ ‘‘ອິມິນາ ສໍສາຣສຸທ຺ຘີ’’ຕິ ກຖິຕາ. ເຕນາຫ – ສີລພ຺ພຕໍ ຊີວິຕໍ ພ຺ຣຫ຺ມຈຣິຍໍ ອຸປຏ຺ຐານສາຣາຕິ. ຕຕ຺ຖ ຍໍ ‘‘ນ ກໂຣມີ’’ຕິ ໂອຣມຕິ, ຕໍ ສີລໍ, ວິສໂຠຊນກິຈ຺ຉາຈຣຓາທິກໍ ວຕໍ, ສາກຠກ຺ຂຕາທິຊີວິກາ ຊີວິຕໍ, ເມຖຸນວິຣຕິ ພ຺ຣຫ຺ມຈຣິຍໍ, ເອເຕສໍ ອນຸຕິຏ຺ຐນໍ ອຸປຏ຺ຐານໍ, ຠູຕປິຓ຺ຑກປຣິຠຓ຺ຑາທິວເສນ ຂນ຺ຘເທວສິວາທິປຣິຈຣຓໍ ວາ ອຸປຏ຺ຐານໍ, ເອວເມເຕຫິ ຍຖາວຸຕ຺ເຕຫິ ສີລາທີຫິ ສໍສາຣສຸທ຺ຘິ ໂຫຕີຕິ ຕານິ ສາຣໂຕ ຄເຫຕ຺ວາ ຐິຕາ ສມຓພ຺ຣາຫ຺ມຓາ ສິກ຺ຂາສາຣາ ສີລພ຺ພຕໍ ຊີວິຕໍ ພ຺ຣຫ຺ມຈຣິຍໍ ‘‘ອຸປຏ຺ຐານສາຣາ’’ຕິ ເວທິຕພ຺ພາ. ອຍເມໂກ ອນ຺ໂຕຕິ ອຍໍ ສີລພ຺ພຕປຣາມາສວເສນ ອຕ຺ຕກິລມຖານຸໂຍຄສງ຺ຂາໂຕ ມຊ຺ຌິມາຍ ປຏິປຕ຺ຕິຍາ ອຸປ຺ປຖຠູໂຕ ລາມກຏ຺ເຐນ ຈ ເອໂກ ອນ຺ໂຕ. ອຍໍ ທຸຕິໂຍ ອນ຺ໂຕຕິ ອຍໍ ກາມສຸຂລ຺ລິການຸໂຍໂຄ ກາເມສຸ ປາຕພ຺ຍຕາປຕ຺ຕິສງ຺ຂາໂຕ ທຸຕິໂຍ ວຸຕ຺ຕນເຍນ ອນ຺ໂຕ.

ອິຈ຺ເຈເຕ ອຸໂຠ ອນ຺ຕາຕິ ກາມສຸຂລ຺ລິການຸໂຍໂຄ ອຕ຺ຕກິລມຖານຸໂຍໂຄ ຈ ອິຕິ ເອເຕ ອຸໂຠ ອນ຺ຕາ. ເຕ ຈ ໂຂ ເອຕຣຫິ ປຕ຺ເຕ, ອາຍຕິໍ ປຕ຺ຕພ຺ເພ ຈ ກິເລສທຸກ຺ຂຣຊານຸກິຓ຺ເຓ ກາມຄຸເຓ ອຕ຺ຕປຣິຕາປເນ ຈ ອລ຺ລີເນຫິ ກິເລສທຸກ຺ຂາຕຸຣານໍ ອນຸສິກ຺ຂນ຺ເຕຫິ, ສຍຎ຺ຈ ກິເລສທຸກ຺ຂາຕຸເຣຫິ ປຏິປຊ຺ຊິຕພ຺ພຕ຺ຕາ ລາມກາ ອຸປ຺ປຖຠູຕາ ຈາຕິ ອນ຺ຕາ. ກຏສິວຑ຺ຒນາຕິ ອນ຺ຘປຸຖຸຊ຺ຊເນຫິ ອຠິກງ຺ຂິຕພ຺ພຏ຺ເຐນ ກຏສິສງ຺ຂາຕານໍ ຕຓ຺ຫາອວິຊ຺ຊານໍ ອຠິວຑ຺ຒນາ. ກຏສິໂຍ ທິຏ຺ຐິໍ ວຑ຺ເຒນ຺ຕີຕິ ຕາ ປນ ກຏສິໂຍ ນານປ຺ປກາຣທິຏ຺ຐິໍ ວຑ຺ເຒນ຺ຕິ. ວຕ຺ຖຸກາເມສຸ ອສ຺ສາທານຸປສ຺ສິໂນ ຫິ ເຕ ປຊຫິຕຸໍ ອສກ຺ໂກນ຺ຕສ຺ສ ຕຓ຺ຫາອວິຊ຺ຊາສຫກາຣີກາຣຓໍ ລຠິຕ຺ວາ ‘‘ນຕ຺ຖິ ທິນ຺ນ’’ນ຺ຕິອາທິນາ (ຘ. ສ. ໑໒໒໑; ວິຠ. ໙໓໘) ນຕ຺ຖິກທິຏ຺ຐິໍ ອກິຣິຍທິຏ຺ຐິໍ ອເຫຕຸກທິຏ຺ຐິຎ຺ຈ ຄຓ຺ຫາເປນ຺ຕິ, ອຕ຺ຕປຣິຕາປນໍ ອນຸຍຸຕ຺ຕສ຺ສ ປນ ອວິຊ຺ຊາຕຓ຺ຫາສຫກາຣີກາຣຓໍ ລຠິຕ຺ວາ ‘‘ສີເລນ ສຸທ຺ຘິ ວເຕນ ສຸທ຺ຘີ’’ຕິອາທິນາ ອຕ຺ຕສຸທ຺ຘິອຠິລາເສນ ສີລພ຺ພຕປຣາມາສທິຏ຺ຐິໍ ຄຓ຺ຫາເປນ຺ຕິ. ສກ຺ກາຍທິຏ຺ຐິຍາ ປນ ເຕສໍ ປຈ຺ຈຍຠາໂວ ປາກໂຏເຍວ. ເອວໍ ອນ຺ຕທ຺ວຍູປນິສ຺ສເຍນ ຕຓ຺ຫາອວິຊ຺ຊານໍ ທິຏ຺ຐິວຑ຺ຒກຕາ ເວທິຕພ຺ພາ. ເກຈິ ປນ ‘‘ກຏສີຕິ ປຎ຺ຈນ຺ນໍ ຂນ຺ຘານໍ ອຘິວຈນ’’ນ຺ຕິ ວທນ຺ຕິ. ເຕສໍ ຍທຄ຺ເຄນ ຕໂຕ ອນ຺ຕທ຺ວຍໂຕ ສໍສາຣສຸທ຺ຘິ ນ ໂຫຕິ, ຕທຄ຺ເຄນ ເຕ ອຸປາທານກ຺ຂນ຺ເຘ ອຠິວຑ຺ເຒຕີຕິ ອຘິປ຺ປາໂຍ. ອປເຣ ປນ ‘‘ກຏສິວຑ຺ຒນາ’’ຕິ ປທສ຺ສ ‘‘ອປຣາປຣໍ ຊຣາມຣເຓຫິ ສິວຖິກວຑ຺ຒນາ’’ຕິ ອຕ຺ຖໍ ວທນ຺ຕິ. ເຕຫິປິ ອນ຺ຕທ຺ວຍສ຺ສ ສໍສາຣສຸທ຺ຘິເຫຕຸຠາວາຠາໂວເຍວ ວຸຕ຺ໂຕ, ກຏສິຍາ ປນ ທິຏ຺ຐິວຑ຺ຒນກາຣຓຠາໂວ ວຕ຺ຕພ຺ໂພ.

