໙. ອຸປເສນສຸຕ຺ຕວຓ຺ຓນາ

໓໙. ນວເມ ອຸປເສນສ຺ສາຕິ ເອຕ຺ຖ ອຸປເສໂນຕິ ຕສ຺ສ ເຖຣສ຺ສ ນາມໍ, ວງ຺ຄນ຺ຕພ຺ຣາຫ຺ມຓສ຺ສ ປນ ປຸຕ຺ຕຕ຺ຕາ ‘‘ວງ຺ຄນ຺ຕປຸຕ຺ໂຕ’’ຕິ ຈ ນໍ ໂວຫຣນ຺ຕິ.

ອຍຎ຺ຫິ ເຖໂຣ ອາຍສ຺ມໂຕ ສາຣິປຸຕ຺ຕສ຺ສ ກນິຏ຺ຐຠາຕາ, ສາສເນ ປພ຺ພຊິຕ຺ວາ ອປຎ຺ຎຕ຺ເຕ ສິກ຺ຂາປເທ ອຸປສມ຺ປທາຍ ທ຺ວິວສ຺ໂສ ອຸປຊ຺ຌາໂຍ ຫຸຕ຺ວາ ເອກໍ ຠິກ຺ຂຸໍ ອຸປສມ຺ປາເທຕ຺ວາ ເຕນ ສທ຺ຘິໍ ຠຄວໂຕ ອຸປຏ຺ຐານໍ ຄໂຕ, ຕສ຺ສ ຠິກ຺ຂຸໂນ ຠຄວຕາ ຕສ຺ສ ສທ຺ຘິວິຫາຣິກຠາວໍ ປຸຈ຺ຉິຕ຺ວາ ຂນ຺ຘເກ ອາຄຕນເຍນ ‘‘ອຕິລຫຸໍ ໂຂ ຕ຺ວໍ, ໂມຆປຸຣິສ, ອາວຕ຺ໂຕ ພາຫຸລ຺ລາຍ, ຍທິທໍ ຄຓພນ຺ຘິຍ’’ນ຺ຕິ (ມຫາວ. ໗໕) ວິຄຣຫິໂຕ ປໂຕທາຠິຕຸນ຺ໂນ ວິຍ ອາຊານີໂຍ ສໍວິຄ຺ຄມານໂສ ‘‘ຍທິປາຫໍ ອິທານິ ປຣິສໍ ນິສ຺ສາຍ ຠຄວຕາ ວິຄຣຫິໂຕ, ປຣິສໍເຍວ ປນ ນິສ຺ສາຍ ປາສໍສິໂຍ ຠເວຍ຺ຍ’’ນ຺ຕິ ອຸສ຺ສາຫຊາໂຕ ສພ຺ເພ ຘຸຕຘມ຺ເມ ສມາທາຍ ວຕ຺ຕມາໂນ ວິປສ຺ສນໍ ອາຣຠິຕ຺ວາ ນ ຈິຣສ຺ເສວ ຉຬຠິຎ຺ໂຎ ປຏິສມ຺ຠິທາປ຺ປຕ຺ໂຕ ມຫາຂີຓາສໂວ ຫຸຕ຺ວາ ອຕ຺ຕໂນ ນິສ຺ສິຕເກ ຘຸຕງ຺ຄຘເຣ ເອວ ກຕ຺ວາ ເຕຫິ ສທ຺ຘິໍ ຠຄວນ຺ຕໍ ອຸປສງ຺ກມິຕ຺ວາ ສນ຺ຖຕສິກ຺ຂາປເທ (ປາຣາ. ໕໖໕ ອາທໂຍ) ອາຄຕນເຍນ ‘‘ປາສາທິກາ ໂຂ ຕ຺ຍາຍໍ, ອຸປເສນ, ປຣິສາ’’ຕິ ປຣິສວເສນ ຠຄວໂຕ ສນ຺ຕິກາ ລທ຺ຘປສໍໂສ ‘‘ເອຕທຄ຺ຄໍ, ຠິກ຺ຂເວ, ມມ ສາວການໍ ຠິກ຺ຂູນໍ ສມນ຺ຕປາສາທິການໍ ຍທິທໍ ອຸປເສໂນ ວງ຺ຄນ຺ຕປຸຕ຺ໂຕ’’ຕິ (ອ. ນິ. ໑.໒໑໓) ເອຕທຄ຺ເຄ ຐປິໂຕ ອສີຕິຍາ ມຫາສາວເກສຸ ອພ຺ຠນ຺ຕໂຣ.

