໖. ມຫາກສ຺ສປສຸຕ຺ຕວຓ຺ຓນາ

໖. ຉຏ຺ເຐ ຣາຊຄເຫຕິ ເອວໍນາມເກ ນຄເຣ. ຕຎ຺ຫິ ມຫາມນ຺ຘາຕຸມຫາໂຄວິນ຺ທາທີຫິ ປຣິຄ຺ຄຫິຕຕ຺ຕາ ‘‘ຣາຊຄຫ’’ນ຺ຕິ ວຸຈ຺ຈຕິ. ‘‘ທຸຣຠິຠວນີຍຕ຺ຕາ ປຏິຣາຊູນໍ ຄຫຠູຕນ຺ຕິ ຣາຊຄຫ’’ນ຺ຕິອາທິນາ ອຎ຺ເຎເນຕ຺ຖ ປກາເຣນ ວຓ຺ຓຍນ຺ຕິ. ກິນ຺ເຕຫິ? ນາມເມຕໍ ຕສ຺ສ ນຄຣສ຺ສ. ຕໍ ປເນຕໍ ພຸທ຺ຘກາເລ ຈກ຺ກວຕ຺ຕິກາເລ ຈ ນຄຣໍ ໂຫຕິ, ເສສກາເລ ສຸຎ຺ຎໍ ຍກ຺ຂປຣິຄ຺ຄຫິຕໍ ເຕສໍ ວສນຏ຺ຐານໍ ຫຸຕ຺ວາ ຕິຏ຺ຐຕິ. ເວຬຸວເນ ກລນ຺ທກນິວາເປຕິ ເວຬຸວນນ຺ຕິ ຕສ຺ສ ວິຫາຣສ຺ສ ນາມໍ. ຕໍ ກິຣ ອຏ຺ຐາຣສຫຕ຺ຖຸພ຺ເພເຘນ ປາກາເຣນ ປຣິກ຺ຂິຕ຺ຕໍ ພຸທ຺ຘສ຺ສ ຠຄວໂຕ ວສນານຸຈ຺ຉວິກາຍ ມຫຕິຍາ ຄນ຺ຘກຸຏິຍາ ອຎ຺ເຎຫິ ຈ ປາສາທກຸຏິເລຓມຓ຺ຑປຈງ຺ກມທ຺ວາຣໂກຏ຺ຐກາທີຫິ ປຏິມຓ຺ຑິຕໍ ພຫິ ເວຬູຫິ ປຣິກ຺ຂິຕ຺ຕໍ ອໂຫສິ ນີໂລຠາສໍ ມໂນຣມໍ, ເຕນ ‘‘ເວຬຸວນ’’ນ຺ຕິ ວຸຈ຺ຈຕິ. ກລນ຺ທການຎ຺ເຈຕ຺ຖ ນິວາປໍ ອທໍສຸ, ຕສ຺ມາ ‘‘ກລນ຺ທກນິວາໂປ’’ຕິ ວຸຈ຺ຈຕິ. ປຸພ຺ເພ ກິຣ ອຎ຺ຎຕໂຣ ຣາຊາ ຕໍ ອຸຍ຺ຍານໍ ກີຬນຕ຺ຖໍ ປວິຏ຺ໂຐ ສຸຣາມທມຕ຺ໂຕ ທິວາເສຍ຺ຍໍ ອຸປຄໂຕ ສຸປິ, ປຣິຊໂນປິສ຺ສ ‘‘ສຸຕ຺ໂຕ ຣາຊາ’’ຕິ ປຸປ຺ຜຜລາທີຫິ ປໂລຠິຍມາໂນ ອິໂຕ ຈິໂຕ ຈ ປກ຺ກາມິ. ອຖ ສຸຣາຄນ຺ເຘນ ອຎ຺ຎຕຣສ຺ມາ ຣຸກ຺ຂສຸສິຣາ ກຓ຺ຫສປ຺ໂປ ນິກ຺ຂມິຕ຺ວາ ຣຎ຺ໂຎ ອຠິມຸໂຂ ອາຄຈ຺ຉຕິ. ຕໍ ທິສ຺ວາ ຣຸກ຺ຂເທວຕາ ‘‘ຣຎ຺ໂຎ ຊີວິຕໍ ທສ຺ສາມີ’’ຕິ ກລນ຺ທກເວເສນ ຄນ຺ຕ຺ວາ ກຓ຺ຓມູເລ ສທ຺ທມກາສິ. ຣາຊາ ປຏິພຸຊ຺ຌິ, ກຓ຺ຫສປ຺ໂປ ນິວຕ຺ໂຕ. ໂສ ຕໍ ທິສ຺ວາ ‘‘ອິມາຍ ກາຬກາຍ ມມ ຊີວິຕໍ ທິນ຺ນ’’ນ຺ຕິ ກາຬການໍ ນິວາປໍ ຕຕ຺ຖ ປຏ຺ຐເປສິ, ອຠຍໂຆສຎ຺ຈ ໂຆສາເປສິ. ຕສ຺ມາ ຕໂຕ ປຏ຺ຐາຍ ຕໍ ‘‘ກລນ຺ທກນິວາປ’’ນ຺ຕິ ສງ຺ຂໍ ຄຕໍ. ກລນ຺ທກາຕິ ຫິ ກາຬການໍ ນາມໍ, ຕສ຺ມິໍ ເວຬຸວເນ ກລນ຺ທກນິວາເປ.

ມຫາກສ຺ສໂປຕິ ມຫນ຺ເຕຫິ ສີລກ຺ຂນ຺ຘາທີຫິ ສມນ຺ນາຄຕຕ຺ຕາ ມຫນ຺ໂຕ ກສ຺ສໂປຕິ ມຫາກສ຺ສໂປ, ອປິຈ ກຸມາຣກສ຺ສປຕ຺ເຖຣໍ ອຸປາທາຍ ອຍໍ ມຫາເຖໂຣ ‘‘ມຫາກສ຺ສໂປ’’ຕິ ວຸຈ຺ຈຕິ. ປິປ຺ປລິຄຸຫາຍນ຺ຕິ ຕສ຺ສາ ກິຣ ຄຸຫາຍ ທ຺ວາຣສມີເປ ເອໂກ ປິປ຺ປລິຣຸກ຺ໂຂ ອໂຫສິ, ເຕນ ສາ ‘‘ປິປ຺ປລິຄຸຫາ’’ຕິ ປຎ຺ຎາຍິຕ຺ຖ. ຕສ຺ສໍ ປິປ຺ປລິຄຸຫາຍໍ. ອາພາຘິໂກຕິ ອາພາໂຘ ອສ຺ສ ອຕ຺ຖີຕິ ອາພາຘິໂກ, ພ຺ຍາຘິໂກຕິ ອຕ຺ໂຖ. ທຸກ຺ຂິໂຕຕິ ກາຍສນ຺ນິສ຺ສິຕໍ ທຸກ຺ຂໍ ສຎ຺ຊາຕໍ ອສ຺ສາຕິ ທຸກ຺ຂິໂຕ, ທຸກ຺ຂປ຺ປຕ຺ໂຕຕິ ອຕ຺ໂຖ. ພາຬ຺ຫຄິລາໂນຕິ ອຘິມຕ຺ຕເຄລຎ຺ໂຎ, ຕໍ ປນ ເຄລຎ຺ຎໍ ສໂຕ ສມ຺ປຊາໂນ ຫຸຕ຺ວາ ອຘິວາເສສິ. ອຖສ຺ສ ຠຄວາ ຕໍ ປວຕ຺ຕິໍ ຎຕ຺ວາ ຕຕ຺ຖ ຄນ຺ຕ຺ວາ ໂພຊ຺ຌງ຺ຄປຣິຕ຺ຕໍ ອຠາສິ, ເຕເນວ ເຖຣສ຺ສ ໂສ ອາພາໂຘ ວູປສມິ. ວຸຕ຺ຕຎ຺ເຫຕໍ ໂພຊ຺ຌງ຺ຄສໍຍຸຕ຺ເຕ –

