໖. ປິລິນ຺ທວຈ຺ຉສຸຕ຺ຕວຓ຺ຓນາ

໒໖. ຉຏ຺ເຐ ປິລິນ຺ທວຈ຺ໂຉຕິ ປິລິນ຺ທາຕິສ຺ສ ນາມໍ, ວຈ຺ໂຉຕິ ໂຄຕ຺ຕວເສນ ເຖຣໍ ສຎ຺ຊານນ຺ຕິ. ວສລວາເທນ ສມຸທາຈຣຕີຕິ ‘‘ເອຫິ, ວສລ, ອເປຫິ, ວສລາ’’ຕິອາທິນາ ຠິກ຺ຂູ ວສລວາເທນ ໂວຫຣຕິ ອາລປຕິ. ສມ຺ພຫຸລາ ຠິກ຺ຂູຕິ ພຫູ ຠິກ຺ຂູ. ເຕ ເຖຣໍ ຕຖາ ສມຸທາຈຣນ຺ຕໍ ທິສ຺ວາ ‘‘ອຣຫາວ ສມາໂນ ອປ຺ປຫີນວາສນຕ຺ຕາ ເອວໍ ຠຓຕີ’’ຕິ ອຊານນ຺ຕາ ‘‘ໂທສນ຺ຕໂຣ ມຎ຺ເຎ ອຍໍ ເຖໂຣ ເອວໍ ສມຸທາຈຣຕີ’’ຕິ ຈິນ຺ເຕຕ຺ວາ ອຸລ຺ລປນາຘິປ຺ປາຍາ ຕໍ ຕໂຕ ວຸຏ຺ຐາເປຕຸໍ ຠຄວໂຕ ອາໂຣເຈສຸໍ. ເຕນ ວຸຕ຺ຕໍ – ‘‘ອາຍສ຺ມາ, ຠນ຺ເຕ, ປິລິນ຺ທວຈ຺ໂຉ ຠິກ຺ຂູ ວສລວາເທນ ສມຸທາຈຣຕີ’’ຕິ. ເກຈິ ປນາຫຸ – ‘‘ອິມໍ ເຖຣໍ ຠິກ຺ຂູ ‘ອຣຫາ’ຕິ ສຎ຺ຊານນ຺ຕິ, ອຍຎ຺ຈ ຠິກ຺ຂູ ຜຣຸສວຈເນນ ເອວໍ ສມຸທາຈຣຕິ, ‘ອຠູໂຕ ເອວ ນຸ ໂຂ ອິມສ຺ມິໍ ອຸຕ຺ຕຣິມນຸສ຺ສຘມ຺ໂມ’ຕິ ວາສນາວເສນ ຕສ຺ສ ຕຖາ ສມຸທາຈາຣໍ ອຊານນ຺ຕາ ອຣິຍຠາວຎ຺ຈສ຺ສ ອສທ຺ທຫນ຺ຕາ ອຸຊ຺ຌານສຎ຺ຎິໂນ ຠຄວໂຕ ຕມຕ຺ຖໍ ອາໂຣເຈສຸ’’ນ຺ຕິ. ຠຄວາ ເຖຣສ຺ສ ໂທສນ຺ຕຣາຠາວໍ ປກາເສຕຸກາໂມ ເອເກນ ຠິກ຺ຂຸນາ ຕໍ ປກ຺ໂກສາເປຕ຺ວາ ສມ຺ມຸຂາ ຕສ຺ສ ‘‘ປຸພ຺ພາຈິຓ຺ຓວເສນາຍໍ ຕຖາ ສມຸທາຈຣຕິ, ນ ຜຣຸສວຈນາຘິປ຺ປາໂຍ’’ຕິ ອາຫ. ເຕນ ວຸຕ຺ຕໍ – ‘‘ອຖ ໂຂ ຠຄວາ ອຎ຺ຎຕຣໍ ຠິກ຺ຂຸໍ ອາມນ຺ເຕສີ’’ຕິອາທິ.

