໗. ສຸຠູຕິສຸຕ຺ຕວຓ຺ຓນາ

໕໗. ສຕ຺ຕເມ ສຸຠູຕີຕິ ຕສ຺ສ ເຖຣສ຺ສ ນາມໍ. ໂສ ຫິ ອາຍສ຺ມາ ປທຸມຸຕ຺ຕຣສ຺ສ ຠຄວໂຕ ປາທມູເລ ກຕາຠິນີຫາໂຣ ກປ຺ປສຕສຫສ຺ສໍ ອຸປຈິຕປຸຎ຺ຎສມ຺ຠາໂຣ ອິມສ຺ມິໍ ພຸທ຺ຘຸປ຺ປາເທ ອຸຬາຣວິຠເວ ຄຫປຕິກຸເລ ອຸປ຺ປນ຺ໂນ ຠຄວໂຕ ຘມ຺ມເທສນໍ ສຸຕ຺ວາ ສໍເວຄຊາໂຕ ຆຣາ ນິກ຺ຂມ຺ມ ປພ຺ພຊິຕ຺ວາ ກຕາຘິກາຣຕ຺ຕາ ຆເຏນ຺ໂຕ ວາຍມນ຺ໂຕ ນ ຈິຣສ຺ເສວ ຉຬຠິຎ຺ໂຎ ຊາໂຕ, ພ຺ຣຫ຺ມວິຫາຣຠາວນາຍ ປນ ອຸກ຺ກໍສປາຣມິປ຺ປຕ຺ຕິຍາ ‘‘ເອຕທຄ຺ຄໍ, ຠິກ຺ຂເວ, ມມ ສາວການໍ ຠິກ຺ຂູນໍ ອຣຓວິຫາຣີນໍ ຍທິທໍ ສຸຠູຕີ’’ຕິ (ອ. ນິ. ໑.໒໐໑) ອຣຓວິຫາເຣ ຠຄວຕາ ເອຕທຄ຺ເຄ ຐປິໂຕ. ໂສ ເອກທິວສໍ ສາຍນ຺ຫສມຍໍ ທິວາຏ຺ຐານໂຕ ວິຫາຣງ຺ຄຓໍ ໂອຕິຓ຺ໂຓ ຈຕຸປຣິສມຊ຺ເຌ ຠຄວນ຺ຕໍ ຘມ຺ມໍ ເທເສນ຺ຕໍ ທິສ຺ວາ ‘‘ເທສນາປຣິໂຍສາເນ ວຸຏ຺ຐຫິຕ຺ວາ ວນ຺ທິສ຺ສາມີ’’ຕິ ກາລປຣິຈ຺ເຉທໍ ກຕ຺ວາ ຠຄວໂຕ ອວິທູເຣ ອຎ຺ຎຕຣສ຺ມິໍ ຣຸກ຺ຂມູເລ ນິສິນ຺ໂນ ຜລສມາປຕ຺ຕິໍ ສມາປຊ຺ຊິ. ເຕນ ວຸຕ຺ຕໍ – ‘‘ເຕນ ໂຂ ປນ ສມເຍນ ອາຍສ຺ມາ ສຸຠູຕິ…ເປ… ສມາປຊ຺ຊິຕ຺ວາ’’ຕິ.

ຕຕ຺ຖ ທຸຕິຍຊ຺ຌານໂຕ ປຏ຺ຐາຍ ຣູປາວຈຣສມາຘິ ສພ຺ໂພປິ ອຣູປາວຈຣສມາຘິ ອວິຕກ຺ກສມາຘິ ເອວ. ອິຘ ປນ ຈຕຸຕ຺ຖຊ຺ຌານປາທໂກ ອຣຫຕ຺ຕຜລສມາຘິ ‘‘ອວິຕກ຺ກສມາຘີ’’ຕິ ອຘິປ຺ເປໂຕ. ທຸຕິຍຊ຺ຌານາທີຫິ ປຫີນາ ມິຈ຺ຉາວິຕກ຺ກາ ນ ຕາວ ສຸປ຺ປຫີນາ ອຈ຺ຈນ຺ຕປຫານາຠາວໂຕ, ອຣິຍມຄ຺ເຄນ ປນ ປຫີນາ ເອວ ປຸນ ປຫານກິຈ຺ຈາຠາວໂຕ. ຕສ຺ມາ ອຄ຺ຄມຄ຺ຄປຣິໂຍສານຠູໂຕ ອຣຫຕ຺ຕຜລສມາຘິ ສພ຺ເພສໍ ມິຈ຺ຉາວິຕກ຺ການໍ ປຫານນ຺ເຕ ອຸປ຺ປນ຺ນຕ຺ຕາ ວິເສສໂຕ ‘‘ອວິຕກ຺ກສມາຘີ’’ຕິ ວຕ຺ຕພ຺ພຕໍ ອຣຫຕິ, ປເຄວ ຈຕຸຕ຺ຖຊ຺ຌານປາທໂກ. ເຕນ ວຸຕ຺ຕໍ – ‘‘ອິຘ ປນ ຈຕຸຕ຺ຖຊ຺ຌານປາທໂກ ອຣຫຕ຺ຕຜລສມາຘິ ‘ອວິຕກ຺ກສມາຘີ’ຕິ ອຘິປ຺ເປໂຕ’’ຕິ.

