໒. ໂຣຫິນີເຖຣີຄາຖາວຓ຺ຓນາ

ສມຓາຕິ ໂຠຕິ ສຸປີຕິອາທິກາ ໂຣຫິນິຍາ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ຕີ ອິໂຕ ເອກນວຸຕິກປ຺ເປ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ວາ, ເອກທິວສໍ ພນ຺ຘຸມຕີນຄເຣ ຠຄວນ຺ຕໍ ປິຓ຺ຑາຍ ຈຣນ຺ຕໍ ທິສ຺ວາ ປຕ຺ຕໍ ຄເຫຕ຺ວາ ປູວສ຺ສ ປູເຣຕ຺ວາ ຠຄວໂຕ ທຕ຺ວາ ປີຕິໂສມນສ຺ສຊາຕາ ປຎ຺ຈປຕິຏ຺ຐິເຕນ ວນ຺ທິ. ສາ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ຕີ ອນຸກ຺ກເມນ ອຸປຈິຕວິໂມກ຺ຂສມ຺ຠາຣາ ຫຸຕ຺ວາ ອິມສ຺ມິໍ ພຸທ຺ຘຸປ຺ປາເທ ເວສາລິຍໍ ມຫາວິຠວສ຺ສ ພ຺ຣາຫ຺ມຓສ຺ສ ເຄເຫ ນິພ຺ພຕ຺ຕິຕ຺ວາ ໂຣຫິນີຕິ ລທ຺ຘນາມາ ວິຎ຺ຎຸຕໍ ປຕ຺ວາ, ສຕ຺ຖຣິ ເວສາລິຍໍ ວິຫຣນ຺ເຕ ວິຫາຣໍ ຄນ຺ຕວາ ຘມ຺ມໍ ສຸຕ຺ວາ ໂສຕາປນ຺ນາ ຫຸຕ຺ວາ ມາຕາປິຕູນໍ ຘມ຺ມໍ ເທເສຕ຺ວາ ສາສເນ ປສາທໍ ອຸປ຺ປາເທຕ຺ວາ ເຕ ອນຸຊານາເປຕ຺ວາ ສຍໍ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ຕີ ນ ຈິຣສ຺ເສວ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ –

‘‘ນຄເຣ ພນ຺ຘຸມຕິຍາ, ວິປສ຺ສິສ຺ສ ມເຫສິໂນ;

ປິຓ຺ຑາຍ ວິຈຣນ຺ຕສ຺ສ, ປູເວທາສິມຫໍ ຕທາ.

‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຕຕ຺ຖ ຈິຕ຺ຕໍ ປສາເທຕ຺ວາ, ຕາວຕິໍສມຄຈ຺ຉຫໍ.

‘‘ຉຕ຺ຕິໍສເທວຣາຊູນໍ, ມເຫສິຕ຺ຕມກາຣຍິໍ;

ປຎ຺ຎາສຈກ຺ກວຕ຺ຕີນໍ, ມເຫສິຕ຺ຕມກາຣຍິໍ.

‘‘ມນສາ ປຕ຺ຖິຕາ ນາມ, ສພ຺ພາ ມຍ຺ຫໍ ສມິຊ຺ຌຖ;

ສມ຺ປຕ຺ຕິໍ ອນຸໂຠຕ຺ວານ, ເທເວສຸ ມນຸເຊສຸ ຈ.

‘‘ປຈ຺ຉິເມ ຠວສມ຺ປຕ຺ເຕ, ຊາໂຕ ວິປ຺ປກຸເລ ອຫໍ;

ໂຣຫິນີ ນາມ ນາເມນ, ຎາຕເກຫິ ປິຍາຍິຕາ.

‘‘ຠິກ຺ຂູນໍ ສນ຺ຕິກໍ ຄນ຺ຕ຺ວາ, ຘມ຺ມໍ ສຸຕ຺ວາ ຍຖາຕຖໍ;

ສໍວິຄ຺ຄມານສາ ຫຸຕ຺ວາ, ປພ຺ພຊິໍ ອນຄາຣິຍໍ.