‘‘ເຕນ ໂຂ ປນ ສມເຍນ ອາຍສ຺ມາ ມຫາກສ຺ສໂປ ປິປ຺ປລິຄຸຫາຍໍ ວິຫຣຕິ ອາພາຘິໂກ ທຸກ຺ຂິໂຕ ພາຬ຺ຫຄິລາໂນ. ອຖ ໂຂ ຠຄວາ ສາຍນ຺ຫສມຍໍ ປຏິສລ຺ລານາ ວຸຏ຺ຐິໂຕ ເຍນາຍສ຺ມາ ມຫາກສ຺ສໂປ ເຕນຸປສງ຺ກມິ, ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ. ນິສຊ຺ຊ ໂຂ ຠຄວາ…ເປ… ເອຕທໂວຈ – ‘ກຈ຺ຈິ ເຕ, ກສ຺ສປ, ຂມນີຍໍ, ກຈ຺ຈິ ຍາປນີຍໍ, ກຈ຺ຈິ ທຸກ຺ຂາ ເວທນາ ປຏິກ຺ກມນ຺ຕິ, ໂນ ອຠິກ຺ກມນ຺ຕິ, ປຏິກ຺ກໂມສານໍ ປຎ຺ຎາຍຕິ ໂນ ອຠິກ຺ກໂມ’ຕິ? ‘ນ ເມ, ຠນ຺ເຕ, ຂມນີຍໍ, ນ ຍາປນີຍໍ, ພາຬ຺ຫາ ເມ ຠນ຺ເຕ, ທຸກ຺ຂາ ເວທນາ ອຠິກ຺ກມນ຺ຕິ ໂນ ປຏິກ຺ກມນ຺ຕິ, ອຠິກ຺ກໂມສານໍ ປຎ຺ຎາຍຕິ ໂນ ປຏິກ຺ກໂມ’ຕິ.

‘‘‘ສຕ຺ຕິເມ, ກສ຺ສປ, ໂພຊ຺ຌງ຺ຄາ ມຍາ ສມ຺ມທກ຺ຂາຕາ ຠາວິຕາ ພຫຸລີກຕາ ອຠິຎ຺ຎາຍ ສມ຺ໂພຘາຍ ນິພ຺ພານາຍ ສໍວຕ຺ຕນ຺ຕິ. ກຕເມ ສຕ຺ຕ? ສຕິສມ຺ໂພຊ຺ຌງ຺ໂຄ ໂຂ, ກສ຺ສປ, ມຍາ ສມ຺ມທກ຺ຂາໂຕ ຠາວິໂຕ ພຫຸລີກໂຕ ອຠິຎ຺ຎາຍ ສມ຺ໂພຘາຍ ນິພ຺ພານາຍ ສໍວຕ຺ຕຕິ…ເປ… ອຸເປກ຺ຂາສມ຺ໂພຊ຺ຌງ຺ໂຄ ໂຂ, ກສ຺ສປ, ມຍາ ສມ຺ມທກ຺ຂາໂຕ ຠາວິໂຕ ພຫຸລີກໂຕ ອຠິຎ຺ຎາຍ ສມ຺ໂພຘາຍ ນິພ຺ພານາຍ ສໍວຕ຺ຕຕິ. ອິເມ ໂຂ, ກສ຺ສປ, ສຕ຺ຕ ໂພຊ຺ຌງ຺ຄາ ມຍາ ສມ຺ມທກ຺ຂາຕາ ຠາວິຕາ ພຫູລີກຕາ ອຠິຎ຺ຎາຍ ສມ຺ໂພຘາຍ ນິພ຺ພານາຍ ສໍວຕ຺ຕນ຺ຕີ’ຕິ. ‘ຕຄ຺ຆ ຠຄວາ ໂພຊ຺ຌງ຺ຄາ, ຕຄ຺ຆ, ສຸຄຕ, ໂພຊ຺ຌງ຺ຄາ’’’ຕິ.