ໂສ ເອກທິວສໍ ປຈ຺ຉາຠຕ຺ຕໍ ປິຓ຺ຑປາຕປ຺ປຏິກ຺ກນ຺ໂຕ ອນ຺ເຕວາສິເກສຸ ອຕ຺ຕໂນ ອຕ຺ຕໂນ ທິວາຏ຺ຐານໍ ຄເຕສຸ ອຸທກກຸມ຺ຠໂຕ ອຸທກໍ ຄເຫຕ຺ວາ ປາເທ ປກ຺ຂາເລຕ຺ວາ ຄຕ຺ຕານິ ສີຕິໍ ກຕ຺ວາ ຈມ຺ມກ຺ຂຓ຺ຑໍ ອຕ຺ຖຣິຕ຺ວາ ທິວາຏ຺ຐາເນ ທິວາວິຫາຣໍ ນິສິນ຺ໂນ ອຕ຺ຕໂນ ຄຸເຓ ອາວຊ຺ເຊສິ. ຕສ຺ສ ເຕ ອເນກສຕາ ອເນກສຫສ຺ສາ ໂປງ຺ຂານຸໂປງ຺ຂໍ ອຸປຏ຺ຐຫິໍສຸ. ໂສ ‘‘ມຍ຺ຫໍ ຕາວ ສາວກສ຺ສ ສໂຕ ອິເມ ເອວຣູປາ ຄຸຓາ, ກີທິສາ ນຸ ໂຂ ມຍ຺ຫໍ ສຕ຺ຖຸ ຄຸຓາ’’ຕິ ຠຄວໂຕ ຄຸຓາຠິມຸຂໍ ມນສິກາຣໍ ເປເສສິ. ເຕ ຕສ຺ສ ຎາຓພລານຸຣູປໍ ອເນກໂກຏິສຫສ຺ສາ ອຸປຏ຺ຐຫິໍສຸ. ໂສ ‘‘ເອວໍສີໂລ ເມ ສຕ຺ຖາ ເອວໍຘມ຺ໂມ ເອວໍປຎ຺ໂຎ ເອວໍວິມຸຕ຺ຕີ’’ຕິອາທິນາ ຈ ‘‘ອິຕິປິ ໂສ ຠຄວາ ອຣຫໍ ສມ຺ມາສມ຺ພຸທ຺ໂຘ’’ຕິອາທິນາ ຈ ອາວິຠາວານຸຣູປໍ ສຕ຺ຖຸ ຄຸເຓ ອນຸສ຺ສຣິຕ຺ວາ, ຕໂຕ ‘‘ສ຺ວາກ຺ຂາໂຕ’’ຕິອາທິນາ ຘມ຺ມສ຺ສ, ‘‘ສຸປ຺ປຏິປນ຺ໂນ’’ຕິອາທິນາ ອຣິຍສງ຺ຆສ຺ສ ຈ ຄຸເຓ ອນຸສ຺ສຣິ. ເອວໍ ມຫາເຖໂຣ ອເນກາກາຣໂວກາຣໍ ຣຕນຕ຺ຕຍຄຸເຓສຸ ອາວິຠູເຕສຸ ອຕ຺ຕມໂນ ປມຸທິໂຕ ອຸຬາຣປີຕິໂສມນສ຺ສໍ ປຏິສໍເວເທນ຺ໂຕ ນິສີທິ. ຕມຕ຺ຖໍ ທສ຺ເສຕຸໍ ‘‘ອາຍສ຺ມໂຕ ອຸປເສນສ຺ສ ວງ຺ຄນ຺ຕປຸຕ຺ຕສ຺ສ ຣໂຫຄຕສ຺ສາ’’ຕິອາທິ ວຸຕ຺ຕໍ.

