໕. ທຸຕິຍນານາຕິຕ຺ຖິຍສຸຕ຺ຕວຓ຺ຓນາ

໕໕. ປຎ຺ຈເມ ສສ຺ສໂຕ ອຕ຺ຕາ ຈ ໂລໂກ ຈາຕິ ຣູປາທີສຸ ອຎ຺ຎຕຣໍ ອຕ຺ຕາຕິ ຈ ໂລໂກຕິ ຈ ຄເຫຕ຺ວາ ຕໍ ສສ຺ສຕໍ ນິຈ຺ຈນ຺ຕິ ອຎ຺ເຎປິ ຈ ຕຖາ ຄາເຫນ຺ຕາ ໂວຫຣນ຺ຕິ. ຍຖາຫ –

‘‘ຣູປໍ ອຕ຺ຕາ ເຈວ ໂລໂກ ຈ ສສ຺ສໂຕ ຈາຕິ ອຕ຺ຕານຎ຺ຈ ໂລກຎ຺ຈ ປຎ຺ຎເປນ຺ຕິ. ເວທນໍ… ສຎ຺ຎໍ… ສງ຺ຂາເຣ… ວິຎ຺ຎາຓໍ ອຕ຺ຕາ ຈ ໂລໂກ ຈ ສສ຺ສໂຕ ຈາຕິ ອຕ຺ຕານຎ຺ຈ ໂລກຎ຺ຈ ປຎ຺ຎເປນ຺ຕີ’’ຕິ.

ອຖ ວາ ອຕ຺ຕາຕິ ອຫງ຺ກາຣວຕ຺ຖຸ, ໂລໂກຕິ ມມງ຺ກາຣວຕ຺ຖຸ, ຍໍ ‘‘ອຕ຺ຕນິຍ’’ນ຺ຕິ ວຸຈ຺ຈຕິ. ອຕ຺ຕາຕິ ວາ ສຍໍ, ໂລໂກຕິ ປໂຣ. ອຕ຺ຕາຕິ ວາ ປຎ຺ຈສຸ ອຸປາທານກ຺ຂນ຺ເຘສຸ ເອໂກ ຂນ຺ໂຘ, ອິຕໂຣ ໂລໂກ. ອຕ຺ຕາຕິ ວາ ສວິຎ຺ຎາຓໂກ ຂນ຺ຘສນ຺ຕາໂນ, ອວິຎ຺ຎາຓໂກ ໂລໂກ. ເອວໍ ຕໍ ຕໍ ອຕ຺ຕາຕິ ຈ ໂລໂກຕິ ຈ ຍຖາທສ຺ສນໍ ທ຺ວິຘາ ຄເຫຕ຺ວາ ຕທຸຠຍໍ ‘‘ນິຈ຺ໂຈ ຘຸໂວ ສສ຺ສໂຕ’’ຕິ ອຠິນິວິສ຺ສ ໂວຫຣນ຺ຕິ. ເອເຕນ ຈຕ຺ຕາໂຣ ສສ຺ສຕວາທາ ທສ຺ສິຕາ. ອສສ຺ສໂຕຕິ ສຕ຺ຕປິ ອຸຈ຺ເຉທວາທາ ທສ຺ສິຕາ. ສສ຺ສໂຕ ຈ ອສສ຺ສໂຕ ຈາຕິ ເອກຈ຺ໂຈ ອຕ຺ຕາ ຈ ໂລໂກ ຈ ສສ຺ສໂຕ, ເອກຈ຺ໂຈ ອສສ຺ສໂຕຕິ ເອວໍ ສສ຺ສໂຕ ຈ ອສສ຺ສໂຕ ຈາຕິ ອຕ຺ໂຖ. ອຖ ວາ ສ຺ເວວ ອຕ຺ຕາ ຈ ໂລໂກ ຈ ອຕ຺ຕຄຕິທິຏ຺ຐິການໍ ວິຍ ສສ຺ສໂຕ ຈ ອສສ຺ສໂຕ ຈ, ສິຍາ ສສ຺ສໂຕຕິ ເອວເມຕ຺ຖ ອຕ຺ໂຖ ເວທິຕພ຺ໂພ. ສພ຺ພຖາປິ ອິມິນາ ເອກຈ຺ຈສສ຺ສຕວາໂທ ທສ຺ສິໂຕ. ເນວ ສສ຺ສໂຕ ນາສສ຺ສໂຕຕິ ອິມິນາ ອມຣາວິກ຺ເຂປວາໂທ ທສ຺ສິໂຕ. ເຕ ຫິ ສສ຺ສຕວາເທ ອສສ຺ສຕວາເທ ຈ ໂທສໍ ທິສ຺ວາ ‘‘ເນວ ສສ຺ສໂຕ ນາສສ຺ສໂຕ ອຕ຺ຕາ ຈ ໂລໂກ ຈາ’’ຕິ ວິກ຺ເຂປໍ ກໂຣນ຺ຕາ ວິວທນ຺ຕິ.