‘‘ອິທມໂວຈ ຠຄວາ. ອຕ຺ຕມໂນ ອາຍສ຺ມາ ມຫາກສ຺ສໂປ ຠຄວໂຕ ຠາສິຕໍ ອຠິນນ຺ທິ. ວຸຏ຺ຐຫິ ຈາຍສ຺ມາ ມຫາກສ຺ສໂປ ຕມ຺ຫາ ອາພາຘາ, ຕຖາ ປຫີໂນ ຈາຍສ຺ມໂຕ ມຫາກສ຺ສປສ຺ສ ໂສ ອາພາໂຘ ອໂຫສີ’’ຕິ.

ເຕນ ວຸຕ຺ຕໍ – ‘‘ອຖ ໂຂ ອາຍສ຺ມາ ມຫາກສ຺ສໂປ ອປເຣນ ສມເຍນ ຕມ຺ຫາ ອາພາຘາ ວຸຏ຺ຐາສີ’’ຕິ.

ເອຕທໂຫສີຕິ ປຸພ຺ເພ ເຄລຎ຺ຎທິວເສສຸ ສທ຺ຘິວິຫາຣິເກຫິ ອຸປນີຕໍ ປິຓ຺ຑປາຕໍ ປຣິຠຸຎ຺ຊິຕ຺ວາ ວິຫາເຣ ເອວ ອໂຫສິ. ອຖສ຺ສ ຕມ຺ຫາ ອາພາຘາ ວຸຏ຺ຐິຕສ຺ສ ເອຕໍ ‘‘ຍໍນູນາຫໍ ຣາຊຄຫໍ ປິຓ຺ຑາຍ ປວິເສຍ຺ຍ’’ນ຺ຕິ ປຣິວິຕກ຺ໂກ ອໂຫສິ. ປຎ຺ຈມຕ຺ຕານິ ເທວຕາສຕານີຕິ ສກ຺ກສ຺ສ ເທວຣຎ຺ໂຎ ປຣິຈາຣິກາ ປຎ຺ຈສຕາ ກກຸຏປາທິນິໂຍ ອຈ຺ຉຣາໂຍ. ອຸສ຺ສຸກ຺ກໍ ອາປນ຺ນານິ ໂຫນ຺ຕີຕິ ເຖຣສ຺ສ ປິຓ຺ຑປາຕໍ ທສ຺ສາມາຕິ ປຎ຺ຈປິຓ຺ຑປາຕສຕານິ ສຊ຺ເຊຕ຺ວາ ສຸວຓ຺ຓຠາຊເນຫິ ອາທາຍ ອນ຺ຕຣາມຄ຺ເຄ ຐຕ຺ວາ, ‘‘ຠນ຺ເຕ, ອິມໍ ປິຓ຺ຑປາຕໍ ຄຓ຺ຫຖ, ສງ຺ຄຫໍ ໂນ ກໂຣຖາ’’ຕິ ວທມານາ ປິຓ຺ຑປາຕທາເນ ຍຸຕ຺ຕປ຺ປຍຸຕ຺ຕານິ ໂຫນ຺ຕິ. ເຕນ ວຸຕ຺ຕໍ ‘‘ອາຍສ຺ມໂຕ ມຫາກສ຺ສປສ຺ສ ປິຓ຺ຑປາຕປ຺ປຏິລາຠາຍາ’’ຕິ.