ຕຕ຺ຖ ຣໂຫຄຕສ຺ສາຕິ ຣຫສິ ຄຕສ຺ສ. ປຏິສລ຺ລີນສ຺ສາຕິ ເອກີຠູຕສ຺ສ. ເອວໍ ເຈຕໂສ ປຣິວິຕກ຺ໂກ ອຸທປາທີຕິ ເອວໍ ອິທານິ ວຸຈ຺ຈມານາກາໂຣ ຈິຕ຺ຕສ຺ສ ວິຕກ຺ໂກ ອຸປ຺ປຊ຺ຊິ. ລາຠາ ວຕ ເມຕິ ເຍ ອິເມ ມນຸສ຺ສຕ຺ຕພຸທ຺ຘຸປ຺ປາທສທ຺ຘາສມຘິຄມາທໂຍ, ອໂຫ ວຕ ເມ ເອເຕ ລາຠາ. ສຸລທ຺ຘໍ ວຕ ເມຕິ ຍຎ຺ຈິທໍ ມຍາ ຠຄວໂຕ ສາສເນ ປພ຺ພຊ຺ຊູປສມ຺ປທາຣຕນຕ຺ຕຍປຍິຣຸປາສນາທິ ປຏິລທ຺ຘໍ, ຕໍ ເມ ອໂຫ ວຕ ສຸຏ຺ຐຸ ລທ຺ຘໍ. ຕຕ຺ຖ ກາຣຓມາຫ ‘‘ສຕ຺ຖາ ຈ ເມ’’ຕິອາທິນາ.

ຕຕ຺ຖ ທິຏ຺ຐຘມ຺ມິກສມ຺ປຣາຍິກປຣມຕ຺ເຖຫິ ຍຖາຣຫໍ ສຕ຺ເຕ ອນຸສາສຕີຕິ ສຕ຺ຖາ. ຠາຄ຺ຍວນ຺ຕຕາທີຫິ ກາຣເຓຫິ ຠຄວາ. ອາຣກຕ຺ຕາ ກິເລເສຫິ, ກິເລສາຣີນໍ ຫຕຕ຺ຕາ, ສໍສາຣຈກ຺ກສ຺ສ ວາ ອຣານໍ ຫຕຕ຺ຕາ, ປຈ຺ຈຍາທີນໍ ອຣຫຕ຺ຕາ, ປາປກຣເຓ ຣຫາຠາວາ ອຣຫໍ. ສມ຺ມາ ສາມຎ຺ຈ ສພ຺ພຘມ຺ມານໍ ພຸທ຺ຘຕ຺ຕາ ສມ຺ມາສມ຺ພຸທ຺ໂຘຕິ ອຍເມຕ຺ຖ ສງ຺ເຂໂປ, ວິຕ຺ຖາໂຣ ປນ ວິສຸທ຺ຘິມຄ຺ເຄ (ວິສຸທ຺ຘິ. ໑.໑໒໓ ອາທໂຍ) ພຸທ຺ຘານຸສ຺ສຕິນິທ຺ເທສໂຕ ຄເຫຕພ຺ໂພ.

