໘. ປິຓ຺ຑປາຕິກສຸຕ຺ຕວຓ຺ຓນາ

໒໘. ອຏ຺ຐເມ ປຈ຺ຉາຠຕ຺ຕນ຺ຕິ ເອກາສນິກຂລຸປຈ຺ຉາຠຕ຺ຕິການໍ ປາໂຕວ ຠຸຕ຺ຕານໍ ອນ຺ໂຕມຊ຺ຌນ຺ຫິໂກປິ ປຈ຺ຉາຠຕ຺ຕເມວ, ອິຘ ປນ ປກຕິຠຕ຺ຕສ຺ເສວ ປຈ຺ຉໂຕ ປຈ຺ຉາຠຕ຺ຕນ຺ຕິ ເວທິຕພ຺ພໍ. ປິຓ຺ຑປາຕປຏິກ຺ກນ຺ຕານນ຺ຕິ ປິຓ຺ຑປາຕໂຕ ປຏິກ຺ກນ຺ຕານໍ, ປິຓ຺ຑປາຕໍ ປຣິເຍສິຕ຺ວາ ຠຕ຺ຕກິຈ຺ຈສ຺ສ ນິຏ຺ຐາປນວເສນ ຕໂຕ ນິວຕ຺ຕານໍ. ກເຣຣິມຓ຺ຑລມາເຬຕິ ເອຕ຺ຖ ກເຣຣີຕິ ວຣຸຓຣຸກ຺ຂສ຺ສ ນາມໍ. ໂສ ກິຣ ຄນ຺ຘກຸຏິຍາ ມຓ຺ຑປສ຺ສ ສາລາຍ ຈ ອນ຺ຕເຣ ໂຫຕິ, ເຕນ ຄນ຺ຘກຸຏີປິ ‘‘ກເຣຣິກຸຏິກາ’’ຕິ ວຸຈ຺ຈຕິ, ມຓ຺ຑໂປປິ ສາລາປິ ‘‘ກເຣຣິມຓ຺ຑລມາໂຬ’’ຕິ. ຕສ຺ມາ ກເຣຣິຣຸກ຺ຂສ຺ສ ອວິທູເຣ ກເຕ ນິສີທນສາລສງ຺ຂາເຕ ມຓ຺ຑລມາເຬ. ຕິຓປຓ຺ຓຈ຺ຉທນໍ ອໂນວສ຺ສກໍ ‘‘ມຓ຺ຑລມາໂຬ’’ຕິ ວທນ຺ຕິ, ອຕິມຸຕ຺ຕກາທິລຕາມຓ຺ຑໂປ ‘‘ມຓ຺ຑລມາໂຬ’’ຕິ ອປເຣ.

