໗. ມິຕ຺ຕາເຖຣີຄາຖາວຓ຺ຓນາ

ຈາຕຸທ຺ທສິໍ ປຎ຺ຈທສິນ຺ຕິອາທິກາ ອປຣາຍ ມິຕ຺ຕາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ຕີ ວິປສ຺ສິສ຺ສ ຠຄວໂຕ ກາເລ ຂຕ຺ຕິຍກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ວາ ພນ຺ຘຸມສ຺ສ ຣຎ຺ໂຎ ອນ຺ເຕປຸຣິກາ ຫຸຕ຺ວາ ວິປສ຺ສິສ຺ສ ຠຄວໂຕ ສາວິກໍ ເອກໍ ຂີຓາສວຕ຺ເຖຣິໍ ທິສ຺ວາ ປສນ຺ນມານສາ ຫຸຕ຺ວາ ຕສ຺ສາ ຫຕ຺ຖໂຕ ປຕ຺ຕໍ ຄເຫຕ຺ວາ ປຓີຕສ຺ສ ຂາທນີຍໂຠຊນີຍສ຺ສ ປູເຣຕ຺ວາ ມຫຄ຺ເຆນ ສາຏກຍຸເຄນ ສທ຺ຘິໍ ອທາສິ. ສາ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ຕີ ອິມສ຺ມິໍ ພຸທ຺ຘຸປ຺ປາເທ ກປິລວຕ຺ຖຸສ຺ມິໍ ສກ຺ຍຣາຊກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ວາ ສຕ຺ຖຸ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ຘາ ອຸປາສິກາ ອໂຫສິ. ສາ ອປຣຠາເຄ ມຫາປຊາປຕິໂຄຕມິຍາ ສນ຺ຕິເກ ປພ຺ພຊິຕ຺ວາ ກຕປຸພ຺ພກິຈ຺ຈາ ວິປສ຺ສນາຍ ກມ຺ມໍ ກໂຣນ຺ຕີ ນ ຈິຣສ຺ເສວ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣີ ໒.໑.໔໖-໕໙) –

‘‘ນຄເຣ ພນ຺ຘຸມຕິຍາ, ພນ຺ຘຸມາ ນາມ ຂຕ຺ຕິໂຍ;

ຕສ຺ສ ຣຎ຺ໂຎ ອຫຸໍ ຠຣິຍາ, ເອກຊ຺ຌໍ ຈາຣຍາມຫໍ.

‘‘ຣໂຫຄຕາ ນິສີທິຕ຺ວາ, ເອວໍ ຈິນ຺ເຕສຫໍ ຕທາ;

ອາທາຍ ຄມນີຍຎ຺ຫິ, ກຸສລໍ ນຕ຺ຖິ ເມ ກຕໍ.

‘‘ມຫາຠິຕາປໍ ກຏຸກໍ, ໂຆຣຣູປໍ ສຸທາຣຸຓໍ;

ນິຣຍໍ ນູນ ຄຈ຺ຉາມິ, ເອຕ຺ຖ ເມ ນຕ຺ຖິ ສໍສໂຍ.

‘‘ຣາຊານໍ ອຸປສງ຺ກມ຺ມ, ອິທໍ ວຈນມພ຺ຣວິໍ;

ເອກໍ ເມ ສມຓໍ ເທຫິ, ໂຠຊຍິສ຺ສາມິ ຂຕ຺ຕິຍ.

‘‘ອທາສິ ເມ ມຫາຣາຊາ, ສມຓໍ ຠາວິຕິນ຺ທ຺ຣິຍໍ;

ຕສ຺ສ ປຕ຺ຕໍ ຄເຫຕ຺ວານ, ປຣມນ຺ເນນ ປູຣຍິໍ.

‘‘ປູຣຍິຕ຺ວາ ປຣມນ຺ນໍ, ຄນ຺ຘາເລປໍ ອກາສຫໍ;

ຊາເລນ ປິທຫິຕ຺ວານ, ວຕ຺ຖຍຸເຄນ ຉາທຍິໍ.