ສ຺ວາກ຺ຂາເຕຕິ ສຸຏ຺ຐຸ ອກ຺ຂາເຕ, ເອກນ຺ຕນິຍ຺ຍານິກໍ ກຕ຺ວາ ຠາສິເຕ. ຘມ຺ມວິນເຍຕິ ປາວຈເນ. ຕຎ຺ຫິ ຍຖານຸສິຏ຺ຐໍ ປຏິປຊ຺ຊມານານໍ ສໍສາຣທຸກ຺ຂປາຕໂຕ ຘາຣເຓນ, ຣາຄາທິກິເລເສ ວິນຍເນນ ຈ ຘມ຺ມວິນໂຍຕິ ວຸຈ຺ຈຕິ. ສພ຺ຣຫ຺ມຈາຣິໂນຕິ ເສຏ຺ຐຏ຺ເຐນ ພ຺ຣຫ຺ມສງ຺ຂາຕໍ ຠຄວໂຕ ສາສນໍ ອຣິຍມຄ຺ຄໍ ສຫ ຈຣນ຺ຕິ ປຏິປຊ຺ຊນ຺ຕີຕິ ສພ຺ຣຫ຺ມຈາຣິໂນ. ສີລວນ຺ໂຕຕິ ມຄ຺ຄຜລສີລວເສນ ສີລວນ຺ໂຕ. ກລ຺ຍາຓຘມ຺ມາຕິ ສມາຘິປຎ຺ຎາວິມຸຕ຺ຕິວິມຸຕ຺ຕິຎາຓທສ຺ສນາທໂຍ ກລ຺ຍາຓາ ສຸນ຺ທຣາ ຘມ຺ມາ ເອເຕສໍ ອຕ຺ຖີຕິ ກລ຺ຍາຓຘມ຺ມາ. ເອເຕນ ສງ຺ຆສ຺ສ ສຸປ຺ປຏິປຕ຺ຕິໍ ທສ຺ເສຕິ. ສີເລສຸ ຈມ຺ຫິ ປຣິປູຣກາຣີຕິ ‘‘ອຫມ຺ປິ ປພ຺ພຊິຕ຺ວາ ນ ຕິຣຈ຺ຉານກຖາກຖິໂກ ກາຍທຬ຺ຫິພຫຸໂລ ຫຸຕ຺ວາ ວິຫາສິໍ, ອຖ ໂຂ ປາຕິໂມກ຺ຂສໍວຣາທິໍ ຈຕຸພ຺ພິຘມ຺ປິ ສີລໍ ອຂຓ຺ຑໍ ອຉິທ຺ທໍ ອສພລໍ ອກມ຺ມາສໍ ຠຸຊິສ຺ສໍ ວິຎ຺ຎຸປ຺ປສຕ຺ຖໍ ອປຣາມຏ຺ຐໍ ກຕ຺ວາ ປຣິປູເຣນ຺ໂຕ ອຣິຍມຄ຺ຄໍເຍວ ປາເປສິ’’ນ຺ຕິ ວທຕິ. ເອເຕນ ເຫຏ຺ຐິມຜລທ຺ວຍສມ຺ປຕ຺ຕິມຕ຺ຕໂນ ທີເປຕິ. ໂສຕາປນ຺ນສກທາຄາມິໂນ ຫິ ສີເລສຸ ປຣິປູຣກາຣິໂນ. ສຸສມາຫິໂຕ ຈມ຺ຫິ ເອກຄ຺ຄຈິຕ຺ໂຕຕິ ອຸປຈາຣປ຺ປນາເຠເທນ ສມາຘິນາ ສພ຺ພຖາປິ ສມາຫິໂຕ ຈ ອມ຺ຫິ ອວິກ຺ຂິຕ຺ຕຈິຕ຺ໂຕ. ອິມິນາ ສມາຘິສ຺ມິໍ ປຣິປູຣກາຣິຕາວຈເນນ ຕຕິຍຜລສມ຺ປຕ຺ຕິມຕ຺ຕໂນ ທີເປຕິ. ອນາຄາມິໂນ ຫິ ສມາຘິສ຺ມິໍ ປຣິປູຣກາຣິໂນ. ອຣຫາ ຈມ຺ຫິ ຂີຓາສໂວຕິ ກາມາສວາທີນໍ ສພ຺ພໂສ ຂີຓຕ຺ຕາ ຂີຓາສໂວ, ຕໂຕ ເອວ ປຣິກ຺ຂີຓຠວສໍໂຍຊໂນ ສເທວເກ ໂລເກ ອຄ຺ຄທກ຺ຂິເຓຍ຺ຍຕາຍ ອຣຫາ ຈມ຺ຫິ. ເອເຕນ ອຕ຺ຕໂນ ກຕກຣຓີຍຕໍ ທສ຺ເສຕິ. ມຫິທ຺ຘິໂກ ຈມ຺ຫິ ມຫານຸຠາໂວຕິ ອຘິຏ຺ຐານວິກຸພ຺ພນາທິອິທ຺ຘີສຸ ມຫຕາ ວສີຠາເວນ ສມນ຺ນາຄຕຕ຺ຕາ ມຫິທ຺ຘິໂກ ອຸຬາຣສ຺ສ ປຸຎ຺ຎານຸຠາວສ຺ສ ຄຸຓານຸຠາວສ຺ສ ຈ ສມ຺ປຕ຺ຕິຍາ ມຫານຸຠາໂວ ຈ ອສ຺ມິ. ເອເຕນ ໂລກິຍາຠິຎ຺ຎານວານຸປຸພ຺ພວິຫາຣສມາປຕ຺ຕິໂຍຄມຕ຺ຕໂນ ທີເປຕິ. ອຠິຎ຺ຎາສຸ ວສີຠາເວນ ຫິ ອຣິຍາ ຍຖິຈ຺ຉິຕນິປ຺ຜາທເນນ ມຫິທ຺ຘິກາ, ປຸພ຺ພູປນິສ຺ສຍສມ຺ປຕ຺ຕິຍາ ນານາວິຫາຣສມາປຕ຺ຕີຫິ ຈ ວິໂສຘິຕສນ຺ຕານຕ຺ຕາ ມຫານຸຠາວາ ຈ ໂຫນ຺ຕີຕິ.

