໓. ປຈ຺ຈເວກ຺ຂຓສຸຕ຺ຕວຓ຺ຓນາ

໕໓. ຕຕິເຍ ອຕ຺ຕໂນ ອເນເກ ປາປເກ ອກຸສເລ ຘມ຺ເມ ປຫີເນຕິ ໂລຠໂທສໂມຫວິປຣີຕມນສິກາຣອຫິຣິກາໂນຕ຺ຕປ຺ປໂກຘູປນາຫມກ຺ຂປລາສອິສ຺ສາມຈ຺ຉຣິຍມາຍາ- ສາເຐຍ຺ຍຖມ຺ຠສາຣມ຺ຠມານາຕິມານມທປມາທຕຓ຺ຫາອວິຊ຺ຊາຕິວິຘາກຸສລມູລທຸຈ຺ຈຣິຕສໍກິເລສວິສມ- ສຎ຺ຎາວິຕກ຺ກປປຎ຺ຈຈຕຸພ຺ພິຘວິປລ຺ລາສອາສວໂອຆໂຍຄຄນ຺ຖາຄຕິຄມນຕຓ຺ຫຸປາທານປຎ຺ຈວິຘ- ເຈໂຕຂິລປຎ຺ຈເຈໂຕວິນິພນ຺ຘນີວຣຓາຠິນນ຺ທນຉວິວາທ- ມູລຕຓ຺ຫາກາຍສຕ຺ຕານຸສຍອຏ຺ຐມິຈ຺ຉຕ຺ຕນວ- ຕຓ຺ຫາມູລກທສາກຸສລກມ຺ມປຖທ຺ວາສຏ຺ຐິທິຏ຺ຐິຄຕອຏ຺ຐສຕຕຓ຺ຫາວິຈຣິຕາທິປ຺ປເຠເທ ອຕ຺ຕໂນ ສນ຺ຕາເນ ອນາທິກາລປວຕ຺ເຕ ທິຍຑ຺ຒສຫສ຺ສກິເລເສ ຕໍສຫຄເຕ ຈາປິ ອເນເກ ປາປເກ ລາມເກ ອໂກສລ຺ລສມ຺ຠູຕຏ຺ເຐນ ອກຸສເລ ຘມ຺ເມ ອນວເສສໍ ສຫ ວາສນາຍ ໂພຘິມູເລເຍວ ປຫີເນ ອຣິຍມຄ຺ເຄນ ສມຸຈ຺ຉິນ຺ເນ ປຈ຺ຈເວກ຺ຂມາໂນ ‘‘ອຍມ຺ປິ ເມ ກິເລໂສ ປຫີໂນ, ອຍມ຺ປິ ເມ ກິເລໂສ ປຫີໂນ’’ຕິ ອນຸປທປຈ຺ຈເວກ຺ຂຓາຍ ປຈ຺ຈເວກ຺ຂມາໂນ ຠຄວາ ນິສິນ຺ໂນ ໂຫຕິ.

