໕. ສຣຠງ຺ຄຕ຺ເຖຣຄາຖາວຓ຺ຓນາ

ສເຣ ຫຕ຺ເຖຫີຕິອາທິກາ ອາຍສ຺ມໂຕ ສຣຠງ຺ຄຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນິຕ຺ວາ ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ອຎ຺ຎຕຣສ຺ສ ພ຺ຣາຫ຺ມຓສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ, ອນຠິລກ຺ຂິໂຕຕິສ຺ສ ກຸລວໍສາຄຕໍ ນາມໍ ອໂຫສິ. ໂສ ວຍປ຺ປຕ຺ໂຕ ກາເມ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ສຣຕິຓານິ ສຍເມວ ຠຎ຺ຊິຕ຺ວາ ປຓ຺ຓສາລໍ ກຕ຺ວາ ວສຕິ. ຕໂຕ ປຏ຺ຐາຍ ສຣຠງ຺ໂຄຕິສ຺ສ ສມຎ຺ຎາ ອໂຫສິ. ອຖ ຠຄວາ ພຸທ຺ຘຈກ຺ຂຸນາ ໂລກໍ ໂວໂລເກນ຺ໂຕ ຕສ຺ສ ອຣຫຕ຺ຕູປນິສ຺ສຍໍ ທິສ຺ວາ, ຕຕ຺ຖ ຄນ຺ຕ຺ວາ, ຘມ຺ມໍ ເທເສສິ. ໂສ ປຏິລທ຺ຘສທ຺ໂຘ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ນຈິຣສ຺ເສວ ອຣຫຕ຺ຕໍ ປຕ຺ວາ ຕຕ຺ເຖວ ວສຕິ. ອຖສ຺ສ ຕາປສກາເລ ກຕາ ປຓ຺ຓສາລາ ຊິຓ຺ຓາ ປລຸຄ຺ຄາ ອໂຫສິ. ຕໍ ທິສ຺ວາ ມນຸສ຺ສາ ‘‘ກິສ຺ສ, ຠນ຺ເຕ, ອິມໍ ກຸຏິກໍ ນ ປຏິສງ຺ຂໂຣຖາ’’ຕິ ອາຫໍສຸ. ເຖໂຣ ‘‘ກຸຏິກາ ຍຖາ ຕາປສກາເລ ກຕາ, ອິທານິ ຕຖາ ກາຕຸໍ ນ ສກ຺ກາ’’ຕິ ຕໍ ສພ຺ພໍ ປກາເສນ຺ໂຕ –

໔໘໗. ‘‘ສເຣ ຫຕ຺ເຖຫິ ຠຎ຺ຊິຕ຺ວາ, ກຕ຺ວານ ກຸຏິມຈ຺ຉິສໍ;

ເຕນ ເມ ສຣຠງ຺ໂຄຕິ, ນາມໍ ສມ຺ມຸຕິຍາ ອຫຸ.

໔໘໘. ‘‘ນ ມຍ຺ຫໍ ກປ຺ປເຕ ອຊ຺ຊ, ສເຣ ຫຕ຺ເຖຫິ ຠຎ຺ຊິຕຸໍ;

ສິກ຺ຂາປທາ ໂນ ປຎ຺ຎຕ຺ຕາ, ໂຄຕເມນ ຍສສ຺ສິນາ’’ຕິ. – ທ຺ເວ ຄາຖາ ອຠາສິ;

ຕຕ຺ຖ ສເຣ ຫຕ຺ເຖຫິ ຠຎ຺ຊິຕ຺ວາຕິ, ປຸພ຺ເພ ຕາປສກາເລ ສຣຕິຓານິ ມມ ຫຕ຺ເຖຫິ ຉິນ຺ທິຕ຺ວາ ຕິຓກຸຏິໍ ກຕ຺ວາ ອຈ຺ຉິສໍ ວສິໍ, ນິສີທິຎ຺ເຈວ ນິປຊ຺ຊິຎ຺ຈ. ເຕນາຕິ ກຸຏິກຣຓຕ຺ຖໍ ສຣານໍ ຠຎ຺ຊເນນ. ສມ຺ມຸຕິຍາຕິ ອນ຺ວຕ຺ຖສມ຺ມຸຕິຍາ ສຣຠງ຺ໂຄຕິ, ນາມໍ ອຫຸ ອໂຫສິ.

