໑໐. ຠທ຺ທິຍສຸຕ຺ຕວຓ຺ຓນາ

໒໐. ທສເມ ອນຸປິຍາຍນ຺ຕິ ເອວໍ ນາມເກ ນຄເຣ. ອມ຺ພວເນຕິ ຕສ຺ສ ນຄຣສ຺ສ ອວິທູເຣ ມລ຺ລຣາຊູນໍ ເອກໍ ອມ຺ພວນໍ ອໂຫສິ, ຕຕ຺ຖ ມລ຺ລຣາຊູຫິ ຠຄວໂຕ ວິຫາໂຣ ກາຣິໂຕ, ໂສ ‘‘ອມ຺ພວນ’’ນ຺ຕ຺ເວວ ວຸຈ຺ຈຕິ. ອນຸປິຍໍ ໂຄຈຣຄາມໍ ກຕ຺ວາ ຕຕ຺ຖ ຠຄວາ ວິຫຣຕິ, ເຕນ ວຸຕ຺ຕໍ ‘‘ອນຸປິຍາຍໍ ວິຫຣຕິ ອມ຺ພວເນ’’ຕິ. ຠທ຺ທິໂຍຕິ ຕສ຺ສ ເຖຣສ຺ສ ນາມໍ. ກາຬີໂຄຘາຍ ປຸຕ຺ໂຕຕິ ກາຬີໂຄຘາ ນາມ ສາກິຍານີ ສກ຺ຍຣາຊເທວີ ອຣິຍສາວິກາ ອາຄຕຜລາ ວິຎ຺ຎາຕສາສນາ, ຕສ຺ສາ ອຍໍ ປຸຕ຺ໂຕ. ຕສ຺ສ ປພ຺ພຊ຺ຊາວິຘິ ຂນ຺ຘເກ (ຈູຬວ. ໓໓໐-໓໓໑) ອາຄໂຕວ. ໂສ ປພ຺ພຊິຕ຺ວາ ວິປສ຺ສນໍ ປຏ຺ຐເປຕ຺ວາ ນ ຈິຣສ຺ເສວ ຉຬຠິຎ຺ໂຎ ອໂຫສິ, ເຕຣສປິ ຘຸຕງ຺ຄານິ ສມາທາຍ ວຕ຺ຕຕິ. ຠຄວຕາ ຈ ‘‘ເອຕທຄ຺ຄໍ, ຠິກ຺ຂເວ, ມມ ສາວການໍ ຠິກ຺ຂູນໍ ອຸຈ຺ຈກຸລິການໍ, ຍທິທໍ ຠທ຺ທິໂຍ ກາຬີໂຄຘາຍ ປຸຕ຺ໂຕ’’ຕິ (ອ. ນິ. ໑.໑໙໓) ອຸຈ຺ຈກຸລິກຠາເວ ເອຕທຄ຺ເຄ ຐປິໂຕ ອສີຕິຍາ ສາວການໍ ອພ຺ຠນ຺ຕໂຣ.

ສຸຎ຺ຎາຄາຣຄໂຕຕິ ‘‘ຐເປຕ຺ວາ ຄາມຎ຺ຈ ຄາມູປຈາຣຎ຺ຈ ອວເສສໍ ອຣຎ຺ຎ’’ນ຺ຕິ ວຸຕ຺ຕໍ ອຣຎ຺ຎໍ ຣຸກ຺ຂມູລຎ຺ຈ ຐເປຕ຺ວາ ອຎ຺ຎໍ ປພ຺ພຕກນ຺ທຣາທິ ປພ຺ພຊິຕສາຣຸປ຺ປໍ ນິວາສຏ຺ຐານໍ ຊນສມ຺ພາຘາຠາວໂຕ ອິຘ ສຸຎ຺ຎາຄາຣນ຺ຕິ ອຘິປ຺ເປຕໍ. ອຖ ວາ ຌານກຓ຺ຏການໍ ສທ຺ທານໍ ອຠາວໂຕ ວິວິຕ຺ຕໍ ຍໍ ກິຎ຺ຈິ ອຄາຣມ຺ປິ ສຸຎ຺ຎາຄາຣນ຺ຕິ ເວທິຕພ຺ພໍ. ຕໍ ສຸຎ຺ຎາຄາຣໍ ອຸປຄໂຕ. ອຠິກ຺ຂຓນ຺ຕິ ພຫຸລໍ. ອຸທານໍ ອຸທາເນສີຕິ ໂສ ຫິ ອາຍສ຺ມາ ອຣຎ຺ເຎ ທິວາວິຫາຣໍ ອຸປຄໂຕປິ ຣຕ຺ຕິວາສູປຄໂຕປິ ເຍຠຸຍ຺ເຍນ ຜລສມາປຕ຺ຕິສຸເຂນ ນິໂຣຘສຸເຂນ ຈ ວີຕິນາເມຕິ, ຕສ຺ມາ ຕໍ ສຸຂໍ ສນ຺ຘາຍ ປຸພ຺ເພ ອຕ຺ຕນາ ອນຸຠູຕໍ ສຠຍໍ ສປຣິຬາຫໍ ຣຊ຺ຊສຸຂໍ ຊິຄຸຈ຺ຉິຕ຺ວາ ‘‘ອໂຫ ສຸຂໍ ອໂຫ ສຸຂ’’ນ຺ຕິ ໂສມນສ຺ສສຫິຕໍ ຎາຓສມຸຏ຺ຐານໍ ປີຕິສມຸຏ຺ຐານໍ ສມຸຄ຺ຄິຣຕິ.