ອເນເກ ຈ ກຸສເລ ຘມ຺ເມຕິ ສີລສມາຘິປຎ຺ຎາວິມຸຕ຺ຕິວິມຸຕ຺ຕິຎາຓທສ຺ສນໍ ຈຕ຺ຕາໂຣ ສຕິປຏ຺ຐານາ, ຈຕ຺ຕາໂຣ ສມ຺ມປ຺ປຘານາ, ຈຕ຺ຕາໂຣ ອິທ຺ຘິປາທາ, ຈຕ຺ຕາໂຣ ອຣິຍມຄ຺ຄາ, ຈຕ຺ຕາຣິ ຜລານິ, ຈຕສ຺ໂສ ປຏິສມ຺ຠິທາ, ຈຕຸໂຍນິປຣິຈ຺ເຉທກຎາຓໍ, ຈຕ຺ຕາໂຣ ອຣິຍວໍສາ, ຈຕ຺ຕາຣິ ເວສາຣຊ຺ຊຎາຓານິ, ປຎ຺ຈ ປຘານິຍງ຺ຄານິ, ປຎ຺ຈງ຺ຄິໂກ ສມ຺ມາສມາຘິ, ປຎ຺ຈຎາຓິໂກ ສມ຺ມາສມາຘິ, ປຎ຺ຈິນ຺ທ຺ຣິຍານິ, ປຎ຺ຈ ພລານິ, ປຎ຺ຈ ນິສ຺ສາຣຓີຍາ ຘາຕຸໂຍ, ປຎ຺ຈ ວິມຸຕ຺ຕາຍຕນຎາຓານິ, ປຎ຺ຈ ວິມຸຕ຺ຕິປຣິປາຈນີຍາ ສຎ຺ຎາ, ຉ ອນຸສ຺ສຕິຏ຺ຐານານິ, ຉ ຄາຣວາ, ຉ ນິສ຺ສາຣຓີຍາ ຘາຕຸໂຍ, ຉ ສຕຕວິຫາຣາ, ຉ ອນຸຕ຺ຕຣິຍານິ, ຉ ນິພ຺ເພຘຠາຄິຍາ ປຎ຺ຎາ, ຉ ອຠິຎ຺ຎາ, ຉ ອສາຘາຣຓຎາຓານິ, ສຕ຺ຕ ອປຣິຫານິຍາ ຘມ຺ມາ, ສຕ຺ຕ ອຣິຍຘນານິ, ສຕ຺ຕ ໂພຊ຺ຌງ຺ຄາ, ສຕ຺ຕ ສປ຺ປຸຣິສຘມ຺ມາ, ສຕ຺ຕ ນິຊ຺ຊຣວຕ຺ຖູນິ, ສຕ຺ຕ ສຎ຺ຎາ, ສຕ຺ຕ ທກ຺ຂິເຓຍ຺ຍປຸຄ຺ຄລເທສນາ, ສຕ຺ຕ ຂີຓາສວພລເທສນາ, ອຏ຺ຐ ປຎ຺ຎາປຏິລາຠເຫຕຸເທສນາ, ອຏ຺ຐ ສມ຺ມຕ຺ຕານິ, ອຏ຺ຐ ໂລກຘມ຺ມາຕິກ຺ກມາ, ອຏ຺ຐ ອາຣມ຺ຠວຕ຺ຖູນິ, ອຏ຺ຐ ອກ຺ຂຓເທສນາ, ອຏ຺ຐ ມຫາປຸຣິສວິຕກ຺ກາ, ອຏ຺ຐ ອຠິຠາຍຕນເທສນາ, ອຏ຺ຐ ວິໂມກ຺ຂາ, ນວ ໂຍນິໂສມນສິກາຣມູລກາ ຘມ຺ມາ, ນວ ປາຣິສຸທ຺ຘິປຘານິຍງ຺ຄານິ, ນວ ສຕ຺ຕາວາສເທສນາ, ນວ ອາຆາຕປ຺ປຏິວິນຍາ, ນວ ສຎ຺ຎາ, ນວ ນານຕ຺ຕານິ, ນວ ອນຸປຸພ຺ພວິຫາຣາ, ທສ ນາຖກຣຓາ ຘມ຺ມາ, ທສ ກສິຓາຍຕນານິ, ທສ ກຸສລກມ຺ມປຖາ, ທສ ສມ຺ມຕ຺ຕານິ, ທສ ອຣິຍວາສາ, ທສ ອເສກ຺ຂາ ຘມ຺ມາ, ທສ ຕຖາຄຕພລານິ, ເອກາທສ ເມຕ຺ຕານິສໍສາ, ທ຺ວາທສ ຘມ຺ມຈກ຺ກາກາຣາ, ເຕຣສ ຘຸຕງ຺ຄຄຸຓາ, ຈຸທ຺ທສ ພຸທ຺ຘຎາຓານິ, ປນ຺ນຣສ ວິມຸຕ຺ຕິປຣິປາຈນີຍາ ຘມ຺ມາ, ໂສຬສວິຘາ ອານາປານສ຺ສຕິ, ໂສຬສ ອປຣນ຺ຕປນີຍາ ຘມ຺ມາ, ອຏ຺ຐາຣສ ມຫາວິປສ຺ສນາ, ອຏ຺ຐາຣສ ພຸທ຺ຘຘມ຺ມາ, ເອກູນວີສຕິ ປຈ຺ຈເວກ຺ຂຓຎາຓານິ, ຈຕຸຈຕ຺ຕາລີສ ຎາຓວຕ຺ຖູນິ, ປຎ຺ຎາສ ອຸທຍພ຺ພຍຎາຓານິ, ປໂຣປຎ຺ຎາສ ກຸສລາ ຘມ຺ມາ, ສຕ຺ຕສຕ຺ຕຕິ ຎາຓວຕ຺ຖູນິ, ຈຕຸວີສຕິໂກຏິສຕສຫສ຺ສສມາປຕ຺ຕິສຎ຺ຈາຣິມຫາວຊິຣຎາຓໍ, ອນນ຺ຕນຍສມນ຺ຕປຏ຺ຐານປວິຈຍປຈ຺ຈເວກ຺ຂຓເທສນາຎາຓານິ, ຕຖາ ອນນ຺ຕາສຸ ໂລກຘາຕູສຸ ອນນ຺ຕານໍ ສຕ຺ຕານໍ ອາສຍາທິວິຠາວນຎາຓານິ ຈາຕິ ເອວມາທິເກ ອເນເກ ອຕ຺ຕໂນ ກຸສເລ ອນວຊ຺ຊຘມ຺ເມ ອນນ຺ຕກາລໍ ປາຣມິປຣິຠາວນາຍ ມຄ຺ຄຠາວນາຍ ຈ ປາຣິປູຣິໍ ວຸທ຺ຘິໍ ຄເຕ ‘‘ອິເມປິ ອນວຊ຺ຊຘມ຺ມາ ມຍິ ສໍວິຊ຺ຊນ຺ຕິ, ອິເມປິ ອນວຊ຺ຊຘມ຺ມາ ມຍິ ສໍວິຊ຺ຊນ຺ຕີ’’ຕິ ຣຸຈິວເສນ ມນສິກາຣາຠິມຸເຂ ພຸທ຺ຘຄຸເຓ ວຄ຺ຄວຄ຺ເຄ ປຸຎ຺ຊປຸຎ຺ເຊ ກຕ຺ວາ ປຈ຺ຈເວກ຺ຂມາໂນ ນິສິນ຺ໂນ ໂຫຕິ. ເຕ ຈ ໂຂ ສປເທສໂຕ ເອວ, ນ ນິປ຺ປເທສໂຕ. ສພ຺ເພ ພຸທ຺ຘຄຸເຓ ຠຄວຕາປິ ອນຸປທໍ ອນວເສສໂຕ ມນສິ ກາຕຸໍ ນ ສກ຺ກາ ອນນ຺ຕາປຣິເມຍ຺ຍຠາວໂຕ.