‘‘ໂຍນິໂສ ປທຫນ຺ຕີນໍ, ອຣຫຕ຺ຕມປາປຸຓິໍ;

ເອກນວຸຕິໂຕ ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ປູວທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ປຸພ຺ເພ ໂສຕາປນ຺ນກາເລ ປິຕຣາ ອຕ຺ຕນາ ຈ ວຈນປຏິວຈນວເສນ ວຸຕ຺ຕຄາຖາ ອຸທານວເສນ ຠາສນ຺ຕີ –

໒໗໑. ‘‘ສມຓາຕິ ໂຠຕິ ສຸປິ, ສມຓາຕິ ປພຸຊ຺ຌສິ;

ສມຓາເນວ ກິຕ຺ເຕສິ, ສມຓີ ນູນ ຠວິສ຺ສສິ.

໒໗໒. ‘‘ວິປຸລໍ ອນ຺ນຎ຺ຈ ປານຎ຺ຈ, ສມຓານໍ ປເວຈ຺ຉສິ;

ໂຣຫິນີ ທານິ ປຸຈ຺ຉາມິ, ເກນ ເຕ ສມຓາ ປິຍາ.

໒໗໓. ‘‘ອກມ຺ມກາມາ ອລສາ, ປຣທຕ຺ຕູປຊີວິໂນ;

ອາສໍສຸກາ ສາທຸກາມາ, ເກນ ເຕ ສມຓາ ປິຍາ.

໒໗໔. ‘‘ຈິຣສ຺ສໍ ວຕ ມໍ ຕາຕ, ສມຓານໍ ປຣິປຸຈ຺ຉສິ;

ເຕສໍ ເຕ ກິຕ຺ຕຍິສ຺ສາມິ, ປຎ຺ຎາສີລປຣກ຺ກມໍ.

໒໗໕. ‘‘ກມ຺ມກາມາ ອນລສາ, ກມ຺ມເສຏ຺ຐສ຺ສ ກາຣກາ;

ຣາຄໍ ໂທສໍ ປຊຫນ຺ຕິ, ເຕນ ເມ ສມຓາ ປິຍາ.

໒໗໖. ‘‘ຕີຓິ ປາປສ຺ສ ມູລານິ, ຘຸນນ຺ຕິ ສຸຈິກາຣິໂນ;

ສພ຺ພໍ ປາປໍ ປຫີເນສໍ, ເຕນ ເມ ສມຓາ ປິຍາ.

໒໗໗. ‘‘ກາຍກມ຺ມໍ ສຸຈິ ເນສໍ, ວຈີກມ຺ມຎ຺ຈ ຕາທິສໍ;

ມໂນກມ຺ມໍ ສຸຈິ ເນສໍ, ເຕນ ເມ ສມຓາ ປິຍາ.

໒໗໘. ‘‘ວິມລາ ສງ຺ຂມຸຕ຺ຕາວ, ສຸທ຺ຘາ ສນ຺ຕຣພາຫິຣາ;

ປຸຓ຺ຓາ ສຸກ຺ການ ຘມ຺ມານໍ, ເຕນ ເມ ສມຓາ ປິຍາ.

໒໗໙. ‘‘ພຫຸສ຺ສຸຕາ ຘມ຺ມຘຣາ, ອຣິຍາ ຘມ຺ມຊີວິໂນ;

ອຕ຺ຖໍ ຘມ຺ມຎ຺ຈ ເທເສນ຺ຕິ, ເຕນ ເມ ສມຓາ ປິຍາ.

໒໘໐. ‘‘ພຫຸສ຺ສຸຕາ ຘມ຺ມຘຣາ, ອຣິຍາ ຘມ຺ມຊີວິໂນ;

ເອກຄ຺ຄຈິຕ຺ຕາ ສຕິມນ຺ໂຕ, ເຕນ ເມ ສມຓາ ປິຍາ.

໒໘໑. ‘‘ທູຣງ຺ຄມາ ສຕິມນ຺ໂຕ, ມນ຺ຕຠາຓີ ອນຸທ຺ຘຕາ;

ທຸກ຺ຂສ຺ສນ຺ຕໍ ປຊານນ຺ຕິ, ເຕນ ເມ ສມຓາ ປິຍາ.

໒໘໒. ‘‘ຍສ຺ມາ ຄາມາ ປກ຺ກມນ຺ຕິ, ນ ວິໂລເກນ຺ຕິ ກິຎ຺ຈນໍ;

ອນເປກ຺ຂາວ ຄຈ຺ຉນ຺ຕິ, ເຕນ ເມ ສມຓາ ປິຍາ.

