໖. ຕຕິຍນານາຕິຕ຺ຖິຍສຸຕ຺ຕວຓ຺ຓນາ

໕໖. ຉຏ຺ເຐ ສພ຺ພໍ ເຫຏ຺ຐາ ວຸຕ຺ຕນຍເມວ. ອິມໍ ອຸທານນ຺ຕິ ເອຕ຺ຖ ປນ ທິຏ຺ຐິຕຓ຺ຫາມາເນສຸ ໂທສໍ ທິສ຺ວາ ເຕ ທູຣໂຕ ວຊ຺ເຊຕ຺ວາ ສງ຺ຂາເຣ ຍຖາຠູຕໍ ປສ຺ສໂຕ ຈ ຕຕ຺ຖ ອນາທີນວທສ຺ສິຕາຍ ມິຈ຺ຉາຠິນິວິຏ຺ຐສ຺ສ ຍຖາຠູຕໍ ອປສ຺ສໂຕ ຈ ຍຖາກ຺ກມໍ ສໍສາຣໂຕ ອຕິວຕ຺ຕນານຕິວຕ຺ຕນທີປກໍ ອິມໍ ອຸທານໍ ອຸທາເນສີຕິ ອຕ຺ໂຖ ໂຍເຊຕພ຺ໂພ.

