໘. ໂສມາເຖຣີຄາຖາວຓ຺ຓນາ

ຍໍ ຕໍ ອິສີຫິ ປຕ຺ຕພ຺ພນ຺ຕິອາທິກາ ໂສມາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ຕີ ສິຂິສ຺ສ ຠຄວໂຕ ກາເລ ຂຕ຺ຕິຍມຫາສາລກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ວາ ອຣຸຓຣຎ຺ໂຎ ອຄ຺ຄມເຫສີ ອໂຫສີຕິ ສພ຺ພໍ ອຕີຕວຕ຺ຖຸ ອຠຍຕ຺ເຖຣິຍາ ວຕ຺ຖຸສທິສໍ. ປຈ຺ຈຸປ຺ປນ຺ນວຕ຺ຖຸ ປນ ອຍໍ ເຖຣີ ຕຕ຺ຖ ຕຕ຺ຖ ເທວມນຸສ຺ເສສຸ ສໍສຣນ຺ຕີ ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ພິມ຺ພິສາຣສ຺ສ ຣຎ຺ໂຎ ປຸໂຣຫິຕສ຺ສ ຘີຕາ ຫຸຕ຺ວາ ນິພ຺ພຕ຺ຕິ. ຕສ຺ສາ ໂສມາຕິ ນາມໍ ອໂຫສິ. ສາ ວິຎ຺ຎຸຕໍ ປຕ຺ຕາ ສຕ຺ຖຸ ຣາຊຄຫປເວສເນ ປຏິລທ຺ຘສທ຺ຘາ ອຸປາສິກາ ຫຸຕ຺ວາ ອປຣຠາເຄ ສຎ຺ຊາຕສໍເວຄາ ຠິກ຺ຂຸນີສຸ ປພ຺ພຊິຕ຺ວາ ກຕປຸພ຺ພກິຈ຺ຈາ ວິປສ຺ສນາຍ ກມ຺ມໍ ກໂຣນ຺ຕີ ນ ຈິຣສ຺ເສວ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣີ ໒.໑.໗໑, ໘໐-໙໐) –

‘‘ນຄເຣ ອຣຸຓວຕິຍາ, ອຣຸໂຓ ນາມ ຂຕ຺ຕິໂຍ;

ຕສ຺ສ ຣຎ຺ໂຎ ອຫຸໍ ຠຣິຍາ, ວາຣິຕໍ ວາຣຍາມຫໍ.

‘‘ຍາວຕາ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ. –

ສພ຺ພໍ ອຠຍຕ຺ເຖຣິຍາ ອປທານສທິສໍ.

ອຣຫຕ຺ຕໍ ປນ ປຕ຺ວາ ວິມຸຕ຺ຕິສຸເຂນ ສາວຕ຺ຖິຍໍ ວິຫຣນ຺ຕີ ເອກທິວສໍ ທິວາວິຫາຣຕ຺ຖາຍ ອນ຺ຘວນໍ ປວິສິຕ຺ວາ ອຎ຺ຎຕຣສ຺ມິໍ ຣຸກ຺ຂມູເລ ນິສີທິ. ອຖ ນໍ ມາໂຣ ວິເວກໂຕ ວິຈ຺ເຉເທຕຸກາໂມ ອທິສ຺ສມານຸຣູໂປ ອຸປຄນ຺ຕ຺ວາ ອາກາເສ ຐຕ຺ວາ –

໖໐. ‘‘ຍໍ ຕໍ ອິສີຫິ ປຕ຺ຕພ຺ພໍ, ຐານໍ ທຸຣຠິສມ຺ຠວໍ;

ນ ຕໍ ທ຺ວງ຺ຄຸລປຎ຺ຎາຍ, ສກ຺ກາ ປປ຺ໂປຕຸມິຕ຺ຖິຍາ’’ຕິ. – ອິມໍ ຄາຖມາຫ;