ສຸຕ຺ວານ ເນສໍ ເອຕທໂຫສີຕິ ເນສໍ ສມ຺ພຫຸລານໍ ຠິກ຺ຂູນໍ ຕສ຺ສ ອາຍສ຺ມໂຕ ‘‘ອໂຫ ສຸຂໍ, ອໂຫ ສຸຂ’’ນ຺ຕິ ອຸທາເນນ຺ຕສ຺ສ ອຸທານໍ ສຸຕ຺ວາ ‘‘ນິສ຺ສໍສຍໍ ເອສ ອນຠິຣໂຕ ພ຺ຣຫ຺ມຈຣິຍໍ ຈຣຕີ’’ຕິ ເອວໍ ປຣິວິຕກ຺ກິຕໍ ອໂຫສິ. ເຕ ຠິກ຺ຂູ ປຸຖຸຊ຺ຊນາ ຕສ຺ສ ອາຍສ຺ມໂຕ ວິເວກສຸຂໍ ສນ຺ຘາຍ ອຸທານໍ ອຊານນ຺ຕາ ເອວໍ ອມຎ຺ຎິໍສຸ, ເຕນ ວຸຕ຺ຕໍ ‘‘ນິສ຺ສໍສຍ’’ນ຺ຕິອາທິ. ຕຕ຺ຖ ນິສ຺ສໍສຍນ຺ຕິ ອສນ຺ເທເຫນ ເອກນ຺ເຕນາຕິ ອຕ຺ໂຖ. ‘‘ຍໍ ໂສ ປຸພ຺ເພ ອຄາຣິຍຠູໂຕ ສມາໂນ’’ຕິ ປາຬິໍ ວຕ຺ວາ ‘‘ອນຸຠວີ’’ຕິ ວຈນເສເສນ ເກຈິ ອຕ຺ຖໍ ວຓ຺ເຓນ຺ຕິ, ອປເຣ ‘‘ຍໍ ສາ’’ຕິ ປຐນ຺ຕິ, ‘‘ຍໍສ ປຸພ຺ເພ ອຄາຣິຍຠູຕສ຺ສາ’’ຕິ ປນ ປາຬິ. ຕຕ຺ຖ ຍໍສາຕິ ຍໍ ອສ຺ສ, ສນ຺ຘິວເສນ ຫິ ອກາຣສກາຣໂລໂປ ‘‘ເອວໍສ ເຕ (ມ. ນິ. ໑.໒໓; ອ. ນິ. ໖.໕໘), ປຸປ຺ຜໍສາ ອຸປ຺ປຊ຺ຊີ’’ຕິອາທີສຸ (ປາຣາ. ໓໖) ວິຍ. ຕສ຺ສຕ຺ໂຖ – ອສ຺ສ ອາຍສ຺ມໂຕ ຠທ຺ທິຍສ຺ສ ປພ຺ພຊິຕໂຕ ປຸພ຺ເພ ອຄາຣິຍຠູຕສ຺ສ ຄຫຏ຺ຐສ຺ສ ສໂຕ ຍໍ ຣຊ຺ຊສຸຂໍ ອນຸຠູຕໍ. ສາ ຕມນຸສ຺ສຣມາໂນຕິ ໂສ ຕໍ ສຸຂໍ ເອຕຣຫິ ອຸກ຺ກຓ຺ຐນວເສນ ອນຸສ຺ສຣນ຺ໂຕ.

