໙. ອຸປາຕິຘາວນ຺ຕິສຸຕ຺ຕວຓ຺ຓນາ

໕໙. ນວເມ ຣຕ຺ຕນ຺ຘກາຣຕິມິສາຍນ຺ຕິ ຣຕ຺ຕິຍໍ ອນ຺ຘກາເຣ ມຫາຕິມິສາຍໍ. ຣຕ຺ຕີປິ ຫິ ອນ຺ຘກາຣວິຣຫິຕາ ໂຫຕິ, ຍາ ປຸຓ຺ຓມາຍ ຣຕ຺ຕິ ຊຸຓ຺ໂຫຠາສິຕາ. ອນ຺ຘກາໂຣປິ ‘‘ຕິມິສາ’’ຕິ ນ ວຕ຺ຕພ຺ໂພ ໂຫຕິ ອພ຺ຠມຫິກາທິອຸປກ຺ກິເລສວິຣຫິເຕ ເທເວ. ມຫນ຺ຘກາໂຣ ຫິ ‘‘ຕິມິສາ’’ຕິ ວຸຈ຺ຈຕິ. ອຍໍ ປນ ອມາວສີ ຣຕ຺ຕິ ເທໂວ ຈ ເມຆປຏລສຎ຺ຉນ຺ໂນ. ເຕນ ວຸຕ຺ຕໍ – ‘‘ຣຕ຺ຕນ຺ຘກາຣຕິມິສາຍນ຺ຕິ ຣຕ຺ຕິຍາ ອນ຺ຘກາເຣ ມຫາຕິມິສາຍ’’ນ຺ຕິ. ອພ຺ໂຠກາເສຕິ ອປ຺ປຏິຈ຺ຉນ຺ເນ ໂອກາເສ ວິຫາຣງ຺ຄເຓ. ເຕລປ຺ປທີເປສຸ ຌາຍມາເນສູຕິ ເຕລປຊ຺ໂຊເຕສຸ ຊລມາເນສຸ.

ນນຸ ຈ ຠຄວໂຕ ພ຺ຍາມປ຺ປຠາ ປກຕິຍາ ພ຺ຍາມມຕ຺ຕປ຺ປເທສໍ ອຠິພ຺ຍາເປຕ຺ວາ ຈນ຺ທິມສູຣິຍາໂລກໍ ອຠິຠວິຕ຺ວາ ຆນພຫລໍ ພຸທ຺ຘາໂລກໍ ວິສ຺ສຊ຺ເຊນ຺ຕີ ອນ຺ຘກາຣໍ ວິຘມິຕ຺ວາ ຕິຏ຺ຐຕິ, ກາຍປ຺ປຠາປິ ນີລປີຕາທິວເສນ ຉພ຺ພຓ຺ຓຆນພຸທ຺ຘຣສ຺ມິໂຍ ວິສ຺ສຊ຺ເຊຕ຺ວາ ປກຕິຍາວ ສມນ຺ຕໂຕ ອສີຕິຫຕ຺ຖປ຺ປເທສໍ ໂອຠາເສນ຺ຕີ ຕິຏ຺ຐຕິ, ເອວໍ ພຸທ຺ຘາໂລເກເນວ ເອໂກຠາສຠູເຕ ຠຄວໂຕ ນິສິນ຺ໂນກາເສ ປທີປກຣເຓ ກິຈ຺ຈໍ ນຕ຺ຖີຕິ? ສຈ຺ຈໍ ນຕ຺ຖິ, ຕຖາປິ ປຸຎ຺ຎຕ຺ຖິກາ ອຸປາສກາ ຠຄວໂຕ ຠິກ຺ຂຸສງ຺ຆສ຺ສ ຈ ປູຊາກຣຓຕ຺ຖໍ ເທວສິກໍ ເຕລປ຺ປທີປໍ ອຸປຏ຺ຐເປນ຺ຕິ. ຕຖາ ຫິ ວຸຕ຺ຕໍ – ສາມຎ຺ຎຜເລປິ ‘‘ເອເຕ ມຓ຺ຑລມາເລ ທີປາ ຌາຍນ຺ຕີ’’ຕິ (ທີ. ນິ. ໑.໑໕໙). ‘‘ຣຕ຺ຕນ຺ຘກາຣຕິມິສາຍ’’ນ຺ຕິ ອິທມ຺ປິ ຕສ຺ສາ ຣຕ຺ຕິຍາ ສຠາວກິຕ຺ຕນຕ຺ຖໍ ວຸຕ຺ຕໍ, ນ ປນ ຠຄວໂຕ ນິສິນ຺ໂນກາສສ຺ສ ອນ຺ຘກາຣຠາວໂຕ. ປູຊາກຣຓຕ຺ຖເມວ ຫິ ຕທາປິ ອຸປາສເກຫິ ປທີປາ ກາຣິຕາ.