ສຍໍກໂຕຕິ ອຕ຺ຕນາ ກໂຕ. ຍຖາ ຫິ ເຕສໍ ເຕສໍ ສຕ຺ຕານໍ ອຕ຺ຕາ ຈ ອຕ຺ຕໂນ ຘມ຺ມານຸຘມ຺ມໍ ກຕ຺ວາ ສຸຂທຸກ຺ຂານິ ປຏິສໍເວເທຕິ, ເອວໍ ອຕ຺ຕາວ ອຕ຺ຕານໍ ຕສ຺ສ ຈ ອຸປໂຠຄຠູຕໍ ກິຎ຺ຈນໍ ປລິໂພຘສງ຺ຂາຕໍ ໂລກຎ຺ຈ ກໂຣຕິ, ອຠິນິມ຺ມິນາຕີຕິ ອຕ຺ຕລທ຺ຘິ ວິຍ ອຍມ຺ປິ ເຕສໍ ລທ຺ຘິ. ປຣໍກໂຕຕິ ປເຣນ ກໂຕ, ອຕ຺ຕໂຕ ປເຣນ ອິສ຺ສເຣນ ວາ ປຸຣິເສນ ວາ ປຊາປຕິນາ ວາ ກາເລນ ວາ ປກຕິຍາ ວາ ອຕ຺ຕາ ຈ ໂລໂກ ຈ ກໂຕ, ນິມ຺ມິໂຕຕິ ອຕ຺ໂຖ. ສຍໍກໂຕ ຈ ປຣໍກໂຕ ຈາຕິ ຍສ຺ມາ ອຕ຺ຕານຎ຺ຈ ໂລກຎ຺ຈ ນິມ຺ມິນນ຺ຕາ ອິສ຺ສຣາທໂຍ ນ ເກວລໍ ສຍເມວ ນິມ຺ມິນນ຺ຕິ, ອຖ ໂຂ ເຕສໍ ເຕສໍ ສຕ຺ຕານໍ ຘມ຺ມາຘມ຺ມານໍ ສຫກາຣີກາຣຓໍ ລຠິຕ຺ວາວ, ຕສ຺ມາ ສຍໍກໂຕ ຈ ປຣໍກໂຕ ຈ ອຕ຺ຕາ ຈ ໂລໂກ ຈາຕິ ເອກຈ຺ຈານໍ ລທ຺ຘິ. ອສຍໍກາໂຣ ອປຣໍກາໂຣຕິ ນຕ຺ຖິ ເອຕສ຺ສ ສຍໍກາໂຣຕິ ອສຍໍກາໂຣ, ນຕ຺ຖິ ເອຕສ຺ສ ປຣກາໂຣຕິ ອປຣກາໂຣ. ອນຸນາສິກາຄມໍ ກຕ຺ວາ ວຸຕ຺ຕໍ ‘‘ອປຣໍກາໂຣ’’ຕິ. ອຍໍ ອຸຠຍຕ຺ຖ ໂທສໍ ທິສ຺ວາ ອຸຠຍໍ ປຏິກ຺ຂິປຕິ. ອຖ ກຖໍ ອຸປ຺ປນ຺ໂນຕິ ອາຫ – ອຘິຈ຺ຈສມຸປ຺ປນ຺ໂນຕິ ຍທິຈ຺ຉາຍ ສມຸປ຺ປນ຺ໂນ ເກນຈິ ກາຣເຓນ ວິນາ ອຸປ຺ປນ຺ໂນຕິ ອຘິຈ຺ຈສມຸປ຺ປນ຺ນວາໂທ ທສ຺ສິໂຕ. ເຕນ ຈ ອເຫຕຸກວາໂທປິ ສງ຺ຄຫິໂຕ ໂຫຕິ.

