໑໐. ສາມາເຖຣີຄາຖາວຓ຺ຓນາ

ຈຕຸກ຺ຂຕ຺ຕຸໍ ປຎ຺ຈກ຺ຂຕ຺ຕຸນ຺ຕິອາທິກາ ສາມາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນິຕ຺ວາ ສຸຄຕີສຸເຍວ ສໍສຣນ຺ຕີ ອິມສ຺ມິໍ ພຸທ຺ຘຸປ຺ປາເທ ໂກສມ຺ພິຍໍ ຄຫປຕິມຫາສາລກຸເລ ນິພ຺ພຕ຺ຕິຕ຺ວາ ສາມາຕິສ຺ສາ ນາມໍ ອໂຫສິ. ສາ ວິຎ຺ຎຸຕໍ ປຕ຺ຕາ ສາມາວຕິຍາ ອຸປາສິກາຍ ປິຍສຫາຍິກາ ຫຸຕ຺ວາ ຕາຍ ກາລງ຺ກຕາຍ ສຎ຺ຊາຕສໍເວຄາ ປພ຺ພຊິ. ປພ຺ພຊິຕ຺ວາ ຈ ສາມາວຕິກໍ ອາຣພ຺ຠ ອຸປ຺ປນ຺ນໂສກໍ ວິໂນເທຕຸໍ ອສກ຺ໂກນ຺ຕີ ອຣິຍມຄ຺ຄໍ ຄຓ຺ຫິຕຸໍ ນາສກ຺ຂິ. ອປຣຠາເຄ ອາສນສາລາຍ ນິສິນ຺ນສ຺ສ ອານນ຺ທຕ຺ເຖຣສ຺ສ ໂອວາທໍ ສຸຕ຺ວາ ວິປສ຺ສນໍ ປຏ຺ຐເປຕ຺ວາ ຕໂຕ ສຕ຺ຕເມ ທິວເສ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ຕໍ ປກາເສນ຺ຕີ –

໓໗. ‘‘ຈຕຸກ຺ຂຕ຺ຕຸໍ ປຎ຺ຈກ຺ຂຕ຺ຕຸໍ, ວິຫາຣາ ອຸປນິກ຺ຂມິໍ;

ອລທ຺ຘາ ເຈຕໂສ ສນ຺ຕິໍ, ຈິຕ຺ເຕ ອວສວຕ຺ຕິນີ;

ຕສ຺ສາ ເມ ອຏ຺ຐມີ ຣຕ຺ຕິ, ຍໂຕ ຕຓ຺ຫາ ສມູຫຕາ.

໓໘. ‘‘ພຫູຫິ ທຸກ຺ຂຘມ຺ເມຫິ, ອປ຺ປມາທຣຕາຍ ເມ;

ຕຓ຺ຫກ຺ຂໂຍ ອນຸປ຺ປຕ຺ໂຕ, ກຕໍ ພຸທ຺ຘສ຺ສ ສາສນ’’ນ຺ຕິ. –

ອຸທານວເສນ ອິມາ ທ຺ເວ ຄາຖາ ອຠາສິ.

ຕຕ຺ຖ ຈຕຸກ຺ຂຕ຺ຕຸໍ ປຎ຺ຈກ຺ຂຕ຺ຕຸໍ, ວິຫາຣາ ອຸປນິກ຺ຂມິນ຺ຕິ ‘‘ມມ ວສນກວິຫາເຣ ວິປສ຺ສນາມນສິກາເຣນ ນິສິນ຺ນາ ສມຓກິຈ຺ຈໍ ມຕ຺ຖກໍ ປາເປຕຸໍ ອສກ຺ໂກນ຺ຕີ ອຸຕຸສປ຺ປາຍາຠາເວນ ນນຸ ໂຂ ມຍ຺ຫໍ ວິປສ຺ສນາ ມຄ຺ເຄນ ຆຏ຺ເຏຕີ’’ຕິ ຈິນ຺ເຕຕ຺ວາ ຈຕ຺ຕາໂຣ ປຎ຺ຈ ຈາຕິ ນວ ວາເຣ ວິຫາຣາ ອຸປສ຺ສຍໂຕ ພຫິ ນິກ຺ຂມິໍ. ເຕນາຫ ‘‘ອລທ຺ຘາ ເຈຕໂສ ສນ຺ຕິໍ, ຈິຕ຺ເຕ ອວສວຕ຺ຕິນີ’’ຕິ. ຕຕ຺ຖ ເຈຕໂສ ສນ຺ຕິນ຺ຕິ ອຣິຍມຄ຺ຄສມາຘິໍ ສນ຺ຘາຍາຫ. ຈິຕ຺ເຕ ອວສວຕ຺ຕິນີຕິ ວີຣິຍສມຕາຍ ອຠາເວນ ມມ ຠາວນາຈິຕ຺ເຕ ນ ວສວຕ຺ຕິນີ. ສາ ກິຣ ອຕິວິຍ ປຄ຺ຄຫິຕວີຣິຍາ ອໂຫສິ. ຕສ຺ສາ ເມ ອຏ຺ຐມີ ຣຕ຺ຕີຕິ ຍໂຕ ປຏ຺ຐາຍ ອານນ຺ທຕ຺ເຖຣສ຺ສ ສນ຺ຕິເກ ໂອວາທໍ ປຏິລຠິໍ, ຕໂຕ ປຏ຺ຐາຍ ຣຕ຺ຕິນ຺ທິວມຕນ຺ທິຕາ ວິປສ຺ສນາຍ ກມ຺ມໍ ກໂຣນ຺ຕີ ຣຕ຺ຕິຍໍ ຈຕຸກ຺ຂຕ຺ຕຸໍ ປຎ຺ຈກ຺ຂຕ຺ຕຸໍ ວິຫາຣໂຕ ນິກ຺ຂມິຕ຺ວາ ມນສິກາຣໍ ປວຕ຺ເຕນ຺ຕີ ວິເສສໍ ອນຘິຄນ຺ຕ຺ວາ ອຏ຺ຐມິຍໍ ຣຕ຺ຕິຍໍ ວີຣິຍສມຕໍ ລຠິຕ຺ວາ ມຄ຺ຄປຏິປາຏິຍາ ກິເລເສ ເຂເປສິນ຺ຕິ ອຕ຺ໂຖ. ເຕນ ວຸຕ຺ຕໍ – ‘‘ຕສ຺ສາ ເມ ອຏ຺ຐມີ ຣຕ຺ຕິ, ຍໂຕ ຕຓ຺ຫາ ສມູຫຕາ’’ຕິ. ເສສໍ ວຸຕ຺ຕນຍເມວ.

ສາມາເຖຣີຄາຖາວຓ຺ຓນາ ນິຏ຺ຐິຕາ.

ທຸກນິປາຕວຓ຺ຓນາ ນິຏ຺ຐິຕາ.