໕-໑໐. ຕິສ຺ສາທິເຖຣີຄາຖາວຓ຺ຓນາ

ຕິສ຺ເສ ຍຸຎ຺ຊສ຺ສຸ ຘມ຺ເມຫີຕິ ຕິສ຺ສາຍ ເຖຣິຍາ ຄາຖາ. ຕສ຺ສາ ວຕ຺ຖຸ ຕິສ຺ສາສິກ຺ຂມານາຍ ວຕ຺ຖຸສທິສໍ. ອຍໍ ປນ ເຖຣີ ຫຸຕ຺ວາ ອຣຫຕ຺ຕໍ ປາປຸຓິ. ຍຖາ ຈ ອຍໍ, ເອວໍ ອິໂຕ ປຣໍ ຘີຣາ, ວີຣາ, ມິຕ຺ຕາ, ຠທ຺ຣາ, ອຸປສມາຕິ ປຎ຺ຈນ຺ນໍ ເຖຣີນໍ ວຕ຺ຖຸ ເອກສທິສເມວ. ສພ຺ພາປິ ອິມາ ກປິລວຕ຺ຖຸວາສິນິໂຍ ໂພຘິສຕ຺ຕສ຺ສ ໂອໂຣຘຠູຕາ ມຫາປຊາປຕິໂຄຕມິຍາ ສທ຺ຘິໍ ນິກ຺ຂນ຺ຕາ ໂອຠາສຄາຖາຍ ຈ ອຣຫຕ຺ຕໍ ປຕ຺ຕາ ຐເປຕ຺ວາ ສຕ຺ຕມິໍ. ສາ ປນ ໂອຠາສຄາຖາຍ ວິນາ ປເຄວ ສຕ຺ຖຸ ສນ຺ຕິເກ ລທ຺ຘໍ ໂອວາທໍ ນິສ຺ສາຍ ວິປສ຺ສນໍ ອຸສ຺ສຸກ຺ກາເປຕ຺ວາ ອຣຫຕ຺ຕໍ ປາປຸຓິຕ຺ວາ ອຸທານວເສນ ‘‘ວີຣາ ວີເຣຫີ’’ຕິ ຄາຖໍ ອຠາສິ. ອິຕຣາປິ ອຣຫຕ຺ຕໍ ປຕ຺ວາ –

໕. ‘‘ຕິສ຺ເສ ຍຸຎ຺ຊສ຺ສຸ ຘມ຺ເມຫິ, ຂໂຓ ຕໍ ມາ ອຸປຈ຺ຈຄາ;

ຂຓາຕີຕາ ຫິ ໂສຈນ຺ຕິ, ນິຣຍມ຺ຫິ ສມປ຺ປິຕາ.

໖. ‘‘ຘີເຣ ນິໂຣຘໍ ຜຸເສຫິ, ສຎ຺ຎາວູປສມໍ ສຸຂໍ;

ອາຣາຘຍາຫິ ນິພ຺ພານໍ, ໂຍຄກ຺ເຂມມນຸຕ຺ຕຣໍ.

໗. ‘‘ວີຣາ ວີເຣຫິ ຘມ຺ເມຫິ, ຠິກ຺ຂຸນີ ຠາວິຕິນ຺ທ຺ຣິຍາ;

ຘາເຣຕິ ອນ຺ຕິມໍ ເທຫໍ, ເຊຕ຺ວາ ມາຣໍ ສວາຫນໍ.

໘. ‘‘ສທ຺ຘາຍ ປພ຺ພຊິຕ຺ວານ, ມິຕ຺ເຕ ມິຕ຺ຕຣຕາ ຠວ;

ຠາເວຫິ ກຸສເລ ຘມ຺ເມ, ໂຍຄກ຺ເຂມສ຺ສ ປຕ຺ຕິຍາ.

໙. ‘‘ສທ຺ຘາຍ ປພ຺ພຊິຕ຺ວານ, ຠທ຺ເຣ ຠທ຺ຣຣຕາ ຠວ;

ຠາເວຫິ ກຸສເລ ຘມ຺ເມ, ໂຍຄກ຺ເຂມມນຸຕ຺ຕຣໍ.

໑໐. ‘‘ອຸປສເມ ຕເຣ ໂອຆໍ, ມຈ຺ຈຸເຘຍ຺ຍໍ ສຸທຸຕ຺ຕຣໍ;

ຘາເຣຫິ ອນ຺ຕິມໍ ເທຫໍ, ເຊຕ຺ວາ ມາຣໍ ສວາຫນ’’ນ຺ຕິ. – ຄາຖາໂຍ ອຠາສິໍສຸ;

