໘. ວິຊຍາເຖຣີຄາຖາວຓ຺ຓນາ

ຈຕຸກ຺ຂຕ຺ຕຸນ຺ຕິອາທິກາ ວິຊຍາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ຕີ, ອນຸກ຺ກເມນ ປຣິພ຺ຣູຫິຕກຸສລມູລາ ເທວມນຸສ຺ເສສຸ ສໍສຣນ຺ຕີ, ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ອຎ຺ຎຕຣສ຺ມິໍ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ວາ ເຂມາຍ ເຖຣິຍາ ຄິຫິກາເລ ສຫາຍິກາ ອໂຫສິ. ສາ ຕສ຺ສາ ປພ຺ພຊິຕຠາວໍ ສຸຕ຺ວາ ‘‘ສາປິ ນາມ ຣາຊມເຫສີ ປພ຺ພຊິສ຺ສຕິ ກິມງ຺ຄໍ ປນາຫ’’ນ຺ຕິ ປພ຺ພຊິຕຸກາມາເຍວ ຫຸຕ຺ວາ ເຂມາເຖຣິຍາ ສນ຺ຕິກໍ ອຸປສງ຺ກມິ. ເຖຣີ ຕສ຺ສາ ອຊ຺ຌາສຍໍ ຎຕ຺ວາ ຕຖາ ຘມ຺ມໍ ເທເສສິ, ຍຖາ ສໍສາເຣ ສໍວິຄ຺ຄມານສາ ສາສເນ ສາ ອຠິປ຺ປສນ຺ນາ ຠວິສ຺ສຕິ. ສາ ຕໍ ຘມ຺ມໍ ສຸຕ຺ວາ ສໍເວຄຊາຕາ ປຏິລທ຺ຘສທ຺ຘາ ຈ ຫຸຕ຺ວາ ປພ຺ພຊ຺ຊໍ ຍາຈິ. ເຖຣີ ຕໍ ປພ຺ພາເຊສິ. ສາ ປພ຺ພຊິຕ຺ວາ ກຕປຸພ຺ພກິຈ຺ຈາ ວິປສ຺ສນໍ ປຏ຺ຐເປຕ຺ວາ ເຫຕຸສມ຺ປນ຺ນຕາຍ, ນ ຈິຣສ຺ເສວ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ອຸທານວເສນ –

໑໖໙. ‘‘ຈຕຸກ຺ຂຕ຺ຕຸໍ ປຎ຺ຈກ຺ຂຕ຺ຕຸໍ, ວິຫາຣາ ອຸປນິກ຺ຂມິໍ;

ອລທ຺ຘາ ເຈຕໂສ ສນ຺ຕິໍ, ຈິຕ຺ເຕ ອວສວຕ຺ຕິນີ.

໑໗໐. ‘‘ຠິກ຺ຂຸນິໍ ອຸປສງ຺ກມ຺ມ, ສກ຺ກຈ຺ຈໍ ປຣິປຸຈ຺ຉຫໍ;

ສາ ເມ ຘມ຺ມມເທເສສິ, ຘາຕຸອາຍຕນານິ ຈ.

໑໗໑. ‘‘ຈຕ຺ຕາຣິ ອຣິຍສຈ຺ຈານິ, ອິນ຺ທ຺ຣິຍານິ ພລານິ ຈ;

ໂພຊ຺ຌງ຺ຄຏ຺ຐງ຺ຄິກໍ ມຄ຺ຄໍ, ອຸຕ຺ຕມຕ຺ຖສ຺ສ ປຕ຺ຕິຍາ.

໑໗໒. ‘‘ຕສ຺ສາຫໍ ວຈນໍ ສຸຕ຺ວາ, ກໂຣນ຺ຕີ ອນຸສາສນິໍ;

ຣຕ຺ຕິຍາ ປຸຣິເມ ຍາເມ, ປຸພ຺ພຊາຕິມນຸສ຺ສຣິໍ.

໑໗໓. ‘‘ຣຕ຺ຕິຍາ ມຊ຺ຌິເມ ຍາເມ, ທິພ຺ພຈກ຺ຂຸໍ ວິໂສຘຍິໍ;

ຣຕ຺ຕິຍາ ປຈ຺ຉິເມ ຍາເມ, ຕໂມຂນ຺ຘໍ ປທາລຍິໍ.

໑໗໔. ‘‘ປີຕິສຸເຂນ ຈ ກາຍໍ, ຜຣິຕ຺ວາ ວິຫຣິໍ ຕທາ;

ສຕ຺ຕມິຍາ ປາເທ ປສາເຣສິໍ, ຕໂມຂນ຺ຘໍ ປທາລິຍາ’’ຕິ. –

ອິມາ ຄາຖາ ອຠາສິ.

ຕຕ຺ຖ ຠິກ຺ຂຸນິນ຺ຕິ ເຂມາເຖຣິໍ ສນ຺ຘາຍ ວທຕິ.

ໂພຊ຺ຌງ຺ຄຏ຺ຐງ຺ຄິກໍ ມຄ຺ຄນ຺ຕິ ສຕ຺ຕໂພຊ຺ຌງ຺ຄຎ຺ຈ ອຏ຺ຐງ຺ຄິກຎ຺ຈ ອຣິຍມຄ຺ຄໍ. ອຸຕ຺ຕມຕ຺ຖສ຺ສ ປຕ຺ຕິຍາຕິ ອຣຫຕ຺ຕສ຺ສ ນິພ຺ພານສ຺ເສວ ວາ ປຕ຺ຕິຍາ ອຘິຄມາຍ.

ປີຕິສຸເຂນາຕິ ຜລສມາປຕ຺ຕິປຣິຍາປນ຺ນາຍ ປີຕິຍາ ສຸເຂນ ຈ. ກາຍນ຺ຕິ ຕໍສມ຺ປຍຸຕ຺ຕໍ ນາມກາຍໍ ຕທນຸສາເຣນ ຣູປກາຍຎ຺ຈ. ຜຣິຕ຺ວາຕິ ຜຸສິຕ຺ວາ ພ຺ຍາເປຕ຺ວາ ວາ. ສຕ຺ຕມິຍາ ປາເທ ປສາເຣສິນ຺ຕິ ວິປສ຺ສນາຍ ອາຣທ຺ຘທິວສໂຕ ສຕ຺ຕມິຍໍ ປລ຺ລງ຺ກໍ ຠິນ຺ທິຕ຺ວາ ປາເທ ປສາເຣສິໍ. ກຖໍ? ຕໂມຂນ຺ຘໍ ປທາລິຍ, ອປ຺ປທາລິຕປຸພ຺ພໍ ໂມຫກ຺ຂນ຺ຘໍ ອຄ຺ຄມຄ຺ຄຎາຓາສິນາ ປທາເລຕ຺ວາ. ເສສໍ ເຫຏ຺ຐາ ວຸຕ຺ຕນຍເມວ.

ວິຊຍາເຖຣີຄາຖາວຓ຺ຓນາ ນິຏ຺ຐິຕາ.

ຉກ຺ກນິປາຕວຓ຺ຓນາ ນິຏ຺ຐິຕາ.