໔. ຈຕຸກ຺ກນິປາໂຕ

໑. ຠທ຺ທາກາປິລານີເຖຣີຄາຖາວຓ຺ຓນາ

ຈຕຸກ຺ກນິປາເຕ ປຸຕ຺ໂຕ ພຸທ຺ຘສ຺ສ ທາຍາໂທຕິອາທິກາ ຠທ຺ທາຍ ກາປິລານິຍາ ເຖຣິຍາ ຄາຖາ. ສາ ກິຣ ປທຸມຸຕ຺ຕຣສ຺ສ ຠຄວໂຕ ກາເລ ຫໍສວຕີນຄເຣ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ວາ ສຕ຺ຖຸ ສນ຺ຕິເກ ຘມ຺ມໍ ສຸຓນ຺ຕີ ສຕ຺ຖາຣໍ ເອກໍ ຠິກ຺ຂຸນິໍ ປຸພ຺ເພນິວາສໍ ອນຸສ຺ສຣນ຺ຕີນໍ ອຄ຺ຄຏ຺ຐາເນ ຐເປນ຺ຕໍ ທິສ຺ວາ ອຘິກາຣກມ຺ມໍ ກຕ຺ວາ ສຍມ຺ປິ ຕໍ ຐານນ຺ຕຣໍ ປຕ຺ເຖຕ຺ວາ ຍາວຊີວໍ ປຸຎ຺ຎານິ ກຕ຺ວາ ຕໂຕ ຈຸຕາ ເທວມນຸສ຺ເສສຸ ສໍສຣນ຺ຕີ ອນຸປ຺ປນ຺ເນ ພຸທ຺ເຘ ພາຣາຓສິຍໍ ກຸລເຄເຫ ນິພ຺ພຕ຺ຕິຕ຺ວາ ປຕິກຸລໍ ຄນ຺ຕ຺ວາ, ເອກທິວສໍ ອຕ຺ຕໂນ ນນນ຺ທາຍ ສທ຺ຘິໍ ກລຫໍ ກໂຣນ຺ຕີ ຕາຍ ປຈ຺ເຈກພຸທ຺ຘສ຺ສ ປິຓ຺ຑປາເຕ ທິນ຺ເນ ‘‘ອຍໍ ອິມສ຺ສ ທານໍ ທຕ຺ວາ ອຸຬາຣສມ຺ປຕ຺ຕິໍ ລຠິສ຺ສຕີ’’ຕິ ປຈ຺ເຈກພຸທ຺ຘສ຺ສ ຫຕ຺ຖໂຕ ປຕ຺ຕໍ ຄເຫຕ຺ວາ ຠຕ຺ຕໍ ຉຑ຺ເຑຕ຺ວາ ກລລສ຺ສ ປູເຣຕ຺ວາ ອທາສິ. ມຫາຊໂນ ຄຣຫິ – ‘‘ພາເລ, ປຈ຺ເຈກພຸທ຺ໂຘ ເຕ ກິໍ ອປຣຊ຺ຌີ’’ຕິ? ສາ ເຕສໍ ວຈເນນ ລຊ຺ຊມານາ ປຸນ ປຕ຺ຕໍ ຄເຫຕ຺ວາ ກລລໍ ນີຫຣິຕ຺ວາ ໂຘວິຕ຺ວາ ຄນ຺ຘຈຸຓ຺ເຓນ ອຸພ຺ພຏ຺ເຏຕ຺ວາ ຈຕຸມຘຸຣສ຺ສ ປູເຣຕ຺ວາ ອຸປຣິ ອາສິຕ຺ເຕນ ປທຸມຄພ຺ຠວຓ຺ເຓນ ສປ຺ປິນາ ວິຊ຺ໂຊຕມານໍ ປຈ຺ເຈກພຸທ຺ຘສ຺ສ ຫຕ຺ເຖ ຐເປຕ຺ວາ ‘‘ຍຖາ ອຍໍ ປິຓ຺ຑປາໂຕ ໂອຠາສຊາໂຕ, ເອວໍ ໂອຠາສຊາຕໍ ເມ ສຣີຣໍ ໂຫຕູ’’ຕິ ປຕ຺ຖນໍ ປຏ຺ຐເປສິ. ສາ ຕໂຕ ຈວິຕ຺ວາ ສຸຄຕີສຸເຍວ ສໍສຣນ຺ຕີ ກສ຺ສປພຸທ຺ຘກາເລ ພາຣາຓສິຍໍ ມຫາວິຠວສ຺ສ ເສຏ຺ຐິໂນ ຘີຕາ ຫຸຕ຺ວາ ນິພ຺ພຕ຺ຕິ. ປຸພ຺ພກມ຺ມຜເລນ ທຸຄ຺ຄນ຺ຘສຣີຣາ ມນຸສ຺ເສຫິ ຊິຄຸຈ຺ຉິຕພ຺ພາ ຫຸຕ຺ວາ ສໍເວຄຊາຕາ ອຕ຺ຕໂນ ອາຠຣເຓຫິ ສຸວຓ຺ຓິຏ຺ຐກໍ ກາເຣຕ຺ວາ ຠຄວໂຕ ເຈຕິເຍ ປຕິຏ຺ຐເປສິ, ອຸປ຺ປລຫຕ຺ເຖນ ຈ ປູຊໍ ອກາສິ. ເຕນສ຺ສາ ສຣີຣໍ ຕສ຺ມິໍເຍວ ຠເວ ສຸຄນ຺ຘໍ ມໂນຫຣໍ ຊາຕໍ. ສາ ປຕິໂນ ປິຍາ ມນາປາ ຫຸຕ຺ວາ ຍາວຊີວໍ ກຸສລໍ ກຕ຺ວາ ຕໂຕ ຈຸຕາ ສຄ຺ເຄ ນິພ຺ພຕ຺ຕິ. ຕຕ຺ຖາປິ ຍາວຊີວໍ ທິພ຺ພສຸຂໍ ອນຸຠວິຕ຺ວາ, ຕໂຕ ຈຸຕາ ພາຣາຓສິຣຎ຺ໂຎ ຘີຕາ ຫຸຕ຺ວາ ຕຕ຺ຖ ເທວສມ຺ປຕ຺ຕິສທິສໍ ສມ຺ປຕ຺ຕິໍ ອນຸຠວນ຺ຕີ ຈິຣກາລໍ ປຈ຺ເຈກພຸທ຺ເຘ ອຸປຏ຺ຐຫິຕ຺ວາ, ເຕສຸ ປຣິນິພ຺ພຸເຕສຸ ສໍເວຄຊາຕາ ຕາປສປພ຺ພຊ຺ຊາຍ ປພ຺ພຊິຕ຺ວາ ອຸຍ຺ຍາເນ ວສນ຺ຕີ ຌານານິ ຠາເວຕ຺ວາ ພ຺ຣຫ຺ມໂລເກ ນິພ຺ພຕ຺ຕິຕ຺ວາ ຕໂຕ ຈຸຕາ ສາຄລນຄເຣ ໂກສິຍໂຄຕ຺ຕສ຺ສ ພ຺ຣາຫ຺ມຓກຸລສ຺ສ ເຄເຫ ນິພ຺ພຕ຺ຕິຕ຺ວາ ມຫຕາ ປຣິຫາເຣນ ວຑ຺ຒິຕ຺ວາ ວຍປ຺ປຕ຺ຕາ ມຫາຕິຕ຺ຖຄາເມ ປິປ຺ຜລິກຸມາຣສ຺ສ ເຄຫໍ ນີຕາ. ຕສ຺ມິໍ ປພ຺ພຊິຕຸໍ ນິກ຺ຂນ຺ເຕ ມຫນ຺ຕໍ ໂຠຄກ຺ຂນ຺ຘໍ ມຫນ຺ຕຎ຺ຈ ຎາຕິປຣິວຏ຺ຏໍ ປຫາຍ ປພ຺ພຊ຺ຊຕ຺ຖາຍ ນິກ຺ຂມິຕ຺ວາ ປຎ຺ຈ ວສ຺ສານິ ຕິຕ຺ຖິຍາຣາເມ ປວິສິຕ຺ວາ ອປຣຠາເຄ ມຫາປຊາປຕິໂຄຕມິຍາ ສນ຺ຕິເກ ປພ຺ພຊ຺ຊໍ ອຸປສມ຺ປທຎ຺ຈ ລຠິຕ຺ວາ ວິປສ຺ສນໍ ປຏ຺ຐເປຕ຺ວາ ນ ຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣີ ໒.໓.໒໔໔-໓໑໓) –

‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

‘‘ຕທາຫຸ ຫໍສວຕິຍໍ, ວິເທໂຫ ນາມ ນາມໂຕ;

ເສຏ຺ຐີ ປຫູຕຣຕໂນ, ຕສ຺ສ ຊາຍາ ອໂຫສຫໍ.

‘‘ກທາຈິ ໂສ ນຣາທິຈ຺ຈໍ, ອຸເປຈ຺ຈ ສປຣິຊ຺ຊໂນ;

ຘມ຺ມມສ຺ໂສສິ ພຸທ຺ຘສ຺ສ, ສພ຺ພທຸກ຺ຂຠຍປ຺ປຫໍ.

‘‘ສາວກໍ ຘຸຕວາທານໍ, ອຄ຺ຄໍ ກິຕ຺ເຕສິ ນາຍໂກ;

ສຸຕ຺ວາ ສຕ຺ຕາຫິກໍ ທານໍ, ທຕ຺ວາ ພຸທ຺ຘສ຺ສ ຕາທິໂນ.

‘‘ນິປຈ຺ຈ ສິຣສາ ປາເທ, ຕໍ ຐານມຠິປຕ຺ຖຍິໍ;

ສ ຫາສຍນ຺ໂຕ ປຣິສໍ, ຕທາ ຫິ ນຣປຸງ຺ຄໂວ.

‘‘ເສຏ຺ຐິໂນ ອນຸກມ຺ປາຍ, ອິມາ ຄາຖາ ອຠາສຖ;

ລຈ຺ຉເສ ປຕ຺ຖິຕໍ ຐານໍ, ນິພ຺ພຸໂຕ ໂຫຫິ ປຸຕ຺ຕກ.

‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ກສ຺ສໂປ ນາມ ໂຄຕ຺ເຕນ, ເຫສ຺ສຕິ ສຕ຺ຖຸ ສາວໂກ.

‘‘ຕໍ ສຸຕ຺ວາ ມຸທິໂຕ ຫຸຕ຺ວາ, ຍາວຊີວໍ ຕທາ ຊິນໍ;

ເມຕ຺ຕຈິຕ຺ໂຕ ປຣິຈຣິ, ປຈ຺ຈເຍຫິ ວິນາຍກໍ.

‘‘ສາສນໍ ໂຊຕຍິຕ຺ວານ, ໂສ ມທ຺ທິຕ຺ວາ ກຸຕິຕ຺ຖິເຍ;

ເວເນຍ຺ຍໍ ວິນຍິຕ຺ວາ ຈ, ນິພ຺ພຸໂຕ ໂສ ສສາວໂກ.

‘‘ນິພ຺ພຸເຕ ຕມ຺ຫິ ໂລກຄ຺ເຄ, ປູຊນຕ຺ຖາຍ ສຕ຺ຖຸໂນ;

ຎາຕິມິຕ຺ເຕ ສມາເນຕ຺ວາ, ສຫ ເຕຫິ ອກາຣຍິ.

‘‘ສຕ຺ຕໂຍຊນິກໍ ຖູປໍ, ອຸພ຺ພິທ຺ຘໍ ຣຕນາມຍໍ;

ຊລນ຺ຕໍ ສຕຣໍສິໍວ, ສາລຣາຊໍວ ຜຸລ຺ລິຕໍ.

‘‘ສຕ຺ຕສຕສຫສ຺ສານິ, ປາຕິໂຍ ຕຕ຺ຖ ກາຣຍິ;

ນຬຄ຺ຄີ ວິຍ ໂຊຕນ຺ຕີ, ຣຕເນເຫວ ສຕ຺ຕຫິ.

‘‘ຄນ຺ຘເຕເລນ ປູເຣຕ຺ວາ, ທີປານຸຊ຺ຊລຍີ ຕຫິໍ;

ປູຊນຕ຺ຖາຍ ມເຫສິສ຺ສ, ສພ຺ພຠູຕານຸກມ຺ປິໂນ.

‘‘ສຕ຺ຕສຕສຫສ຺ສານິ, ປຸຓ຺ຓກຸມ຺ຠານິ ກາຣຍິ;

ຣຕເນເຫວ ປຸຓ຺ຓານິ, ປູຊນຕ຺ຖາຍ ມເຫສິໂນ.

‘‘ມຊ຺ເຌ ອຏ຺ຐຏ຺ຐກຸມ຺ຠີນໍ, ອຸສ຺ສິຕາ ກຎ຺ຈນຄ຺ຆິໂຍ;

ອຕິໂຣຈນ຺ຕິ ວຓ຺ເຓນ, ສຣເທວ ທິວາກໂຣ.

‘‘ຈຕຸທ຺ວາເຣສຸ ໂສຠນ຺ຕິ, ໂຕຣຓາ ຣຕນາມຍາ;

ອຸສ຺ສິຕາ ຜລກາ ຣມ຺ມາ, ໂສຠນ຺ຕິ ຣຕນາມຍາ.