ເຕ ຠິກ຺ຂູ ຠຄວນ຺ຕໍ ເອຕທໂວຈຸນ຺ຕິ ເຕ ສມ຺ພຫຸລາ ຠິກ຺ຂູ ອຸລ຺ລປນສຠາວສຓ຺ຐິຕາ ຕສ຺ສ ອນຸຄ຺ຄຫຓາຘິປ຺ປາເຍນ ຠຄວນ຺ຕໍ ເອຕທໂວຈຸໍ, ນ ອຸຊ຺ຌານວເສນ. ອຎ຺ຎຕຣນ຺ຕິ ນາມໂຄຕ຺ເຕນ ອປາກຏໍ ເອກໍ ຠິກ຺ຂຸໍ. ອາມນ຺ເຕສີຕິ ອາຓາເປສິ ເຕ ຠິກ຺ຂູ ສຎ຺ຎາເປຕຸກາໂມ. ເອວນ຺ຕິ ວຈນສມ຺ປຏິຄ຺ຄເຫ, ສາຘູຕິ ອຕ຺ໂຖ. ປຸນ ເອວນ຺ຕິ ປຏິຎ຺ຎາຍ. ອຠິກ຺ຂຓໍ ‘‘ອໂຫ ສຸຂໍ, ອໂຫ ສຸຂ’’ນ຺ຕິ ອິມໍ ອຸທານໍ ອຸທາເນສີຕິ ຍຖາ ເຕ ຠິກ຺ຂູ ວທນ຺ຕິ, ຕໍ ເອວໍ ຕເຖວາຕິ ອຕ຺ຕໂນ ອຸທານໍ ປຏິຊານາຕິ. ກິໍ ປນ ຕ຺ວໍ ຠທ຺ທິຍາຕິ ກສ຺ມາ ຠຄວາ ປຸຈ຺ຉຕິ, ກິໍ ຕສ຺ສ ຈິຕ຺ຕໍ ນ ຊານາຕີຕິ? ໂນ ນ ຊານາຕິ, ເຕເນວ ປນ ຕມຕ຺ຖໍ ວທາເປຕ຺ວາ ເຕ ຠິກ຺ຂູ ສຎ຺ຎາເປຕຸໍ ປຸຈ຺ຉຕິ. ວຸຕ຺ຕຎ຺ເຫຕໍ – ‘‘ຊານນ຺ຕາປິ ຕຖາຄຕາ ປຸຈ຺ຉນ຺ຕິ, ຊານນ຺ຕາປິ ນ ປຸຈ຺ຉນ຺ຕີ’’ຕິອາທິ. ອຕ຺ຖວສນ຺ຕິ ກາຣຓໍ.