ອິທານິ ເຍ ທິຏ຺ຐິຄຕິກາ ອຕ຺ຕານໍ ວິຍ ສຸຂທຸກ຺ຂມ຺ປິ ຕສ຺ສ ຄຸຓຠູຕໍ ກິຎ຺ຈນຠູຕໍ ວາ ສສ຺ສຕາທິວເສນ ອຠິນິວິສ຺ສ ໂວຫຣນ຺ຕິ, ເຕສໍ ຕໍ ວາທໍ ທສ຺ເສຕຸໍ ‘‘ສນ຺ເຕເກ ສມຓພ຺ຣາຫ຺ມຓາ’’ຕິອາທິ ວຸຕ຺ຕໍ. ຕໍ ວຸຕ຺ຕນຍເມວ.

ເອຕມຕ຺ຖໍ ວິທິຕ຺ວາຕິ ເອຕ຺ຖ ປນ ອິຘ ຊຈ຺ຈນ຺ຘູປມາຍ ອນາຄຕຕ຺ຕາ ຕໍ ຫິຕ຺ວາ ເຫຏ຺ຐາ ວຸຕ຺ຕນເຍເນວ ອຕ຺ໂຖ ໂຍເຊຕພ຺ໂພ, ຕຖາ ຄາຖາຍ.

ຕຕ຺ຖ ອນ຺ຕຣາວ ວິສີທນ຺ຕິ, ອປຕ຺ວາວ ຕໂມຄຘນ຺ຕິ ອຍໍ ວິເສໂສ. ຕສ຺ສຕ຺ໂຖ – ເອວໍ ທິຏ຺ຐິຄເຕສຸ ທິຏ຺ຐິນິສ຺ສເຍສຸ ອາສຊ຺ຊມານາ ທິຏ຺ຐິຄຕິກາ ກາໂມຆາທີນໍ ຈຕຸນ຺ນໍ ໂອຆານໍ, ສໍສາຣມໂຫຆສ຺ເສວ ວາ ອນ຺ຕຣາວ ເວມຊ຺ເຌ ເອວ ຍໍ ເຕສໍ ປາຣຠາເວນ ປຕິຏ຺ຐຏ຺ເຐນ ວາ ໂອຄຘສງ຺ຂາຕໍ ນິພ຺ພານໍ ຕທຘິຄມູປາໂຍ ວາ ອຣິຍມຄ຺ໂຄ ຕໍ ອປ຺ປຕ຺ວາວ ອນຘິຄນ຺ຕ຺ວາວ ວິສີທນ຺ຕິ ສໍສີທນ຺ຕິ. ໂອຄາຘນ຺ຕິ ປຕິຏ຺ຐຫນ຺ຕິ ເອເຕນ, ເອຕ຺ຖ ວາຕິ ໂອຄາໂຘ, ອຣິຍມຄ຺ໂຄ ນິພ຺ພານຎ຺ຈ. ໂອຄາຘເມເວຕ຺ຖ ຣສ຺ສຕ຺ຕໍ ກຕ຺ວາ ໂອຄຘນ຺ຕິ ວຸຕ຺ຕໍ. ຕໍ ໂອຄຘໍ ຕໂມຄຘນ຺ຕິ ປທວິຠາໂຄ.

ປຎ຺ຈມສຸຕ຺ຕວຓ຺ຓນາ ນິຏ຺ຐິຕາ.