ກາເລນ ກາລນ຺ຕິ ກາເລ ກາເລ ອນ຺ຕຣນ຺ຕຣາ, ຕສ຺ມິໍ ຕສ຺ມິໍ ສມເຍຕິ ອຕ຺ໂຖ. ມນາປິເກຕິ ມນວຑ຺ຒເກ, ປິຍຣູເປ ອິຏ຺ເຐຕິ ອຕ຺ໂຖ. ອິຏ຺ຐານິຏ຺ຐຠາໂວ ຈ ປຸຄ຺ຄລວເສນ ຈ ທ຺ວາຣວເສນ ຈ ຄເຫຕພ຺ໂພ. ເອກຈ຺ຈສ຺ສ ຫິ ອິຏ຺ຐາຠິມໂຕ ເອກຈ຺ຈສ຺ສ ອນິຏ຺ໂຐ ໂຫຕິ, ເອກຈ຺ຈສ຺ສ ອນິຏ຺ຐາຠິມໂຕ ເອກຈ຺ຈສ຺ສ ອິຏ຺ໂຐ. ຕຖາ ເອກສ຺ສ ທ຺ວາຣສ຺ສ ອິຏ຺ໂຐ ອຎ຺ຎສ຺ສ ອນິຏ຺ໂຐ. ວິປາກວເສນ ປເນຕ຺ຖ ວິນິຈ຺ຉໂຍ ເວທິຕພ຺ໂພ. ກຸສລວິປາໂກ ຫິ ເອກນ຺ເຕນ ອິຏ຺ໂຐ, ອກຸສລວິປາໂກ ອນິຏ຺ໂຐ ເອວາຕິ. ຈກ຺ຂຸນາ ຣູເປ ປສ຺ສິຕຸນ຺ຕິ ຄາມໍ ປິຓ຺ຑາຍ ປວິຏ຺ໂຐ ອຸປາສເກຫິ ເຄຫໍ ປເວເສຕ຺ວາ ປູຊາສກ຺ກາຣກຣຓຕ຺ຖໍ ອຸປນີເຕສຸ ອາສນວິຕານາທີສຸ ນານາວິຣາຄສມຸຊ຺ຊລວຓ຺ຓສງ຺ຂາເຕ ຣຊນີເຍ ອຎ຺ເຎ ຈ ສວິຎ຺ຎາຓກຣູເປ ຈກ຺ຂຸທ຺ວາຣິກວິຎ຺ຎາເຓຫິ ປສ຺ສິຕຸໍ. ສທ຺ເທຕິ ຕເຖວ ອິສ຺ສຣຊນານໍ ເຄຫໍ ປວິຏ຺ໂຐ ເຕສໍ ປຍຸຕ຺ເຕ ຄີຕວາທິຕສທ຺ເທ ໂສຕຸໍ. ຄນ຺ເຘຕິ ຕຖາ ເຕຫິ ປູຊາສກ຺ກາຣວເສນ ອຸປນີເຕ ປຸປ຺ຜຘູມາທິຄນ຺ເຘ ຆາຍິຕຸໍ. ຣເສຕິ ເຕຫິ ທິນ຺ນາຫາຣປຣິໂຠເຄ ນານຄ຺ຄຣເສ ສາຍິຕຸໍ. ໂຜຏ຺ຐພ຺ເພຕິ ມຫຄ຺ຆປຈ຺ຈຕ຺ຖຣເຓສຸ ອາສເນສຸ ນິສິນ຺ນກາເລ ສຸຂສມ຺ຜສ຺ເສ ໂຜຏ຺ຐພ຺ເພ ຜຸສິຕຸໍ. ເອວຎ຺ຈ ປຎ຺ຈທ຺ວາຣິກອິຏ຺ຐາຣມ຺ມຓປ຺ປຏິລາຠໍ ກິຕ຺ເຕຕ຺ວາ ອິທານິ ມໂນທ຺ວາຣິກອິຏ຺ຐາຣມ຺ມຓປ຺ປຏິລາຠໍ ທສ຺ເສຕຸໍ ‘‘ສກ຺ກໂຕ’’ຕິອາທິ ວຸຕ຺ຕໍ. ຕໍ ເຫຏ຺ຐາ ວຸຕ຺ຕຕ຺ຖເມວ.

ກິໍ ປນ ອປິຓ຺ຑປາຕິການໍ ອຍໍ ນໂຍ ນ ລພ຺ຠຕີຕິ? ລພ຺ຠຕິ. ເຕສມ຺ປິ ຫິ ນິມນ຺ຕນສລາກຠຕ຺ຕາທິອຕ຺ຖໍ ຄາມໍ ຄຕກາເລ ອຸຬາຣວິຠວາ ອຸປາສກາ ຕຖາ ສກ຺ກາຣສມ຺ມານໍ ກໂຣນ຺ຕິເຍວ, ຕໍ ປນ ອນິຍຕໍ. ປິຓ຺ຑປາຕິການໍ ປນ ຕທາ ນິຈ຺ຈເມວ ຕຕ຺ຖ ປູຊາສກ຺ກາຣໍ ກຣິຍມານໍ ທິສ຺ວາ, ສກ຺ກາຣຄຣຸຕາຍ ອນິສ຺ສຣຓມຄ຺ເຄ ຐຕ຺ວາ, ອໂຍນິໂສມນສິກາຣວເສນ ເຕ ຠິກ຺ຂູ ເອວມາຫໍສຸ. ເຕເນວາຫ – ‘‘ຫນ຺ທາວຸໂສ, ມຍມ຺ປິ ປິຓ຺ຑປາຕິກາ ໂຫມາ’’ຕິອາທິ.