‘‘ວິໂຣຈນ຺ຕິ ປຣິກ຺ຂິຕ຺ຕາ, ອວຏໍສາ ສຸນິມ຺ມິຕາ;

ອຸສ຺ສິຕານິ ປຏາການິ, ຣຕນານິ ວິໂຣຈເຣ.

‘‘ສຸຣຕ຺ຕໍ ສຸກຕໍ ຈິຕ຺ຕໍ, ເຈຕິຍໍ ຣຕນາມຍໍ;

ອຕິໂຣຈຕິ ວຓ຺ເຓນ, ສສຎ຺ໂຌວ ທິວາກໂຣ.

‘‘ຖູປສ຺ສ ເວທິໂຍ ຕິສ຺ໂສ, ຫຣິຕາເລນ ປູຣຍິ;

ເອກໍ ມໂນສິລາເຍກໍ, ອຎ຺ຊເນນ ຈ ເອກິກໍ.

‘‘ປູຊໍ ເອຕາທິສໍ ຣມ຺ມໍ, ກາເຣຕ຺ວາ ວຣວາທິໂນ;

ອທາສິ ທານໍ ສງ຺ຆສ຺ສ, ຍາວຊີວໍ ຍຖາພລໍ.

‘‘ສຫາວ ເສຏ຺ຐິນາ ເຕນ, ຕານິ ປຸຎ຺ຎານິ ສພ຺ພໂສ;

ຍາວຊີວໍ ກຣິຕ຺ວານ, ສຫາວ ສຸຄຕິໍ ຄຕາ.

‘‘ສມ຺ປຕ຺ຕິໂຍນຸໂຠຕ຺ວານ, ເທວຕ຺ເຕ ອຖ ມານຸເສ;

ຉາຍາ ວິຍ ສຣີເຣນ, ສຫ ເຕເນວ ສໍສຣິໍ.

‘‘ເອກນວຸຕິໂຕ ກປ຺ເປ, ວິປສ຺ສີ ນາມ ນາຍໂກ;

ອຸປ຺ປຊ຺ຊິ ຈາຣຸທສ຺ສໂນ, ສພ຺ພຘມ຺ມວິປສ຺ສໂກ.

‘‘ຕທາຍໍ ພນ຺ຘຸປຕິຍໍ, ພ຺ຣາຫ຺ມໂຓ ສາຘຸສມ຺ມໂຕ;

ອຑ຺ໂຒ ສນ຺ໂຕ ຄຸເຓນາປິ, ຘເນນ ຈ ສຸທຸຄ຺ຄໂຕ.

‘‘ຕທາປິ ຕສ຺ສາຫໍ ອາສິໍ, ພ຺ຣາຫ຺ມຓີ ສມເຈຕສາ;

ກທາຈິ ໂສ ທິຊວໂຣ, ສງ຺ຄເມສິ ມຫາມຸນິໍ.

‘‘ນິສິນ຺ນໍ ຊນກາຍມ຺ຫິ, ເທເສນ຺ຕໍ ອມຕໍ ປທໍ;

ສຸຕ຺ວາ ຘມ຺ມໍ ປມຸທິໂຕ, ອທາສິ ເອກສາຏກໍ.

‘‘ຆຣເມເກນ ວຕ຺ເຖນ, ຄນ຺ຕ຺ວາເນຕໍ ສ ມພ຺ຣວິ;

ອນຸໂມທ ມຫາປຸຎ຺ຎໍ, ທິນ຺ນໍ ພຸທ຺ຘສ຺ສ ສາຏກໍ.

‘‘ຕທາຫໍ ອຎ຺ຊລິໍ ກຕ຺ວາ, ອນຸໂມທິໍ ສຸປີຓິຕາ;

ສຸທິນ຺ໂນ ສາຏໂກ ສາມິ, ພຸທ຺ຘເສຏ຺ຐສ຺ສ ຕາທິໂນ.

‘‘ສຸຂິໂຕ ສຊ຺ຊິໂຕ ຫຸຕ຺ວາ, ສໍສຣນ຺ໂຕ ຠວາຠເວ;

ພາຣາຓສິປຸເຣ ຣມ຺ເມ, ຣາຊາ ອາສິ ມຫີປຕິ.

‘‘ຕທາ ຕສ຺ສ ມເຫສີຫໍ, ອິຕ຺ຖິຄຸມ຺ພສ຺ສ ອຸຕ຺ຕມາ;

ຕສ຺ສາຕິ ທຍິຕາ ອາສິໍ, ປຸພ຺ພສ຺ເນເຫນ ຠຕ຺ຕຸໂນ.

