໗. ຄຸຕ຺ຕາເຖຣີຄາຖາວຓ຺ຓນາ

ຄຸຕ຺ເຕ ຍທຕ຺ຖໍ ປພ຺ພຊ຺ຊາຕິອາທິກາ ຄຸຕ຺ຕາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ຕີ ອນຸກ຺ກເມນ ສມ຺ຠຕວິໂມກ຺ຂສມ຺ຠາຣາ ຫຸຕ຺ວາ, ປຣິປກ຺ກກຸສລມູລາ ສຸຄຕີສຸເຍວ ສໍສຣນ຺ຕີ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ພ຺ຣາຫ຺ມຓກຸເລ ນິພ຺ພຕ຺ຕາ, ຄຸຕ຺ຕາຕິສ຺ສາ ນາມໍ ອໂຫສິ. ສາ ວິຎ຺ຎຸຕໍ ປຕ຺ວາ ອຸປນິສ຺ສຍສມ຺ປຕ຺ຕິຍາ ໂຈທິຍມານາ ຆຣາວາສໍ ຊິຄຸຈ຺ຉນ຺ຕີ ມາຕາປິຕໂຣ ອນຸຊານາເປຕ຺ວາ ມຫາປຊາປຕິໂຄຕມິຍາ ສນ຺ຕິເກ ປພ຺ພຊິ. ປພ຺ພຊິຕ຺ວາ ຈ ວິປສ຺ສນໍ ປຏ຺ຐເປຕ຺ວາ ຠາວນໍ ອນຸຍຸຎ຺ຊນ຺ຕິຍາ ຕສ຺ສາ ຈິຕ຺ຕໍ ຈິຣກາລປຣິຈເຍນ ພຫິທ຺ຘາຣມ຺ມເຓ ວິຘາວຕິ, ເອກຄ຺ຄໍ ນາໂຫສິ. ສຕ຺ຖາ ທິສ຺ວາ ຕໍ ອນຸຄ຺ຄຓ຺ຫນ຺ໂຕ, ຄນ຺ຘກຸຏິຍໍ ຍຖານິສິນ຺ໂນວ ໂອຠາສໍ ຜຣິຕ຺ວາ ຕສ຺ສາ ອາສນ຺ເນ ອາກາເສ ນິສິນ຺ນໍ ວິຍ ອຕ຺ຕານໍ ທສ຺ເສຕ຺ວາ ໂອວທນ຺ໂຕ –

໑໖໓. ‘‘ຄຸຕ຺ເຕ ຍທຕ຺ຖໍ ປພ຺ພຊ຺ຊາ, ຫິຕ຺ວາ ປຸຕ຺ຕໍ ວສຸໍ ປິຍໍ;

ຕເມວ ອນຸພ຺ຣູເຫຫິ, ມາ ຈິຕ຺ຕສ຺ສ ວສໍ ຄມິ.

໑໖໔. ‘‘ຈິຕ຺ເຕນ ວຎ຺ຈິຕາ ສຕ຺ຕາ, ມາຣສ຺ສ ວິສເຍ ຣຕາ;

ອເນກຊາຕິສໍສາຣໍ, ສນ຺ຘາວນ຺ຕິ ອວິທ຺ທສູ.

໑໖໕. ‘‘ກາມາຈ຺ຉນ຺ທຎ຺ຈ ພ຺ຍາປາທໍ, ສກ຺ກາຍທິຏ຺ຐິເມວ ຈ;

ສີລພ຺ພຕປຣາມາສໍ, ວິຈິກິຈ຺ຉໍ ຈ ປຎ຺ຈມໍ.

໑໖໖. ‘‘ສໍໂຍຊນານິ ເອຕານິ, ປຊຫິຕ຺ວານ ຠິກ຺ຂຸນີ;

ໂອຣມ຺ຠາຄມນີຍານິ, ນຍິທໍ ປຸນເຣຫິສິ.

໑໖໗. ‘‘ຣາຄໍ ມານໍ ອວິຊ຺ຊຎ຺ຈ, ອຸທ຺ຘຈ຺ຈຎ຺ຈ ວິວຊ຺ຊິຍ;

ສໍໂຍຊນານິ ເຉຕ຺ວານ, ທຸກ຺ຂສ຺ສນ຺ຕໍ ກຣິສ຺ສສິ.

໑໖໘. ‘‘ເຂເປຕ຺ວາ ຊາຕິສໍສາຣໍ, ປຣິຎ຺ຎາຍ ປຸນພ຺ຠວໍ;

ທິຏ຺ເຐວ ຘມ຺ເມ ນິຈ຺ຉາຕາ, ອຸປສນ຺ຕາ ຈຣິສ຺ສສີ’’ຕິ. – ອິມາ ຄາຖາ ອາຠາສິ;

ຕຕ຺ຖ ຕເມວ ອນຸພ຺ຣູເຫຫີຕິ ຍທຕ຺ຖໍ ຍສ຺ສ ກິເລສປຣິນິພ຺ພານສ຺ສ ຂນ຺ຘປຣິນິພ຺ພານສ຺ສ ຈ ອຕ຺ຖາຍ. ຫິຕ຺ວາ ປຸຕ຺ຕໍ ວສຸໍ ປິຍນ຺ຕິ ປິຍາຍິຕພ຺ພໍ ຎາຕິປຣິວຏ຺ຏໍ ໂຠຄກ຺ຂນ຺ຘຎ຺ຈ ຫິຕ຺ວາ ມມ ສາສເນ ປພ຺ພຊ຺ຊາ ພ຺ຣຫ຺ມຈຣິຍວາໂສ ອິຈ຺ຉິໂຕ, ຕເມວ ວຑ຺ເຒຍ຺ຍາສິ ສມ຺ປາເທຍ຺ຍາສິ. ມາ ຈິຕ຺ຕສ຺ສ ວສໍ ຄມີຕິ ທີຆຣຕ຺ຕໍ ຣູປາທິອາຣມ຺ມຓວເສນ ວຑ຺ຒິຕສ຺ສ ກູຏຈິຕ຺ຕສ຺ສ ວສໍ ມາ ຄຈ຺ຉິ.