ຕຕ຺ຖ ຫນ຺ທາຕິ ໂວສ຺ສຄ຺ຄຕ຺ເຖ ນິປາໂຕ. ລຈ຺ຉາມາຕິ ລຠິສ຺ສາມ. ເຕນຸປສງ຺ກມີຕິ ຕຕ຺ຖ ສຸຣຠິຄນ຺ຘກຸຏິຍໍ ນິສິນ຺ໂນ ເຕສໍ ຕໍ ກຖາສລ຺ລາປໍ ສຸຕ຺ວາ ‘‘ອິເມ ຠິກ຺ຂູ ມາທິສສ຺ສ ນາມ ພຸທ຺ຘສ຺ສ ສາສເນ ປພ຺ພຊິຕ຺ວາ ມຍາ ສທ຺ຘິໍ ເອກວິຫາເຣ ວສນ຺ຕາປິ ເອວໍ ອໂຍນິໂສມນສິກາຣວເສນ ກຖໍ ປວຕ຺ເຕນ຺ຕິ, ສລ຺ເລເຂ ນ ວຕ຺ຕນ຺ຕິ, ຫນ຺ທ ເຕ ຕໂຕ ນິວາເຣຕ຺ວາ ສລ຺ເລຂວິຫາເຣ ນິໂຍເຊສ຺ສາມີ’’ຕິ ມຓ຺ຑລມາຬໍ ອຸປສງ຺ກມິ. ເສສໍ ເຫຏ຺ຐາ ວຸຕ຺ຕນຍເມວ.

ເອຕມຕ຺ຖໍ ວິທິຕ຺ວາຕິ ‘‘ອປ຺ປິຈ຺ຉຕາສນ຺ຕຸຏ຺ຐິຕາສລ຺ເລຂານໍ ວເສນ ກິເລເສ ຘຸນິຕຸໍ ຕຓ຺ຫໍ ວິໂສເສຕຸໍ ປຏິປນ຺ໂນຕິ ປິຓ຺ຑປາຕິກສ຺ສ ສໂຕ ເທວາ ປິຫຍນ຺ຕິ, ຕສ຺ສ ປຏິປຕ຺ຕິຍາ ອາທຣຊາຕາ ປິຍາຍນ຺ຕິ, ນ ອິໂຕ ອຎ຺ຎຖາ’’ຕິ ອິມມຕ຺ຖໍ ວິທິຕ຺ວາ ຕທຕ຺ຖທີປນໍ ອິມໍ ອຸທານໍ ອຸທາເນສິ.

ຕຕ຺ຖ ໂນ ເຈ ສທ຺ທສິໂລກນິສ຺ສິໂຕຕິ ‘‘ອໂຫ ອຍ຺ໂຍ ອປ຺ປິຈ຺ໂຉ ສນ຺ຕຸຏ຺ໂຐ ປຣມສລ຺ເລຂວຸຕ຺ຕີ’’ຕິອາທິນາ ປເຣຫິ ກິຕ຺ຕິຕພ຺ພສທ຺ທສງ຺ຂາຕໍ ສິໂລກໍ. ຕຓ຺ຫາຍ ນິສ຺ສິໂຕ ນ ໂຫຕິ ເຈຕິ ອຕ຺ໂຖ. ສທ຺ໂທ ວາ ສມ຺ມຸຂາ ວຓ຺ຓຠຓນຖຸຕິໂຆໂສ, ສິໂລໂກ ປຣມ຺ມຸຂຠູຕາ ປສໍສາ ປຕ຺ຖຏຍສຕາ ວາ. ເສສໍ ອນນ຺ຕຣສຸຕ຺ເຕ ວຸຕ຺ຕນຍເມວ.

ອຏ຺ຐມສຸຕ຺ຕວຓ຺ຓນາ ນິຏ຺ຐິຕາ.