‘‘ປິຓ຺ຑາຍ ວິຈຣນ຺ເຕ ເຕ, ອຏ຺ຐ ປຈ຺ເຈກນາຍເກ;

ທິສ຺ວາ ປມຸທິໂຕ ຫຸຕ຺ວາ, ທຕ຺ວາ ປິຓ຺ຑໍ ມຫາຣຫໍ.

‘‘ປຸໂນ ນິມນ຺ຕຍິຕ຺ວານ, ກຕ຺ວາ ຣຕນມຓ຺ຑປໍ;

ກມ຺ມາເຣຫິ ກຕໍ ປຕ຺ຕໍ, ໂສວຓ຺ຓໍ ວຕ ຕຕ຺ຕກໍ.

‘‘ສມາເນຕ຺ວານ ເຕ ສພ຺ເພ, ເຕສໍ ທານມທາສິ ໂສ;

ໂສຓ຺ຓາສເນ ປວິຏ຺ຐານໍ, ປສນ຺ໂນ ເສຫິ ປາຓິຠິ.

‘‘ຕມ຺ປິ ທານໍ ສຫາທາສິໍ, ກາສິຣາເຊນຫໍ ຕທາ;

ປຸນາຫໍ ພາຣາຓສິຍໍ, ຊາຕາ ກາສິກຄາມເກ.

‘‘ກຸຏຸມ຺ພິກກຸເລ ຜີເຕ, ສຸຂິໂຕ ໂສ ສຠາຕຸໂກ;

ເຊຏ຺ຐສ຺ສ ຠາຕຸໂນ ຊາຍາ, ອໂຫສິໍ ສຸປຕິພ຺ພຕາ.

‘‘ປຈ຺ເຈກພຸທ຺ຘໍ ທິສ຺ວານ, ກນິຍສ຺ສ ມມ ຠຕ຺ຕຸໂນ;

ຠາຄນ຺ນໍ ຕສ຺ສ ທຕ຺ວານ, ອາຄເຕ ຕມ຺ຫິ ປາວທິໍ.

‘‘ນາຠິນນ຺ທິຕ຺ຖ ໂສ ທານໍ, ຕໂຕ ຕສ຺ສ ອທາສຫໍ;

ອຸຂາ ອານິຍ ຕໍ ອນ຺ນໍ, ປຸໂນ ຕສ຺ເສວ ໂສ ອທາ.

‘‘ຕທນ຺ນໍ ຉຑ຺ຑຍິຕ຺ວານ, ທຸຏ຺ຐາ ພຸທ຺ຘສ຺ສຫໍ ຕທາ;

ປຕ຺ຕໍ ກລລປຸຓ຺ຓໍ ຕໍ, ອທາສິໍ ຕສ຺ສ ຕາທິໂນ.

‘‘ທາເນ ຈ ຄຫເຓ ເຈວ, ອປເຈ ປທຸເສປິ ຈ;

ສມຈິຕ຺ຕມຸຂໍ ທິສ຺ວາ, ຕທາຫໍ ສໍວິຊິໍ ຠຸສໍ.

‘‘ປຸໂນ ປຕ຺ຕໍ ຄເຫຕ຺ວານ, ໂສຘຍິຕ຺ວາ ສຸຄນ຺ຘິນາ,

ປສນ຺ນຈິຕ຺ຕາ ປູເຣຕ຺ວາ, ສຆຕໍ ສກ຺ກຣໍ ອທໍ.

‘‘ຍຕ຺ຖ ຍຕ຺ຖູປປຊ຺ຊາມິ, ສຸຣູປາ ໂຫມິ ທານໂຕ;

ພຸທ຺ຘສ຺ສ ອປກາເຣນ, ທຸຄ຺ຄນ຺ຘາ ວທເນນ ຈ.

‘‘ປຸນ ກສ຺ສປວີຣສ຺ສ, ນິຘາຍນ຺ຕມ຺ຫິ ເຈຕິເຍ;

ໂສວຓ຺ຓໍ ອິຏ຺ຐກໍ ວຣໍ, ອທາສິໍ ມຸທິຕາ ອຫໍ.

‘‘ຈຕຸຊ຺ຊາເຕນ ຄນ຺ເຘນ, ນິຈຍິຕ຺ວາ ຕມິຏ຺ຐກໍ;

ມຸຕ຺ຕາ ທຸຄ຺ຄນ຺ຘໂທສມ຺ຫາ, ສພ຺ພງ຺ຄສຸສມາຄຕາ.

