໖. ເມຕ຺ຕິກາເຖຣີຄາຖາວຓ຺ຓນາ

ກິຎ຺ຈາປິ ໂຂມ຺ຫິ ທຸກ຺ຂິຕາຕິອາທິກາ ເມຕ຺ຕິກາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ຕີ ສິທ຺ຘຕ຺ຖສ຺ສ ຠຄວໂຕ ກາເລ ຄຫປຕິກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ວາ ສຕ຺ຖຸ ເຈຕິເຍ ຣຕເນນ ປຏິມຓ຺ຑິຕາຍ ເມຂລາຍ ປູຊໍ ອກາສິ. ສາ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ຕີ ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ພ຺ຣາຫ຺ມຓມຫາສາລກຸເລ ນິພ຺ພຕ຺ຕິ. ເສສໍ ອນນ຺ຕເຣ ວຸຕ຺ຕສທິສໍ. ອຍໍ ປນ ປຏິຠາຄກູຏໍ ອຠິຣຸຫິຕ຺ວາ ສມຓຘມ຺ມໍ ກໂຣນ຺ຕີ ວິປສ຺ສນໍ ວຑ຺ເຒຕ຺ວາ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣີ ໒.໑.໒໐-໒໕) –

‘‘ສິທ຺ຘຕ຺ຖສ຺ສ ຠຄວໂຕ, ຖູປກາຣາປິກາ ອຫຸໍ;

ເມຂລິກາ ມຍາ ທິນ຺ນາ, ນວກມ຺ມາຍ ສຕ຺ຖຸໂນ.

‘‘ນິຏ຺ຐິເຕ ຈ ມຫາຖູເປ, ເມຂລໍ ປຸນທາສຫໍ;

ໂລກນາຖສ຺ສ ມຸນິໂນ, ປສນ຺ນາ ເສຫິ ປາຓິຠິ.

‘‘ຈຕຸນ຺ນວຸຕິໂຕ ກປ຺ເປ, ຍໍ ເມຂລມທໍ ຕທາ;

ທຸຄ຺ຄຕິໍ ນາຠິຊານາມິ, ຖູປກາຣສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ອຸທານວເສນ –

໒໙. ‘‘ກິຎ຺ຈາປິ ໂຂມ຺ຫິ ທຸກ຺ຂິຕາ, ທຸພ຺ພລາ ຄຕໂຍພ຺ພນາ;

ທຓ຺ຑໂມລຸພ຺ຠ ຄຈ຺ຉາມິ, ປພ຺ພຕໍ ອຠິຣູຫິຍ.

໓໐. ‘‘ນິກ຺ຂິປິຕ຺ວານ ສງ຺ຆາຏິໍ, ປຕ຺ຕກຎ຺ຈ ນິກຸຊ຺ຊິຍ;

ນິສິນ຺ນາ ຈມ຺ຫິ ເສລມ຺ຫິ, ອຖ ຈິຕ຺ຕໍ ວິມຸຈ຺ຈິ ເມ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນ’’ນ຺ຕິ. –

ອິມາ ທ຺ເວ ຄາຖາ ອຠາສິ.

ຕຕ຺ຖ ທຸກ຺ຂິຕາຕິ ໂຣຄາຠິຠເວນ ທຸກ຺ຂິຕາ ສຎ຺ຊາຕທຸກ຺ຂາ ທຸກ຺ຂປ຺ປຕ຺ຕາ. ທຸພ຺ພລາຕິ ຕາຍ ເຈວ ທຸກ຺ຂປ຺ປຕ຺ຕິຍາ, ຊຣາຊິຓ຺ຓຕາຍ ຈ ພລວິຣຫິຕາ. ເຕນາຫ ‘‘ຄຕໂຍພ຺ພນາ’’ຕິ, ອທ຺ຘຄຕາຕິ ອຕ຺ໂຖ.

ອຖ ຈິຕ຺ຕໍ ວິມຸຈ຺ຈິ ເມຕິ ເສລມ຺ຫິ ປາສາເຓ ນິສິນ຺ນາ ຈມ຺ຫິ, ອຖ ຕທນນ຺ຕຣໍ ວີຣິຍສມຕາຍ ສມ຺ມເທວ ໂຍຊິຕຕ຺ຕາ ມຄ຺ຄປຏິປາຏິຍາ ສພ຺ເພຫິປິ ອາສເວຫິ ມມ ຈິຕ຺ຕໍ ວິມຸຈ຺ຈິ. ເສສໍ ວຸຕ຺ຕນຍເມວ.

ເມຕ຺ຕິກາເຖຣີຄາຖາວຓ຺ຓນາ ນິຏ຺ຐິຕາ.