໔. ຕິສ຺ສາເຖຣີຄາຖາວຓ຺ຓນາ

ຕິສ຺ເສ ສິກ຺ຂສ຺ສຸ ສິກ຺ຂາຍາຕິ ຕິສ຺ສາຍ ສິກ຺ຂມານາຍ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນິຕ຺ວາ ສມ຺ຠຕກຸສລປຈ຺ຈຍາ ອິມສ຺ມິໍ ພຸທ຺ຘຸປ຺ປາເທ ກປິລວຕ຺ຖຸສ຺ມິໍ ສກ຺ຍຣາຊກຸເລ ນິພ຺ພຕ຺ຕິຕ຺ວາ ວຍປ຺ປຕ຺ຕາ ໂພຘິສຕ຺ຕສ຺ສ ໂອໂຣຘຠູຕາ ປຈ຺ຉາ ມຫາປຊາປຕິໂຄຕມິຍາ ສທ຺ຘິໍ ນິກ຺ຂມິຕ຺ວາ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣຕິ. ຕສ຺ສາ ສຕ຺ຖາ ເຫຏ຺ຐາ ວຸຕ຺ຕນເຍເນວ ໂອຠາສໍ ວິສ຺ສຊ຺ເຊຕ຺ວາ –

໔. ‘‘ຕິສ຺ເສ ສິກ຺ຂສ຺ສຸ ສິກ຺ຂາຍ, ມາ ຕໍ ໂຍຄາ ອຸປຈ຺ຈຄຸໍ;

ສພ຺ພໂຍຄວິສໍຍຸຕ຺ຕາ, ຈຣ ໂລເກ ອນາສວາ’’ຕິ. – ຄາຖໍ ອຠາສິ;

ຕຕ຺ຖ ຕິສ຺ເສຕິ ຕສ຺ສາ ອາລປນໍ. ສິກ຺ຂສ຺ສຸ ສິກ຺ຂາຍາຕິ ອຘິສີລສິກ຺ຂາທິກາຍ ຕິວິຘາຍ ສິກ຺ຂາຍ ສິກ຺ຂ, ມຄ຺ຄສມ຺ປຍຸຕ຺ຕາ ຕິສ຺ໂສ ສິກ຺ຂາໂຍ ສມ຺ປາເທຫີຕິ ອຕ຺ໂຖ. ອິທານິ ຕາສໍ ສມ຺ປາທເນ ກາຣຓມາຫ ‘‘ມາ ຕໍ ໂຍຄາ ອຸປຈ຺ຈຄຸ’’ນ຺ຕິ ມນຸສ຺ສຕ຺ຕໍ, ອິນ຺ທ຺ຣິຍາເວກລ຺ລໍ, ພຸທ຺ຘຸປ຺ປາໂທ, ສທ຺ຘາປຏິລາໂຠຕິ ອິເມ ໂຍຄາ ສມຍາ ທຸລ຺ລຠກ຺ຂຓາ ຕໍ ມາ ອຕິກ຺ກມຸໍ. ກາມໂຍຄາທໂຍ ເອວ ວາ ຈຕ຺ຕາໂຣ ໂຍຄາ ຕໍ ມາ ອຸປຈ຺ຈຄຸໍ ມາ ອຠິຠເວຍ຺ຍຸໍ. ສພ຺ພໂຍຄວິສໍຍຸຕ຺ຕາຕິ ສພ຺ເພຫິ ກາມໂຍຄາທີຫິ ໂຍເຄຫິ ວິມຸຕ຺ຕາ ຕໂຕ ເອວ ອນາສວາ ຫຸຕ຺ວາ ໂລເກ ຈຣ, ທິຏ຺ຐສຸຂວິຫາເຣນ ວິຫຣາຫີຕິ ອຕ຺ໂຖ.

ສາ ຕໍ ຄາຖໍ ສຸຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓີຕິ ອາທິນໂຍ ເຫຏ຺ຐາ ວຸຕ຺ຕນເຍເນວ ເວທິຕພ຺ໂພ.

ຕິສ຺ສາເຖຣີຄາຖາວຓ຺ຓນາ ນິຏ຺ຐິຕາ.