໙. ສຘາຍມານສຸຕ຺ຕວຓ຺ຓນາ

໔໙. ນວເມ ມາຓວກາຕິ ຕຣຸຓາ. ປຐເມ ໂຍພ຺ພເນ ຐິຕາ ພ຺ຣາຫ຺ມຓກຸມາຣກາ ອິຘາຘິປ຺ເປຕາ.

ສຘາຍມານຣູປາຕິ ອຸປ຺ປຓ຺ຑນຊາຕິກໍ ວຈນໍ ສນ຺ຘາຍ ວຸຕ຺ຕໍ. ອຎ຺ເຎສໍ ອຸປ຺ປຓ຺ເຑນ຺ຕາ ສຘນ຺ຕິ, ຕທຕ຺ຖວຈນສີລາຕິ ອຕ຺ໂຖ. ຕສ຺ສາຍໍ ວຈນຕ຺ໂຖ – ສຘນໍ ສໂຘ, ຕໍ ອາຈິກ຺ຂນ຺ຕີຕິ ສຘຍມານາຕິ ວຕ຺ຕພ຺ເພ ທີຆໍ ກຕ຺ວາ ‘‘ສຘາຍມານາ’’ຕິ ວຸຕ຺ຕໍ. ອຖ ວາ ວິເສສໂຕ ສເສເຘ ວິຍ ອຕ຺ຕານໍ ອາວທນ຺ຕີຕິ ສຘາຍມານາ. ເຕ ເອວໍ ສຠາວຕາຍ ‘‘ສຘາຍມານຣູປາ’’ຕິ ວຸຕ຺ຕໍ. ‘‘ສທ຺ທາຍມານຣູປາ’’ຕິປິ ປາໂຐ, ອຸຈ຺ຈາສທ຺ທມຫາສທ຺ທໍ ກໂຣນ຺ຕາຕິ ອຕ຺ໂຖ. ຠຄວໂຕ ອວິທູເຣ ອຕິກ຺ກມນ຺ຕີຕິ ຠຄວໂຕ ສວນວິສເຍ ຕໍ ຕໍ ມຸຂາຣຸຬ຺ຫໍ ວທນ຺ຕາ ອຕິຍນ຺ຕິ.

ເອຕມຕ຺ຖໍ ວິທິຕ຺ວາຕິ ເອຕໍ ເຕສໍ ວາຈາຍ ອສຎ຺ຎຕຠາວໍ ຊານິຕ຺ວາ ຕທຕ຺ຖທີປກໍ ຘມ຺ມສໍເວຄວເສນ ອິມໍ ອຸທານໍ ອຸທາເນສິ.

ຕຕ຺ຖ ປຣິມຸຏ຺ຐາຕິ ທນ຺ຘາ ມຸຏ຺ຐສ຺ສຕິໂນ. ປຓ຺ຑິຕາຠາສາຕິ ປຓ຺ຑິຕປຕິຣູປກາ ‘‘ເກ ອຎ຺ເຎ ຊານນ຺ຕິ, ມຍເມເວຕ຺ຖ ຊານາມາ’’ຕິ ຕສ຺ມິໍ ຕສ຺ມິໍ ອຕ຺ເຖ ອຕ຺ຕານເມວ ຊານນ຺ຕໍ ກຕ຺ວາ ສມຸທາຈຣຓໂຕ. ວາຈາໂຄຈຣຠາຓິໂນຕິ ເຍສໍ ວາຈາ ເອວ ໂຄຈໂຣ ວິສໂຍ, ເຕ ວາຈາໂຄຈຣຠາຓິໂນ, ວາຈາວຕ຺ຖຸມຕ຺ຕສ຺ເສວ ຠາຓິໂນ ອຕ຺ຖສ຺ສ ອປຣິຎ຺ຎາຕຕ຺ຕາ. ອຖ ວາ ວາຈາຍ ອໂຄຈຣໍ ອຣິຍານໍ ກຖາຍ ອວິສຍໍ ມຸສາວາທໍ ຠຓນ຺ຕີຕິ ວາຈາໂຄຈຣຠາຓິໂນ. ອຖ ວາ ‘‘ໂຄຈຣຠາຓິໂນ’’ຕິ ເອຕ຺ຖ ອາກາຣສ຺ສ ຣສ຺ສຠາໂວ ກໂຕ. ວາຈາໂຄຈຣາ, ນ ສຕິປຏ຺ຐານາທິໂຄຈຣາ ຠາຓິໂນວ. ກຖໍ ຠາຓິໂນ? ຍາວິຈ຺ຉນ຺ຕິ ມຸຂາຍາມໍ ອຕ຺ຕໂນ ຍາວ ມຸຂາຍາມໍ ຍາວ ມຸຂປ຺ປສາຣຓໍ ອິຈ຺ຉນ຺ຕິ, ຕາວ ປສາເຣຕ຺ວາ ຠາຓິໂນ, ປເຣສຸ ຄາຣເວນ, ອຕ຺ຕໂນ ອວິສຍຕາຍ ຈ ມຸຂສງ຺ໂກຈໍ ນ ກໂຣນ຺ຕີຕິ ອຕ຺ໂຖ. ອຖ ວາ ວາຈາໂຄຈຣາ ເອວ ຫຸຕ຺ວາ ຠາຓິໂນ, ສຍໍ ອຊານິຕ຺ວາ ປຣປຕ຺ຕິກາ ເອວ ຫຸຕ຺ວາ ວຕ຺ຕາໂຣຕິ ອຕ຺ໂຖ. ຕໂຕ ເອວ ຍາວິຈ຺ຉນ຺ຕິ ມຸຂາຍາມໍ ເຍນ ວຈເນນ ສາເວຕພ຺ພາ, ຕໍ ອຈິນ຺ເຕຕ຺ວາ ຍາວເທວ ອຕ຺ຕໂນ ມຸຂປ຺ປສາຣຓມຕ຺ຕໍ ອິຈ຺ຉນ຺ຕີຕິ ອຕ຺ໂຖ. ເຍນ ນີຕາ ນ ຕໍ ວິທູຕິ ເຍນ ມຸຏ຺ຐສ຺ສຈ຺ຈາທິນາ ນິລ຺ລຊ຺ຊຠາວໍ ປຓ຺ຑິຕມານີຠາວຎ຺ຈ ນີຕາ ‘‘ມຍເມວໍ ຠຓາມາ’’ຕິ, ຕໍ ຕຖາ ອຕ຺ຕໂນ ຠຓນ຺ຕສ຺ສ ກາຣຓໍ ນ ວິທູ, ອວິທ຺ທສຸໂນ ອສູຣາ ນ ຊານນ຺ຕີຕິ ອຕ຺ໂຖ.

ນວມສຸຕ຺ຕວຓ຺ຓນາ ນິຏ຺ຐິຕາ.