ຕສ຺ມິຎ຺ຫິ ທິວເສ ສາວຕ຺ຖິວາສິໂນ ພຫູ ອຸປາສກາ ປາໂຕວ ສຣີຣປຏິຊຄ຺ຄນໍ ກຕ຺ວາ ວິຫາຣໍ ຄນ຺ຕ຺ວາ ອຸໂປສຖງ຺ຄານິ ສມາທິຍິຕ຺ວາ ພຸທ຺ຘປ຺ປມຸຂໍ ຠິກ຺ຂຸສງ຺ຆໍ ນິມນ຺ເຕຕ຺ວາ ນຄຣໍ ປວິສິຕ຺ວາ ມຫາທານານິ ປວຕ຺ເຕຕ຺ວາ ຠຄວນ຺ຕໍ ຠິກ຺ຂຸສງ຺ຆຎ຺ຈ ອນຸຄນ຺ຕ຺ວາ ນິວຕ຺ຕິຕ຺ວາ ອຕ຺ຕໂນ ອຕ຺ຕໂນ ເຄຫານິ ຄນ຺ຕ຺ວາ ສຍມ຺ປິ ປຣິຠຸຎ຺ຊິຕ຺ວາ ສຸທ຺ຘວຕ຺ຖນິວຕ຺ຖາ ສຸທ຺ຘຸຕ຺ຕຣາສງ຺ຄາ ຄນ຺ຘມາລາທິຫຕ຺ຖາ ວິຫາຣໍ ຄນ຺ຕ຺ວາ ຠຄວນ຺ຕໍ ປູເຊຕ຺ວາ ເກຈິ ມໂນຠາວນີເຍ ຠິກ຺ຂູ ປຍິຣຸປາສນ຺ຕາ ເກຈິ ໂຍນິໂສມນສິກໂຣນ຺ຕາ ທິວສຠາຄໍ ວີຕິນາເມສຸໍ. ເຕ ສາຍນ຺ຫສມເຍ ຠຄວໂຕ ສນ຺ຕິເກ ຘມ຺ມໍ ສຸຕ຺ວາ ສຕ຺ຖຣິ ຘມ຺ມສຠາມຓ຺ຑປໂຕ ປຏ຺ຐາຍ ຄນ຺ຘກຸຏິສມີເປ ອຊ຺ໂຌກາເສ ປຎ຺ຎຕ຺ຕວຣພຸທ຺ຘາສເນ ນິສິນ຺ເນ, ຠິກ຺ຂຸສງ຺ເຆ ຈ ຠຄວນ຺ຕໍ ອຸປສງ຺ກມິຕ຺ວາ ປຍິຣຸປາສນ຺ເຕ ອຸໂປສຖວິໂສຘນຕ຺ຖຎ຺ເຈວ ໂຍນິໂສມນສິກາຣປຣິພ຺ຣູຫນຕ຺ຖຎ຺ຈ ນຄຣໍ ອຄນ຺ຕ຺ວາ ວິຫາເຣເຍວ ວສິຕຸກາມາ ໂອຫີຍິໍສຸ. ອຖ ເຕ ຠຄວໂຕ ຠິກ຺ຂຸສງ຺ຆສ຺ສ ຈ ປູຊາກຣຓຕ຺ຖໍ ພຫູ ເຕລປ຺ປທີເປ ອາໂຣເປຕ຺ວາ ສຕ຺ຖາຣໍ ອຸປສງ຺ກມິຕ຺ວາ ວນ຺ທິຕ຺ວາ ຠິກ຺ຂຸສງ຺ຆສ຺ສ ຈ ອຎ຺ຊລິໍ ກຕ຺ວາ ຠິກ຺ຂູນໍ ປຣິຍນ຺ເຕ ນິສິນ຺ນາ ກຖໍ ສມຸຏ຺ຐາເປສຸໍ, ‘‘ຠນ຺ເຕ, ອິເມ ຕິຕ຺ຖິຍາ ນານາວິຘານິ ທິຏ຺ຐິຄຕານິ ອຠິນິວິສ຺ສ ໂວຫຣນ຺ຕິ, ຕຖາ ໂວຫຣນ຺ຕາ ຈ ກທາຈິ ສສ຺ສຕໍ, ກທາຈິ ອສສ຺ສຕໍ, ອຸຈ຺ເຉທາທີສຸ ອຎ຺ຎຕຣນ຺ຕິ ເອກສ຺ມິໍເຍວ ອຏ຺ຐຕ຺ວາ ນວນວານິ ທິຏ຺ຐິຄຕານິ ‘ອິທເມວ ສຈ຺ຈໍ ໂມຆມຎ຺ຎ’ນ຺ຕິ ປຄ຺ຄຍ຺ຫ ຕິຏ຺ຐນ຺ຕິ ອຸມ຺ມຕ຺ຕກສທິສາ, ເຕສໍ ຕຖາ ອຠິນິວິຏ຺ຐານໍ ກາ ຄຕິ, ໂກ ອຠິສມ຺ປຣາໂຍ’’ຕິ. ເຕນ ຈ ສມເຍນ ພຫູ ປຏງ຺ຄປາຓກາ ປຕນ຺ຕາ ປຕນ຺ຕາ ເຕສຸ ເຕລປ຺ປທີເປສຸ ນິປຕນ຺ຕິ. ເຕນ ວຸຕ຺ຕໍ – ‘‘ເຕນ ໂຂ ປນ ສມເຍນ ສມ຺ພຫຸລາ ອຘິປາຕກາ’’ຕິອາທິ.

