໑໐. ສາຣິປຸຕ຺ຕອຸປສມສຸຕ຺ຕວຓ຺ຓນາ

໔໐. ທສເມ ອຕ຺ຕໂນ ອຸປສມນ຺ຕິ ສາວກປາຣມີມຕ຺ຖກປ຺ປຕ຺ຕິຍາ ເຫຕຸຠູຕໍ ອຄ຺ຄມຄ຺ເຄນ ອຕ຺ຕໂນ ອນວເສສກິເລສວູປສມໍ.

ອາຍສ຺ມາ ຫິ ສາຣິປຸຕ຺ໂຕ ອນຸປສນ຺ຕກິເລສານໍ ສຕ຺ຕານໍ ຣາຄາທິກິເລສຊນິຕສນ຺ຕາປທຣຖປຣິຬາຫທຸກ຺ຂຎ຺ເຈວ ກິເລສາຠິສງ຺ຂາຣນິມິຕ຺ຕໍ ຊາຕິຊຣາພ຺ຍາຘິມຣຓໂສກປຣິເທວາທິທຸກ຺ຂຎ຺ຈ ປຈ຺ຈກ຺ຂໂຕ ທິສ຺ວາ ອຕີຕານາຄເຕປິ ເນສໍ ວຏ຺ຏມູລກທຸກ຺ຂໍ ປຣິຕຸເລຕ຺ວາ ກຣຸຓາຍມາໂນ ອຕ຺ຕນາປິ ປຸຖຸຊ຺ຊນກາເລ ອນຸຠູຕໍ ກິເລສນິມິຕ຺ຕໍ ວາ ອນປ຺ປກໍ ທຸກ຺ຂໍ ອນຸສ຺ສຣິຕ຺ວາ ‘‘ອີທິສສ຺ສ ນາມ ມຫາທຸກ຺ຂສ຺ສ ເຫຕຸຠູຕາ ກິເລສາ ອິທານິ ເມ ສຸປ຺ປຫີນາ’’ຕິ ອຕ຺ຕໂນ ກິເລສວູປສມໍ ອຠິຓ຺ຫໍ ປຈ຺ຈເວກ຺ຂຕິ. ປຈ຺ຈເວກ຺ຂນ຺ໂຕ ຈ ‘‘ອິເມ ເອຕ຺ຕກາ ກິເລສາ ໂສຕາປຕ຺ຕິມຄ຺ເຄນ ອຸປສມິຕາ, ເອຕ຺ຕກາ ສກທາຄາມິມຄ຺ເຄນ, ເອຕ຺ຕກາ ອນາຄາມິມຄ຺ເຄນ, ເອຕ຺ຕກາ ອຣຫຕ຺ຕມຄ຺ເຄນ ອຸປສມິຕາ’’ຕິ ຕໍຕໍມຄ຺ຄຎາເຓຫິ ໂອຘິໂສ ກິເລສານໍ ອຸປສມິຕຠາວໍ ປຈ຺ຈເວກ຺ຂຕິ, ເຕນ ວຸຕ຺ຕໍ – ‘‘ອຕ຺ຕໂນ ອຸປສມໍ ປຈ຺ຈເວກ຺ຂມາໂນ’’ຕິ.

ອປເຣ ‘‘ເຖໂຣ ອຣຫຕ຺ຕຜລສມາປຕ຺ຕິໍ ສມາປຊ຺ຊິຕ຺ວາ ຕໍ ປຈ຺ຈເວກ຺ຂິຕ຺ວາ ‘ອິມສ຺ສ ວຕາຍໍ ສນ຺ຕປຓີຕຠາໂວ ອຈ຺ຈນ຺ຕສນ຺ຕາຍ ອສງ຺ຂຕາຍ ຘາຕຸຍາ ອາຣມ຺ມຓໂຕ, ສຍຎ຺ຈ ສມ຺ມເທວ ກິເລສວູປສມໂຕ’ຕິ ເອວໍ ອຠິຓ຺ຫໍ ອຸປສມໍ ປຈ຺ຈເວກ຺ຂຕີ’’ຕິ ວທນ຺ຕິ. ອຎ຺ເຎ ປນ ‘‘ອນວເສສກິເລສານໍ ອຸປສມປຣິໂຍສາເນ ຊາຕໍ ອຄ຺ຄຜລເມເວຕ຺ຖ ອຸປສໂມ ນາມ, ຕໍ ປຈ຺ຈເວກ຺ຂມາໂນ ນິສິນ຺ໂນ’’ຕິ.