ອນ຺ເຕປຸເຣຕິ ອິຕ຺ຖາຄາຣສ຺ສ ສຎ຺ຈຣຓຏ຺ຐານຠູເຕ ຣາຊເຄຫສ຺ສ ອພ຺ຠນ຺ຕເຣ, ຍຕ຺ຖ ຣາຊາ ນ຺ຫານໂຠຊນສຍນາທິໍ ກປ຺ເປຕິ. ຣກ຺ຂາ ສຸສໍວິຫິຕາຕິ ອາຣກ຺ຂາທິກຕປຸຣິເສຫິ ຄຸຕ຺ຕິ ສຸຏ຺ຐຸ ສມນ຺ຕໂຕ ວິຫິຕາ. ພຫິປິ ອນ຺ເຕປຸເຣຕິ ອຑ຺ຑກຣຓຏ຺ຐານາທິເກ ອນ຺ເຕປຸຣໂຕ ພຫິຠູເຕ ຣາຊເຄເຫ. ເອວໍ ຣກ຺ຂິໂຕ ໂຄປິໂຕ ສນ຺ໂຕຕິ ເອວໍ ຣາຊເຄຫຣາຊຘານິຣຊ຺ຊເທເສສຸ ອນ຺ໂຕ ຈ ພຫິ ຈ ອເນເກສຸ ຐາເນສຸ ອເນກສເຕຫິ ສຸສໍວິຫິຕຣກ຺ຂາວຣຓຄຸຕ຺ຕິຍາ ມເມວ ນິພ຺ຠຍຕ຺ຖໍ ຜາສຸວິຫາຣຕ຺ຖໍ ຣກ຺ຂິໂຕ ໂຄປິໂຕ ສມາໂນ. ຠີໂຕຕິອາທີນິ ປທານິ ອຎ຺ຎມຎ຺ຎເວວຈນານິ. ອຖ ວາ ຠີໂຕຕິ ປຣຣາຊູຫິ ຠາຍມາໂນ. ອຸພ຺ພິຄ຺ໂຄຕິ ສກຣຊ຺ເຊປິ ປກຕິໂຕ ອຸປ຺ປຊ຺ຊນກຠຍຸພ຺ເພເຄນ ອຸພ຺ພິຄ຺ໂຄ ຈລິໂຕ. ອຸສ຺ສງ຺ກີຕິ ‘‘ຣຎ຺ຎາ ນາມ ສພ຺ພກາລໍ ອວິສ຺ສຕ຺ເຖນ ຠວິຕພ຺ພ’’ນ຺ຕິ ວຈເນນ ສພ຺ພຕ຺ຖ ອວິສ຺ສາສວເສນ ເຕສໍ ເຕສໍ ກິຈ຺ຈກຣຓີຍານໍ ປຈ຺ຈຍປຣິສງ຺ກາຍ ຈ ອຸທ຺ຘມຸຂໍ ສງ຺ກມາໂນ. ອຸຕ຺ຣາສີຕິ ‘‘ສນ຺ຕິກາວຈເຣຫິປິ ອຊານນ຺ຕສ຺ເສວ ເມ ກທາຈິ ອນຕ຺ໂຖ ຠເວຍ຺ຍາ’’ຕິ ອຸປ຺ປນ຺ເນນ ສຣີຣກມ຺ປໍ ອຸປ຺ປາທນສມຕ຺ເຖນ ຕາເສນ ອຸຕ຺ຣາສີ. ‘‘ອຸຕ຺ຣສ຺ໂຕ’’ຕິປິ ປຐນ຺ຕິ. ວິຫາສິນ຺ຕິ ເອວໍຠູໂຕ ຫຸຕ຺ວາ ວິຫຣິໍ.

ເອຕຣຫີຕິ ອິທານິ ປພ຺ພຊິຕກາລໂຕ ປຏ຺ຐາຍ. ເອໂກຕິ ອສຫາໂຍ, ເຕນ ວູປກຏ຺ຐກາຍຕໍ ທສ຺ເສຕິ. ອຠີໂຕຕິອາທີນໍ ປທານໍ ວຸຕ຺ຕວິປຣິຍາເຍນ ອຕ຺ໂຖ ເວທິຕພ຺ໂພ. ຠຍາທິນິມິຕ຺ຕສ຺ສ ປຣິຄ຺ຄຫສ຺ສ ຕໍ ນິມິຕ຺ຕສ຺ສ ຈ ກິເລສສ຺ສ ອຠາເວເນວສ຺ສ ອຠີຕາທິຕາຕິ. ເອເຕນ ຈິຕ຺ຕວິເວກໍ ທສ຺ເສຕິ. ອປ຺ໂປສ຺ສຸກ຺ໂກຕິ ສຣີຣຄຸຕ຺ຕິຍໍ ນິຣຸສ຺ສຸກ຺ໂກ. ປນ຺ນໂລໂມຕິ ໂລມຫໍສຸປ຺ປາທກສ຺ສ ຉມ຺ຠິຕຕ຺ຕສ຺ສ ອຠາເວນ ອນຸຄ຺ຄຕໂລໂມ. ປທທ຺ວເຍນປິ ເສຣິວິຫາຣໍ ທສ຺ເສຕິ. ປຣທຕ຺ຕວຸຕ຺ໂຕຕິ ປເຣຫິ ທິນ຺ເນນ ຈີວຣາທິນາ ວຕ຺ຕມາໂນ, ເອເຕນ ສພ຺ພໂສ ສງ຺ຄາຠາວທີປນມຸເຂນ ອນວເສສຠຍເຫຕຸວິຣຫໍ ທສ຺ເສຕິ. ມິຄຠູເຕນ ເຈຕສາຕິ ວິສ຺ສຕ຺ຖວິຫາຣິຕາຍ ມິຄສ຺ສ ວິຍ ຊາເຕນ ຈິຕ຺ເຕນ. ມິໂຄ ຫິ ອມນຸສ຺ສປເຖ ອຣຎ຺ເຎ ວສມາໂນ ວິສ຺ສຕ຺ໂຖ ຕິຏ຺ຐຕິ, ນິສີທຕິ, ນິປຊ຺ຊຕິ, ເຍນກາມຎ຺ຈ ປກ຺ກມຕິ ອປ຺ປຏິຫຕຈາໂຣ, ເອວໍ ອຫມ຺ປິ ວິຫຣາມີຕິ ທສ຺ເສຕິ. ວຸຕ຺ຕຎ຺ເຫຕໍ ປຈ຺ເຈກພຸທ຺ເຘນ –

