໔. ສຸຊາຕາເຖຣີຄາຖາວຓ຺ຓນາ

ອລງ຺ກຕາ ສຸວສນາຕິອາທິກາ ສຸຊາຕາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ຕີ ອນຸກ຺ກເມນ ສມ຺ຠຕວິໂມກ຺ຂສມ຺ຠາຣາ ຫຸຕ຺ວາ ອິມສ຺ມິໍ ພຸທ຺ຘຸປ຺ປາເທ ສາເກຕນຄເຣ ເສຏ຺ຐິກຸເລ ນິພ຺ພຕ຺ຕິຕ຺ວາ ວຍປ຺ປຕ຺ຕາ ມາຕາປິຕູຫິ ສມານຊາຕິກສ຺ສ ເສຏ຺ຐິປຸຕ຺ຕສ຺ສ ທິນ຺ນາ ຫຸຕ຺ວາ ປຕິກຸລໍ ຄຕາ. ຕຕ຺ຖ ເຕນ ສທ຺ຘິໍ ສຸຂສໍວາສໍ ວສນ຺ຕີ ເອກທິວສໍ ອຸຍ຺ຍານໍ ຄນ຺ຕ຺ວາ ນກ຺ຂຕ຺ຕກີຬໍ ກີຬິຕ຺ວາ ປຣິຊເນນ ສທ຺ຘິໍ ນຄຣໍ ອາຄຈ຺ຉນ຺ຕີ ອຎ຺ຊນວເນ ສຕ຺ຖາຣໍ ທິສ຺ວາ ປສນ຺ນມານສາ ອຸປສງ຺ກມິຕ຺ວາ ວນ຺ທິຕ຺ວາ ເອກມນ຺ຕໍ ນິສີທິ. ສຕ຺ຖາ ຕສ຺ສາ ອນຸປຸພ຺ພິໍ ກຖໍ ກເຖຕ຺ວາ ກລ຺ລຈິຕ຺ຕຕໍ ຎຕ຺ວາ ອຸປຣິ ສາມຸກ຺ກໍສິກໍ ຘມ຺ມເທສນໍ ປກາເສສິ. ສາ ເທສນາວສາເນ ອຕ຺ຕໂນ ກຕາຘິກາຣຕາຍ ຎາຓສ຺ສ ປຣິປາກໍ ຄຕຕ຺ຕາ ຈ, ສຕ຺ຖຸ ຈ ເທສນາວິລາເສນ ຍຖານິສິນ຺ນາວ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ ສຕ຺ຖາຣໍ ວນ຺ທິຕ຺ວາ ເຄຫໍ ຄນ຺ຕ຺ວາ ສາມິກຎ຺ຈ ມາຕາປິຕໂຣ ຈ ອນຸຊານາເປຕ຺ວາ ສຕ຺ຖຸອາຓາຍ ຠິກ຺ຂຸນຸປສ຺ສຍໍ ຄນ຺ຕ຺ວາ ຠິກ຺ຂຸນີນໍ ສນ຺ຕິເກ ປພ຺ພຊິ. ປພ຺ພຊິຕ຺ວາ ຈ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ອຸທານວເສນ –

໑໔໕. ‘‘ອລງ຺ກຕາ ສຸວສນາ, ມາລິນີ ຈນ຺ທໂນກ຺ຂິຕາ;

ສພ຺ພາຠຣຓສຎ຺ຉນ຺ນາ, ທາສີຄຓປຸຣກ຺ຂຕາ.

໑໔໖. ‘‘ອນ຺ນໍ ປານຎ຺ຈ ອາທາຍ, ຂຊ຺ຊໍ ໂຠຊ຺ຊໍ ອນປ຺ປກໍ;

ເຄຫໂຕ ນິກ຺ຂມິຕ຺ວານ, ອຸຍ຺ຍານມຠິຫາຣຍິໍ.

໑໔໗. ‘‘ຕຕ຺ຖ ຣມິຕ຺ວາ ກີຬິຕ຺ວາ, ອາຄຈ຺ຉນ຺ຕີ ສກໍ ຆຣໍ;

ວິຫາຣໍ ທຏ຺ຐຸໍ ປາວິສິໍ, ສາເກເຕ ອຎ຺ຊນໍ ວນໍ.