ນ ມຍ຺ຫໍ ກປ຺ປເຕ ອຊ຺ຊາຕິ ອຊ຺ຊ ອິທານິ ອຸປສມ຺ປນ຺ນສ຺ສ ມຍ຺ຫໍ ສເຣ ສຣຕິເຓ ຫຕ຺ເຖຫິ ຠຎ຺ຊິຕຸໍ ນ ກປ຺ປເຕ ນ ວຏ຺ຏຕິ. ກສ຺ມາ? ສິກ຺ຂາປທາ ໂນ ປຎ຺ຎຕ຺ຕາ, ໂຄຕເມນ ຍສສ຺ສິນາຕິ. ເຕນ ຍໍ ອມ຺ຫາກໍ ສຕ຺ຖາຣາ ສິກ຺ຂາປທໍ ປຎ຺ຎຕ຺ຕໍ, ຕໍ ມຍໍ ຊີວິຕເຫຕຸນາປິ ນາຕິກ຺ກມາມາຕິ ທສ຺ເສຕິ.

ເອວໍ ເອເກນ ປກາເຣນ ຕິຓກຸຏິກາຍ ອປຏິສງ຺ຂຣເຓ ກາຣຓໍ ທສ຺ເສຕ຺ວາ ອິທານິ ອປເຣນປິ ປຣິຍາເຍນ ນໍ ທສ຺ເສນ຺ໂຕ –

໔໘໙. ‘‘ສກລໍ ສມຕ຺ຕໍ ໂຣຄໍ, ສຣຠງ຺ໂຄ ນາທ຺ທສໍ ປຸພ຺ເພ;

ໂສຍໍ ໂຣໂຄ ທິຏ຺ໂຐ, ວຈນກເຣນາຕິເທວສ຺ສາ’’ຕິ. – ອິມໍ ຄາຖມາຫ;

ຕຕ຺ຖ ສກລນ຺ຕິ ສພ຺ພໍ. ສມຕ຺ຕນ຺ຕິ ສມ຺ປຸຓ຺ຓໍ, ສພ຺ພຠາຄໂຕ ອນວເສສນ຺ຕິ ອຕ຺ໂຖ. ໂຣຄນ຺ຕິ ທຸກ຺ຂທຸກ຺ຂຕາທິວເສນ ຣຸຊນຏ຺ເຐນ ໂຣຄຠູຕໍ ອຸປາທານກ຺ຂນ຺ຘປຎ຺ຈກໍ ສນ຺ຘາຍ ວທຕິ. ນາທ຺ທສໍ ປຸພ຺ເພຕິ ສຕ຺ຖຸ ໂອວາທປຏິລາຠໂຕ ປຸພ຺ເພ ນ ອທ຺ທກ຺ຂິໍ. ໂສຍໍ ໂຣໂຄ ທິຏ຺ໂຐ, ວຈນກເຣນາຕິເທວສ຺ສາຕິ ສມ຺ມຸຕິເທວາ ອຸປປຕ຺ຕິເທວາ ວິສຸທ຺ຘິເທວາຕິ ສພ຺ເພປິ ເທເວ ອຕ຺ຕໂນ ສີລາທິຄຸເຓຫິ ອຕິກ຺ກມິຕ຺ວາ ຐິຕຕ຺ຕາ ອຕິເທວສ຺ສ ສມ຺ມາສມ຺ພຸທ຺ຘສ຺ສ ໂອວາທປຏິກເຣນ ສຣຠງ຺ເຄນ ໂສ ອຍໍ ຂນ຺ຘປຎ຺ຈກສງ຺ຂາໂຕ ໂຣໂຄ ວິປສ຺ສນາປຎ຺ຎາສຫິຕາຍ ມຄ຺ຄປຎ຺ຎາຍ ປຎ຺ຈກ຺ຂນ຺ຘໂຕ ທິຏ຺ໂຐ, ປຣິຎ຺ຎາໂຕຕິ ອຕ຺ໂຖ. ເອເຕນ ເອວໍ ອຕ຺ຕຠາວກຸຏິກາຍມ຺ປິ ອນເປກ຺ໂຂ ພາຫິຣໍ ຕິຓກຸຏິກໍ ກຖໍ ປຏິສງ຺ຂຣິສ຺ສຕີຕິ ທສ຺ເສຕິ.