ສກ຺ໂກ ກິຣ ເທວຣາຊາ ເຖຣສ຺ສ ຈິຕ຺ຕປ຺ປວຕ຺ຕິໍ ຎຕ຺ວາ ຕາ ອຈ຺ຉຣາໂຍ ອຸຍ຺ໂຍເຊສິ ‘‘ຄຈ຺ຉຖ ຕຸມ຺ເຫ ອຍ຺ຍສ຺ສ ມຫາກສ຺ສປຕ຺ເຖຣສ຺ສ ປິຓ຺ຑປາຕໍ ທຕ຺ວາ ອຕ຺ຕໂນ ປຕິຏ຺ຐໍ ກໂຣຖາ’’ຕິ. ເອວໍ ຫິສ຺ສ ອໂຫສິ ‘‘ອິມາສຸ ສພ຺ພາສຸ ຄຕາສຸ ກທາຈິ ເອກິສ຺ສາປິ ຫຕ຺ຖໂຕ ປິຓ຺ຑປາຕໍ ເຖໂຣ ປຏິຄ຺ຄຓ຺ເຫຍ຺ຍ, ຕໍ ຕສ຺ສາ ຠວິສ຺ສຕິ ທີຆຣຕ຺ຕໍ ຫິຕາຍ ສຸຂາຍາ’’ຕິ. ປຏິກ຺ຂິປິ ເຖໂຣ, ‘‘ຠນ຺ເຕ, ມຍ຺ຫໍ ປິຓ຺ຑປາຕໍ ຄຓ຺ຫຖ, ມຍ຺ຫໍ ປິຓ຺ຑປາຕໍ ຄຓ຺ຫຖາ’’ຕິ ວທນ຺ຕິໂຍ ‘‘ຄຈ຺ຉຖ ຕຸມ຺ເຫ ກຕປຸຎ຺ຎາ ມຫາໂຠຄາ, ອຫໍ ທຸຄ຺ຄຕານໍ ສງ຺ຄຫໍ ກຣິສ຺ສາມີ’’ຕິ ວຕ຺ວາ, ‘‘ຠນ຺ເຕ, ມາ ໂນ ນາເສຖ, ສງ຺ຄຫໍ ໂນ ກໂຣຖາ’’ຕິ ວທນ຺ຕິໂຍ ປຸນປິ ປຏິກ຺ຂິປິຕ຺ວາ ປຸນປິ ອປຄນ຺ຕຸໍ ອນິຈ຺ຉມານາ ຍາຈນ຺ຕິໂຍ ‘‘ນ ອຕ຺ຕໂນ ປມາຓໍ ຊານາຖ, ອປຄຈ຺ຉຖາ’’ຕິ ວຕ຺ວາ ອຈ຺ຉຣໍ ປຫຣິ. ຕາ ເຖຣສ຺ສ ອຈ຺ຉຣາສທ຺ທໍ ສຸຕ຺ວາ ສນ຺ຕຊ຺ຊິຕາ ຐາຕຸໍ ອສກ຺ໂກນ຺ຕິໂຍ ປລາຍິຕ຺ວາ ເທວໂລກເມວ ຄຕາ. ເຕນ ວຸຕ຺ຕໍ – ‘‘ປຎ຺ຈມຕ຺ຕານິ ເທວຕາສຕານິ ປຏິກ຺ຂິປິຕ຺ວາ’’ຕິ.