‘‘ມິໂຄ ອຣຎ຺ຎມ຺ຫິ ຍຖາ ອພທ຺ໂຘ,

ເຍນິຈ຺ຉກໍ ຄຈ຺ຉຕິ ໂຄຈຣາຍ;

ວິຎ຺ຎູ ນໂຣ ເສຣິຕໍ ເປກ຺ຂມາໂນ,

ເອໂກ ຈເຣ ຂຄ຺ຄວິສາຓກປ຺ໂປ’’ຕິ. (ສຸ. ນິ. ໓໙; ອປ. ເຖຣ ໑.໑.໙໕);

ອິມໍ ໂຂ ອຫໍ, ຠນ຺ເຕ, ອຕ຺ຖວສນ຺ຕິ, ຠນ຺ເຕ, ຠຄວາ ຍທິທໍ ມມ ເອຕຣຫິ ປຣມໍ ວິເວກສຸຂໍ ຜລສມາປຕ຺ຕິສຸຂໍ, ອິທເມວ ກາຣຓໍ ສມ຺ປສ຺ສມາໂນ ‘‘ອໂຫ ສຸຂໍ, ອໂຫ ສຸຂ’’ນ຺ຕິ ອຸທານໍ ອຸທາເນສິນ຺ຕິ.

ເອຕມຕ຺ຖນ຺ຕິ ເອຕໍ ຠທ຺ທິຍຕ຺ເຖຣສ຺ສ ປຸຖຸຊ຺ຊນວິສຍາຕີຕໍ ວິເວກສຸຂສງ຺ຂາຕມຕ຺ຖໍ ສພ຺ພາກາຣໂຕ ວິທິຕ຺ວາ. ອິມໍ ອຸທານນ຺ຕິ ອິທໍ ສເຫຕຸກຠຍໂສກວິຄມານຸຠາວທີປກໍ ອຸທານໍ ອຸທາເນສິ.

ຕຕ຺ຖ ຍສ຺ສນ຺ຕຣໂຕ ນ ສນ຺ຕິ ໂກປາຕິ ຍສ຺ສ ອຣິຍປຸຄ຺ຄລສ຺ສ ອນ຺ຕຣໂຕ ອພ຺ຠນ຺ຕເຣ ອຕ຺ຕໂນ ຈິຕ຺ເຕ ຈິຕ຺ຕກາລຸສ຺ສິຍກຣຓໂຕ ຈິຕ຺ຕປ຺ປໂກປາ ຣາຄາທໂຍ ອາຆາຕວຕ຺ຖຸອາທິກາຣຓເຠທໂຕ ອເນກເຠທາ ໂທສໂກປາ ເອວ ໂກປາ ນ ສນ຺ຕິ ມຄ຺ເຄນ ປຫີນຕ຺ຕາ ນ ວິຊ຺ຊນ຺ຕິ. ອຍຎ຺ຫິ ອນ຺ຕຣສທ຺ໂທ ກິຎ຺ຈາປິ ‘‘ມຎ຺ຈ ຕ຺ວຎ຺ຈ ກິມນ຺ຕຣ’’ນ຺ຕິອາທີສຸ (ສໍ. ນິ. ໑.໒໒໘) ກາຣເຓ ທິສ຺ສຕິ, ‘‘ອນ຺ຕຣຏ຺ຐເກ ຫິມປາຕສມເຍ’’ຕິອາທີສຸ (ມຫາວ. ໓໔໖) ເວມຊ຺ເຌ, ‘‘ອນ຺ຕຣາ ຈ ເຊຕວນໍ ອນ຺ຕຣາ ຈ ສາວຕ຺ຖິ’’ນ຺ຕິອາທີສຸ (ອຸທາ. ໑໓, ໔໔) ວິວເຣ, ‘‘ຠຍມນ຺ຕຣໂຕ ຊາຕ’’ນ຺ຕິອາທີສຸ (ອິຕິວຸ. ໘໘; ມຫານິ. ໕) ຈິຕ຺ເຕ, ອິຘາປິ ຈິຕ຺ເຕ ເອວ ທຏ຺ຐພ຺ໂພ. ເຕນ ວຸຕ຺ຕໍ ‘‘ອນ຺ຕຣໂຕ ອຕ຺ຕໂນ ຈິຕ຺ເຕ’’ຕິ.

