໕. ອໂນປມາເຖຣີຄາຖາວຓ຺ຓນາ

ອຸຈ຺ເຈ ກຸເລຕິອາທິກາ ອໂນປມາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ຕີ ອນຸກ຺ກເມນ ວິມຸຕ຺ຕິປຣິປາຈນີເຍ ຘມ຺ເມ ປຣິພ຺ຣູຫິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາເກຕນຄເຣ ມຊ຺ຌສ຺ສ ນາມ ເສຏ຺ຐິໂນ ຘີຕາ ຫຸຕ຺ວາ ນິພ຺ພຕ຺ຕິ. ຕສ຺ສາ ຣູປສມ຺ປຕ຺ຕິຍາ ອໂນປມາຕິ ນາມໍ ອໂຫສິ. ຕສ຺ສາ ວຍປ຺ປຕ຺ຕກາເລ ພຫູ ເສຏ຺ຐິປຸຕ຺ຕາ ຣາຊມຫາມຕ຺ຕາ ຣາຊາໂນ ຈ ປິຕຸ ທູຕໍ ປາເຫສຸໍ – ‘‘ອຕ຺ຕໂນ ຘີຕຣໍ ອໂນປມໍ ເທຫິ, ອິທຎ຺ຈິທຎ຺ຈ ເຕ ທສ຺ສາມາ’’ຕິ. ສາ ຕໍ ສຸຕ຺ວາ ອຸປນິສ຺ສຍສມ຺ປນ຺ນຕາຍ ‘‘ຆຣາວາເສນ ມຍ຺ຫໍ ອຕ຺ໂຖ ນຕ຺ຖີ’’ຕິ ສຕ຺ຖຸ ສນ຺ຕິກໍ ຄນ຺ຕ຺ວາ ຘມ຺ມໍ ສຸຕ຺ວາ ຎາຓສ຺ສ ປຣິປາກໍ ຄຕຕ຺ຕາ ເທສນານຸສາເຣນ ວິປສ຺ສນໍ ອາຣຠິຕ຺ວາ ຕໍ ອຸສ຺ສຸກ຺ກາເປນ຺ຕີ ມຄ຺ຄປຏິປາຏິຍາ ຕຕິຍຜເລ ປຕິຏ຺ຐາສິ. ສາ ສຕ຺ຖາຣໍ ປພ຺ພຊ຺ຊໍ ຍາຈິຕ຺ວາ ສຕ຺ຖຸອາຓາຍ ຠິກ຺ຂຸນຸປສ຺ສຍໍ ອຸປຄນ຺ຕ຺ວາ ຠິກ຺ຂຸນີນໍ ສນ຺ຕິເກ ປພ຺ພຊິຕ຺ວາ ສຕ຺ຕເມ ທິວເສ ອຣຫຕ຺ຕໍ ສຈ຺ຉິກຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ອຸທານວເສນ –

໑໕໑. ‘‘ອຸຈ຺ເຈ ກຸເລ ອຫໍ ຊາຕາ, ພຫຸວິຕ຺ເຕ ມຫທ຺ຘເນ;

ວຓ຺ຓຣູເປນ ສມ຺ປນ຺ນາ, ຘີຕາ ມຊ຺ຌສ຺ສ ອຕ຺ຣຊາ.

໑໕໒. ‘‘ປຕ຺ຖິຕາ ຣາຊປຸຕ຺ເຕຫິ, ເສຏ຺ຐິປຸຕ຺ເຕຫິ ຄິຊ຺ຌິຕາ;

ປິຕຸ ເມ ເປສຍີ ທູຕໍ, ເທຖ ມຍ຺ຫໍ ອໂນປມໍ.

໑໕໓. ‘‘ຍຕ຺ຕກໍ ຕຸລິຕາ ເອສາ, ຕຸຍ຺ຫໍ ຘີຕາ ອໂນປມາ;

ຕໂຕ ອຏ຺ຐຄຸຓໍ ທສ຺ສໍ, ຫິຣຎ຺ຎໍ ຣຕນານິ ຈ.

໑໕໔. ‘‘ສາຫໍ ທິສ຺ວານ ສມ຺ພຸທ຺ຘໍ, ໂລກເຊຏ຺ຐໍ ອນຸຕ຺ຕຣໍ;

ຕສ຺ສ ປາທານິ ວນ຺ທິຕ຺ວາ, ເອກມນ຺ຕໍ ອຸປາວິສິໍ.

