໘. ສງ຺ຆເຠທສຸຕ຺ຕວຓ຺ຓນາ

໔໘. ອຏ຺ຐເມ ອາຍສ຺ມນ຺ຕໍ ອານນ຺ທໍ ເອຕທໂວຈາຕິ ອຠິມາເຣ ປໂຍເຊຕ຺ວາ ນາຬາຄິຣິໍ ວິສ຺ສຊ຺ຊາເປຕ຺ວາ ສິລໍ ປວຏ຺ເຏຕ຺ວາ ຠຄວໂຕ ອນຕ຺ຖໍ ກາຕຸໍ ອສກ຺ໂກນ຺ໂຕ ‘‘ສງ຺ຆໍ ຠິນ຺ທິຕ຺ວາ ຈກ຺ກເຠທໍ ກຣິສ຺ສາມີ’’ຕິ ອຘິປ຺ປາເຍນ ເອຕໍ ‘‘ອຊ຺ຊຕຄ຺ເຄ’’ຕິອາທິວຈນໍ ອໂວຈ. ອຎ຺ຎຕ຺ເຣວ ຠຄວຕາຕິ ວິນາ ເອວ ຠຄວນ຺ຕໍ, ສຕ຺ຖາຣໍ ອກຕ຺ວາຕິ ອຕ຺ໂຖ. ອຎ຺ຎຕ຺ຣ ຠິກ຺ຂຸສງ຺ຆາຕິ ວິນາ ເອວ ຠິກ຺ຂຸສງ຺ຆໍ. ອຸໂປສຖໍ ກຣິສ຺ສາມິ ສງ຺ຆກມ຺ມານິ ຈາຕິ ຠຄວໂຕ ໂອວາທກາຣກໍ ຠິກ຺ຂຸສງ຺ຆໍ ວິສຸໍ ກຕ຺ວາ ມໍ ອນຸວຕ຺ຕນ຺ເຕຫິ ຠິກ຺ຂູຫິ ສທ຺ຘິໍ ອາເວຓິກໍ ອຸໂປສຖໍ ສງ຺ຆກມ຺ມານິ ຈ ກຣິສ຺ສາມີຕິ ອຕ຺ໂຖ. ເທວທຕ຺ໂຕ ສງ຺ຆໍ ຠິນ຺ທິສ຺ສຕີຕິ ເຠທກຣານໍ ສພ຺ເພສໍ ເທວທຕ຺ເຕນ ສຊ຺ຊິຕຕ຺ຕາ ເອກໍເສເນວ ເທວທຕ຺ໂຕ ອຊ຺ຊ ສງ຺ຆໍ ຠິນ຺ທິສ຺ສຕິ ທ຺ວິຘາ ກຣິສ຺ສຕິ. ‘‘ອຘມ຺ມໍ ຘມ຺ໂມ’’ຕິອາທີສຸ ຫິ ອຏ຺ຐາຣສສຸ ເຠທກຣວຕ຺ຖູສຸ ຍໍກິຎ຺ຈິ ເອກມ຺ປິ ວຕ຺ຖຸໍ ທີເປຕ຺ວາ ເຕນ ເຕນ ກາຣເຓນ ‘‘ອິມໍ ຄຓ຺ຫຖ, ອິມໍ ໂຣເຈຖາ’’ຕິ ສຎ຺ຎາເປຕ຺ວາ ສລາກໍ ຄາເຫຕ຺ວາ ວິສຸໍ ສງ຺ຆກມ຺ເມ ກເຕ ສງ຺ໂຆ ຠິນ຺ໂນ ໂຫຕິ. ວຸຕ຺ຕຎ຺ເຫຕໍ –

‘‘ປຎ຺ຈຫິ, ອຸປາລິ, ອາກາເຣຫິ ສງ຺ໂຆ ຠິຊ຺ຊຕິ ກມ຺ເມນ ອຸທ຺ເທເສນ ໂວຫຣນ຺ໂຕ ອນຸສ຺ສາວເນນ ສລາກຄ຺ຄາເຫນາ’’ຕິ (ປຣິ. ໔໕໘).