‘‘ອາຣມ຺ມຓໍ ມມໍ ເອຕໍ, ສຣາມິ ຍາວຊີວິຕໍ;

ຕຕ຺ຖ ຈິຕ຺ຕໍ ປສາເທຕ຺ວາ, ຕາວຕິໍສມຄຈ຺ຉຫໍ.

‘‘ຕິໍສານໍ ເທວຣາຊູນໍ, ມເຫສິຕ຺ຕມກາຣຍິໍ;

ມນສາ ປຕ຺ຖິຕໍ ມຍ຺ຫໍ, ນິພ຺ພຕ຺ຕຕິ ຍຖິຈ຺ຉິຕໍ.

‘‘ວີສານໍ ຈກ຺ກວຕ຺ຕີນໍ, ມເຫສິຕ຺ຕມກາຣຍິໍ;

ໂອຈິຕຕ຺ຕາວ ຫຸຕ຺ວານ, ສໍສຣາມິ ຠເວສ຺ວຫໍ.

‘‘ສພ຺ພພນ຺ຘນມຸຕ຺ຕາຫໍ, ອເປຕາ ເມ ອຸປາທິກາ;

ສພ຺ພາສວປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

‘‘ເອກນວຸຕິໂຕ ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ປິຓ຺ຑປາຕສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ. (ອປ. ເຖຣີ ໒.໑.໔໖-໕໙);

ອຣຫຕ຺ຕໍ ປນ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ປີຕິໂສມນສ຺ສຊາຕາ ອຸທານວເສນ –

໓໑. ‘‘ຈາຕຸທ຺ທສິໍ ປຎ຺ຈທສິໍ, ຍາ ຈ ປກ຺ຂສ຺ສ ອຏ຺ຐມີ;

ປາຏິຫາຣິຍປກ຺ຂຎ຺ຈ, ອຏ຺ຐງ຺ຄສຸສມາຄຕໍ.

໓໒. ‘‘ອຸໂປສຖໍ ອຸປາຄຈ຺ຉິໍ, ເທວກາຍາຠິນນ຺ທິນີ;

ສາຊ຺ຊ ເອເກນ ຠຕ຺ເຕນ, ມຸຓ຺ຑາ ສງ຺ຆາຏິປາຣຸຕາ;

ເທວກາຍໍ ນ ປຕ຺ເຖຫໍ, ວິເນຍ຺ຍ ຫທເຍ ທຣ’’ນ຺ຕິ. – ອິມາ ທ຺ເວ ຄາຖາ ອຠາສິ;

ຕຕ຺ຖ ຈາຕຸທ຺ທສິໍ ປຎ຺ຈທສິນ຺ຕິ ຈຕຸທ຺ທສນ຺ນໍ ປູຣຓີ ຈາຕຸທ຺ທສີ, ປຎ຺ຈທສນ຺ນໍ ປູຣຓີ ປຎ຺ຈທສີ, ຕໍ ຈາຕຸທ຺ທສິໍ ປຎ຺ຈທສິຎ຺ຈ, ປກ຺ຂສ຺ສາຕິ ສມ຺ພນ຺ໂຘ. ອຈ຺ຈນ຺ຕສໍໂຍເຄ ເຈຕໍ ອຸປໂຍຄວຈນໍ. ຍາ ຈ ປກ຺ຂສ຺ສ ອຏ຺ຐມີ, ຕຎ຺ຈາຕິ ໂຍຊນາ. ປາຏິຫາຣິຍປກ຺ຂຎ຺ຈາຕິ ປຣິຫຣຓກປກ຺ຂຎ຺ຈ ຈາຕຸທ຺ທສີປຎ຺ຈທສີອຏ຺ຐມີນໍ ຍຖາກ຺ກມໍ ອາທິໂຕ ອນ຺ຕໂຕ ວາ ປເວສນິຄ຺ຄມວເສນ ອຸໂປສຖສີລສ຺ສ ປຣິຫຣິຕພ຺ພປກ຺ຂຎ຺ຈ ເຕຣສີປາຏິປທສຕ຺ຕມີນວມີສຸ ຈາຕິ ອຕ຺ໂຖ. ອຏ຺ຐງ຺ຄສຸສມາຄຕນ຺ຕິ ປາຓາຕິປາຕາ ເວຣມຓິອາທີຫິ ອຏ຺ຐຫິ ອງ຺ເຄຫິ ສຸຏ຺ຐຸ ສມນ຺ນາຄຕໍ. ອຸໂປສຖໍ ອຸປາຄຈ຺ຉິນ຺ຕິ ອຸປວາສໍ ອຸປຄມິໍ, ອຸປວສິນ຺ຕິ ອຕ຺ໂຖ. ຍໍ ສນ຺ຘາຍ ວຸຕ຺ຕໍ –

