໓. ອປຣາ ອຸຕ຺ຕມາເຖຣີຄາຖາວຓ຺ຓນາ

ເຍ ອິເມ ສຕ຺ຕ ໂພຊ຺ຌງ຺ຄາຕິອາທິກາ ອປຣາຍ ອຸຕ຺ຕມາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ຕີ ວິປສ຺ສິສ຺ສ ຠຄວໂຕ ກາເລ ພນ຺ຘຸມຕີນຄເຣ ກຸລທາສີ ຫຸຕ຺ວາ ນິພ຺ພຕ຺ຕິ. ສາ ເອກທິວສໍ ສຕ຺ຖຸ ສາວກໍ ເອກໍ ຂີຓາສວຕ຺ເຖຣໍ ປິຓ຺ຑາຍ ຈຣນ຺ຕໍ ທິສ຺ວາ ປສນ຺ນມານສາ ຕີຓິ ໂມທການິ ອທາສິ. ສາ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ຕີ ອິມສ຺ມິໍ ພຸທ຺ຘຸປ຺ປາເທ ໂກສລຊນປເທ ອຎ຺ຎຕຣສ຺ມິໍ ພ຺ຣາຫ຺ມຓມຫາສາລກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ຕາ ຊນປທຈາຣິກໍ ຈຣນ຺ຕສ຺ສ ສຕ຺ຖຸ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ຘາ ປພ຺ພຊິຕ຺ວາ ນຈິຣສ຺ເສວ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣີ ໒.໒.໓໐-໓໖) –

‘‘ນຄເຣ ພນ຺ຘຸມຕິຍາ, ກຸມ຺ຠທາສີ ອໂຫສຫໍ;

ມມ ຠາຄໍ ຄເຫຕ຺ວານ, ຄຈ຺ຉໍ ອຸທກຫາຣິກາ.

‘‘ປນ຺ຖມ຺ຫິ ສມຓໍ ທິສ຺ວາ, ສນ຺ຕຈິຕ຺ຕໍ ສມາຫິຕໍ;

ປສນ຺ນຈິຕ຺ຕາ ສຸມນາ, ໂມທເກ ຕີຓິທາສຫໍ.

‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ເອກນວຸຕິກປ຺ປານິ, ວິນິປາຕໍ ນ ຄຈ຺ຉຫໍ.

‘‘ສມ຺ປຕ຺ຕິ ຕໍ ກຣິຕ຺ວານ, ສພ຺ພໍ ອນຸຠວິໍ ອຫໍ;

ໂມທເກ ຕີຓິ ທຕ຺ວານ, ປຕ຺ຕາຫໍ ອຈລໍ ປທໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ອຸທານວເສນ –

໔໕. ‘‘ເຍ ອິເມ ສຕ຺ຕ ໂພຊ຺ຌງ຺ຄາ, ມຄ຺ຄາ ນິພ຺ພານປຕ຺ຕິຍາ;

ຠາວິຕາ ເຕ ມຍາ ສພ຺ເພ, ຍຖາ ພຸທ຺ເຘນ ເທສິຕາ.

໔໖. ‘‘ສຸຎ຺ຎຕສ຺ສານິມິຕ຺ຕສ຺ສ, ລາຠິນີຫໍ ຍທິຈ຺ຉກໍ;

ໂອຣສາ ຘີຕາ ພຸທ຺ຘສ຺ສ, ນິພ຺ພານາຠິຣຕາ ສທາ.

໔໗. ‘‘ສພ຺ເພ ກາມາ ສມຸຈ຺ຉິນ຺ນາ, ເຍ ທິພ຺ພາ ເຍ ຈ ມານຸສາ;

ວິກ຺ຂີໂຓ ຊາຕິສໍສາໂຣ, ນຕ຺ຖິ ທານິ ປຸນພ຺ຠໂວ’’ຕິ. –

ອິມາ ຄາຖາ ອຠາສິ.

ຕຕ຺ຖ ສຸຎ຺ຎຕສ຺ສານິມິຕ຺ຕສ຺ສ, ລາຠິນີຫໍ ຍທິຈ຺ຉກນ຺ຕິ ສຸຎ຺ຎຕສມາປຕ຺ຕິຍາ ຈ ອນິມິຕ຺ຕສມາປຕ຺ຕິຍາ ຈ ອຫໍ ຍທິຈ຺ຉກໍ ລາຠິນີ, ຕຕ຺ຖ ຍໍ ຍໍ ສມາປຊ຺ຊິຕຸໍ ອິຈ຺ຉາມິ ຍຕ຺ຖ ຍຕ຺ຖ ຍທາ ຍທາ, ຕໍ ຕໍ ຕຕ຺ຖ ຕຕ຺ຖ ຕທາ ຕທາ ສມາປຊ຺ຊິຕ຺ວາ ວິຫຣາມີຕິ ອຕ຺ໂຖ. ຍທິປິ ຫິ ສຸຎ຺ຎຕາປ຺ປຓິຫິຕາທິນາມກສ຺ສ ຍສ຺ສ ກສ຺ສຈິປິ ມຄ຺ຄສ຺ສ ສຸຎ຺ຎຕາທິເຠທໍ ຕິວິຘມ຺ປິ ຜລໍ ສມ຺ຠວຕິ. ອຍໍ ປນ ເຖຣີ ສຸຎ຺ຎຕານິມິຕ຺ຕສມາປຕ຺ຕິໂຍວ ສມາປຊ຺ຊຕິ. ເຕນ ວຸຕ຺ຕໍ – ‘‘ສຸຎ຺ຎຕສ຺ສານິມິຕ຺ຕສ຺ສ, ລາຠິນີຫໍ ຍທິຈ຺ຉກ’’ນ຺ຕິ. ເຍຠຸຍ຺ຍວເສນ ວາ ເອຕໍ ວຸຕ຺ຕໍ. ນິທສ຺ສນມຕ຺ຕເມຕນ຺ຕິ ອປເຣ.

ເຍ ທິພ຺ພາ ເຍ ຈ ມານຸສາຕິ ເຍ ເທວໂລກປຣິຍາປນ຺ນາ ເຍ ຈ ມນຸສ຺ສໂລກປຣິຍາປນ຺ນາ ວຕ຺ຖຸກາມາ, ເຕ ສພ຺ເພປິ ຕປ຺ປຏິພທ຺ຘຉນ຺ທຣາຄປ຺ປຫາເນນ ມຍາ ສມ຺ມເທວ ອຸຈ຺ຉິນ຺ນາ, ອປຣິໂຠຄາຣຫາ ກຕາ. ວຸຕ຺ຕຎ຺ຫິ – ‘‘ອຠພ຺ໂພ, ອາວຸໂສ, ຂີຓາສໂວ ຠິກ຺ຂຸ ກາເມ ປຣິຠຸຎ຺ຊິຕຸໍ. ເສຍ຺ຍຖາປິ ປຸພ຺ເພ ອຄາຣິຍຠູໂຕ’’ຕິ. ເສສໍ ວຸຕ຺ຕນຍເມວ.

ອປຣາ ອຸຕ຺ຕມາເຖຣີຄາຖາວຓ຺ຓນາ ນິຏ຺ຐິຕາ.