ອິທານິ ຍໍ ມຄ຺ຄໍ ປຏິປຊ຺ຊນ຺ເຕນ ມຍາ ອຍໍ ອຕ຺ຕຠາວໂຣໂຄ ຍາຖາວໂຕ ທິຏ຺ໂຐ, ສ຺ວາຍໍ ມຄ຺ໂຄ ສພ຺ພພຸທ຺ຘສາຘາຣໂຓ. ເຍນ ເນສໍ ໂອວາທຘມ຺ໂມປິ ມຊ຺ເຌ ຠິນ຺ນສຸວຓ຺ຓສທິໂສ ຍຕ຺ຖາຫໍ ປຕິຏ຺ຐາຍ ທຸກ຺ຂກ຺ຂຍໍ ປຕ຺ໂຕຕິ ເອວໍ ອຕ຺ຕໂນ ອຣຫຕ຺ຕປຏິປຕ຺ຕິໍ ພ຺ຍາກໂຣນ຺ໂຕ –

໔໙໐. ‘‘ເຍເນວ ມຄ຺ເຄນ ຄໂຕ ວິປສ຺ສີ, ເຍເນວ ມຄ຺ເຄນ ສິຂີ ຈ ເວສ຺ສຠູ;

ກກຸສນ຺ຘໂກຓາຄມໂນ ຈ ກສ຺ສໂປ, ເຕນຎ຺ຊເສນ ອຄມາສິ ໂຄຕໂມ.

໔໙໑. ‘‘ວີຕຕຓ຺ຫາ ອນາທານາ, ສຕ຺ຕ ພຸທ຺ຘາ ຂໂຍຄຘາ;

ເຍຫາຍໍ ເທສິໂຕ ຘມ຺ໂມ, ຘມ຺ມຠູເຕຫິ ຕາທິຠິ.

໔໙໒. ‘‘ຈຕ຺ຕາຣິ ອຣິຍສຈ຺ຈານິ, ອນຸກມ຺ປາຍ ປາຓິນໍ;

ທຸກ຺ຂໍ ສມຸທໂຍ ມຄ຺ໂຄ, ນິໂຣໂຘ ທຸກ຺ຂສງ຺ຂໂຍ.

໔໙໓. ‘‘ຍສ຺ມິໍ ນິວຕ຺ຕເຕ ທຸກ຺ຂໍ, ສໍສາຣສ຺ມິໍ ອນນ຺ຕກໍ;

ເຠທາ ອິມສ຺ສ ກາຍສ຺ສ, ຊີວິຕສ຺ສ ຈ ສງ຺ຂຍາ;

ອຎ຺ໂຎ ປຸນພ຺ຠໂວ ນຕ຺ຖິ, ສຸວິມຸຕ຺ໂຕມ຺ຫິ ສພ຺ພຘີ’’ຕິ. –

ອິມາ ຄາຖາ ອຠາສິ –

ຕຕ຺ຖ ເຍເນວ ມຄ຺ເຄນາຕິ ເຍເນວ ສປຸພ຺ພຠາເຄນ ອຣິເຍນ ອຏ຺ຐງ຺ຄິເກນ ມຄ຺ເຄນ. ຄໂຕຕິ ປຏິປນ຺ໂນ ນິພ຺ພານໍ ອຘິຄໂຕ. ວິປສ຺ສີຕິ ວິປສ຺ສີ ສມ຺ມາສມ຺ພຸທ຺ໂຘ. ກກຸສນ຺ຘາຕິ ອວິຠຕ຺ຕິໂກ ນິທ຺ເທໂສ. ‘‘ກກຸສນ຺ຘໂກຓາຄມນາ’’ຕິປິ ປາໂຐ. ເຕນຎ຺ຊເສນາຕິ ເຕເນວ ອຎ຺ຊເສນ ອຣິຍມຄ຺ເຄນ.