ປຸພ຺ພຓ຺ຫສມຍນ຺ຕິ ປຸພ຺ພຓ຺ເຫ ເອກໍ ສມຍໍ, ເອກສ຺ມິໍ ກາເລ. ນິວາເສຕ຺ວາຕິ ວິຫາຣນິວາສນປຣິວຕ຺ຕນວເສນ ນິວາສນໍ ທຬ຺ຫໍ ນິວາເສຕ຺ວາ. ປຕ຺ຕຈີວຣມາທາຍາຕິ ຈີວຣໍ ປາຣຸປິຕ຺ວາ ປຕ຺ຕໍ ຫຕ຺ເຖນ ຄເຫຕ຺ວາ. ປິຓ຺ຑາຍ ປາວິສີຕິ ປິຓ຺ຑປາຕຕ຺ຖາຍ ປາວິສິ. ທລິທ຺ທວິສິຂາຕິ ທຸຄ຺ຄຕມນຸສ຺ສານໍ ວສໂນກາໂສ. ກປຓວິສິຂາຕິ ໂຠຄປາຣິຊຸຎ຺ຎປ຺ປຕ຺ຕິຍາ ທີນມນຸສ຺ສານໍ ວາໂສ. ເປສກາຣວິສິຂາຕິ ຕນ຺ຕວາຍວາໂສ. ອທ຺ທສາ ໂຂ ຠຄວາຕິ ກຖໍ ອທ຺ທສ? ‘‘ອາພາຘາ ວຸຏ຺ຐິໂຕ ມມ ປຸຕ຺ໂຕ ກສ຺ສໂປ ກິນ຺ນຸ ໂຂ ກໂຣຕີ’’ຕິ ອາວຊ຺ເຊນ຺ໂຕ ເວຬຸວເນ ນິສິນ຺ໂນ ເອວ ຠຄວາ ທິພ຺ພຈກ຺ຂຸນາ ອທ຺ທສ.

ເອຕມຕ຺ຖໍ ວິທິຕ຺ວາຕິ ຍາຍໍ ອາຍສ຺ມໂຕ ມຫາກສ຺ສປສ຺ສ ປຎ຺ຈຫິ ອຈ຺ຉຣາສເຕຫິ ອຸປນີຕໍ ອເນກສູປໍ ອເນກພ຺ຍຎ຺ຊນໍ ທິພ຺ພປິຓ຺ຑປາຕໍ ປຏິກ຺ຂິປິຕ຺ວາ ກປຓຊນານຸຄ຺ຄຫປ຺ປຏິປຕ຺ຕິ ວຸຕ຺ຕາ, ເອຕມຕ຺ຖໍ ຊານິຕ຺ວາ. ອິມໍ ອຸທານນ຺ຕິ ອິມໍ ປຣມປ຺ປິຈ຺ຉຕາທສ຺ສນມຸເຂນ ຂີຓາສວສ຺ສ ຕາທີຠາວານຸຠາວທີປກໍ ອຸທານໍ ອຸທາເນສິ.

ຕຕ຺ຖ ອນຎ຺ຎໂປສິນ຺ຕິ ອຎ຺ຎໍ ໂປເສຕີຕິ ອຎ຺ຎໂປສີ, ນ ອຎ຺ຎໂປສີ ອນຎ຺ຎໂປສີ, ອຕ຺ຕນາ ໂປເສຕພ຺ພສ຺ສ ອຎ຺ຎສ຺ສ ອຠາເວນ ອທຸຕິໂຍ, ເອກໂກຕິ ອຕ຺ໂຖ. ເຕນ ເຖຣສ຺ສ ສຸຠຣຕໍ ທສ຺ເສຕິ. ເຖໂຣ ຫິ ກາຍປຣິຫາຣິເກນ ຈີວເຣນ ກຸຈ຺ຉິປຣິຫາຣິເກນ ຈ ປິຓ຺ຑປາເຕນ ອຕ຺ຕານເມວ ໂປເສນ຺ໂຕ ປຣມປ຺ປິຈ຺ໂຉ ຫຸຕ຺ວາ ວິຫຣຕິ, ອຎ຺ຎໍ ຎາຕິມິຕ຺ຕາທີສຸ ກຎ຺ຈິ ນ ໂປເສຕິ ກຕ຺ຖຈິ ອລຄ຺ຄຠາວໂຕ. ອຖ ວາ ອຎ຺ເຎນ ອຎ຺ຎຕເຣນ ໂປເສຕພ຺ພຕາຍ ອຠາວໂຕ ອນຎ຺ຎໂປສີ. ໂຍ ຫິ ເອກສ຺ມິໍເຍວ ປຈ຺ຈຍທາຍເກ ປຏິພທ຺ຘຈຕຸປຈ຺ຈໂຍ ໂສ ອນຎ຺ຎໂປສີ ນາມ ນ ໂຫຕິ ເອກາຍຕ຺ຕວຸຕ຺ຕິໂຕ. ເຖໂຣ ປນ ‘‘ຍຖາປິ ຠມໂຣ ປຸປ຺ຜ’’ນ຺ຕິ (ຘ. ປ. ໔໙) ຄາຖາຍ ວຸຕ຺ຕນເຍນ ຊງ຺ຆາພລໍ ນິສ຺ສາຍ ປິຓ຺ຑາຍ ຈຣນ຺ໂຕ ກຸເລສຸ ນິຈ຺ຈນໂວ ຫຸຕ຺ວາ ມິສ຺ສກຠຕ຺ເຕນ ຍາເປຕິ. ຕຖາ ຫິ ນໍ ຠຄວາ ຈນ຺ທູປມປ຺ປຏິປທາຍ ໂຖເມສິ. ອຎ຺ຎາຕນ຺ຕິ ອຠິຎ຺ຎາຕໍ, ຍຖາຠຸຈ຺ຈຄຸເຓຫິ ປຕ຺ຖຏຍສໍ, ເຕເນວ ວາ ອນຎ຺ຎໂປສິຠາເວນ ອປ຺ປິຈ຺ຉຕາສນ຺ຕຸຏ຺ຐິຕາຫິ ຎາຕໍ. ອຖ ວາ ອຎ຺ຎາຕນ຺ຕິ ສພ຺ພໂສ ປຫີນຕຓ຺ຫຕາຍ ລາຠສກ຺ກາຣສິໂລກນິກາມນເຫຕຸ ອຕ຺ຕານໍ ຊານາປນວເສນ ນ ຎາຕໍ. ອວີຕຕຓ຺ໂຫ ຫິ ປາປິຈ຺ໂຉ ກຸຫກຕາຍ ສມ຺ຠາວນາຘິປ຺ປາເຍນ ອຕ຺ຕານໍ ຊານາເປຕິ. ທນ຺ຕນ຺ຕິ ຉຬງ຺ຄຸເປກ຺ຂາວເສນ ອິນ຺ທ຺ຣິເຍສຸ ອຸຕ຺ຕມທມເນນ ທນ຺ຕໍ. ສາເຣ ປຕິຏ຺ຐິຕນ຺ຕິ ວິມຸຕ຺ຕິສາເຣ ອວຏ຺ຐິຕໍ, ອເສກ຺ຂສີລກ຺ຂນ຺ຘາທິເກ ວາ ສີລາທິສາເຣ ປຕິຏ຺ຐິຕໍ. ຂີຓາສວໍ ວນ຺ຕໂທສນ຺ຕິ ກາມາສວາທີນໍ ຈຕຸນ຺ນໍ ອາສວານໍ ອນວເສສໍ ປຫີນຕ຺ຕາ ຂີຓາສວໍ. ຕໂຕ ເອວ ຣາຄາທິໂທສານໍ ສພ຺ພໂສ ວນ຺ຕຕ຺ຕາ ວນ຺ຕໂທສໍ. ຕມຫໍ ພ຺ຣູມິ ພ຺ຣາຫ຺ມຓນ຺ຕິ ຕໍ ຍຖາວຸຕ຺ຕຄຸຓໍ ປຣມຕ຺ຖພ຺ຣາຫ຺ມຓໍ ອຫໍ ພ຺ຣາຫ຺ມຓນ຺ຕິ ວທາມີຕິ. ອິຘາປິ ເຫຏ຺ຐາ ວຸຕ຺ຕນເຍເນວ ເທສນານານຕ຺ຕໍ ເວທິຕພ຺ພໍ.

ຉຏ຺ຐສຸຕ຺ຕວຓ຺ຓນາ ນິຏ຺ຐິຕາ.