ຕຕ຺ຖ ຍຸຎ຺ຊສ຺ສຸ ຘມ຺ເມຫີຕິ ສມຖວິປສ຺ສນາຘມ຺ເມຫິ ອຣິເຍຫິ ໂພຘິປກ຺ຂິຍຘມ຺ເມຫິ ຈ ຍຸຎ຺ຊ ໂຍຄໍ ກໂຣຫິ. ຂໂຓ ຕໍ ມາ ອຸປຈ຺ຈຄາຕິ ໂຍ ເອວໍ ໂຍຄຠາວນໍ ນ ກໂຣຕິ, ຕໍ ປຸຄ຺ຄລໍ ປຕິຣູປເທເສ ອຸປ຺ປຕ຺ຕິກ຺ຂໂຓ, ຉນ຺ນໍ ອາຍຕນານໍ ອເວກລ຺ລກ຺ຂໂຓ, ພຸທ຺ຘຸປ຺ປາທກ຺ຂໂຓ, ສທ຺ຘາຍ ປຏິລທ຺ຘກ຺ຂໂຓ, ສພ຺ໂພປິ ອຍໍ ຂໂຓ ອຕິກ຺ກມຕິ ນາມ. ໂສ ຂໂຓ ຕໍ ມາ ອຕິກ຺ກມິ. ຂຓາຕີຕາຕິ ເຍ ຫິ ຂຓໍ ອຕີຕາ, ເຍ ຈ ປຸຄ຺ຄເລ ໂສ ຂໂຓ ອຠີໂຕ, ເຕ ນິຣຍມ຺ຫິ ສມປ຺ປິຕາ ຫຸຕ຺ວາ ໂສຈນ຺ຕິ, ຕຕ຺ຖ ນິພ຺ພຕ຺ຕິຕ຺ວາ ມຫາທຸກ຺ຂໍ ປຈ຺ຈນຸຠວນ຺ຕີຕິ ອຕ຺ໂຖ.

ນິໂຣຘໍ ຜຸເສຫີຕິ ກິເລສນິໂຣຘໍ ຜຸສ຺ສ ປຏິລຠ. ສຎ຺ຎາວູປສມໍ ສຸຂໍ, ອາຣາຘຍາຫິ ນິພ຺ພານນ຺ຕິ ກາມສຎ຺ຎາທີນໍ ປາປສຎ຺ຎານໍ ອຸປສມນິມິຕ຺ຕໍ ອຈ຺ຈນ຺ຕສຸຂໍ ນິພ຺ພານໍ ອາຣາເຘຫິ.

ວີຣາ ວີເຣຫິ ຘມ຺ເມຫີຕິ ວີຣິຍປຘານຕາຍ ວີເຣຫິ ເຕຊຸສ຺ສເທຫິ ອຣິຍມຄ຺ຄຘມ຺ເມຫິ ຠາວິຕິນ຺ທ຺ຣິຍາ ວຑ຺ຒິຕສທ຺ຘາທິອິນ຺ທ຺ຣິຍາ ວີຣາ ຠິກ຺ຂຸນີ ວຕ຺ຖຸກາເມຫິ ສວາຫນໍ ກິເລສມາຣໍ ຊິນິຕ຺ວາ ອາຍຕິໍ ປຸນພ຺ຠວາຠາວໂຕ ອນ຺ຕິມໍ ເທຫໍ ຘາເຣຕີຕິ ເຖຣີ ອຎ຺ຎໍ ວິຍ ກຕ຺ວາ ອຕ຺ຕານໍ ທສ຺ເສຕິ.

ມິຕ຺ເຕຕິ ຕໍ ອາລປຕິ. ມິຕ຺ຕຣຕາຕິ ກລ຺ຍາຓມິຕ຺ເຕສຸ ອຠິຣຕາ. ຕຕ຺ຖ ສກ຺ກາຣສມ຺ມານກຣຓຕາ ໂຫຫິ. ຠາເວຫິ ກຸສເລ ຘມ຺ເມຕິ ອຣິຍມຄ຺ຄຘມ຺ເມ ວຑ຺ເຒຫິ. ໂຍຄກ຺ເຂມສ຺ສາຕິ ອຣຫຕ຺ຕສ຺ສ ນິພ຺ພານສ຺ສ ຈ ປຕ຺ຕິຍາ ອຘິຄມາຍ.

ຠທ຺ເຣຕິ ຕໍ ອາລປຕິ. ຠທ຺ຣຣຕາຕິ ຠທ຺ເຣສຸ ສີລາທິຘມ຺ເມສຸ ຣຕາ ອຠິຣຕາ ໂຫຫິ. ໂຍຄກ຺ເຂມມນຸຕ຺ຕຣນ຺ຕິ ຈຕູຫິ ໂຍເຄຫິ ເຂມໍ ອນຸປທ຺ທວໍ ອນຸຕ຺ຕຣໍ ນິພ຺ພານໍ, ຕສ຺ສ ປຕ຺ຕິຍາ ກຸສເລ ໂພຘິປກ຺ຂິຍຘມ຺ເມ ຠາເວຫີຕິ ອຕ຺ໂຖ.

ອຸປສເມຕິ ຕໍ ອາລປຕິ. ຕເຣ ໂອຆໍ ມຈ຺ຈຸເຘຍ຺ຍໍ ສຸທຸຕ຺ຕຣນ຺ຕິ ມຈ຺ຈຸ ເອຕ຺ຖ ຘີຍຕີຕິ ມຈ຺ຈຸເຘຍ຺ຍໍ, ອນຸປຈິຕກຸສລສມ຺ຠາເຣຫິ ສຸຏ຺ຐຸ ທຸຕ຺ຕຣນ຺ຕິ ສຸທຸຕ຺ຕຣໍ, ສໍສາຣມໂຫຆໍ ຕເຣ ອຣິຍມຄ຺ຄນາວາຍ ຕເຣຍ຺ຍາສິ. ຘາເຣຫິ ອນ຺ຕິມໍ ເທຫນ຺ຕິ ຕສ຺ສ ຕຣເຓເນວ ອນ຺ຕິມເທຫຘຣາ ໂຫຫີຕິ ອຕ຺ໂຖ.

ຕິສ຺ສາທິເຖຣີຄາຖາວຓ຺ຓນາ ນິຏ຺ຐິຕາ.

ນິຏ຺ຐິຕາ ປຐມວຄ຺ຄວຓ຺ຓນາ.