ເອເຕ ເຕ ອຸໂຠ ອນ຺ເຕ ອນຠິຎ຺ຎາຍາຕິ ເຕ ເອເຕ ຍຖາວຸຕ຺ເຕ ອຸໂຠປິ ອນ຺ເຕ ອຊານິຕ຺ວາ ‘‘ອິເມ ອນ຺ຕາ ເຕ ຈ ເອວໍຄຫິຕາ ເອວໍອນຸຏ຺ຐິຕາ ເອວໍຄຕິກາ ເອວໍອຠິສມ຺ປຣາຍາ’’ຕິ ເອວໍ ອຊານນເຫຕຸ ອຊານນກາຣຓາ. ‘‘ປຎ຺ຎາຍ ຈສ຺ສ ທິສ຺ວາ ອາສວາ ປຣິກ຺ຂີຓາ’’ຕິອາທີສຸ (ປຸ. ປ. ໒໐໘; ອ. ນິ. ໙.໔໓) ວິຍສ຺ສ ເຫຕຸອຕ຺ຖຕາ ທຏ຺ຐພ຺ພາ. ໂອລີຍນ຺ຕິ ເອເກຕິ ເອເກ ກາມສຸຂານຸໂຍຄວເສນ ສງ຺ໂກຈໍ ອາປຊ຺ຊນ຺ຕິ. ອຕິຘາວນ຺ຕິ ເອເກຕິ ເອເກ ອຕ຺ຕກິລມຖານຸໂຍຄວເສນ ອຕິກ຺ກມນ຺ຕິ. ກາມສຸຂມນຸຍຸຕ຺ຕາ ຫິ ວີຣິຍສ຺ສ ອກຣຓໂຕ ໂກສຊ຺ຊວເສນ ສມ຺ມາປຏິປຕ຺ຕິໂຕ ສງ຺ໂກຈມາປນ຺ນຕາ ໂອລີຍນ຺ຕິ ນາມ, ອຕ຺ຕປຣິຕາປນມນຸຍຸຕ຺ຕາ ປນ ໂກສຊ຺ຊໍ ປຫາຍ ອນຸປາເຍນ ວີຣິຍາຣມ຺ຠໍ ກໂຣນ຺ຕາ ສມ຺ມາປຏິປຕ຺ຕິຍາ ອຕິກ຺ກມນໂຕ ອຕິຘາວນ຺ຕິ ນາມ, ຕທຸຠຍໍ ປນ ຕຕ຺ຖ ອາທີນວາທສ຺ສນໂຕ. ເຕນ ວຸຕ຺ຕໍ – ‘‘ອຸໂຠ ອນ຺ເຕ ອນຠິຎ຺ຎາຍ ໂອລີຍນ຺ຕິ ເອເກ ອຕິຘາວນ຺ຕິ ເອເກ’’ຕິ. ຕຕ຺ຖ ຕຓ຺ຫາຠິນນ຺ທນວເສນ ໂອລີຍນ຺ຕິ, ທິຏ຺ຐາຠິນນ຺ທນວເສນ ອຕິຘາວນ຺ຕີຕິ ເວທິຕພ຺ພໍ.

ອຖ ວາ ສສ຺ສຕາຠິນິເວສວເສນ ໂອລີຍນ຺ຕິ ເອເກ, ອຸຈ຺ເຉທາຠິນິເວສວເສນ ອຕິຘາວນ຺ຕິ ເອເກ. ໂຄສີລາທິວເສນ ຫິ ອຕ຺ຕປຣິຕາປນມນຸຍຸຕ຺ຕາ ເອກຈ຺ເຈ ‘‘ອິມິນາຫໍ ສີເລນ ວາ ວເຕນ ວາ ຕເປນ ວາ ພ຺ຣຫ຺ມຈຣິເຍນ ວາ ເທໂວ ວາ ຠວິສ຺ສາມິ ເທວຎ຺ຎຕໂຣ ວາ, ຕຕ຺ຖ ນິຈ຺ໂຈ ຘຸໂວ ສສ຺ສໂຕ ອວິປຣິຓາມຘມ຺ໂມ ສສ຺ສຕິສມໍ ຕເຖວ ຐສ຺ສາມີ’’ຕິ ສສ຺ສຕທສ຺ສນໍ ອຠິນິວິສນ຺ຕາ ສໍສາເຣ ໂອລີຍນ຺ຕິ ນາມ, ກາມສຸຂມນຸຍຸຕ຺ຕາ ປນ ເອກຈ຺ເຈ ຍໍກິຎ຺ຈິ ກຕ຺ວາ ອິນ຺ທ຺ຣິຍານິ ສນ຺ຕປ຺ເປຕຸກາມາ ໂລກາຍຕິກາ ວິຍ ຕທນຸຄຸຓໍ ອຸຈ຺ເຉທທສ຺ສນໍ ອຠິນິວິສນ຺ຕາ ອນຸປາເຍນ ວຏ຺ຏຸປຈ຺ເຉທສ຺ສ ປຣິເຍສນໂຕ ອຕິຘາວນ຺ຕິ ນາມ. ເອວໍ ສສ຺ສຕຸຈ຺ເຉທວເສນປິ ໂອລີຍນາຕິຘາວນານິ ເວທິຕພ຺ພານິ.