ເອຕມຕ຺ຖໍ ວິທິຕ຺ວາຕິ ຍທິທໍ ອາຍສ຺ມໂຕ ສາຣິປຸຕ຺ຕສ຺ສ ມຫາປຎ຺ຎຕາທິເຫຕຸຠູຕໍ ສາວເກສຸ ອນຎ຺ຎສາຘາຣຓໍ ກິເລສປ຺ປຫານໍ ອຄ຺ຄຜລໍ ວາ ອຸປສມປຣິຍາເຍນ ວຸຕ຺ຕໍ, ຕສ຺ສ ປຈ຺ຈເວກ຺ຂຓສງ຺ຂາຕໍ ອຕ຺ຖໍ ສພ຺ພາກາຣໂຕ ວິທິຕ຺ວາ ຕທນຸຠາວທີປກໍ ອິມໍ ອຸທານໍ ອຸທາເນສິ.

ຕຕ຺ຖ ອຸປສນ຺ຕສນ຺ຕຈິຕ຺ຕສ຺ສາຕິ ອຸປສນ຺ຕເມວ ຫຸຕ຺ວາ ສນ຺ຕໍ ຈິຕ຺ຕໍ ເອຕສ຺ສາຕິ ອຸປສນ຺ຕສນ຺ຕຈິຕ຺ໂຕ. ສມາປຕ຺ຕິຍາ ວິກ຺ຂມ຺ຠເນນ ຫິ ອຸປສນ຺ຕກິເລສຕ຺ຕາ ອຸປສນ຺ຕຈິຕ຺ຕໍ ນ ສພ຺ພຖາ ‘‘ອຸປສນ຺ຕສນ຺ຕ’’ນ຺ຕິ ວຸຈ຺ຈຕິ ຕສ຺ສ ອຸປສມສ຺ສ ອນຈ຺ຈນ຺ຕິກຠາວໂຕ, ນ ຕຖາ ອຄ຺ຄມຄ຺ເຄນ. ເຕນ ປນ ອຈ຺ຈນ຺ຕເມວ ກິເລສານໍ ສມຸຈ຺ຉິນ຺ນຕ຺ຕາ ອຣຫໂຕ ຈິຕ຺ຕໍ ປຸນ ກິເລສານໍ ອນຸປສເມຕພ຺ພຕາຍ ສມຖວິປສ຺ສນາເຫຏ຺ຐິມມຄ຺ເຄຫິ ອຸປສນ຺ຕກິເລສໍ ຫຸຕ຺ວາ ອຈ຺ຈນ຺ຕສນ຺ຕຠາວໂຕວ ‘‘ອຸປສນ຺ຕສນ຺ຕ’’ນ຺ຕິ ວຸຈ຺ຈຕິ. ເຕນ ວຸຕ຺ຕໍ – ‘‘ອຸປສນ຺ຕເມວ ຫຸຕ຺ວາ ສນ຺ຕໍ ຈິຕ຺ຕໍ ເອຕສ຺ສາຕິ ອຸປສນ຺ຕສນ຺ຕຈິຕ຺ໂຕ’’ຕິ. ອຸປສນ຺ຕນ຺ຕິ ວາ ອຸປສໂມ ວຸຈ຺ຈຕິ, ຕສ຺ມາ ‘‘ອຸປສນ຺ຕສນ຺ຕຈິຕ຺ຕສ຺ສາ’’ຕິ ອຈ຺ຈນ຺ຕູປສເມນ ສນ຺ຕຈິຕ຺ຕສ຺ສາຕິ ອຕ຺ໂຖ.

