໑. ອປຣາສາມາເຖຣີຄາຖາວຓ຺ຓນາ

ຕິກນິປາເຕ ປຓ຺ຓວີສຕິວສ຺ສານີຕິອາທິກາ ອປຣາຍ ສາມາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ຕີ ວິປສ຺ສິສ຺ສ ຠຄວໂຕ ກາເລ ຈນ຺ທຠາຄາຍ ນທິຍາ ຕີເຣ ກິນ຺ນຣໂຍນິຍໍ ນິພ຺ພຕ຺ຕິ. ສາ ຕຕ຺ຖ ກິນ຺ນເຣຫິ ສທ຺ຘິໍ ກີຬາປສຸຕາ ວິຈຣຕິ. ອເຖກທິວສໍ ສຕ຺ຖາ ຕສ຺ສາ ກຸສລພີຊໂຣປນຕ຺ຖໍ ຕຕ຺ຖ ຄນ຺ຕ຺ວາ ນທີຕີເຣ ຈງ຺ກມິ. ສາ ຠຄວນ຺ຕໍ ທິສ຺ວາ ຫຏ຺ຐຕຸຏ຺ຐາ ສຬລປຸປ຺ຜານິ ອາທາຍ ສຕ຺ຖຸ ສນ຺ຕິກໍ ຄນ຺ຕ຺ວາ ວນ຺ທິຕ຺ວາ ເຕຫິ ປຸປ຺ເຜຫິ ຠຄວນ຺ຕໍ ປູເຊສິ. ສາ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ຕີ ອິມສ຺ມິໍ ພຸທ຺ຘຸປ຺ປາເທ ໂກສມ຺ພິຍໍ ກຸລຆເຣ ນິພ຺ພຕ຺ຕິຕ຺ວາ ວຍປ຺ປຕ຺ຕາ ສາມາວຕິຍາ ສຫາຍິກາ ຫຸຕ຺ວາ ຕສ຺ສາ ມຕກາເລ ສໍເວຄຊາຕາ ປພ຺ພຊິຕ຺ວາ ປຎ຺ຈວີສຕິ ວສ຺ສານິ ຈິຕ຺ຕສມາຘານໍ ອລຠິຕ຺ວາ ມຫລ຺ລິກາກາເລ ສຸຄໂຕວາທໍ ລຠິຕ຺ວາ ວິປສ຺ສນໍ ວຑ຺ເຒຕ຺ວາ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣີ ໒.໒.໒໒-໒໙) –

‘‘ຈນ຺ທຠາຄານທີຕີເຣ, ອໂຫສິໍ ກິນ຺ນຣີ ຕທາ;

ອທ຺ທສາຫໍ ເທວເທວໍ, ຈງ຺ກມນ຺ຕໍ ນຣາສຠໍ.

‘‘ໂອຈິນິຕ຺ວານ ສຬລໍ, ພຸທ຺ຘເສຏ຺ຐສ຺ສທາສຫໍ;

ອຸປສິງ຺ຆິ ມຫາວີໂຣ, ສຬລໍ ເທວຄນ຺ຘິກໍ.

‘‘ປຏິຄ຺ຄເຫຕ຺ວາ ສມ຺ພຸທ຺ໂຘ, ວິປສ຺ສີ ໂລກນາຍໂກ;

ອຸປສິງ຺ຆິ ມຫາວີໂຣ, ເປກ຺ຂມານາຍ ເມ ຕທາ.

‘‘ອຎ຺ຊລິໍ ປຄ຺ຄເຫຕ຺ວານ, ວນ຺ທິຕ຺ວາ ທ຺ວິປທຸຕ຺ຕມໍ;

ສກໍ ຈິຕ຺ຕໍ ປສາເທຕ຺ວາ, ຕໂຕ ປພ຺ພຕມາຣຸຫິໍ.

‘‘ເອກນວຸຕິໂຕ ກປ຺ເປ, ຍໍ ປຸປ຺ຜມທທິໍ ຕທາ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ອຸທານວເສນ –

໓໙. ‘‘ປຓ຺ຓວີສຕິ ວສ຺ສານິ, ຍໂຕ ປພ຺ພຊິຕາຍ ເມ;

ນາຠິຊານາມິ ຈິຕ຺ຕສ຺ສ, ສມໍ ລທ຺ຘໍ ກຸທາຈນໍ.

໔໐. ‘‘ອລທ຺ຘາ ເຈຕໂສ ສນ຺ຕິໍ, ຈິຕ຺ເຕ ອວສວຕ຺ຕິນີ;

ຕໂຕ ສໍເວຄມາປາທິໍ, ສຣິຕ຺ວາ ຊິນສາສນໍ.

໔໑. ‘‘ພຫູຫິ ທຸກ຺ຂຘມ຺ເມຫິ, ອປ຺ປມາທຣຕາຍ ເມ;

ຕຓ຺ຫກ຺ຂໂຍ ອນຸປ຺ປຕ຺ໂຕ, ກຕໍ ພຸທ຺ຘສ຺ສ ສາສນໍ;

ອຊ຺ຊ ເມ ສຕ຺ຕມີ ຣຕ຺ຕິ, ຍໂຕ ຕຓ຺ຫາ ວິໂສສິຕາ’’ຕິ. –

ອິມາ ຄາຖາ ອຠາສິ.

ຕຕ຺ຖ ຈິຕ຺ຕສ຺ສ ສມນ຺ຕິ ຈິຕ຺ຕສ຺ສ ວູປສມໍ, ເຈໂຕສມຖມຄ຺ຄຜລສມາຘີຕິ ອຕ຺ໂຖ.

ຕໂຕຕິ ຕສ຺ມາ ຈິຕ຺ຕວສໍ ວຕ຺ເຕຕຸໍ ອສມຕ຺ຖຠາວໂຕ. ສໍເວຄມາປາທິນ຺ຕິ ສຕ຺ຖຣິ ຘຣນ຺ເຕປິ ປພ຺ພຊິຕກິຈ຺ຈໍ ມຕ຺ຖກໍ ປາເປຕຸໍ ອສກ຺ໂກນ຺ຕີ ປຈ຺ຉາ ກຖໍ ປາປຍິສ຺ສາມີຕິ ສໍເວຄໍ ຎາຓຸຕ຺ຣາສໍ ອາປຊ຺ຊິໍ. ສຣິຕ຺ວາ ຊິນສາສນນ຺ຕິ ກາຓກຈ຺ຉໂປປມາທິສຕ຺ຖຸໂອວາທໍ (ສໍ. ນິ. ໕.໑໑໑໗; ມ. ນິ. ໓.໒໕໒) ອນຸສ຺ສຣິຕ຺ວາ. ເສສໍ ວຸຕ຺ຕນຍເມວ.

ອປຣາສາມາເຖຣີຄາຖາວຓ຺ຓນາ ນິຏ຺ຐິຕາ.