ຍສ຺ມາ ຈິຕ຺ຕໍ ນາເມຕໍ ມາຍູປມໍ, ເຍນ ວຎ຺ຈິຕາ ອນ຺ຘປຸຖຸຊ຺ຊນາ ມາຣວສານຸຄາ ສໍສາຣໍ ນາຕິວຕ຺ຕນ຺ຕິ. ເຕນ ວຸຕ຺ຕໍ ‘‘ຈິຕ຺ເຕນ ວຎ຺ຈິຕາ’’ຕິອາທິ.

ສໍໂຍຊນານິ ເອຕານີຕິ ເອຕານິ ‘‘ກາມຈ຺ຉນ຺ທຎ຺ຈ ພ຺ຍາປາທ’’ນ຺ຕິອາທິນາ ຍຖາວຸຕ຺ຕານິ ປຎ຺ຈ ພນ຺ຘນຏ຺ເຐນ ສໍໂຍຊນານິ. ປຊຫິຕ຺ວານາຕິ ອນາຄາມິມຄ຺ເຄນ ສມຸຈ຺ຉິນ຺ທິຕ຺ວາ. ຠິກ຺ຂຸນີຕິ ຕສ຺ສາ ອາລປນໍ. ໂອຣມ຺ຠາຄມນີຍານີຕິ ຣູປາຣູປຘາຕຸໂຕ ເຫຏ຺ຐາຠາເຄ ກາມຘາຕຸຍໍ ມນຸສ຺ສຊີວສ຺ສ ຫິຕານິ ອຸປກາຣານິ ຕຕ຺ຖ ປຏິສນ຺ຘິຍາ ປຈ຺ຈຍຠາວໂຕ. ມ-ກາໂຣ ປທສນ຺ຘິກໂຣ. ‘‘ໂອຣມາຄມນີຍານີ’’ຕິ ປາຬິ, ໂສ ເອວຕ຺ໂຖ. ນຍິທໍ ປຸນເຣຫິສີຕິ ໂອຣມ຺ຠາຄິຍານໍ ສໍໂຍຊນານໍ ປຫາເນນ ອິທໍ ກາມຏ຺ຐານໍ ກາມຠວໍ ປຏິສນ຺ຘິວເສນ ປຸນ ນາຄມິສ຺ສສິ. ຣ-ກາໂຣ ປທສນ຺ຘິກໂຣ. ‘‘ອິຕ຺ຖ’’ນ຺ຕິ ວາ ປາຬິ, ອິຕ຺ຖຕ຺ຕໍ ກາມຠວມິຈ຺ເຈວ ອຕ຺ໂຖ.

ຣາຄນ຺ຕິ ຣູປຣາຄຎ຺ຈ ອຣູປຣາຄຎ຺ຈ. ມານນ຺ຕິ ອຄ຺ຄມຄ຺ຄວຊ຺ຌໍ ມານໍ. ອວິຊ຺ຊຎ຺ຈ ອຸທ຺ຘຈ຺ຈຎ຺ຈາຕິ ເອຕ຺ຖາປິ ເອເສວ ນໂຍ. ວິວຊ຺ຊິຍາຕິ ວິປສ຺ສນາຍ ວິກ຺ຂມ຺ເຠຕ຺ວາ. ສໍໂຍຊນານິ ເຉຕ຺ວານາຕິ ເອຕານິ ຣູປຣາຄາທີນິ ປຎ຺ຈຸທ຺ຘມ຺ຠາຄິຍານິ ສໍໂຍຊນານິ ອຣຫຕ຺ຕມຄ຺ເຄນ ສມຸຈ຺ຉິນ຺ທິຕ຺ວາ. ທຸກ຺ຂສ຺ສນ຺ຕໍ ກຣິສ຺ສສີຕິ ສພ຺ພສ຺ສາປິ ວຏ຺ຏທຸກ຺ຂສ຺ສ ປຣິຍນ຺ຕໍ ປຣິໂຍສານໍ ປາປຸຓິສ຺ສສິ.

ເຂເປຕ຺ວາ ຊາຕິສໍສາຣນ຺ຕິ ຊາຕິ ສມູລິກສໍສາຣປວຕ຺ຕິໍ ປຣິໂຍສາເປຕ຺ວາ. ນິຈ຺ຉາຕາຕິ ນິຕ຺ຕຓ຺ຫາ. ອຸປສນ຺ຕາຕິ ສພ຺ພໂສ ກິເລສານໍ ວູປສເມນ ອຸປສນ຺ຕາ. ເສສໍ ວຸຕ຺ຕນຍເມວ.

ເອວໍ ສຕ຺ຖາຣາ ອິມາສຸ ຄາຖາສຸ ຠາສິຕາສຸ ຄາຖາປຣິໂຍສາເນ ເຖຣີ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ ອຸທານວເສນ ຠຄວຕາ ຠາສິຕນິຍາເມເນວ ອິມາ ຄາຖາ ອຠາສິ. ເຕເນວ ຕາ ເຖຣິຍາ ຄາຖາ ນາມ ຊາຕາ.

ຄຸຕ຺ຕາເຖຣີຄາຖາວຓ຺ຓນາ ນິຏ຺ຐິຕາ.