໑໕. ອຸຕ຺ຕຣາເຖຣີຄາຖາວຓ຺ຓນາ

ກາເຍນ ສໍວຸຕາ ອາສິນ຺ຕິ ອຸຕ຺ຕຣາຍ ເຖຣິຍາ ຄາຖາ. ຕສ຺ສາປິ ວຕ຺ຖຸ ຕິສ຺ສາເຖຣິຍາ ວຕ຺ຖຸສທິສໍ. ສາປິ ຫິ ສກ຺ຍກຸລປ຺ປສຸຕາ ໂພຘິສຕ຺ຕສ຺ສ ໂອໂຣຘຠູຕາ ມຫາປຊາປຕິໂຄຕມິຍາ ສທ຺ຘິໍ ນິກ຺ຂນ຺ຕາ ໂອຠາສຄາຖາຍ ອຣຫຕ຺ຕໍ ປຕ຺ວາ ປນ –

໑໕. ‘‘ກາເຍນ ສໍວຸຕາ ອາສິໍ, ວາຈາຍ ອຸທ ເຈຕສາ;

ສມູລໍ ຕຓ຺ຫມພ຺ພຸຍ຺ຫ, ສີຕິຠູຕາມ຺ຫິ ນິພ຺ພຸຕາ’’ຕິ. –

ອຸທານວເສນ ຕເມວ ຄາຖໍ ອຠາສິ.

ຕຕ຺ຖ ກາເຍນ ສໍວຸຕາ ອາສິນ຺ຕິ ກາຍິເກນ ສໍວເຣນ ສໍວຸຕາ ອໂຫສິໍ. ວາຈາຍາຕິ ວາຈສິເກນ ສໍວເຣນ ສໍວຸຕາ ອາສິນ຺ຕິ ໂຍຊນາ, ປທທ຺ວເຍນາປິ ສີລສໍວຣມາຫ. ອຸທາຕິ ອຖ. ເຈຕສາຕິ ສມາຘິຈິຕ຺ເຕນ, ເອເຕນ ວິປສ຺ສນາຠາວນມາຫ. ສມູລໍ ຕຓ຺ຫມພ຺ພຸຍ຺ຫາຕິ ສານຸສຍໍ, ສຫ ວາ ອວິຊ຺ຊາຍ ຕຓ຺ຫໍ ອຸທ຺ຘຣິຕ຺ວາ. ອວິຊ຺ຊາຍ ຫິ ປຏິຈ຺ຉາທິຕາທີນເວ ຠວຕ຺ຕເຍ ຕຓ຺ຫາ ອຸປ຺ປຊ຺ຊຕິ.

ອປໂຣ ນໂຍ – ກາເຍນ ສໍວຸຕາຕິ ສມ຺ມາກມ຺ມນ຺ເຕນ ສພ຺ພໂສ ມິຈ຺ຉາກມ຺ມນ຺ຕສ຺ສ ປຫານາ ມຄ຺ຄສໍວເຣເນວ ກາເຍນ ສໍວຸຕາ ອາສິໍ. ວາຈາຍາຕິ ສມ຺ມາວາຈາຍ ສພ຺ພໂສ ມິຈ຺ຉາວາຈາຍ ປຫານາ ມຄ຺ຄສໍວເຣເນວ ວາຈາຍ ສໍວຸຕາ ອາສິນ຺ຕິ ອຕ຺ໂຖ. ເຈຕສາຕິ ສມາຘິນາ. ເຈໂຕສີເສນ ເຫຕ຺ຖ ສມ຺ມາສມາຘິ ວຸຕ຺ໂຕ, ສມ຺ມາສມາຘິຄ຺ຄຫເຓເນວ ມຄ຺ຄລກ຺ຂເຓນ ເອກລກ຺ຂຓາ ສມ຺ມາທິຏ຺ຐິອາທໂຍ ມຄ຺ຄຘມ຺ມາ ຄຫິຕາວ ໂຫນ຺ຕີຕິ, ມຄ຺ຄສໍວເຣນ ອຠິຊ຺ຌາທິກສ຺ສ ອສໍວຣສ຺ສ ອນວເສສໂຕ ປຫານໍ ທສ຺ສິຕໍ ໂຫຕິ. ເຕເນວາຫ ‘‘ສມູລໍ ຕຓ຺ຫມພ຺ພຸຍ຺ຫາ’’ຕິ. ສີຕິຠູຕາມ຺ຫິ ນິພ຺ພຸຕາຕິ ສພ຺ພໂສ ກິເລສປຣິຬາຫາຠາເວນ ສີຕິຠາວປ຺ປຕ຺ຕາ ອນຸປາທິເສສາຍ ນິພ຺ພານຘາຕຸຍາ ນິພ຺ພຸຕາ ອມ຺ຫີຕິ.

ອຸຕ຺ຕຣາເຖຣີຄາຖາວຓ຺ຓນາ ນິຏ຺ຐິຕາ.