ຕຕ຺ຖ ປຸພ຺ເພນິວາສໍ ມນສິ ກຣິຕ຺ວາຕິ ສຕ຺ຖາ ‘‘ສຈ຺ຈໍ ກິຣ ຕ຺ວໍ, ວຈ຺ຉ, ຠິກ຺ຂູ ວສລວາເທນ ສມຸທາຈຣສີ’’ຕິ ເຖຣໍ ປຸຈ຺ຉິຕ຺ວາ ເຕນ ‘‘ເອວໍ, ຠນ຺ເຕ’’ຕິ ວຸຕ຺ເຕ ‘‘ອຍໍ ວຈ຺ໂຉ ກິເລສວາສນາຍ ວສລວາທໍ ນ ປຣິຈ຺ຈຊຕິ, ກິໍ ນຸ ໂຂ ອຕີເຕສຸປິ ອຕ຺ຕຠາເວສຸ ພ຺ຣາຫ຺ມຓຊາຕິໂກ ອໂຫສີ’’ຕິ ອາວຊ຺ເຊນ຺ໂຕ ປຸພ຺ເພນິວາສຎາເຓນ ສພ຺ພຎ຺ຎຸຕຎ຺ຎາເຓນ ວາ ຕສ຺ສ ປຸພ຺ເພນິວາສໍ ອຕີຕາສຸ ຊາຕີສຸ ນິວຸຕ຺ຖກ຺ຂນ຺ຘສນ຺ຕານໍ ມນສິ ກຣິຕ຺ວາ ຫຕ຺ຖຕເລ ຐປິຕໍ ອາມລກໍ ວິຍ ປຈ຺ຈກ຺ຂກຣຓວເສນ ອຕ຺ຕໂນ ມນສິ ກຕ຺ວາ. ຠິກ຺ຂູ ອາມນ຺ເຕສີຕິ ເຕ ຠິກ຺ຂູ ສຎ຺ຎາເປຕຸໍ ອາລປິ, ອຠາສິ. ເຕນ ວຸຕ຺ຕໍ ‘‘ມາ ໂຂ ຕຸມ຺ເຫ, ຠິກ຺ຂເວ’’ຕິອາທິ.

ຕຕ຺ຖ ມາຕິ ປຏິເສເຘ ນິປາໂຕ, ຕສ຺ສ ‘‘ອຸຊ຺ຌາຍິຕ຺ຖາ’’ຕິ ອິມິນາ ສມ຺ພນ຺ໂຘ. ມາ ອຸຊ຺ຌາຍິຕ຺ຖາຕິ ມາ ເຫຏ຺ຐາ ກຕ຺ວາ ຈິນ຺ຕຍິຕ຺ຖ, ໂອໂລກຍິຕ຺ຖາຕິ ອຕ຺ໂຖ. ວຈ຺ຉສ຺ສ ຠິກ຺ຂຸໂນຕິ ຈ ອຸຊ຺ຌາຍນສ຺ສ ອຸສູຍນຕ຺ຖຕ຺ຕາ ສມ຺ປທານວຈນໍ. ອິທານິສ຺ສ ອນຸຊ຺ຌາຍິຕພ຺ເພ ກາຣຓໍ ທສ຺ເສນ຺ໂຕ ‘‘ນ, ຠິກ຺ຂເວ, ວຈ຺ໂຉ ໂທສນ຺ຕໂຣ ຠິກ຺ຂູ ວສລວາເທນ ສມຸທາຈຣຕີ’’ຕິ ອາຫ. ຕສ຺ສຕ຺ໂຖ – ຠິກ຺ຂເວ, ອຍໍ ວຈ຺ໂຉ ໂທສນ຺ຕໂຣ ໂທສຈິຕ຺ໂຕ ໂທເສນ ພ຺ຍາປາເທນ ທູສິຕຈິຕ຺ໂຕ ຫຸຕ຺ວາ ຠິກ຺ຂູ ວສລວາເທນ ນ ສມຸທາຈຣຕິ, ມຄ຺ເຄເນວ ຈສ຺ສ ພ຺ຍາປາໂທ ສມຸຄ຺ຆາຕິໂຕ. ເອວໍ ອໂທສນ຺ຕຣຕ຺ເຕປິ ຕສ຺ສ ຕຖາ ສມຸທາຈາຣສ຺ສ ປຸຣິມຊາຕິສິທ຺ຘໍ ກາຣຓໍ ທສ຺ເສນ຺ໂຕ ‘‘ວຈ຺ຉສ຺ສ, ຠິກ຺ຂເວ’’ຕິອາທິມາຫ.