ຕສ຺ສຕ຺ໂຖ – ສີລກ຺ຂນ຺ຘາທີນໍ ເອສນຏ຺ເຐນ ‘‘ອິສີ’’ຕິ ລທ຺ຘນາເມຫິ ພຸທ຺ຘາທີຫິ ມຫາປຎ຺ເຎຫິ ປຕ຺ຕພ຺ພໍ, ຕໍ ອຎ຺ເຎຫິ ປນ ທຸຣຠິສມ຺ຠວໍ ທຸນ຺ນິປ຺ຜາທນີຍໍ. ຍໍ ຕໍ ອຣຫຕ຺ຕສງ຺ຂາຕໍ ປຣມສ຺ສາສຏ຺ຐານໍ, ນ ຕໍ ທ຺ວງ຺ຄຸລປຎ຺ຎາຍ ນິຫີນປຎ຺ຎາຍ ອິຕ຺ຖິຍາ ປາປຸຓິຕຸໍ ສກ຺ກາ. ອິຕ຺ຖິໂຍ ຫິ ສຕ຺ຕຏ຺ຐວສ຺ສກາລໂຕ ປຏ຺ຐາຍ ສພ຺ພກາລໍ ໂອທນໍ ປຈນ຺ຕິໂຍ ປກ຺ກຸຖິເຕ ອຸທເກ ຕຓ຺ຑຸເລ ປກ຺ຂິປິຕ຺ວາ ‘‘ເອຕ຺ຕາວຕາ ໂອທນໍ ປກ຺ກ’’ນ຺ຕິ ນ ຊານນ຺ຕິ, ປກ຺ກຸຖິຍມາເນ ປນ ຕຓ຺ຑຸເລ ທພ຺ພິຍາ ອຸທ຺ຘຣິຕ຺ວາ ທ຺ວີຫິ ອງ຺ຄຸລີຫິ ປີເຬຕ຺ວາ ຊານນ຺ຕິ, ຕສ຺ມາ ທ຺ວງ຺ຄຸລິປຎ຺ຎາຍາຕິ ວຸຕ຺ຕາ.

ຕໍ ສຸຕ຺ວາ ເຖຣີ ມາຣໍ ອປສາເທນ຺ຕີ –

໖໑. ‘‘ອິຕ຺ຖິຠາໂວ ໂນ ກິໍ ກຍິຣາ, ຈິຕ຺ຕມ຺ຫິ ສຸສມາຫິເຕ;

ຎາຓມ຺ຫິ ວຕ຺ຕມານມ຺ຫິ, ສມ຺ມາ ຘມ຺ມໍ ວິປສ຺ສໂຕ.

໖໒. ‘‘ສພ຺ພຕ຺ຖ ວິຫຕາ ນນ຺ທີ, ຕໂມກ຺ຂນ຺ໂຘ ປທາລິໂຕ;

ເອວໍ ຊານາຫິ ປາປິມ, ນິຫໂຕ ຕ຺ວມສິ ອນ຺ຕກາ’’ຕິ. –

ອິຕຣາ ທ຺ເວ ຄາຖາ ອຠາສິ.

ຕຕ຺ຖ ອິຕ຺ຖິຠາໂວ ໂນ ກິໍ ກຍິຣາຕິ ມາຕຸຄາມຠາໂວ ອມ຺ຫາກໍ ກິໍ ກເຣຍ຺ຍ, ອຣຫຕ຺ຕປ຺ປຕ຺ຕິຍາ ກີທິສໍ ວິພນ຺ຘໍ ອຸປ຺ປາເທຍ຺ຍ. ຈິຕ຺ຕມ຺ຫິ ສຸສມາຫິເຕຕິ ຈິຕ຺ເຕ ອຄ຺ຄມຄ຺ຄສມາຘິນາ ສຸຏ຺ຐຸ ສມາຫິເຕ. ຎາຓມ຺ຫິ ວຕ຺ຕມານມ຺ຫີຕິ ຕໂຕ ອຣຫຕ຺ຕມຄ຺ຄຎາເຓ ປວຕ຺ຕມາເນ. ສມ຺ມາ ຘມ຺ມໍ ວິປສ຺ສໂຕຕິ ຈຕຸສຈ຺ຈຘມ຺ມໍ ປຣິຎ຺ຎາທິວິຘິນາ ສມ຺ມເທວ ປສ຺ສໂຕ. ອຍຎ຺ເຫຕ຺ຖ ສງ຺ເຂໂປ – ປາປິມ, ອິຕ຺ຖີ ວາ ໂຫຕຸ ປຸຣິໂສ ວາ, ອຄ຺ຄມຄ຺ເຄ ອຘິຄເຕ ອຣຫຕ຺ຕໍ ຫຕ຺ຖຄຕເມວາຕິ.

ອິທານິ ຕສ຺ສ ອຕ຺ຕນາ ອຘິຄຕຠາວໍ ອຸຊຸກເມວ ທສ຺ເສນ຺ຕີ ‘‘ສພ຺ພຕ຺ຖ ວິຫຕາ ນນ຺ທີ’’ຕິ ຄາຖມາຫ. ສາ ວຸຕ຺ຕຕ຺ຖາເຍວ.

ໂສມາເຖຣີຄາຖາວຓ຺ຓນາ ນິຏ຺ຐິຕາ.

ຕິກນິປາຕວຓ຺ຓນາ ນິຏ຺ຐິຕາ.