‘‘ປາຓໍ ນ ຫເນ ນ ຈາທິນ຺ນມາທິເຍ, ມຸສາ ນ ຠາເສ ນ ຈ ມຊ຺ຊໂປ ສິຍາ;

ອພ຺ຣຫ຺ມຈຣິຍາ ວິຣເມຍ຺ຍ ເມຖຸນາ, ຣຕ຺ຕິໍ ນ ຠຸຎ຺ເຊຍ຺ຍ ວິກາລໂຠຊນໍ.

‘‘ມາລໍ ນ ຘາເຣ ນ ຈ ຄນ຺ຘມາຈເຣ, ມຎ຺ເຈ ຉມາຍໍ ວ ສເຍຖ ສນ຺ຖເຕ;

ເອຕຎ຺ຫິ ອຏ຺ຐງ຺ຄິກມາຫຸໂປສຖໍ, ພຸທ຺ເຘນ ທຸກ຺ຂນ຺ຕຄຸນາ ປກາສິຕ’’ນ຺ຕິ. (ສຸ. ນິ. ໔໐໒-໔໐໓);

ເທວກາຍາຠິນນ຺ທິນີຕິ ຕຕ຺ຣູປປຕ຺ຕິອາກງ຺ຂາວເສນ ຈາຕຸມຫາຣາຊິກາທິໍ ເທວກາຍໍ ອຠິປຕ຺ເຖນ຺ຕີ ອຸໂປສຖໍ ອຸປາຄຈ຺ຉິນ຺ຕິ ໂຍຊນາ. ສາຊ຺ຊ ເອເກນ ຠຕ຺ເຕນາຕິ ສາ ອຫໍ ອຊ຺ຊ ອິມສ຺ມິໍເຍວ ທິວເສ ເອເກນ ຠຕ຺ຕໂຠຊນກ຺ຂເຓນ. ມຸຓ຺ຑາ ສງ຺ຆາຏິປາຣຸຕາຕິ ມຸຓ຺ຑິຕເກສາ ສງ຺ຆາຏິປາຣຸຕສຣີຣາ ຈ ຫຸຕ຺ວາ ປພ຺ພຊິຕາຕິ ອຕ຺ໂຖ. ເທວກາຍໍ ນ ປຕ຺ເຖຫນ຺ຕິ ອຄ຺ຄມຄ຺ຄສ຺ສ ອຘິຄຕຕ຺ຕາ ກຎ຺ຈິ ເທວນິກາຍໍ ອຫໍ ນ ປຕ຺ຖເຍ. ເຕເນວາຫ – ‘‘ວິເນຍ຺ຍ ຫທເຍ ທຣ’’ນ຺ຕິ, ຈິຕ຺ຕຄຕໍ ກິເລສທຣຖໍ ສມຸຈ຺ເຉທວເສນ ວິເນຕ຺ວາຕິ ອຕ຺ໂຖ. ອິທເມວ ຈສ຺ສາ ອຎ຺ຎາພ຺ຍາກຣຓໍ ອໂຫສິ.

ມິຕ຺ຕາເຖຣີຄາຖາວຓ຺ຓນາ ນິຏ຺ຐິຕາ.