໑໕໕. ‘‘ໂສ ເມ ຘມ຺ມມເທເສສິ, ອນຸກມ຺ປາຍ ໂຄຕໂມ;

ນິສິນ຺ນາ ອາສເນ ຕສ຺ມິໍ, ຜຸສຍິໍ ຕຕິຍໍ ຜລໍ.

໑໕໖. ‘‘ຕໂຕ ເກສານິ ເຉຕ຺ວານ, ປພ຺ພຊິໍ ອນຄາຣິຍໍ;

ອຊ຺ຊ ເມ ສຕ຺ຕມີ ຣຕ຺ຕິ, ຍໂຕ ຕຓ຺ຫາ ວິເສສິຕາ’’ຕິ. –

ອິມາ ຄາຖາ ອຠາສິ.

ຕຕ຺ຖ ອຸຈ຺ເຈ ກຸເລຕິ ອຸຬາຣຕເມ ເວສ຺ສກຸເລ. ພຫຸວິຕ຺ເຕຕິ ອລງ຺ກາຣາທິປຫູຕວິຕ຺ຕູປກຣເຓ. ມຫທ຺ຘເນຕິ ນິຘານຄຕສ຺ເສວ ຈຕ຺ຕາຣີສໂກຏິປຣິມາຓສ຺ສ ມຫໂຕ ຘນສ຺ສ ອຕ຺ຖິຠາເວນ ມຫທ຺ຘເນ ອຫໍ ຊາຕາຕິ ໂຍຊນາ. ວຓ຺ຓຣູເປນ ສມ຺ປນ຺ນາຕິ ວຓ຺ຓສມ຺ປນ຺ນາ ເຈວ ຣູປສມ຺ປນ຺ນາ ຈ, ສິນິທ຺ຘຠາສຸຣາຍ ຉວິສມ຺ປຕ຺ຕິຍາ ວຕ຺ຖາຠຣຓາທິສຣີຣາວຍວສມ຺ປຕ຺ຕິຍາ ຈ ສມນ຺ນາຄຕາຕິ ອຕ຺ໂຖ. ຘີຕາ ມຊ຺ຌສ຺ສ ອຕ຺ຣຊາຕິ ມຊ຺ຌນາມສ຺ສ ເສຏ຺ຐິໂນ ໂອຣສາ ຘີຕາ.

ປຕ຺ຖິຕາ ຣາຊປຸຕ຺ເຕຫີຕິ ‘‘ກຖໍ ນຸ ໂຂ ຕໍ ລເຠຍ຺ຍາມາ’’ຕິ ຣາຊກຸມາເຣຫິ ອຠິປຕ຺ຖິຕາ. ເສຏ຺ຐິປຸຕ຺ເຕຫິ ຄິຊ຺ຌິຕາຕິ ຕຖາ ເສຏ຺ຐິກຸມາເຣຫິປິ ອຠິຄິຊ຺ຌິຕາ ປຈ຺ຈາສີສິຕາ. ເທຖ ມຍ຺ຫໍ ອໂນປມນ຺ຕິ ຣາຊປຸຕ຺ຕາທໂຍ ‘‘ເທຖ ມຍ຺ຫໍ ອໂນປມໍ ເທຖ ມຍ຺ຫ’’ນ຺ຕິ ປິຕຸ ສນ຺ຕິເກ ທູຕໍ ເປສຍິໍສຸ.

ຍຕ຺ຕກໍ ຕຸລິຕາ ເອສາຕິ ‘‘ຕຸຍ຺ຫໍ ຘີຕາ ອໂນປມາ ຍຕ຺ຕກໍ ຘນໍ ອຄ຺ຆຕີ’’ຕິ ຕຸລິຕາ ລກ຺ຂຓຎ຺ຎູຫິ ປຣິຈ຺ຉິນ຺ນາ, ‘‘ຕໂຕ ອຏ຺ຐຄຸຓໍ ທສ຺ສາມີ’’ຕິ ປິຕຸ ເມ ເປສຍິ ທູຕນ຺ຕິ ໂຍຊນາ. ເສສໍ ເຫຏ຺ຐາ ວຸຕ຺ຕນຍເມວ.

ອໂນປມາເຖຣີຄາຖາວຓ຺ຓນາ ນິຏ຺ຐິຕາ.