ຕຕ຺ຖ ອຫງ຺ກາຣປສຸຕາຍໍ ປຊາຕິ ‘‘ສຍໍກໂຕ ອຕ຺ຕາ ຈ ໂລໂກ ຈາ’’ຕິ ເອວໍ ວຸຕ຺ຕສຍໍກາຣສງ຺ຂາຕໍ ອຫງ຺ກາຣໍ ຕຖາປວຕ຺ຕໍ ທິຏ຺ຐິໍ ປສຸຕາ ອນຸຍຸຕ຺ຕາ ອຍໍ ປຊາ ມິຈ຺ຉາຠິນິວິຏ຺ໂຐ ສຕ຺ຕກາໂຍ. ປຣໍກາຣູປສໍຫິຕາຕິ ປໂຣ ອຎ຺ໂຎ ອິສ຺ສຣາທິໂກ ສພ຺ພໍ ກໂຣຕີຕິ ເອວໍ ປວຕ຺ຕປຣໍກາຣທິຏ຺ຐິສນ຺ນິສ຺ສິຕາ ຕາຍ ອຸປສໍຫິຕາຕິ ປຣໍກາຣູປສໍຫິຕາ. ເອຕເທເກ ນາພ຺ຠຎ຺ຎໍສູຕິ ເອຕໍ ທິຏ຺ຐິທ຺ວຍໍ ເອເກ ສມຓພ຺ຣາຫ຺ມຓາ ຕຕ຺ຖ ໂທສທສ຺ສິໂນ ຫຸຕ຺ວາ ນານຸຊານິໍສຸ. ກຖໍ? ສຕິ ຫິ ສຍໍກາເຣ ກາມກາຣໂຕ ສຕ຺ຕານໍ ອິຏ຺ເຐເນວ ຠວິຕພ຺ພໍ, ນ ອນິຏ຺ເຐນ. ນ ຫິ ໂກຈິ ອຕ຺ຕໂນ ທຸກ຺ຂໍ ອິຈ຺ຉຕິ, ຠວຕິ ຈ ອນິຏ຺ຐໍ, ຕສ຺ມາ ນ ສຍໍກາໂຣ. ປຣໍກາໂຣປິ ຍທິ ອິສ຺ສຣເຫຕຸໂກ, ສ຺ວາຍໍ ອິສ຺ສໂຣ ອຕ຺ຕຕ຺ຖໍ ວາ ກເຣຍ຺ຍ ປຣຕ຺ຖໍ ວາ. ຕຕ຺ຖ ຍທິ ອຕ຺ຕຕ຺ຖໍ, ອຕ຺ຕນາ ອກຕກິຈ຺ໂຈ ສິຍາ ອສິທ຺ຘສ຺ສ ສາຘນໂຕ. ອຖ ວາ ປຣຕ຺ຖໍ ສພ຺ເພສໍ ຫິຕສຸຂເມວ ນິປ຺ຜຊ຺ເຊຍ຺ຍ, ນ ອຫິຕໍ ທຸກ຺ຂໍ ນິປ຺ຜຊ຺ຊຕິ, ຕສ຺ມາ ອິສ຺ສຣວເສນ ນ ປຣໍກາໂຣ ສິຊ຺ຌຕິ. ຍທິ ຈ ອິສ຺ສຣສງ຺ຂາຕໍ ອຎ຺ຎນິຣເປກ຺ຂໍ ນິຈ຺ຈເມກກາຣຓໍ ປວຕ຺ຕິຍາ ສິຍາ, ກມ຺ເມນ ອຸປ຺ປຕ຺ຕິ ນ ສິຍາ, ສພ຺ເພເຫວ ເອກຊ຺ຌໍ ອຸປ຺ປຊ຺ຊິຕພ຺ພໍ ກາຣຓສ຺ສ ສນ຺ນິຫິຕຕ຺ຕາ. ອຖສ຺ສ ອຎ຺ຎມ຺ປິ ສຫກາຣີກາຣຓໍ ອິຈ຺ຉິຕໍ, ຕຎ຺ເຎວ ເຫຕຸ, ກິໍ ອິສ຺ສເຣນ ອປຣິນິຏ຺ຐິຕສາມຕ຺ຖິເຍນ ປຣິກປ຺ປິເຕນ. ຍຖາ ຈ ອິສ຺ສຣເຫຕຸໂກ ປຣໍກາໂຣ ນ ສິຊ຺ຌຕິ, ເອວໍ ປຊາປຕິປຸຣິສປກຕິພ຺ຣຫ຺ມກາລາທິເຫຕຸໂຕປິ ນ ສິຊ຺ຌເຕວ ເຕສມ຺ປິ ອສິທ຺ຘຕ຺ຕາ ວຸຕ຺ຕໂທສານຕິວຕ຺ຕນໂຕ ຈ. ເຕນ ວຸຕ຺ຕໍ ‘‘ເອຕເທເກ ນາພ຺ຠຎ຺ຎໍສູ’’ຕິ. ເຍ ປນ ຍຖາວຸຕ຺ເຕ ສຍໍກາຣປຣໍກາເຣ ນານຸຊານນ຺ຕາປິ ອຘິຈ຺ຈສມຸປ຺ປນ຺ນໍ ອຕ຺ຕານຎ຺ຈ ໂລກຎ຺ຈ ປຎ຺ຎເປນ຺ຕິ, ເຕປິ ນ ນໍ ສລ຺ລນ຺ຕິ ອທ຺ທສຸໍ ອຘິຈ຺ຈສມຸປ຺ປນ຺ນນ຺ຕິວາທິໂນປິ ມິຈ຺ຉາຠິນິເວສໍ ອນຕິກ຺ກມນໂຕ ຍຖາຠູຕໍ ອຊານນ຺ຕານໍ ທິຏ຺ຐິຄຕໍ ຕຕ຺ຖ ຕຕ຺ຖ ທຸກ຺ຂຸປ຺ປາທນໂຕ ວິຊ຺ຌນຏ຺ເຐນ ‘‘ສລ຺ລ’’ນ຺ຕິ ນ ປສ຺ສິໍສຸ.