໒໘໓. ‘‘ນ ເຕ ສໍ ໂກຏ຺ເຐ ໂອເປນ຺ຕິ, ນ ກຸມ຺ຠິໍ ນ ຂໂຬປິຍໍ;

ປຣິນິຏ຺ຐິຕເມສານາ, ເຕນ ເມ ສມຓາ ປິຍາ.

໒໘໔. ‘‘ນ ເຕ ຫິຣຎ຺ຎໍ ຄຓ຺ຫນ຺ຕິ, ນ ສຸວຓ຺ຓໍ ນ ຣູປິຍໍ;

ປຈ຺ຈຸປ຺ປນ຺ເນນ ຍາເປນ຺ຕິ, ເຕນ ເມ ສມຓາ ປິຍາ.

໒໘໕. ‘‘ນານາກຸລາ ປພ຺ພຊິຕາ, ນານາຊນປເທຫິ ຈ;

ອຎ຺ຎມຎ຺ຎໍ ປິຫຍນ຺ຕິ, ເຕນ ເມ ສມຓາ ປິຍາ.

໒໘໖. ‘‘ອຕ຺ຖາຍ ວຕ ໂນ ໂຠຕິ, ກຸເລ ຊາຕາສິ ໂຣຫິນີ;

ສທ຺ຘາ ພຸທ຺ເຘ ຈ ຘມ຺ເມ ຈ, ສງ຺ເຆ ຈ ຕິພ຺ພຄາຣວາ.

໒໘໗. ‘‘ຕຸວຎ຺ເຫຕໍ ປຊານາສິ, ປຸຎ຺ຎກ຺ເຂຕ຺ຕໍ ອນຸຕ຺ຕຣໍ;

ອມ຺ຫມ຺ປິ ເອເຕ ສມຓາ, ປຏິຄ຺ຄຓ຺ຫນ຺ຕິ ທກ຺ຂິຓໍ.

໒໘໘. ‘‘ປຕິຏ຺ຐິໂຕ ເຫຕ຺ຖ ຍຎ຺ໂຎ, ວິປຸໂລ ໂນ ຠວິສ຺ສຕິ;

ສເຈ ຠາຍສິ ທຸກ຺ຂສ຺ສ, ສເຈ ເຕ ທຸກ຺ຂມປ຺ປິຍໍ.

໒໘໙. ‘‘ອຸເປຫິ ສຣຓໍ ພຸທ຺ຘໍ, ຘມ຺ມໍ ສງ຺ຆຎ຺ຈ ຕາທິນໍ;

ສມາທິຍາຫິ ສີລານິ, ຕໍ ເຕ ອຕ຺ຖາຍ ເຫຫິຕິ.

໒໙໐. ‘‘ອຸເປມິ ສຣຓໍ ພຸທ຺ຘໍ, ຘມ຺ມໍ ສງ຺ຆຎ຺ຈ ຕາທິນໍ;

ສມາທິຍາມິ ສີລານິ, ຕໍ ເມ ອຕ຺ຖາຍ ເຫຫິຕິ.

໒໙໑. ‘‘ພ຺ຣຫ຺ມພນ຺ຘຸ ປຸເຣ ອາສິໍ, ໂສ ອິທານິມ຺ຫິ ພ຺ຣາຫ຺ມໂຓ;

ເຕວິຊ຺ໂຊ ໂສຕ຺ຕິໂຍ ຈມ຺ຫິ, ເວທຄູ ຈມ຺ຫິ ນ຺ຫາຕໂກ’’ຕິ. –

ອິມາ ຄາຖາ ປຈ຺ຈຸທາຫາສິ.