໑໔໘. ‘‘ທິສ຺ວານ ໂລກປຊ຺ໂຊຕໍ, ວນ຺ທິຕ຺ວານ ອຸປາວິສິໍ;

ໂສ ເມ ຘມ຺ມມເທເສສິ, ອນຸກມ຺ປາຍ ຈກ຺ຂຸມາ.

໑໔໙. ‘‘ສຸຕ຺ວາ ຈ ໂຂ ມເຫສິສ຺ສ, ສຈ຺ຈໍ ສມ຺ປຏິວິຊ຺ຌຫໍ;

ຕຕ຺ເຖວ ວິຣຊໍ ຘມ຺ມໍ, ຜຸສຍິໍ ອມຕໍ ປທໍ.

໑໕໐. ‘‘ຕໂຕ ວິຎ຺ຎາຕສທ຺ຘມ຺ມາ, ປພ຺ພຊິໍ ອນຄາຣິຍໍ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ອໂມຆໍ ພຸທ຺ຘສາສນ’’ນ຺ຕິ. –

ອິມາ ຄາຖາ ອຠາສິ.

ຕຕ຺ຖ ອລງ຺ກຕາຕິ ວິຠູສິຕາ. ຕໍ ປນ ອລງ຺ກຕາກາຣໍ ທສ຺ເສຕຸໍ ‘‘ສຸວສນາ ມາລິນີ ຈນ຺ທໂນກ຺ຂິຕາ’’ຕິ ວຸຕ຺ຕໍ. ຕຕ຺ຖ ມາລິນີຕິ ມາລາຘາຣິນີ. ຈນ຺ທໂນກ຺ຂິຕາຕິ ຈນ຺ທນານຸລິຕ຺ຕາ. ສພ຺ພາຠຣຓສຎ຺ຉນ຺ນາຕິ ຫຕ຺ຖູປຄາທີຫິ ສພ຺ເພຫິ ອາຠຣເຓຫິ ອລງ຺ກາຣວເສນ ສຎ຺ຉາທິຕສຣີຣາ.

ອນ຺ນໍ ປານຎ຺ຈ ອາທາຍ, ຂຊ຺ຊໍ ໂຠຊ຺ຊໍ ອນປ຺ປກນ຺ຕິ ສາລິໂອທນາທິອນ຺ນໍ, ອມ຺ພປານາທິປານໍ, ປິຏ຺ຐຂາທນີຍາທິຂຊ຺ຊໍ, ອວສິຏ຺ຐໍ ອາຫາຣສງ຺ຂາຕໍ ໂຠຊ຺ຊຎ຺ຈ ປຫູຕໍ ຄເຫຕ຺ວາ. ອຸຍ຺ຍານມຠິຫາຣຍິນ຺ຕິ ນກ຺ຂຕ຺ຕກີຬາວເສນ ອຸຍ຺ຍານໍ ອຸປເນສິໍ. ອນ຺ນປານາທິໍ ຕຕ຺ຖ ອາເນຕ຺ວາ ສຫ ປຣິຊເນນ ກີຬນ຺ຕີ ຣມນ຺ຕີ ປຣິຈາເຣສິນ຺ຕິ ອຘິປ຺ປາໂຍ.

ສາເກເຕ ອຎ຺ຊນໍ ວນນ຺ຕິ ສາເກຕສມີເປ ອຎ຺ຊນວເນ ວິຫາຣໍ ປາວິສິໍ.

ໂລກປຊ຺ໂຊຕນ຺ຕິ ຎາຓປຊ຺ໂຊເຕນ ໂລກສ຺ສ ປຊ຺ໂຊຕຠູຕໍ.

ຜຸສຍິນ຺ຕິ ຜຸສິໍ, ອຘິຄຈ຺ຉິນ຺ຕິ ອຕ຺ໂຖ. ເສສໍ ວຸຕ຺ຕນຍເມວ.

ສຸຊາຕາເຖຣີຄາຖາວຓ຺ຓນາ ນິຏ຺ຐິຕາ.