‘‘ສຕ຺ຕ ປາຕິສຫສ຺ສານິ, ຣຕເນເຫວ ສຕ຺ຕຫິ;

ກາເຣຕ຺ວາ ຆຕປູຣານິ, ວຏ຺ຏີນິ ຈ ສຫສ຺ສໂສ.

‘‘ປກ຺ຂິປິຕ຺ວາ ປທີເປຕ຺ວາ, ຐປຍິໍ ສຕ຺ຕປນ຺ຕິໂຍ;

ປູຊນຕ຺ຖໍ ໂລກນາຖສ຺ສ, ວິປ຺ປສນ຺ເນນ ເຈຕສາ.

‘‘ຕທາປິ ຕມ຺ຫິ ປຸຎ຺ຎມ຺ຫິ, ຠາຄິນີຍິ ວິເສສໂຕ;

ປຸນ ກາສີສຸ ສຎ຺ຊາໂຕ, ສຸມິຕ຺ຕາ ອິຕິ ວິສ຺ສຸໂຕ.

‘‘ຕສ຺ສາຫໍ ຠຣິຍາ ອາສິໍ, ສຸຂິຕາ ສຊ຺ຊິຕາ ປິຍາ;

ຕທາ ປຈ຺ເຈກມຸນິໂນ, ອທາສິໍ ຆນເວຐນໍ.

‘‘ຕສ຺ສາປິ ຠາຄິນີ ອາສິໍ, ໂມທິຕ຺ວາ ທານມຸຕ຺ຕມໍ;

ປຸນາປິ ກາສິຣຏ຺ຐມ຺ຫິ, ຊາໂຕ ໂກລິຍຊາຕິຍາ.

‘‘ຕທາ ໂກລິຍປຸຕ຺ຕານໍ, ສເຕຫິ ສຫ ປຎ຺ຈຫິ;

ປຎ຺ຈ ປຈ຺ເຈກພຸທ຺ຘານໍ, ສຕານິ ສມຸປຏ຺ຐຫິ.

‘‘ເຕມາສໍ ຕປ຺ປຍິຕ຺ວານ, ອທາສິ ຈ ຕິຈີວເຣ;

ຊາຍາ ຕສ຺ສ ຕທາ ອາສິໍ, ປຸຎ຺ຎກມ຺ມປຖານຸຄາ.

‘‘ຕໂຕ ຈຸໂຕ ອຫຸ ຣາຊາ, ນນ຺ໂທ ນາມ ມຫາຍໂສ;

ຕສ຺ສາປິ ມເຫສີ ອາສິໍ, ສພ຺ພກາມສມິທ຺ຘິນີ.

‘‘ຕທາ ຣາຊາ ຠວິຕ຺ວານ, ພ຺ຣຫ຺ມທຕ຺ໂຕ ມຫີປຕິ;

ປທຸມວຕີປຸຕ຺ຕານໍ, ປຈ຺ເຈກມຸນິນໍ ຕທາ.

‘‘ສຕານິ ປຎ຺ຈນູນານິ, ຍາວຊີວໍ ອຸປຏ຺ຐຫິໍ;

ຣາຊຸຍ຺ຍາເນ ນິວາເສຕ຺ວາ, ນິພ຺ພຸຕານິ ຈ ປູຊຍິໍ.

‘‘ເຈຕິຍານິ ຈ ກາເຣຕ຺ວາ, ປພ຺ພຊິຕ຺ວາ ອຸໂຠ ມຍໍ;

ຠາເວຕ຺ວາ ອປ຺ປມຎ຺ຎາໂຍ, ພ຺ຣຫ຺ມໂລກໍ ອຄມ຺ຫເສ.

‘‘ຕໂຕ ຈຸໂຕ ມຫາຕິຕ຺ເຖ, ສຸຊາໂຕ ປິປ຺ຜລາຍໂນ;

ມາຕາ ສຸມນເທວີຕິ, ໂກສິໂຄຕ຺ໂຕ ທິໂຊ ປິຕາ.

‘‘ອຫໍ ມທ຺ເທ ຊນປເທ, ສາກລາຍ ປຸຣຸຕ຺ຕເມ;

ກປ຺ປິລສ຺ສ ທິຊສ຺ສາສິໍ, ຘີຕາ ມາຕາ ສຸຈີມຕິ.

‘‘ຆຣກຎ຺ຈນພິມ຺ເພນ, ນິມ຺ມິນິຕ຺ວານ ມໍ ປິຕາ;

ອທາ ກສ຺ສປຘີຣສ຺ສ, ກາເມຫິ ວຊ຺ຊິຕສ຺ສມໍ.