ເອຕມຕ຺ຖໍ ວິທິຕ຺ວາຕິ ເອຕໍ ອາຍສ຺ມໂຕ ສຸຠູຕິສ຺ສ ສພ຺ພມິຈ຺ຉາວິຕກ຺ກສພ຺ພສໍກິເລສປຫານສງ຺ຂາຕໍ ອຕ຺ຖໍ ສພ຺ພາກາຣໂຕ ຊານິຕ຺ວາ ຕທຕ຺ຖທີປກໍ ອິມໍ ອຸທານໍ ອຸທາເນສິ.

ຕຕ຺ຖ ຍສ຺ສ ວິຕກ຺ກາ ວິຘູປິຕາຕິ ເຍນ ອຣິຍປຸຄ຺ຄເລນ, ຍສ຺ສ ວາ ອຣິຍປຸຄ຺ຄລສ຺ສ ກາມວິຕກ຺ກາທໂຍ ສພ຺ເພປິ ມິຈ຺ຉາວິຕກ຺ກາ ວິຘູປິຕາ ອຣິຍມຄ຺ຄຎາເຓນ ສນ຺ຕາປິຕາ ສມຸຈ຺ຉິນ຺ນາ. ອຊ຺ຌຕ຺ຕໍ ສຸວິກປ຺ປິຕາ ອເສສາຕິ ນິຍກຊ຺ຌຕ຺ຕສງ຺ຂາເຕ ອຕ຺ຕໂນ ສນ຺ຕາເນ ອຸປ຺ປຊ຺ຊນາຣຫາ ສຸວິກປ຺ປິຕາ ສຸຏ຺ຐຸ ວິກປ຺ປິຕາ ອເສສໂຕ, ກິຎ຺ຈິປິ ອເສເສຕ຺ວາ ສຸສມຸຈ຺ຉິນ຺ນາຕິ ອຕ຺ໂຖ. ຕໍ ສງ຺ຄມຕິຈ຺ຈ ອຣູປສຎ຺ຎີຕິ ເອຕ຺ຖ ນ຺ຕິ ນິປາຕມຕ຺ຕໍ. ອຖ ວາ ເຫຕຸອຕ຺ໂຖ ຕໍສທ຺ໂທ. ຍສ຺ມາ ອນວເສເສນ ມິຈ຺ຉາວິຕກ຺ກາ ສມຸຈ຺ຉິນ຺ນາ, ຕສ຺ມາ ຣາຄສງ຺ຄາທິກໍ ປຎ຺ຈວິຘໍ ສງ຺ຄໍ, ສພ຺ພມ຺ປິ ວາ ກິເລສສງ຺ຄໍ ອຕິຈ຺ຈ ອຕິກ຺ກມິຕ຺ວາ ອຕິກ຺ກມນເຫຕຸ ຣູປສຠາວາຠາວໂຕ ຣຸປ຺ປນສງ຺ຂາຕສ຺ສ ຈ ວິກາຣສ຺ສ ຕຕ຺ຖ ອຠາວໂຕ ນິພ຺ພິກາຣເຫຕຸຠາວໂຕ ວາ ‘‘ອຣູປ’’ນ຺ຕິ ລທ຺ຘນາມໍ ນິພ຺ພານໍ ອາຣມ຺ມຓໍ ກຕ຺ວາ ປວຕ຺ຕາຫິ ມຄ຺ຄຜລສຎ຺ຎາຫິ ອຣູປສຎ຺ຎີ. ຈຕຸໂຍຄາຕິຄໂຕຕິ ກາມໂຍໂຄ ຠວໂຍໂຄ ທິຏ຺ຐິໂຍໂຄ ອວິຊ຺ຊາໂຍໂຄຕິ ຈຕ຺ຕາໂຣ ໂຍເຄ ຍຖາຣຫໍ ຈຕູຫິປິ ມຄ຺ເຄຫິ ອຕິກ຺ກມິຕ຺ວາ ຄໂຕ. ນ ຊາຕຸ ເມຕີຕິ ມກາໂຣ ປທສນ຺ຘິກໂຣ, ຊາຕຸ ເອກໍເສເນວ ປຸນພ຺ຠວາຍ ນ ເອຕິ, ອາຍຕິໍ ປຸນພ຺ຠວາຠິນິພ຺ພຕ຺ຕິ ຕສ຺ສ ນຕ຺ຖີຕິ ອຕ຺ໂຖ. ‘‘ນ ຊາຕິ ເມຕີ’’ຕິປິ ປຐນ຺ຕິ, ໂສ ເອວຕ຺ໂຖ. ອິຕິ ຠຄວາ ອາຍສ຺ມໂຕ ສຸຠູຕິສ຺ສ ອຣຫຕ຺ຕຜລສມາປຕ຺ຕິວິຫາຣໍ ອນຸປາທິເສສນິພ຺ພານຎ຺ຈ ອາຣພ຺ຠ ປີຕິເວຄວິສ຺ສຏ຺ຐໍ ອຸທານໍ ອຸທາເນສິ.

ສຕ຺ຕມສຸຕ຺ຕວຓ຺ຓນາ ນິຏ຺ຐິຕາ.