ຕຕ຺ຖ ອາທິໂຕ ຕິສ຺ໂສ ຄາຖາ ອຕ຺ຕໂນ ຘີຕຸ ຠິກ຺ຂູສຸ ສມ຺ມຸຕິໍ ອນິຈ຺ຉນ຺ເຕນ ວຸຕ຺ຕາ. ຕຕ຺ຖ ສມຓາຕິ ໂຠຕິ ສຸປີຕິ ໂຠຕິ ຕ຺ວໍ ສຸປນກາເລປິ ‘‘ສມຓາ ສມຓາ’’ຕິ ກິຕ຺ເຕນ຺ຕີ ສມຓປຏິພທ຺ຘໍເຍວ ກຖໍ ກເຖນ຺ຕີ ສຸປສິ. ສມຓາຕິ ປພຸຊ຺ຌສີຕິ ສຸປນໂຕ ອຸຏ຺ຐຫນ຺ຕີປິ ‘‘ສມຓາ’’ອິຈ຺ເຈວໍ ວຕ຺ວາ ປພຸຊ຺ຌສິ ນິທ຺ທາຍ ວຸຏ຺ຐາສິ. ສມຓາເນວ ກິຕ຺ເຕສີຕິ ສພ຺ພກາລມ຺ປິ ສມເຓ ເອວ ສມຓານເມວ ວາ ຄຸເຓ ກິຕ຺ເຕສິ ອຠິຕ຺ຖວສິ. ສມຓີ ນູນ ຠວິສ຺ສສີຕິ ຄິຫິຣູເປນ ຐິຕາປິ ຈິຕ຺ເຕນ ສມຓີ ເອວ ມຎ຺ເຎ ຠວິສ຺ສສິ. ອຖ ວາ ສມຓີ ນູນ ຠວິສ຺ສສີຕິ ອິທານິ ຄິຫິຣູເປນ ຐິຕາປິ ນ ຈິເຣເນວ ສມຓີ ເອວ ມຎ຺ເຎ ຠວິສ຺ສສິ ສມເຓສຸ ເອວ ນິນ຺ນໂປຓຠາວໂຕ.

ປເວຈ຺ຉສີຕິ ເທສິ. ໂຣຫິນີ ທານິ ປຸຈ຺ຉາມີຕິ, ອມ຺ມ ໂຣຫິນິ, ຕໍ ອຫໍ ອິທານິ ປຸຈ຺ຉາມີຕິ ພ຺ຣາຫ຺ມໂຓ ອຕ຺ຕໂນ ຘີຕຣໍ ປຸຈ຺ຉນ຺ໂຕ ອາຫ. ເກນ ເຕ ສມຓາ ປິຍາຕິ, ອມ຺ມ ໂຣຫິນິ, ຕ຺ວໍ ສຍນ຺ຕີປິ ປພຸຊ຺ຌນ຺ຕີປິ ອຎ຺ຎທາປິ ສມຓານເມວ ຄຸເຓ ກິຕ຺ຕຍສິ, ເກນ ນາມ ກາຣເຓນ ຕຸຍ຺ຫໍ ສມຓາ ປິຍາຍິຕພ຺ພາ ຊາຕາຕິ ອຕ຺ໂຖ.

ອິທານິ ພ຺ຣາຫ຺ມໂຓ ສມເຓສຸ ໂທສໍ ຘີຕຸ ອາຈິກ຺ຂນ຺ໂຕ ‘‘ອກມ຺ມກາມາ’’ຕິ ຄາຖມາຫ. ຕຕ຺ຖ ອກມ຺ມກາມາຕິ ນ ກມ຺ມກາມາ, ອຕ຺ຕໂນ ປເຣສຎ຺ຈ ອຕ຺ຖາວຫໍ ກິຎ຺ຈິ ກມ຺ມໍ ນ ກາຕຸກາມາ. ອລສາຕິ ກຸສີຕາ. ປຣທຕ຺ຕູປຊີວິໂນຕິ ປເຣຫິ ທິນ຺ເນເນວ ອຸປຊີວນສີລາ. ອາສໍສຸກາຕິ ຕໂຕ ເອວ ຆາສຈ຺ຉາທນາທີນໍ ອາສີສນກາ. ສາທຸກາມາຕິ ສາທຸໍ ມຘຸຣເມວ ອາຫາຣໍ ອິຈ຺ຉນກາ. ສພ຺ພເມຕໍ ພ຺ຣາຫ຺ມໂຓ ສມຓານໍ ຄຸເຓ ອຊານນ຺ໂຕ ອຕ຺ຕນາວ ປຣິກປ຺ປິຕໍ ໂທສມາຫ.

ຕໍ ສຸຕ຺ວາ ໂຣຫິນີ ‘‘ລທ຺ໂຘ ທານິ ເມ ໂອກາໂສ ອຍ຺ຍານໍ ຄຸເຓ ກເຖຕຸ’’ນ຺ຕິ ຕຸຏ຺ຐມານສາ ຠິກ຺ຂູນໍ ຄຸເຓ ກິຕ຺ເຕຕຸກາມາ ປຐມໍ ຕາວ ເຕສໍ ກິຕ຺ຕເນ ໂສມນສ຺ສໍ ປເວເທນ຺ຕີ ‘‘ຈີຣສ຺ສໍ ວຕ ມໍ, ຕາຕາ’’ຕິ ຄາຖມາຫ. ຕຕ຺ຖ ຈິຣສ຺ສໍ ວຕາຕິ ຈິເຣນ ວຕ. ຕາຕາຕິ ປິຕຣໍ ອາລປຕິ. ສມຓານນ຺ຕິ ສມເຓ ສມຓານໍ ວາ ມຍ຺ຫໍ ປິຍາຍິຕພ຺ພໍ ປຣິປຸຈ຺ຉສິ. ເຕສນ຺ຕິ ສມຓານໍ. ປຎ຺ຎາສີລປຣກ຺ກມນ຺ຕິ ປຎ຺ຎຎ຺ຈ ສີລຎ຺ຈ ອຸສ຺ສາຫຎ຺ຈ.