ເອຕຎ຺ຈ ສລ຺ລໍ ປຏິກຈ຺ຈ ປສ຺ສໂຕຕິ ໂຍ ປນ ອາຣທ຺ຘວິປສ຺ສໂກ ປຎ຺ຈປິ ອຸປາທານກ຺ຂນ຺ເຘ ອນິຈ຺ຈໂຕ ທຸກ຺ຂໂຕ ອນຕ຺ຕໂຕ ສມນຸປສ຺ສຕິ, ໂສ ເອຕຎ຺ຈ ຕິວິຘໍ ວິປຣີຕທສ຺ສນໍ ອຎ຺ຎຎ຺ຈ ສກລໍ ມິຈ຺ຉາຠິນິເວສໍ ເຕສຎ຺ຈ ນິສ຺ສຍຠູເຕ ປຎ຺ຈຸປາທານກ຺ຂນ຺ເຘປິ ຕຸຊ຺ຊນໂຕ ທຸຣຸທ຺ຘາຣໂຕ ຈ ‘‘ສລ຺ລ’’ນ຺ຕິ ປຏິກຈ຺ຈ ປຸພ຺ເພເຍວ ວິປສ຺ສນາປຎ຺ຎາຍ ປສ຺ສຕິ. ເອວໍ ປສ຺ສໂຕ ອຣິຍມຄ຺ຄກ຺ຂເຓ ເອກນ຺ເຕເນວ ອຫໍ ກໂຣມີຕິ ນ ຕສ຺ສ ໂຫຕິ. ຍຖາ ຈ ອຕ຺ຕໂນ ກາຣກຠາໂວ ຕສ຺ສ ນ ອຸປຏ຺ຐາຕິ, ເອວໍ ປໂຣ ກໂຣຕີຕິ ນ ຕສ຺ສ ໂຫຕິ, ເກວລໍ ປນ ອນິຈ຺ຈສງ຺ຂາຕໍ ປຏິຈ຺ຈສມຸປ຺ປນ຺ນຘມ຺ມມຕ຺ຕເມວ ໂຫຕິ. ເອຕ຺ຕາວຕາ ສມ຺ມາປຏິປນ຺ນສ຺ສ ສພ຺ພຖາປິ ທິຏ຺ຐິມານາຠາໂວວ ທສ຺ສິໂຕ. ເຕນ ຈ ອຣຫຕ຺ຕປ຺ປຕ຺ຕິຍາ ສໍສາຣສມຕິກ຺ກໂມ ປກາສິໂຕ ໂຫຕິ.

ອິທານິ ໂຍ ທິຏ຺ຐິຄເຕ ອລ຺ລີໂນ, ນ ໂສ ສໍສາຣໂຕ ສີສໍ ອຸກ຺ຂິປິຕຸໍ ສກ຺ໂກຕິ, ຕໍ ທສ຺ເສຕຸໍ ‘‘ມານຸເປຕາ’’ຕິ ຄາຖມາຫ. ຕຕ຺ຖ ມານຸເປຕາ ອຍໍ ປຊາຕິ ອຍໍ ສພ຺ພາປິ ທິຏ຺ຐິຄຕິກສງ຺ຂາຕາ ປຊາ ສຕ຺ຕກາໂຍ ‘‘ມຍ຺ຫໍ ທິຏ຺ຐິ ສຸນ຺ທຣາ, ມຍ຺ຫໍ ອາທາໂນ ສຸນ຺ທໂຣ’’ຕິ ອຕ຺ຕໂນ ຄາຫສ຺ສ ສໍປຄ຺ຄຫລກ຺ຂເຓນ ມາເນນ ອຸເປຕາ ສມນ຺ນາຄຕາ. ມານຄນ຺ຖາ ມານວິນິພທ຺ຘາຕິ ຕໂຕ ເອວ ເຕນ ອປຣາປຣໍ ອຸປ຺ປຊ຺ຊມາເນນ ຍຖາ ຕໍ ທິຏ຺ຐິໍ ນ ປຏິນິສ຺ສຊ຺ຊຕິ, ເອວໍ ອຕ຺ຕໂນ ສນ຺ຕານສ຺ສ ຄນ຺ຖິຕຕ຺ຕາ ວິນິພທ຺ຘຕ຺ຕາ ຈ ມານຄນ຺ຖາ ມານວິນິພທ຺ຘາ. ທິຏ຺ຐີສຸ ສາຣມ຺ຠກຖາ, ສໍສາຣໍ ນາຕິວຕ຺ຕຕີຕິ ‘‘ອິທເມວ ສຈ຺ຈໍ ໂມຆມຎ຺ຎ’’ນ຺ຕິ ອຕ຺ຕຸກ຺ກໍສນປຣວມ຺ຠນວເສນ ອຕ຺ຕໂນ ທິຏ຺ຐາຠິນິເວເສນ ປເຣສໍ ທິຏ຺ຐີສຸ ສາຣມ຺ຠກຖາ ວິໂຣຘກຖາ ສໍສາຣນາຍິການໍ ອວິຊ຺ຊາຕຓ຺ຫານໍ ອປ຺ປຫານໂຕ ສໍສາຣໍ ນາຕິວຕ຺ຕຕິ, ນ ອຕິກ຺ກມຕີຕິ ອຕ຺ໂຖ.

ຉຏ຺ຐສຸຕ຺ຕວຓ຺ຓນາ ນິຏ຺ຐິຕາ.