ຕຕ຺ຖ ອພ຺ໂພກິຓ຺ຓານີຕິ ຂຕ຺ຕິຍາທິຊາຕິອນ຺ຕເຣຫິ ອໂວມິສ຺ສານິ ອນນ຺ຕຣິຕານິ. ປຎ຺ຈ ຊາຕິສຕານິ ພ຺ຣາຫ຺ມຓກຸເລ ປຈ຺ຈາຊາຕານີຕິ ສພ຺ພານິ ຕານິ ວຈ຺ຉສ຺ສ ປຎ຺ຈ ຊາຕິສຕານິ ປຏິປາຏິຍາ ພ຺ຣາຫ຺ມຓກຸເລ ເອວ ຊາຕານິ, ອເຫສຸນ຺ຕິ ອຕ຺ໂຖ. ໂສ ຕສ຺ສ ວສລວາໂທ ທີຆຣຕ຺ຕໍ ສມຸທາຈິຓ຺ໂຓຕິ ໂຍ ເອຕຣຫິ ຂີຓາສເວນປິ ສຕາ ປວຕ຺ຕິຍຕິ, ໂສ ຕສ຺ສ ວຈ຺ຉສ຺ສ ຠິກ຺ຂຸໂນ ວສລວາໂທ ທີຆຣຕ຺ຕໍ ອິໂຕ ຊາຕິໂຕ ປຏ຺ຐາຍ ອຸທ຺ຘໍ ອາໂຣຫນວເສນ ປຎ຺ຈຊາຕິສຕມຕ຺ຕໍ ກາລໍ ພ຺ຣາຫ຺ມຓຊາຕິກຕ຺ຕາ ສມຸທາຈິຓ຺ໂຓ ສມຸທາຈຣິໂຕ ອໂຫສິ. ພ຺ຣາຫ຺ມຓາ ຫິ ຊາຕິສິທ຺ເຘນ ມາເນນ ຖທ຺ຘາ ອຎ຺ຎໍ ວສລວາເທນ ສມຸທາຈຣນ຺ຕິ. ‘‘ອຊ຺ຌາຈິຓ຺ໂຓ’’ຕິປິ ປຐນ຺ຕິ, ໂສ ເອວ ອຕ຺ໂຖ. ເຕນາຕິ ເຕນ ທີຆຣຕ຺ຕໍ ຕຖາ ສມຸທາຈິຓ຺ຓຠາເວນ, ເອເຕນສ຺ສ ຕຖາ ສມຸທາຈາຣສ຺ສ ກາຣຓໍ ວາສນາຕິ ທສ຺ເສຕິ. ກາ ປນາຍໍ ວາສນາ ນາມ? ຍໍ ກິເລສຣຫິຕສ຺ສາປິ ສນ຺ຕາເນ ອປ຺ປຫີນກິເລສານໍ ສມາຈາຣສທິສສມາຈາຣເຫຕຸຠູຕໍ, ອນາທິກາລຠາວິເຕຫິ ກິເລເສຫິ ອາຫິຕໍ ສາມຕ຺ຖິຍມຕ຺ຕໍ, ຕຖາຣູປາ ອຘິມຸຕ຺ຕີຕິ ວທນ຺ຕິ. ຕໍ ປເນຕໍ ອຠິນີຫາຣສມ຺ປຕ຺ຕິຍາ ເຎຍ຺ຍາວຣຓປ຺ປຫານວເສນ ຍຕ຺ຖ ກິເລສາ ປຫີນາ, ຕຕ຺ຖ ຠຄວໂຕ ສນ຺ຕາເນ ນຕ຺ຖິ. ຍຕ຺ຖ ປນ ຕຖາ ກິເລສາ ນ ປຫີນາ, ຕຕ຺ຖ ສາວການໍ ປຈ຺ເຈກພຸທ຺ຘານຎ຺ຈ ສນ຺ຕາເນ ອຕ຺ຖິ, ຕໂຕ ຕຖາຄໂຕວ ອນາວຣຓຎາຓທສ຺ສໂນ.

ເອຕມຕ຺ຖໍ ວິທິຕ຺ວາຕິ ເອຕໍ ອາຍສ຺ມໂຕ ປິລິນ຺ທວຈ຺ຉສ຺ສ ສຕິປິ ວສລສມຸທາຈາເຣ ໂທສນ຺ຕຣາຠາວສງ຺ຂາຕໍ ອຕ຺ຖໍ ວິທິຕ຺ວາ. ອິມໍ ອຸທານນ຺ຕິ ຕສ຺ສ ອຄ຺ຄຜລາຘິຄມວິຠາວນໍ ອິມໍ ອຸທານໍ ອຸທາເນສິ.