ຠທ຺ທກໍ ເມ ຊີວິຕນ຺ຕິ ເອວໍວິຘສີລາທິຄຸຓສມນ຺ນາຄຕສ຺ສ ເມ ຍາວາຍໍ ກາໂຍ ຘຣຕິ, ຕາວ ສຕ຺ຕານໍ ຫິຕສຸຂເມວ ວຑ຺ຒຕິ, ປຸຎ຺ຎກ຺ເຂຕ຺ຕຠາວໂຕ ຊີວິຕມ຺ປິ ເມ ຠທ຺ທກໍ ສຸນ຺ທຣໍ. ຠທ຺ທກໍ ມຣຓນ຺ຕິ ສເຈ ປນິທໍ ຂນ຺ຘປຎ຺ຈກໍ ອຊ຺ຊ ວາ ອິມສ຺ມິໍເຍວ ວາ ຂເຓ ອນຸປາທາໂນ ວິຍ ຊາຕເວໂທ ນິພ຺ພາຍຕິ, ຕໍ ອປ຺ປຏິສນ຺ຘິກໍ ປຣິນິພ຺ພານສງ຺ຂາຕໍ ມຣຓມ຺ປິ ເມ ຠທ຺ທກນ຺ຕິ ອຸຠຍຕ຺ຖ ຕາທິຠາວໍ ທີເປຕິ. ເອວໍ ມຫາເຖໂຣ ອປ຺ປຫີນໂສມນສ຺ສຸປ຺ປິລາວິຕວາສນຸສ຺ສນ຺ນຕ຺ຕາ ອຸຬາຣໂສມນສ຺ສິໂຕ ຘມ຺ມພຫຸມາເນນ ຘມ຺ມປີຕິປຏິສໍເວທເນນ ປຣິວິຕກ຺ເກສິ.

ຕໍ ສຕ຺ຖາ ຄນ຺ຘກຸຏິຍໍ ນິສິນ຺ໂນວ ສພ຺ພຎ຺ຎຸຕຎ຺ຎາເຓນ ຊານິຕ຺ວາ ຊີວິເຕ ມຣເຓ ຈ ຕສ຺ສ ຕາທິຠາວວິຠາວນໍ ອິມໍ ອຸທານໍ ອຸທາເນສິ. ເຕນ ວຸຕ຺ຕໍ – ‘‘ອຖ ໂຂ ຠຄວາ…ເປ… ອຸທາເນສີ’’ຕິ.

ຕຕ຺ຖ ຍໍ ຊີວິຕໍ ນ ຕປຕີຕິ ຍໍ ຂີຓາສວປຸຄ຺ຄລໍ ຊີວິຕໍ ອາຍຕິໍ ຂນ຺ຘປ຺ປວຕ຺ຕິຍາ ສພ຺ເພນ ສພ຺ພໍ ອຠາວໂຕ ນ ຕປຕິ ນ ພາຘຕິ, ວຕ຺ຕມານເມວ ວາ ຊີວິຕໍ ສພ຺ພໂສ ສງ຺ຂຕຘມ຺ມຕ຺ຕາ ສຕິປຎ຺ຎາເວປຸລ຺ລປ຺ປຕ຺ຕິຍາ ສພ຺ພຕ຺ຖ ສຕິສມ຺ປຊຎ຺ຎສມາໂຍຄໂຕ ນ ພາຘຕິ. ໂຍ ຫິ ອນ຺ຘປຸຖຸຊ຺ຊໂນ ປາປຊນເສວີ ອໂຍນິໂສມນສິກາຣພຫຸໂລ ອກຕກຸສໂລ ອກຕປຸຎ຺ໂຎ, ໂສ ‘‘ອກຕໍ ວຕ ເມ ກລ຺ຍາຓ’’ນ຺ຕິອາທິນາ ວິປ຺ປຏິສາເຣນ ຕປຕີຕິ ຕສ຺ສ ຊີວິຕໍ ຕໍ ຕປຕິ ນາມ. ອິຕເຣ ປນ ອກຕປາປາ ກຕປຸຎ຺ຎາ ກລ຺ຍາຓປຸຖຸຊ຺ຊເນນ ສທ຺ຘິໍ ສຕ຺ຕ ເສຂາ ຕປນີຍຘມ຺ມປຣິວຊ຺ຊເນນ ອຕປນີຍຘມ຺ມສມນ຺ນາຄເມນ ຈ ປຈ຺ຉານຸຕາເປນ ນ ຕປນ຺ຕີຕິ ນ ເຕສໍ ຊີວິຕໍ ຕປຕິ. ຂີຓາສເວ ປນ ວຕ຺ຕພ຺ພເມວ ນຕ຺ຖີຕິ ປວຕ຺ຕິທຸກ຺ຂວເສນ ອຕ຺ຖວຓ຺ຓນາ ກຕາ.