‘‘ກທາຈິ ໂສ ກາຣຸຓິໂກ, ຄນ຺ຕ຺ວາ ກມ຺ມນ຺ຕເປກ຺ຂໂກ;

ກາກາທິເກຫິ ຂຊ຺ຊນ຺ເຕ, ປາເຓ ທິສ຺ວານ ສໍວິຊິ.

‘‘ຆເຣວາຫໍ ຕິເລ ຊາເຕ, ທິສ຺ວານາຕປຕາປເນ;

ກິມີ ກາເກຫິ ຂຊ຺ຊນ຺ເຕ, ສໍເວຄມລຠິໍ ຕທາ.

‘‘ຕທາ ໂສ ປພ຺ພຊີ ຘີໂຣ, ອຫໍ ຕມນຸປພ຺ພຊິໍ;

ປຎ຺ຈ ວສ຺ສານິ ນິວສິໍ, ປຣິພ຺ພາຊວເຕ ອຫໍ.

‘‘ຍທາ ປພ຺ພຊິຕາ ອາສິ, ໂຄຕມີ ຊິນໂປສິກາ;

ຕທາຫໍ ຕມຸປຄນ຺ຕ຺ວາ, ພຸທ຺ເຘນ ອນຸສາສິຕາ.

‘‘ນ ຈິເຣເນວ ກາເລນ, ອຣຫຕ຺ຕມປາປຸຓິໍ;

ອໂຫ ກລ຺ຍາຓມິຕ຺ຕຕ຺ຕໍ, ກສ຺ສປສ຺ສ ສິຣີມໂຕ.

‘‘ສຸໂຕ ພຸທ຺ຘສ຺ສ ທາຍາໂທ, ກສ຺ສໂປ ສຸສມາຫິໂຕ;

ປຸພ຺ເພນິວາສໍ ໂຍ ເວທິ, ສຄ຺ຄາປາຍຎ຺ຈ ປສ຺ສຕິ.

‘‘ອໂຖ ຊາຕິກ຺ຂຍໍ ປຕ຺ໂຕ, ອຠິຎ຺ຎາໂວສິໂຕ ມຸນິ;

ເອຕາຫິ ຕີຫິ ວິຊ຺ຊາຫິ, ເຕວິຊ຺ໂຊ ໂຫຕິ ພ຺ຣາຫ຺ມໂຓ.

‘‘ຕເຖວ ຠທ຺ທາກາປິລານີ, ເຕວິຊ຺ຊາ ມຈ຺ຈຸຫາຍິນີ;

ຘາເຣຕິ ອນ຺ຕິມໍ ເທຫໍ, ຊິຕ຺ວາ ມາຣໍ ສວາຫນໍ.

‘‘ທິສ຺ວາ ອາທີນວໍ ໂລເກ, ອຸໂຠ ປພ຺ພຊິຕາ ມຍໍ;

ຕ຺ຍມ຺ຫ ຂີຓາສວາ ທນ຺ຕາ, ສີຕິຠູຕາມ຺ຫ ນິພ຺ພຸຕາ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ. (ອປ. ເຖຣີ ໒.໓.໒໔໔-໓໑໓);

ອຣຫຕ຺ຕໍ ປນ ປຕ຺ວາ ປຸພ຺ເພນິວາສຎາເຓ ຈິຓ຺ຓວສີ ອໂຫສິ. ຕຕ຺ຖ ສາຕິສຍໍ ກຕາຘິກາຣຕ຺ຕາ ອປຣຠາເຄ ຕໍ ສຕ຺ຖາ ເຊຕວເນ ອຣິຍຄຓມຊ຺ເຌ ນິສິນ຺ໂນ ຠິກ຺ຂຸນິໂຍ ປຏິປາຏິຍາ ຐານນ຺ຕເຣສຸ ຐເປນ຺ໂຕ ປຸພ຺ເພນິວາສໍ ອນຸສ຺ສຣນ຺ຕີນໍ ອຄ຺ຄຏ຺ຐາເນ ຐເປສິ. ສາ ເອກທິວສໍ ມຫາກສ຺ສປຕ຺ເຖຣສ຺ສ ຄຸຓາຠິຕ຺ຖວນປຸພ຺ພກໍ ອຕ຺ຕໂນ ກຕກິຈ຺ຈຕາທິວິຠາວນມຸເຂນ ອຸທານໍ ອຸທາເນນ຺ຕີ –

໖໓. ‘‘ປຸຕ຺ໂຕ ພຸທ຺ຘສ຺ສ ທາຍາໂທ, ກສ຺ສໂປ ສຸສມາຫິໂຕ;

ປຸພ຺ເພນິວາສໍ ໂຍເວທິ, ສຄ຺ຄາປາຍຎ຺ຈ ປສ຺ສຕິ.

