໑໔. ສຸມນາເຖຣີຄາຖາວຓ຺ຓນາ

ຘາຕຸໂຍ ທຸກ຺ຂໂຕ ທິສ຺ວາຕິ ສຸມນາຍ ເຖຣິຍາ ຄາຖາ. ຕສ຺ສາ ວຕ຺ຖຸ ຕິສ຺ສາເຖຣິຍາ ວຕ຺ຖຸສທິສໍ. ອິມິສ຺ສາປິ ຫິ ສຕ຺ຖາ ໂອຠາສໍ ວິສ຺ສຊ຺ເຊຕ຺ວາ ປຸຣໂຕ ນິສິນ຺ໂນ ວິຍ ອຕ຺ຕານໍ ທສ຺ເສຕ຺ວາ –

໑໔. ‘‘ຘາຕຸໂຍ ທຸກ຺ຂໂຕ ທິສ຺ວາ, ມາ ຊາຕິໍ ປຸນຣາຄມິ;

ຠເວ ຉນ຺ທໍ ວິຣາເຊຕ຺ວາ, ອຸປສນ຺ຕາ ຈຣິສ຺ສສີ’’ຕິ. –

ອິມໍ ຄາຖມາຫ. ສາ ຄາຖາປຣິໂຍສາເນ ອຣຫຕ຺ຕໍ ປາປຸຓິ.

ຕຕ຺ຖ ຘາຕຸໂຍ ທຸກ຺ຂໂຕ ທິສ຺ວາຕິ ສສນ຺ຕຕິປຣິຍາປນ຺ນາ ຈກ຺ຂາທິຘາຕຸໂຍ ອິຕຣາປິ ຈ ອຸທຍພ຺ພຍປຏິປີຬນາທິນາ ‘‘ທຸກ຺ຂາ’’ຕິ ຎາຓຈກ຺ຂຸນາ ທິສ຺ວາ. ມາ ຊາຕິໍ ປຸນຣາຄມີຕິ ປຸນ ຊາຕິໍ ອາຍຕິໍ ປຸນພ຺ຠວໍ ມາ ອຸປຄຈ຺ຉິ. ຠເວ ຉນ຺ທໍ ວິຣາເຊຕ຺ວາຕິ ກາມຠວາທິເກ ສພ຺ພສ຺ມິໍ ຠເວ ຕຓ຺ຫາຉນ຺ທໍ ວິຣາຄສງ຺ຂາເຕນ ມຄ຺ເຄນ ປຊຫິຕ຺ວາ. ອຸປສນ຺ຕາ ຈຣິສ຺ສສີຕິ ສພ຺ພໂສ ປຫີນກິເລສຕາຍ ນິພ຺ພຸຕາ ວິຫຣິສ຺ສສິ.

ເອຕ຺ຖ ຈ ‘‘ຘາຕຸໂຍ ທຸກ຺ຂໂຕ ທິສ຺ວາ’’ຕິ ອິມິນາ ທຸກ຺ຂານຸປສ຺ສນາມຸເຂນ ວິປສ຺ສນາ ທສ຺ສິຕາ. ‘‘ຠເວ ຉນ຺ທໍ ວິຣາເຊຕ຺ວາ’’ຕິ ອິມິນາ ມຄ຺ໂຄ, ‘‘ອຸປສນ຺ຕາ ຈຣິສ຺ສສີ’’ຕິ ອິມິນາ ສອຸປາທິເສສາ ນິພ຺ພານຘາຕຸ, ‘‘ມາ ຊາຕິໍ ປຸນຣາຄມີ’’ຕິ ອິມິນາ ອນຸປາທິເສສາ ນິພ຺ພານຘາຕຸ ທສ຺ສິຕາຕິ ທຏ຺ຐພ຺ພໍ.

ສຸມນາເຖຣີຄາຖາວຓ຺ຓນາ ນິຏ຺ຐິຕາ.