ອຖ ວາ ສຕິປິ ສພ຺ເພສໍ ຂີຓາສວານໍ ອນວເສສກິເລສວູປສເມ ສາວກປາຣມີຎາຓສ຺ສ ປນ ມຕ຺ຖກປ຺ປຕ຺ຕິເຫຕຸຠູໂຕ ສາວເກສຸ ອນຎ຺ຎສາຘາຣໂຓ ສວິເສໂສ ຘມ຺ມເສນາປຕິໂນ ກິເລສວູປສໂມຕິ ທສ຺ເສຕຸໍ ສຕ຺ຖາ ອຸປສນ຺ຕສທ຺ເທນ ວິເສເສຕ຺ວາ ອາຫ ‘‘ອຸປສນ຺ຕສນ຺ຕຈິຕ຺ຕສ຺ສາ’’ຕິ.

ຕຕ຺ຣາຍມຕ຺ໂຖ – ຠຸສໍ ທຬ຺ຫໍ ວາ ສນ຺ຕໍ ອຸປສນ຺ຕໍ, ເຕນ ອຸປສນ຺ເຕນ ອຸປສນ຺ຕເມວ ຫຸຕ຺ວາ ສນ຺ຕໍ ອຸປສນ຺ຕສນ຺ຕໍ, ຕາທິສໍ ຈິຕ຺ຕໍ ເອຕສ຺ສາຕິ ສພ຺ພໍ ປຸຣິມສທິສເມວ. ຕຖາ ເຫສ ຠຄວຕາ – ‘‘ສາຣິປຸຕ຺ໂຕ, ຠິກ຺ຂເວ, ມຫາປຎ຺ໂຎ ປຸຖຸປຎ຺ໂຎ ຫາສປຎ຺ໂຎ ຊວນປຎ຺ໂຎ ຕິກ຺ຂປຎ຺ໂຎ ນິພ຺ເພຘິກປຎ຺ໂຎ’’ຕິອາທິນາ (ມ. ນິ. ໓.໙໓) ອເນກປຣິຍາເຍນ ວຓ຺ຓິໂຕ ໂຖມິໂຕ. ເນຕ຺ຕິຈ຺ຉິນ຺ນສ຺ສາຕິ ເນຕ຺ຕິ ວຸຈ຺ຈຕິ ຠວຕຓ຺ຫາ ສໍສາຣສ຺ສ ນຍນໂຕ, ສາ ເນຕ຺ຕິ ຉິນ຺ນາ ເອຕສ຺ສາຕິ ເນຕ຺ຕິຈ຺ຉິນ຺ໂນ. ຕສ຺ສ ເນຕ຺ຕິຈ຺ຉິນ຺ນສ຺ສ, ປຫີນຕຓ຺ຫສ຺ສາຕິ ອຕ຺ໂຖ. ມຸຕ຺ໂຕ ໂສ ມາຣພນ຺ຘນາຕິ ໂສ ເອວໍວິໂຘ ປຣິກ຺ຂີຓຠວສໍໂຍຊໂນ ສພ຺ພສ຺ມາ ມາຣພນ຺ຘນໂຕ ມຸຕ຺ໂຕ, ນ ຕສ຺ສ ມາຣພນ຺ຘນໂມຈນາຍ ກຣຓີຍໍ ອຕ຺ຖິ, ຕສ຺ມາ ຘມ຺ມເສນາປຕິ ອຕ຺ຕໂນ ອຸປສມໍ ປຈ຺ຈເວກ຺ຂຕີຕິ. ເສສໍ ວຸຕ຺ຕນຍເມວ.

ທສມສຸຕ຺ຕວຓ຺ຓນາ ນິຏ຺ຐິຕາ.

ນິຏ຺ຐິຕາ ຈ ເມຆິຍວຄ຺ຄວຓ຺ຓນາ.