໖໔. ‘‘ອໂຖ ຊາຕິກ຺ຂຍໍ ປຕ຺ໂຕ, ອຠິຎ຺ຎາໂວສິໂຕ ມຸນິ;

ເອຕາຫິ ຕີຫິ ວິຊ຺ຊາຫິ, ເຕວິຊ຺ໂຊ ໂຫຕິ ພ຺ຣາຫ຺ມໂຓ.

໖໕. ‘‘ຕເຖວ ຠທ຺ທາກາປິລານີ, ເຕວິຊ຺ຊາ ມຈ຺ຈຸຫາຍິນີ;

ຘາເຣຕິ ອນ຺ຕິມໍ ເທຫໍ, ເຊຕ຺ວາ ມາຣໍ ສວາຫນໍ.

໖໖. ‘‘ທິສ຺ວາ ອາທີນວໍ ໂລເກ, ອຸໂຠ ປພ຺ພຊິຕາ ມຍໍ;

ຕ຺ຍມ຺ຫ ຂີຓາສວາ ທນ຺ຕາ, ສີຕິຠູຕາມ຺ຫ ນິພ຺ພຸຕາ’’ຕິ. –

ອິມາ ຄາຖາ ອຠາສິ.

ຕຕ຺ຖ ປຸຕ຺ໂຕ ພຸທ຺ຘສ຺ສ ທາຍາໂທຕິ ພຸທ຺ຘານຸພຸທ຺ຘຠາວໂຕ ສມ຺ມາສມ຺ພຸທ຺ຘສ຺ສ ອນຸຊາຕສຸໂຕ ຕໂຕ ເອວ ຕສ຺ສ ທາຍຠູຕສ຺ສ ນວໂລກຸຕ຺ຕຣຘມ຺ມສ຺ສ ອາທາເນນ ທາຍາໂທ ກສ຺ສໂປ ໂລກິຍໂລກຸຕ຺ຕເຣຫິ ສມາຘີຫິ ສຸຏ຺ຐຸ ສມາຫິຕຈິຕ຺ຕຕາຍ ສຸສມາຫິໂຕ. ປຸພ຺ເພນິວາສໍ ໂຍເວທີຕິ ໂຍ ມຫາກສ຺ສປຕ຺ເຖໂຣ ປຸພ຺ເພນິວາສໍ ອຕ຺ຕໂນ ປເຣສຎ຺ຈ ນິວຸຕ຺ຖກ຺ຂນ຺ຘສນ຺ຕານໍ ປຸພ຺ເພນິວາສານຸສ຺ສຕິຎາເຓນ ປາກຏໍ ກຕ຺ວາ ອເວທິ ອຎ຺ຎາສິ ປຏິວິຊ຺ຌິ. ສຄ຺ຄາປາຍຎ຺ຈ ປສ຺ສຕີຕິ ຉພ຺ພີສຕິເທວໂລກເຠທໍ ສຄ຺ຄໍ ຈຕຸພ຺ພິຘໍ ອປາຍຎ຺ຈ ທິພ຺ພຈກ຺ຂຸນາ ຫຕ຺ຖຕເລ ອາມລກໍ ວິຍ ປສ຺ສຕິ.

ອໂຖ ຊາຕິກ຺ຂຍໍ ປຕ຺ໂຕຕິ ຕໂຕ ປຣໍ ຊາຕິກ຺ຂຍສງ຺ຂາຕໍ ອຣຫຕ຺ຕໍ ປຕ຺ໂຕ. ອຠິຎ຺ຎາຍ ອຠິວິສິຏ຺ເຐນ ຎາເຓນ ອຠິຎ຺ເຎຍ຺ຍໍ ຘມ຺ມໍ ອຠິຊານິຕ຺ວາ ປຣິຎ຺ເຎຍ຺ຍໍ ປຣິຊານິຕ຺ວາ, ປຫາຕພ຺ພໍ ປຫາຍ, ສຈ຺ຉິກາຕພ຺ພໍ ສຈ຺ຉິກຕ຺ວາ ໂວສິໂຕ ນິຏ຺ຐໍ ປຕ຺ໂຕ ກຕກິຈ຺ໂຈ. ອາສວກ຺ຂຍປຎ຺ຎາສງ຺ຂາຕໍ ໂມນໍ ປຕ຺ຕຕ຺ຕາ ມຸນິ.