ຕຕ຺ຖ ອຘິປາຕກາຕິ ປຏງ຺ຄປາຓກາ, ເຍ ‘‘ສລຠາ’’ຕິປິ ວຸຈ຺ຈນ຺ຕິ. ເຕ ຫິ ທີປສິຂໍ ອຘິປຕນໂຕ ‘‘ອຘິປາຕກາ’’ຕິ ອຘິປ຺ເປຕາ. ອາປາຕປຣິປາຕນ຺ຕິ ອາປາຕໍ ປຣິປາຕໍ, ອາປຕິຕ຺ວາ ອາປຕິຕ຺ວາ ປຣິປຕິຕ຺ວາ ປຣິປຕິຕ຺ວາ, ອຠິມຸຂປາຕຎ຺ເຈວ ປຣິພ຺ຠມິຕ຺ວາ ປາຕຎ຺ຈ ກຕ຺ວາຕິ ອຕ຺ໂຖ. ‘‘ອາປາເຖ ປຣິປາຕ’’ນ຺ຕິ ເກຈິ ປຐນ຺ຕິ, ອາປາເຖ ປທີປສ຺ສ ອຕ຺ຕໂນ ອາປາຖຄມເນ ສຕິ ປຣິປຕິຕ຺ວາ ປຣິປຕິຕ຺ວາຕິ ອຕ຺ໂຖ. ອນຍນ຺ຕິ ອວຑ຺ຒິໍ ທຸກ຺ຂໍ. ພ຺ຍສນນ຺ຕິ ວິນາສໍ. ປຸຣິມປເທນ ຫິ ມຣຓມຕ຺ຕໍ ທຸກ຺ຂໍ, ປຈ຺ຉິມປເທນ ມຣຓໍ ເຕສໍ ທີເປຕິ. ຕຕ຺ຖ ເກຈິ ປາຓກາ ສຫ ປຕເນນ ມຣິໍສຸ, ເກຈິ ມຣຓມຕ຺ຕໍ ທຸກ຺ຂໍ ອາປຊ຺ຊິໍສຸ.