ກິຕ຺ຕຍິສ຺ສາມີຕິ ກຖຍິສ຺ສາມິ. ປຏິຊາເນຕ຺ວາ ເຕ ກິຕ຺ເຕນ຺ຕີ ‘‘ອກມ຺ມກາມາ ອລສາ’’ຕິ ເຕນ ວຸຕ຺ຕໍ ໂທສໍ ຕາວ ນິພ຺ເພເຐຕ຺ວາ ຕປ຺ປຏິປກ຺ຂຠູຕໍ ຄຸຓໍ ທສ຺ເສຕຸໍ ‘‘ກມ຺ມກາມາ’’ຕິອາທິມາຫ. ຕຕ຺ຖ ກມ຺ມກາມາຕິ ວຕ຺ຕປຏິວຕ຺ຕາທິເຠທໍ ກມ຺ມໍ ສມຓກິຈ຺ຈໍ ປຣິປູຣຓວເສນ ກາເມນ຺ຕິ ອິຈ຺ຉນ຺ຕີຕິ ກມ຺ມກາມາ. ຕຕ຺ຖ ຍຸຕ຺ຕປ຺ປຍຸຕ຺ຕາ ຫຸຕ຺ວາ ອຸຏ຺ຐາຍ ສມຸຏ຺ຐາຍ ວາຍມນໂຕ ນ ອລສາຕິ ອນລສາ. ຕໍ ປນ ກມ຺ມໍ ເສຏ຺ຐໍ ອຸຕ຺ຕມໍ ນິພ຺ພານາວຫເມວ ກໂຣນ຺ຕີຕິ ກມ຺ມເສຏ຺ຐສ຺ສ ກາຣກາ. ກໂຣນ຺ຕາ ປນ ຕໍ ປຏິປຕ຺ຕິຍາ ອນວຊ຺ຊຠາວໂຕ ຣາຄໍ ໂທສໍ ປຊຫນ຺ຕິ, ຍຖາ ຣາຄໂທສາ ປຫີຍນ຺ຕິ, ເອວໍ ສມຓາ ກມ຺ມໍ ກໂຣນ຺ຕິ. ເຕນ ເມ ສມຓາ ປິຍາຕິ ເຕນ ຍຖາວຸຕ຺ເຕນ ສມ຺ມາປຏິປຊ຺ຊເນນ ມຍ຺ຫໍ ສມຓາ ປິຍາຍິຕພ຺ພາຕິ ອຕ຺ໂຖ.

ຕີຓິ ປາປສ຺ສ ມູລານີຕິ ໂລຠໂທສໂມຫສງ຺ຂາຕານິ ອກຸສລສ຺ສ ຕີຓິ ມູລານິ. ຘຸນນ຺ຕີຕິ ນິຄ຺ຆາເຕນ຺ຕິ, ປຊຫນ຺ຕີຕິ ອຕ຺ໂຖ. ສຸຈິກາຣິໂນຕິ ອນວຊ຺ຊກມ຺ມກາຣິໂນ. ສພ຺ພໍ ປາປໍ ປຫີເນສນ຺ຕິ ອຄ຺ຄມຄ຺ຄາຘິຄເມນ ເອສໍ ສພ຺ພມ຺ປິ ປາປໍ ປຫີນໍ.

ເອວໍ ‘‘ສມຓາ ສຸຈິກາຣິໂນ’’ຕິ ສງ຺ເຂປໂຕ ວຸຕ຺ຕມຕ຺ຖໍ ວິຠຊິຕ຺ວາ ທສ຺ເສຕຸໍ ‘‘ກາຍກມ຺ມ’’ນ຺ຕິ ຄາຖມາຫ. ຕໍ ສຸວິຎ຺ເຎຍ຺ຍເມວ.