ຕຕ຺ຖ ກມ຺ເມນາຕິ ອປໂລກນກມ຺ມາທີສຸ ຈຕູສຸ ກມ຺ເມສຸ ອຎ຺ຎຕເຣນ ກມ຺ເມນ. ອຸທ຺ເທເສນາຕິ ປຎ຺ຈສຸ ປາຕິໂມກ຺ຂຸທ຺ເທເສສຸ ອຎ຺ຎຕເຣນ ອຸທ຺ເທເສນ. ໂວຫຣນ຺ໂຕຕິ ຕາຫິ ຕາຫິ ອຸປ຺ປຕ຺ຕີຫິ ‘‘ອຘມ຺ມໍ ຘມ຺ໂມ’’ຕິອາທີນິ (ອ. ນິ. ໑໐.໓໗; ຈູຬວ. ໓໕໒) ອຏ຺ຐາຣສເຠທກຣວຕ຺ຖູນິ ທີເປນ຺ໂຕ. ອນຸສ຺ສາວເນນາຕິ ‘‘ນນຸ ຕຸມ຺ເຫ ຊານາຖ ມຍ຺ຫໍ ອຸຈ຺ຈາກຸລາ ປພ຺ພຊິຕຠາວໍ ພຫຸສ຺ສຸຕຠາວຎ຺ຈ, ມາທິໂສ ນາມ ອຸທ຺ຘມ຺ມໍ ອຸພ຺ພິນຍໍ ຄາເຫຍ຺ຍາຕິ ກິໍ ຕຸມ຺ຫາກໍ ຈິຕ຺ຕມ຺ປິ ອຸປ຺ປາເທຕຸໍ ຍຸຕ຺ຕໍ, ກິມຫໍ ອປາຍໂຕ ນ ຠາຍາມີ’’ຕິອາທິນາ ນເຍນ ກຓ຺ຓມູເລ ວຈີເຠທໍ ກຕ຺ວາ ອນຸສ຺ສາວເນນ. ສລາກຄ຺ຄາເຫນາຕິ ເອວໍ ອນຸສ຺ສາເວຕ຺ວາ ເຕສໍ ຈິຕ຺ຕໍ ອຸປຕ຺ຖມ຺ເຠຕ຺ວາ ອນາວຕ຺ຕິຘມ຺ເມ ກຕ຺ວາ ‘‘ຄຓ຺ຫຖ ອິມໍ ສລາກ’’ນ຺ຕິ ສລາກຄ຺ຄາເຫນ.

ເອຕ຺ຖ ຈ ກມ຺ມເມວ ອຸທ຺ເທໂສ ວາ ປມາຓໍ, ໂວຫາຣານຸສ຺ສາວນສລາກຄ຺ຄາຫາ ປນ ປຸພ຺ພຠາຄາ. ອຏ຺ຐາຣສວຕ຺ຖຸທີປນວເສນ ຫິ ໂວຫຣນ຺ເຕນ ຕຕ຺ຖ ຣຸຈິຊນນຕ຺ຖໍ ອນຸສ຺ສາເວຕ຺ວາ ສລາກາຍ ຄາຫິຕາຍປິ ອຠິນ຺ໂນວ ໂຫຕິ ສງ຺ໂຆ. ຍທາ ປເນວໍ ຈຕ຺ຕາໂຣ ວາ ອຕິເຣກາ ວາ ສລາກໍ ຄາເຫຕ຺ວາ ອາເວຓິກໍ ອຸທ຺ເທສໍ ວາ ກມ຺ມໍ ວາ ກໂຣນ຺ຕິ, ຕທາ ສງ຺ໂຆ ຠິນ຺ໂນ ນາມ ໂຫຕິ. ເທວທຕ຺ໂຕ ຈ ສພ຺ພໍ ສງ຺ຆເຠທສ຺ສ ປຸພ຺ພຠາຄໍ ນິປ຺ຜາເທຕ຺ວາ ‘‘ເອກໍເສເນວ ອຊ຺ຊ ອາເວຓິກໍ ອຸໂປສຖໍ ສງ຺ຆກມ຺ມຎ຺ຈ ກຣິສ຺ສາມີ’’ຕິ ຈິນ຺ເຕຕ຺ວາ ‘‘ອຊ຺ຊຕຄ຺ເຄ’’ຕິອາທິວຈນໍ ອໂວຈ. ເຕນາຫ – ‘‘ອຊ຺ຊ, ຠນ຺ເຕ, ເທວທຕ຺ໂຕ ສງ຺ຆໍ ຠິນ຺ທິສ຺ສຕີ’’ຕິ. ຍໂຕ ອໂວຈຸມ຺ຫາ ‘‘ເຠທກຣານໍ ສພ຺ເພສໍ ເທວທຕ຺ເຕນ ສຊ຺ຊິຕຕ຺ຕາ’’ຕິ.