ເອຕມຕ຺ຖໍ ວິທິຕ຺ວາຕິ ເອຕໍ ອຘິປາຕກປາຓການໍ ອຕ຺ຕຫິຕໍ ອຊານນ຺ຕານໍ ອຕ຺ຕຸປກ຺ກມວເສນ ນິຣຕ຺ຖກພ຺ຍສນາປຕ຺ຕິໍ ວິທິຕ຺ວາ ເຕສໍ ວິຍ ທິຏ຺ຐິຄຕິການໍ ທິຏ຺ຐາຠິນິເວເສນ ອນຍພ຺ຍສນາປຕ຺ຕິທີປກໍ ອິມໍ ອຸທານໍ ອຸທາເນສິ.

ຕຕ຺ຖ ອຸປາຕິຘາວນ຺ຕິ ນ ສາຣເມນ຺ຕີຕິ ສີລສມາຘິປຎ຺ຎາວິມຸຕ຺ຕິອາທິເຠທໍ ສາຣໍ ນ ເອນ຺ຕິ, ຈຕຸສຈ຺ຈາຠິສມຍວເສນ ນ ອຘິຄຈ຺ຉນ຺ຕິ. ຕສ຺ມິໍ ປນ ສອຸປາເຍ ສາເຣ ຕິຏ຺ຐນ຺ເຕເຍວ ວິມຸຕ຺ຕາຠິລາສາຍ ຕໍ ອຸເປນ຺ຕາ ວິຍ ຫຸຕ຺ວາປິ ທິຏ຺ຐິວິປລ຺ລາເສນ ອຕິຘາວນ຺ຕິ ອຕິກ຺ກມິຕ຺ວາ ຄຈ຺ຉນ຺ຕິ, ປຎ຺ຈຸປາທານກ຺ຂນ຺ເຘ ‘‘ນິຈ຺ຈໍ ສຸຠໍ ສຸຂໍ ອຕ຺ຕາ’’ຕິ ອຠິນິວິສິຕ຺ວາ ຄຓ຺ຫນ຺ຕາຕິ ອຕ຺ໂຖ. ນວໍ ນວໍ ພນ຺ຘນໍ ພ຺ຣູຫຍນ຺ຕີຕິ ຕຖາ ຄຓ຺ຫນ຺ຕາ ຈ ຕຓ຺ຫາທິຏ຺ຐິສງ຺ຂາຕໍ ນວໍ ນວໍ ພນ຺ຘນໍ ພ຺ຣູຫຍນ຺ຕິ ວຑ຺ຒຍນ຺ຕິ. ປຕນ຺ຕິ ປຊ຺ໂຊຕມິວາຘິປາຕກາ, ທິຏ຺ເຐ ສຸເຕ ອິຕິເຫເກ ນິວິຏ຺ຐາຕິ ເອວໍ ຕຓ຺ຫາທິຏ຺ຐິພນ຺ຘເນຫິ ພທ຺ຘຕ຺ຕາ ເອເກ ສມຓພ຺ຣາຫ຺ມຓາ ທິຏ຺ເຐ ອຕ຺ຕນາ ຈກ຺ຂຸວິຎ຺ຎາເຓນ ທິຏ຺ຐິທສ຺ສເນເນວ ວາ ທິຏ຺ເຐ ອນຸສ຺ສວູປລພ຺ຠມຕ຺ເຕເນວ ຈ ສຸເຕ ‘‘ອິຕິຫ ເອກນ຺ຕໂຕ ເອວເມຕ’’ນ຺ຕິ ນິວິຏ຺ຐາ ທິຏ຺ຐາຠິນິເວເສນ ‘‘ສສ຺ສຕ’’ນ຺ຕິອາທິນາ ອຠິນິວິຏ຺ຐາ, ເອກນ຺ຕຫິຕໍ ວາ ນິສ຺ສຣຓໍ ອຊານນ຺ຕາ ຣາຄາທີຫິ ເອກາທສຫິ ອຄ຺ຄີຫິ ອາທິຕ຺ຕໍ ຠວຕ຺ຕຍສງ຺ຂາຕໍ ອງ຺ຄາຣກາສຸໍເຍວ ອິເມ ວິຍ ອຘິປາຕກາ ອິມໍ ປຊ຺ໂຊຕໍ ປຕນ຺ຕິ, ນ ຕໂຕ ສີສໍ ອຸກ຺ຂິປິຕຸໍ ສກ຺ໂກນ຺ຕີຕິ ອຕ຺ໂຖ.

ນວມສຸຕ຺ຕວຓ຺ຓນາ ນິຏ຺ຐິຕາ.