ວິມລາ ສງ຺ຂມຸຕ຺ຕາວາຕິ ສຸໂຘຕສງ຺ຂາ ວິຍ ມຸຕ຺ຕາ ວິຍ ຈ ວິຄຕມລາ ຣາຄາທິມລຣຫິຕາ. ສຸທ຺ຘາ ສນ຺ຕຣພາຫິຣາຕິ ສນ຺ຕຣຎ຺ຈ ພາຫິຣຎ຺ຈ ສນ຺ຕຣພາຫິຣໍ. ຕໂຕ ສນ຺ຕຣພາຫິຣໂຕ ສຸທ຺ຘາ, ສຸທ຺ຘາສຍປໂຍຄາຕິ ອຕ຺ໂຖ. ປຸຓ຺ຓາ ສຸກ຺ການ ຘມ຺ມານນ຺ຕິ ເອກນ຺ຕສຸກ຺ເກຫິ ອນວຊ຺ຊຘມ຺ເມຫິ ປຣິປຸຓ຺ຓາ, ອເສເຂຫິ ສີລກ຺ຂນ຺ຘາທີຫິ ສມນ຺ນາຄຕາຕິ ອຕ຺ໂຖ.

ສຸຕ຺ຕເຄຍ຺ຍາທິພຫຸໍ ສຸຕໍ ເອເຕສໍ, ສຸເຕນ ວາ ອຸປ຺ປນ຺ນາຕິ ພຫຸສ຺ສຸຕາ, ປຣິຍຕ຺ຕິພາຫຸສຈ຺ເຈນ ປຏິເວຘພາຫຸສຈ຺ເຈນ ຈ ສມນ຺ນາຄຕາຕິ ອຕ຺ໂຖ. ຕເມວ ທຸວິຘມ຺ປິ ຘມ຺ມໍ ຘາເຣນ຺ຕີຕິ ຘມ຺ມຘຣາ. ສຕ຺ຕານໍ ອາຈາຣສມາຈາຣສິກ຺ຂາປເທນ ອຣີຍນ຺ຕີຕິ ອຣິຍາ. ຘມ຺ເມນ ຎາເຍນ ຊີວນ຺ຕີຕິ ຘມ຺ມຊີວິໂນ. ອຕ຺ຖໍ ຘມ຺ມຎ຺ຈ ເທເສນ຺ຕີຕິ ຠາສິຕຕ຺ຖຎ຺ຈ ເທສນາຘມ຺ມຎ຺ຈ ກເຖນ຺ຕິ ປກາເສນ຺ຕິ. ອຖ ວາ ອຕ຺ຖໂຕ ອນເປຕໍ ຘມ຺ມໂຕ ອນເປຕຎ຺ຈ ເທເສນ຺ຕິ ອາຈິກ຺ຂນ຺ຕິ.

ເອກຄ຺ຄຈິຕ຺ຕາຕິ ສມາຫິຕຈິຕ຺ຕາ. ສຕິມນ຺ໂຕຕິ ອຸປຏ຺ຐິຕສຕິໂນ.

ທູຣງ຺ຄມາຕິ ອຣຎ຺ຎຄຕາ, ມນຸສ຺ສູປຈາຣໍ ມຸຎ຺ຈິຕ຺ວາ ທູຣໍ ຄຈ຺ຉນ຺ຕາ, ອິທ຺ຘານຸຠາເວນ ວາ ຍຖາຣຸຈິຕໍ ທູຣໍ ຐານໍ ຄຈ຺ຉນ຺ຕີຕິ ທູຣງ຺ຄມາ. ມນ຺ຕາ ວຸຈ຺ຈຕິ ປຎ຺ຎາ, ຕາຍ ຠຓນສີລຕາຍ ມນ຺ຕຠາຓີ. ນ ອຸທ຺ຘຕາຕິ ອນຸທ຺ຘຕາ, ອຸທ຺ຘຈ຺ຈຣຫິຕາ ວູປສນ຺ຕຈິຕ຺ຕາ. ທຸກ຺ຂສ຺ສນ຺ຕໍ ປຊານນ຺ຕີຕິ ວຏ຺ຏທຸກ຺ຂສ຺ສ ປຣິຍນ຺ຕຠູຕໍ ນິພ຺ພານໍ ປຏິວິຊ຺ຌນ຺ຕິ.