ວຸຕ຺ຕຎ຺ເຫຕໍ –

‘‘ພຸທ຺ໂຘປິ ພຸທ຺ຘສ຺ສ ຠເຓຍ຺ຍ ວຓ຺ຓໍ,

ກປ຺ປມ຺ປິ ເຈ ອຎ຺ຎມຠາສມາໂນ;

ຂີເຍຖ ກປ຺ໂປ ຈິຣທີຆມນ຺ຕເຣ,

ວຓ຺ໂຓ ນ ຂີເຍຖ ຕຖາຄຕສ຺ສາ’’ຕິ.

ອປຣມ຺ປິ ວຸຕ຺ຕໍ –

‘‘ອສງ຺ຂ຺ເຍຍ຺ຍານິ ນາມານິ, ສຄຸເຓນ ມເຫສິໂນ;

ຄຸເຓນ ນາມມຸທ຺ເຘຍ຺ຍໍ, ອປິ ນາມ ສຫສ຺ສໂຕ’’ຕິ.

ຕທາ ຫິ ຠຄວາ ປຈ຺ຉາຠຕ຺ຕໍ ປິຓ຺ຑປາຕປ຺ປຏິກ຺ກນ຺ໂຕ ວິຫາຣໍ ປວິສິຕ຺ວາ ຄນ຺ຘກຸຏິປ຺ປມຸເຂ ຐຕ຺ວາ ຠິກ຺ຂູສຸ ວຕ຺ຕໍ ທສ຺ເສຕ຺ວາ ຄເຕສຸ ມຫາຄນ຺ຘກຸຏິໍ ປວິສິຕ຺ວາ ປຎ຺ຎຕ຺ຕວຣພຸທ຺ຘາສເນ ນິສິນ຺ໂນ ອຕ຺ຕໂນ ອຕີຕຊາຕິວິສຍໍ ຎາຓໍ ເປເສສິ. ອຖສ຺ສ ຕານິ ນິຣນ຺ຕຣໍ ໂປງ຺ຂານຸໂປງ຺ຂໍ ອນນ຺ຕາປຣິມາຓປ຺ປເຠທາ ອຸປຏ຺ຐຫິໍສຸ. ໂສ ‘‘ເອວໍ ມຫນ຺ຕສ຺ສ ນາມ ທຸກ຺ຂກ຺ຂນ຺ຘສ຺ສ ມູລຠູຕາ ອິເມ ກິເລສາ’’ຕິ ກິເລສວິສຍໍ ຎາຓາຈາຣໍ ເປເສຕ຺ວາ ເຕ ປຫານມຸເຂນ ອນຸປທໍ ປຈ຺ຈເວກ຺ຂິຕ຺ວາ ‘‘ອິເມ ວຕ ກິເລສາ ອນວເສສໂຕ ມຍ຺ຫໍ ສຸຏ຺ຐຸ ປຫີນາ’’ຕິ ປຸນ ເຕສໍ ປຫານກຣໍ ສາກາຣໍ ສປຣິວາຣໍ ສອຸທ຺ເທສໍ ອຣິຍມຄ຺ຄໍ ປຈ຺ຈເວກ຺ຂນ຺ໂຕ ອນນ຺ຕາປຣິມາຓເຠເທ ອຕ຺ຕໂນ ສີລາທິອນວຊ຺ຊຘມ຺ເມ ມນສາກາສິ. ເຕນ ວຸຕ຺ຕໍ –

‘‘ເຕນ ໂຂ ປນ ສມເຍນ ຠຄວາ ອຕ຺ຕໂນ ອເນເກ ປາປເກ ອກຸສເລ ຘມ຺ເມ ປຫີເນ ປຈ຺ຈເວກ຺ຂມາໂນ ນິສິນ຺ໂນ ໂຫຕິ, ອເນເກ ຈ ກຸສເລ ຘມ຺ເມ ຠາວນາປາຣິປູຣິໍ ຄເຕ’’ຕິ.

ເອວໍ ປຈ຺ຈເວກ຺ຂິຕ຺ວາ ອຸປ຺ປນ຺ນປີຕິໂສມນສ຺ສຸທ຺ເທສຠູຕໍ ອິມໍ ອຸທານໍ ອຸທາເນສິ.

ຕຕ຺ຖ ອຫຸ ປຸພ຺ເພຕິ ອຣຫຕ຺ຕມຄ຺ຄຎາຓຸປ຺ປຕ຺ຕິໂຕ ປຸພ຺ເພ ສພ຺ໂພປິ ຈາຍໍ ຣາຄາທິໂກ ກິເລສຄໂຓ ມຍ຺ຫໍ ສນ຺ຕາເນ ອຫຸ ອາສິ, ນ ອິມສ຺ມິໍ ກິເລສຄເຓ ໂກຈິປິ ກິເລໂສ ນາໂຫສິ. ຕທາ ນາຫູຕິ ຕທາ ຕສ຺ມິໍ ກາເລ ອຣິຍມຄ຺ຄກ຺ຂເຓ ໂສ ກິເລສຄໂຓ ນ ອຫຸ ນ ອາສິ, ຕຕ຺ຖ ອຓຸມຕ຺ໂຕປິ ກິເລໂສ ອຄ຺ຄມຄ຺ຄກ຺ຂເຓ ອປ຺ປຫີໂນ ນາມ ນຕ຺ຖິ. ‘‘ຕໂຕ ນາຫູ’’ຕິປິ ປຐນ຺ຕິ, ຕໂຕ ອຣຫຕ຺ຕມຄ຺ຄກ຺ຂຓໂຕ ປຣໍ ນາສີຕິ ອຕ຺ໂຖ. ນາຫຸ ປຸພ຺ເພຕິ ໂຍ ຈາຍໍ ມມ ອປຣິມາໂຓ ອນວຊ຺ຊຘມ຺ໂມ ເອຕຣຫິ ຠາວນາປາຣິປູຣິໍ ຄໂຕ ອຸປລພ຺ຠຕິ, ໂສປິ ອຣິຍມຄ຺ຄກ຺ຂຓໂຕ ປຸພ຺ເພ ນ ອຫຸ ນ ອາສິ. ຕທາ ອຫູຕິ ຍທາ ປນ ເມ ອຄ຺ຄມຄ຺ຄຎາຓໍ ອຸປ຺ປນ຺ນໍ, ຕທາ ສພ຺ໂພປິ ເມ ອນວຊ຺ຊຘມ຺ໂມ ອາສິ. ອຄ຺ຄມຄ຺ຄາຘິຄເມນ ຫິ ສທ຺ຘິໍ ສພ຺ເພປິ ສພ຺ພຎ຺ຎຸຄຸຓາ ພຸທ຺ຘານໍ ຫຕ຺ຖຄຕາ ເອວ ໂຫນ຺ຕິ.