ອິຕິຠວາຠວຕຎ຺ຈ ວີຕິວຕ຺ໂຕຕິ ຍສ຺ມາ ຠໂວຕິ ສມ຺ປຕ຺ຕິ, ອຠໂວຕິ ວິປຕ຺ຕິ. ຕຖາ ຠໂວຕິ ວຸທ຺ຘິ, ອຠໂວຕິ ຫານິ. ຠໂວຕິ ວາ ສສ຺ສຕໍ, ອຠໂວຕິ ອຸຈ຺ເຉໂທ. ຠໂວຕິ ວາ ປຸຎ຺ຎໍ, ອຠໂວຕິ ປາປໍ. ຠໂວຕິ ວາ ສຸຄຕິ, ອຠໂວຕິ ທຸຄ຺ຄຕິ. ຠໂວຕິ ວາ ຂຸທ຺ທໂກ, ອຠໂວຕິ ມຫນ຺ໂຕ. ຕສ຺ມາ ຍາ ສາ ສມ຺ປຕ຺ຕິວິປຕ຺ຕິວຸຑ຺ຒິຫານິສສ຺ສຕຸຈ຺ເຉທປຸຎ຺ຎປາປສຸຄຕິທຸຄ຺ຄຕິ- ຂຸທ຺ທກມຫນ຺ຕອຸປປຕ຺ຕິຠວານໍ ວເສນ ອິຕິ ອເນກປ຺ປກາຣາ ຠວາຠວຕາ ວຸຈ຺ຈຕິ. ຈຕູຫິປິ ອຣິຍມຄ຺ເຄຫິ ຍຖາສມ຺ຠວໍ ເຕນ ເຕນ ນເຍນ ຕໍ ອິຕິຠວາຠວຕຎ຺ຈ ວີຕິວຕ຺ໂຕ ອຕິກ຺ກນ຺ໂຕ ໂຫຕິ. ອຕ຺ຖວເສນ ວິຠຕ຺ຕິ ວິປຣິຓາເມຕພ຺ພາ. ຕໍ ວິຄຕຠຍນ຺ຕິ ຕໍ ເອວຣູປໍ ຍຖາວຸຕ຺ຕຄຸຓສມນ຺ນາຄຕໍ ຂີຓາສວໍ ຈິຕ຺ຕໂກປາຠາວໂຕ ອິຕິຠວາຠວສມຕິກ຺ກມໂຕ ຈ ຠຍເຫຕຸວິຄເມນ ວິຄຕຠຍໍ, ວິເວກສຸເຂນ ອຄ຺ຄຜລສຸເຂນ ຈ ສຸຂິໍ, ວິຄຕຠຍຕ຺ຕາ ເອວ ອໂສກໍ. ເທວາ ນານຸຠວນ຺ຕິ ທສ຺ສນາຍາຕິ ອຘິຄຕມຄ຺ເຄ ຐເປຕ຺ວາ ສພ຺ເພປິ ອຸປປຕ຺ຕິເທວາ ວາຍມນ຺ຕາປິ ຈິຕ຺ຕຈາຣທສ຺ສນວເສນ ທສ຺ສນາຍ ທຏ຺ຐຸໍ ນານຸຠວນ຺ຕິ ນ ອຠິສມ຺ຠຸຓນ຺ຕິ ນ ສກ຺ໂກນ຺ຕິ, ປເຄວ ມນຸສ຺ສາ. ເສກ຺ຂາປິ ຫິ ປຸຖຸຊ຺ຊນາ ວິຍ ອຣຫໂຕ ຈິຕ຺ຕປ຺ປວຕ຺ຕິໍ ນ ຊານນ຺ຕິ.

ທສມສຸຕ຺ຕວຓ຺ຓນາ ນິຏ຺ຐິຕາ.

ນິຏ຺ຐິຕາ ຈ ມຸຈລິນ຺ທວຄ຺ຄວຓ຺ຓນາ.