ມຣຓນ຺ເຕ ນ ໂສຈຕີຕິ ມຣຓສງ຺ຂາເຕ ອນ຺ເຕ ປຣິໂຍສາເນ, ມຣຓສມີເປ ວາ ນ ໂສຈຕິ ອນາຄາມິມຄ຺ເຄເນວ ໂສກສ຺ສ ສມຸຄ຺ຆາຕິຕຕ຺ຕາ. ສ ເວ ທິຏ຺ຐປໂທ ຘີໂຣ, ໂສກມຊ຺ເຌ ນ ໂສຈຕີຕິ ໂສ ອນຠິຊ຺ຌາທີນໍ ຈຕຸນ຺ນໍ ຘມ຺ມປທານໍ ນິພ຺ພານສ຺ເສວ ວາ ທິຏ຺ຐຕ຺ຕາ ທິຏ຺ຐປໂທ, ຘິຕິສມ຺ປນ຺ນຕ຺ຕາ ຘີໂຣ ຂີຓາສໂວ ໂສຈນຘມ຺ມຕ຺ຕາ ‘‘ໂສກາ’’ຕິ ລທ຺ຘນາມານໍ ອວີຕຣາຄານໍ ສຕ຺ຕານໍ, ໂສກເຫຕູນໍ ວາ ໂລກຘມ຺ມານໍ ມຊ຺ເຌ ຐຕ຺ວາປິ ນ ໂສຈຕິ.

ອິທານິສ຺ສ ສພ຺ພໂສ ໂສກເຫຕູນໍ ອຠາວໍ ທີເປຕຸໍ ‘‘ອຸຈ຺ຉິນ຺ນຠວຕຓ຺ຫສ຺ສາ’’ຕິອາທິມາຫ. ຕຕ຺ຖ ຍສ຺ສ ອຄ຺ຄມຄ຺ເຄນ ສພ຺ພໂສ ອຸຈ຺ຉິນ຺ນາ ຠວຕຓ຺ຫາ, ໂສ ອຸຈ຺ຉິນ຺ນຠວຕຓ຺ໂຫ. ຕສ຺ສ ອວເສສກິເລສານໍ ອນວເສສວູປສເມນ ສນ຺ຕຈິຕ຺ຕສ຺ສ ຂີຓາສວຠິກ຺ຂຸໂນ. ວິກ຺ຂີໂຓ ຊາຕິສໍສາໂຣຕິ ຊາຕິອາທິໂກ –

‘‘ຂນ຺ຘານຎ຺ຈ ປຏິປາຏິ, ຘາຕຸອາຍຕນານ ຈ;

ອພ຺ໂພຈ຺ຉິນ຺ນໍ ວຕ຺ຕມານາ, ‘ສໍສາໂຣ’ຕິ ປວຸຈ຺ຈຕີ’’ຕິ. –

ວຸຕ຺ຕລກ຺ຂໂຓ ສໍສາໂຣ ວິເສສໂຕ ຂີໂຓ. ຕສ຺ມາ ນຕ຺ຖິ ຕສ຺ສ ປຸນພ຺ຠໂວຕິ ຍສ຺ມາ ຕສ຺ສ ເອວຣູປສ຺ສ ອຣິຍປຸຄ຺ຄລສ຺ສ ອາຍຕິໍ ປຸນພ຺ຠໂວ ນຕ຺ຖິ, ຕສ຺ມາ ຕສ຺ສ ຊາຕິສໍສາໂຣ ຂີໂຓ. ກສ຺ມາ ປນສ຺ສ ປຸນພ຺ຠໂວ ນຕ຺ຖິ? ຍສ຺ມາ ອຸຈ຺ຉິນ຺ນຠວຕຓ຺ໂຫ ສນ຺ຕຈິຕ຺ໂຕ ຈ ໂຫຕິ, ຕສ຺ມາຕິ ອາວຕ຺ເຕຕ຺ວາ ວຕ຺ຕພ຺ພໍ. ອຖ ວາ ວິກ຺ຂີໂຓ ຊາຕິສໍສາໂຣ, ຕໂຕ ເອວ ນຕ຺ຖິ ຕສ຺ສ ປຸນພ຺ຠໂວຕິ ອຕ຺ໂຖ ໂຍເຊຕພ຺ໂພ.

ນວມສຸຕ຺ຕວຓ຺ຓນາ ນິຏ຺ຐິຕາ.