ຕຕ຺ຖ ຍມ຺ຫິ ນ ມາຍາ ວສຕິ ນ ມາໂນຕິ ຍສ຺ມິໍ ອຣິຍປຸຄ຺ຄເລ ສນ຺ຕໂທສປ຺ປຏິຈ຺ຉາທນລກ຺ຂຓາ ມາຍາ, ‘‘ເສຍ຺ໂຍຫມສ຺ມີ’’ຕິອາທິນາ ສມ຺ປຄ຺ຄຫວເສນ ປວຕ຺ໂຕ ອຸຓ຺ຓຕິລກ຺ຂໂຓ ມາໂນ ຈ ນ ວສຕິ, ມຄ຺ເຄນ ສມຸຄ຺ຆາຕິຕຕ຺ຕາ ນ ປວຕ຺ຕຕິ ນ ອຸປ຺ປຊ຺ຊຕິ. ໂຍ ວີຕໂລໂຠ ອມໂມ ນິຣາໂສຕິ ໂຍ ຈ ຣາຄາທິປຣິຍາຍວເສນ ປວຕ຺ຕສ຺ສ ອາຣມ຺ມຓຄ຺ຄຫຓລກ຺ຂຓສ຺ສ ໂລຠສ຺ສ ສພ຺ພຖາ ວິຄຕຕ຺ຕາ ວີຕໂລໂຠ, ຕໂຕ ເອວ ຣູປາທີສຸ ກຕ຺ຖຈິ ມມາຍນາຠາວໂຕ ອມໂມ ອປຣິຄ຺ຄໂຫ, ອນາຄຕານມ຺ປິ ຠວາທີນໍ ອນາສີສນໂຕ ນິຣາໂສ. ປນຸຓ຺ຓໂກໂຘຕິ ກຸຊ຺ຌນລກ຺ຂຓສ຺ສ ໂກຘສ຺ສ ອນາຄາມິມຄ຺ເຄນ ສພ຺ພໂສ ປຫີນຕ຺ຕາ ປນຸຓ຺ຓໂກໂຘ ສມຸຈ຺ຉິນ຺ນາຆາໂຕ. ອຠິນິພ຺ພຸຕຕ຺ໂຕຕິ ໂຍ ເອວໍ ມາຍາມານໂລຠໂກຘານໍ ສມຸຄ຺ຆາເຕນ ຕເທກຏ຺ຐຕາຍ ສພ຺ພສ຺ສ ສໍກິເລສປກ຺ຂສ຺ສ ສຸປ຺ປຫີນຕ຺ຕາ ສພ຺ພໂສ ກິເລສປຣິນິພ຺ພາເນນ ອຠິນິພ຺ພຸຕຈິຕ຺ໂຕ ສີຕິຠູໂຕ. ໂສ ພ຺ຣາຫ຺ມໂຓ ໂສ ສມໂຓ ສ ຠິກ຺ຂູຕິ ໂສ ເອວຣູໂປ ຂີຓາສໂວ ສພ຺ພໂສ ພາຫິຕປາປຕ຺ຕາ ພ຺ຣາຫ຺ມໂຓ, ໂສ ເອວ ສມິຕປາປຕ຺ຕາ ສມຈຣິຍາຍ ຈ ສມໂຓ, ໂສ ເອວ ຈ ສພ຺ພໂສ ຠິນ຺ນກິເລສຕ຺ຕາ ຠິກ຺ຂຸ ນາມ. ເອວໍຠູໂຕ ຈ, ຠິກ຺ຂເວ, ວຈ຺ໂຉ ໂສ ກຖໍ ໂທສນ຺ຕໂຣ ກິຎ຺ຈິ ກາຍກມ຺ມາທິໍ ປວຕ຺ເຕຍ຺ຍ, ເກວລໍ ປນ ວາສນາຍ ອປ຺ປຫີນຕ຺ຕາ ວສລວາເທນ ສມຸທາຈຣຕີຕິ.

ຉຏ຺ຐສຸຕ຺ຕວຓ຺ຓນາ ນິຏ຺ຐິຕາ.