ເຍ ຈ ໂຂ ເຕ ອຠິຎ຺ຎາຍາຕິ ເຍ ຈ ໂຂ ປນ ອຣິຍປຸຄ຺ຄລາ ເຕ ຍຖາວຸຕ຺ເຕ ອຸໂຠ ອນ຺ເຕ ‘‘ອິເມ ອນ຺ຕາ ເອວໍຄຫິຕາ ເອວໍອນຸຏ຺ຐິຕາ ເອວໍຄຕິກາ ເອວໍອຠິສມ຺ປຣາຍາ’’ຕິ ອຠິວິສິຏ຺ເຐນ ຎາເຓນ ວິປສ຺ສນາສຫິຕາຍ ມຄ຺ຄປຎ຺ຎາຍ ຊານິຕ຺ວາ ມຊ຺ຌິມປຏິປທໍ ສມ຺ມາປຏິປນ຺ນາ, ຕາຍ ສມ຺ມາປຏິປຕ຺ຕິຍາ. ຕຕ຺ຣ ຈ ນາເຫສຸນ຺ຕິ ຕຕ຺ຣ ຕສ຺ມິໍ ອນ຺ຕທ຺ວເຍ ປຕິຕາ ນ ອເຫສຸໍ, ຕໍ ອນ຺ຕທ຺ວຍໍ ປຊຫິໍສູຕິ ອຕ຺ໂຖ. ເຕນ ຈ ນາມຎ຺ຎິໍສູຕິ ເຕນ ອນ຺ຕທ຺ວຍປຫາເນນ ‘‘ມມ ອິທໍ ອນ຺ຕທ຺ວຍປຫານໍ, ອຫໍ ອນ຺ຕທ຺ວຍໍ ປຫາສິໍ, ອິມິນາ ອນ຺ຕທ຺ວຍປຫາເນນ ເສຍ຺ໂຍ’’ຕິອາທິນາ ຕຓ຺ຫາທິຏ຺ຐິມານມຎ຺ຎນາວເສນ ນ ອມຎ຺ຎິໍສຸ ສພ຺ພມຎ຺ຎນານໍ ສມ຺ມເທວ ປຫີນຕ຺ຕາ. ເອຕ຺ຖ ຈ ອຄ຺ຄຜເລ ຐິເຕ ອຣິຍປຸຄ຺ຄເລ ສນ຺ຘາຍ ‘‘ຕຕ຺ຣ ຈ ນາເຫສຸໍ, ເຕນ ຈ ນາມຎ຺ຎິໍສູ’’ຕິ ອຕີຕກາລວເສນ ອຍໍ ເທສນາ ປວຕ຺ຕາ, ມຄ຺ຄກ຺ຂເຓ ປນ ອຘິປ຺ເປເຕ ວຕ຺ຕມານກາລວເສເນວ ວຕ຺ຕພ຺ພໍ ສິຍາ. ວຏ຺ຏໍ ເຕສໍ ນຕ຺ຖິ ປຎ຺ຎາປນາຍາຕິ ເຍ ເອວໍ ປຫີນສພ຺ພມຎ຺ຎນາ ອຸຕ຺ຕມປຸຣິສາ, ເຕສໍ ອນຸປາທາປຣິນິພ຺ພຸຕານໍ ກມ຺ມວິປາກກິເລສວເສນ ຕິວິຘມ຺ປິ ວຏ຺ຏໍ ນຕ຺ຖິ ປຎ຺ຎາປນາຍ, ວຕ຺ຕມານກ຺ຂນ຺ຘເຠທໂຕ ອຸທ຺ຘໍ ອນຸປາທາໂນ ວິຍ ຊາຕເວໂທ ອປຎ຺ຎຕ຺ຕິກຠາວເມວ ຄຈ຺ຉຕີຕິ ອຕ຺ໂຖ.

ອຏ຺ຐມສຸຕ຺ຕວຓ຺ຓນາ ນິຏ຺ຐິຕາ.