ນ ຈາຫຸ ນ ຈ ຠວິສ຺ສຕິ, ນ ເຈຕຣຫິ ວິຊ຺ຊຕີຕິ ໂຍ ປນ ໂສ ອນວຊ຺ຊຘມ຺ໂມ ອຣິຍມຄ຺ໂຄ ມຍ຺ຫໍ ໂພຘິມຓ຺ເຑ ອຸປ຺ປນ຺ໂນ, ເຍນ ສພ຺ໂພ ກິເລສຄໂຓ ອນວເສສໍ ປຫີໂນ, ໂສ ຍຖາ ມຍ຺ຫໍ ມຄ຺ຄກ຺ຂຓໂຕ ປຸພ຺ເພ ນ ຈາຫຸ ນ ຈ ອໂຫສິ, ເອວໍ ອຕ຺ຕນາ ປຫາຕພ຺ພກິເລສາຠາວໂຕ ເຕ ກິເລສາ ວິຍ ອຍມ຺ປິ ນ ຈ ຠວິສ຺ສຕິ ອນາຄເຕ ນ ອຸປ຺ປຊ຺ຊິສ຺ສຕິ, ເອຕຣຫິ ປຈ຺ຈຸປ຺ປນ຺ນກາເລປິ ນ ວິຊ຺ຊຕິ ນ ອຸປລພ຺ຠຕິ ອຕ຺ຕນາ ກຕ຺ຕພ຺ພກິຈ຺ຈາຠາວໂຕ. ນ ຫິ ອຣິຍມຄ຺ໂຄ ອເນກວາຣໍ ປວຕ຺ຕຕິ. ເຕເນວາຫ – ‘‘ນ ປາຣໍ ທິຄຸຓໍ ຍນ຺ຕີ’’ຕິ.

ອິຕິ ຠຄວາ ອຣິຍມຄ຺ເຄນ ອຕ຺ຕໂນ ສນ຺ຕາເນ ອນວເສສໍ ປຫີເນ ອກຸສເລ ຘມ຺ເມ ຠາວນາປາຣິປູຣິໍ ຄເຕ ອປຣິມາເຓ ອນວຊ຺ຊຘມ຺ເມ ຈ ປຈ຺ຈເວກ຺ຂມາໂນ ອຕ຺ຕຸປນາຍິກປີຕິເວຄວິສ຺ສຏ຺ຐໍ ອຸທານໍ ອຸທາເນສິ. ປຸຣິມາຍ ກຖາຍ ປຸຣິມເວສາຣຊ຺ຊທ຺ວຍເມວ ກຖິຕໍ, ປຈ຺ຉິມທ຺ວຍໍ ສມ຺ມາສມ຺ໂພຘິຍາ ປກາສິຕຕ຺ຕາ ປກາສິຕເມວ ໂຫຕີຕິ.

ຕຕິຍສຸຕ຺ຕວຓ຺ຓນາ ນິຏ຺ຐິຕາ.