ນ ວິໂລເກນ຺ຕິ ກິຎ຺ຈນນ຺ຕິ ຍໂຕ ຄາມໂຕ ປກ຺ກມນ຺ຕິ, ຕສ຺ມິໍ ຄາເມ ກຎ຺ຈິ ສຕ຺ຕໍ ວາ ສງ຺ຂາຣໍ ວາ ອເປກ຺ຂາວເສນ ນ ໂອໂລເກນ຺ຕິ, ອຖ ໂຂ ປນ ອນເປກ຺ຂາວ ຄຈ຺ຉນ຺ຕິ ປກ຺ກມນ຺ຕິ.

ນ ເຕ ສໍ ໂກຏ຺ເຐ ໂອເປນ຺ຕີຕິ ເຕ ສມຓາ ສໍ ອຕ຺ຕໂນ ສນ຺ຕກໍ ສາປເຕຍ຺ຍໍ ໂກຏ຺ເຐ ນ ໂອເປນ຺ຕິ ນ ປຏິສາເມຕ຺ວາ ຐເປນ຺ຕິ ຕາທິສສ຺ສ ປຣິຄ຺ຄຫສ຺ສ ອຠາວໂຕ. ກຸມ຺ຠິນ຺ຕິ ກຸມ຺ຠິຍໍ. ຂໂຬປິຍນ຺ຕິ ປຈ຺ຉິຍໍ. ປຣິນິຏ຺ຐິຕເມສານາຕິ ປຣກຸເລສຸ ປເຣສໍ ອຕ຺ຖາຍ ສິທ຺ຘເມວ ຆາສໍ ປຣິເຍສນ຺ຕາ.

ຫິຣຎ຺ຎນ຺ຕິ ກຫາປຓໍ. ຣູປິຍນ຺ຕິ ຣຊຕໍ. ປຈ຺ຈຸປ຺ປນ຺ເນນ ຍາເປນ຺ຕີຕິ ອຕີຕໍ ອນນຸໂສຈນ຺ຕາ ອນາຄຕຎ຺ຈ ອປຈ຺ຈາສີສນ຺ຕາ ປຈ຺ຈຸປ຺ປນ຺ເນນ ຍາເປນ຺ຕິ ອຕ຺ຕຠາວໍ ປວຕ຺ເຕນ຺ຕິ.

ອຎ຺ຎມຎ຺ຎໍ ປິຫຍນ຺ຕີຕິ ອຎ຺ຎມຎ຺ຎສ຺ມິໍ ເມຕ຺ຕິໍ ກໂຣນ຺ຕິ. ‘‘ປິຫາຍນ຺ຕິ’’ປິ ປາໂຐ, ໂສ ເອວ ອຕ຺ໂຖ.

ເອວໍ ໂສ ພ຺ຣາຫ຺ມໂຓ ຘີຕຸຍາ ສນ຺ຕິເກ ຠິກ຺ຂູນໍ ຄຸເຓ ສຸຕ຺ວາ ປສນ຺ນມານໂສ ຘີຕຣໍ ປສໍສນ຺ໂຕ ‘‘ອຕ຺ຖາຍ ວຕາ’’ຕິອາທິມາຫ.

ອມ຺ຫມ຺ປີຕິ ອມ຺ຫາກມ຺ປິ. ທກ຺ຂິຓນ຺ຕິ ເທຍ຺ຍຘມ຺ມໍ.

ເອຕ຺ຖາຕິ ເອເຕສຸ ສມເຓສຸ. ຍຎ຺ໂຎຕິ ທານຘມ຺ໂມ. ວິປຸໂລຕິ ວິປຸລຜໂລ. ເສສໍ ວຸຕ຺ຕນຍເມວ.

ເອວໍ ພ຺ຣາຫ຺ມໂຓ ສຣເຓສຸ ສີເລສຸ ຈ ປຕິຏ຺ຐິໂຕ ອປຣຠາເຄ ສຎ຺ຊາຕສໍເວໂຄ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ເຕ ປຕິຏ຺ຐາຍ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ອຸທາເນນ຺ໂຕ ‘‘ພ຺ຣຫ຺ມພນ຺ຘູ’’ຕິ ຄາຖມາຫ. ຕສ຺ສຕ຺ໂຖ ເຫຏ຺ຐາ ວຸຕ຺ໂຕເຍວ.

ໂຣຫິນີເຖຣີຄາຖາວຓ຺ຓນາ ນິຏ຺ຐິຕາ.