ເອຕມຕ຺ຖໍ ວິທິຕ຺ວາຕິ ເອຕໍ ອວີຈິມຫານິຣຍຸປ຺ປຕ຺ຕິສໍວຕ຺ຕນິຍໍ ກປ຺ປຏ຺ຐິຍໍ ອເຕກິຈ຺ຉໍ ເທວທຕ຺ເຕນ ນິພ຺ພຕ຺ຕິຍມານໍ ສງ຺ຆເຠທກມ຺ມໍ ສພ຺ພາກາຣໂຕ ວິທິຕ຺ວາ. ອິມໍ ອຸທານນ຺ຕິ ກຸສລາກຸສເລສຸ ຍຖາກ຺ກມໍ ສປ຺ປຸຣິສາສປ຺ປຸຣິສສຠາຄວິສຠາຄປຏິປຕ຺ຕິວເສນ ປນ ສຸກຸສລາຕິ ອິທມຕ຺ຖວິຠາວນໍ ອິມໍ ອຸທານໍ ອຸທາເນສິ.

ຕຕ຺ຖ ສຸກຣໍ ສາຘຸນາ ສາຘູຕິ ອຕ຺ຕໂນ ປເຣສຎ຺ຈ ຫິຕໍ ສາເຘຕີຕິ ສາຘຸ, ສມ຺ມາປຏິປນ຺ໂນ. ເຕນ ສາຘຸນາ ສາຣິປຸຕ຺ຕາທິນາ ສາວເກນ ປຈ຺ເຈກພຸທ຺ເຘນ ສມ຺ມາສມ຺ພຸທ຺ເຘນ ອຎ຺ເຎນ ວາ ໂລກິຍສາຘຸນາ ສາຘຸ ສຸນ຺ທຣໍ ຠທ຺ທກໍ ອຕ຺ຕໂນ ປເຣສຎ຺ຈ ຫິຕສຸຂາວຫໍ ສຸກຣໍ ສຸເຂນ ກາຕຸໍ ສກ຺ກາ. ສາຘຸ ປາເປນ ທຸກ຺ກຣນ຺ຕິ ຕເທວ ປນ ວຸຕ຺ຕລກ຺ຂຓໍ ສາຘຸ ປາເປນ ເທວທຕ຺ຕາທິນາ ປາປປຸຄ຺ຄເລນ ທຸກ຺ກຣໍ ກາຕຸໍ ນ ສກ຺ກາ, ນ ໂສ ຕໍ ກາຕຸໍ ສກ຺ໂກຕີຕິ ອຕ຺ໂຖ. ປາປໍ ປາເປນ ສຸກຣນ຺ຕິ ປາປໍ ອສຸນ຺ທຣໍ ອຕ຺ຕໂນ ປເຣສຎ຺ຈ ອນຕ຺ຖາວຫໍ ປາເປນ ຍຖາວຸຕ຺ຕປາປປຸຄ຺ຄເລນ ສຸກຣໍ ສຸເຂນ ກາຕຸໍ ສກ຺ກຸເຓຍ຺ຍ. ປາປມຣິເຍຫິ ທຸກ຺ກຣນ຺ຕິ ອຣິເຍຫິ ປນ ພຸທ຺ຘາທີຫິ ຕໍ ຕໍ ປາປໍ ທຸກ຺ກຣໍ ທຸຣຠິສມ຺ຠວໍ. ເສຕຸຆາໂຕເຍວ ຫິ ເຕສນ຺ຕິ ສຕ຺ຖາ ທີເປຕິ.

ອຏ຺ຐມສຸຕ຺ຕວຓ຺ຓນາ ນິຏ຺ຐິຕາ.