ອນາທານາຕິ ອນຸປາທານາ ອປ຺ປຏິສນ຺ຘິກາ ວາ. ຂໂຍຄຘາຕິ ນິພ຺ພາໂນຄຘາ ນິພ຺ພານປຕິຏ຺ຐາ. ເຍຫາຍໍ ເທສິໂຕ ຘມ຺ໂມຕິ ເຍຫິ ສຕ຺ຕຫິ ສມ຺ມາສມ຺ພຸທ຺ເຘຫິ ອຍໍ ສາສນຘມ຺ໂມ ເທສິໂຕ ປເວທິໂຕ. ຘມ຺ມຠູເຕຫີຕິ ຘມ຺ມກາຍຕາຍ ຘມ຺ມສຠາເວຫິ, ນວໂລກຸຕ຺ຕຣຘມ຺ມໂຕ ວາ ຠູເຕຫິ ຊາເຕຫິ, ຘມ຺ມໍ ວາ ປຕ຺ເຕຫິ. ຕາທິຠີຕິ, ອິຏ຺ຐາທີສຸ ຕາທິຠາວປ຺ປຕ຺ເຕຫິ.

‘‘ຈຕ຺ຕາຣິ ອຣິຍສຈ຺ຈານີ’’ຕິອາທິນາ ເຕຫິ ເທສິຕໍ ຘມ຺ມໍ ທສ຺ເສຕິ. ຕຕ຺ຖ ຈຕ຺ຕາຣີຕິ ຄຓນປຣິຈ຺ເຉໂທ. ອຣິຍສຈ຺ຈານີຕິ ປຣິຈ຺ຉິນ຺ນຘມ຺ມທສ຺ສນໍ. ວຈນຕ຺ຖໂຕ ປນ ອຣິຍານິ ຈ ອວິຕຖຏ຺ເຐນ ສຈ຺ຈານິ ຈາຕິ ອຣິຍສຈ຺ຈານິ, ອຣິຍສ຺ສ ວາ ຠຄວໂຕ ສຈ຺ຈານິ ເຕນ ເທສິຕຕ຺ຕາ, ອຣິຍຠາວກຣານິ ວາ ສຈ຺ຈານີຕິ ອຣິຍສຈ຺ຈານິ. ກຸຈ຺ຉິຕຠາວໂຕ ຕຸຈ຺ຉຠາວໂຕ ຈ ທຸກ຺ຂໍ, ອຸປາທານກ຺ຂນ຺ຘປຎ຺ຈກໍ. ຕໍ ທຸກ຺ຂໍ ສມຸເທຕິ ເອຕສ຺ມາຕິ ສມຸທໂຍ, ຕຓ຺ຫາ. ກິເລເສ ມາເຣນ຺ໂຕ ຄຈ຺ຉຕິ, ນິພ຺ພານຕ຺ຖິເກຫິ ມຄ຺ຄີຍຕີຕິ ວາ ມຄ຺ໂຄ, ສມ຺ມາທິຏ຺ຐິອາທໂຍ ອຏ຺ຐ ຘມ຺ມາ. ສໍສາຣຈາຣກສງ຺ຂາໂຕ ນຕ຺ຖິ ເອຕ຺ຖ ໂຣໂຘ, ເອຕສ຺ມິໍ ວາ ອຘິຄເຕ ປຸຄ຺ຄລສ຺ສ ໂຣຘາຠາໂວ ໂຫຕິ, ນິຣຸຊ຺ຌຕິ ທຸກ຺ຂເມຕ຺ຖາຕິ ວາ ນິໂຣໂຘ, ນິພ຺ພານໍ. ເຕນາຫ ‘‘ທຸກ຺ຂສງ຺ຂໂຍ’’ຕິ. ອຍເມຕ຺ຖ ສງ຺ເຂໂປ, ວິຕ຺ຖາໂຣ ປນ ວິສຸທ຺ຘິມຄ຺ເຄ ວຸຕ຺ຕນເຍເນວ ເວທິຕພ຺ໂພ.

ຍສ຺ມິນ຺ຕິ ຍສ຺ມິໍ ນິໂຣເຘ ນິພ຺ພາເນ ອຘິຄເຕ. ນິວຕ຺ຕເຕຕິ ອຣິຍມຄ຺ຄຠາວນາຍ ສຕິ ອນນ຺ຕກໍ ອປຣິຍນ຺ຕໍ ອິມສ຺ມິໍ ສໍສາເຣ ຊາຕິອາທິທຸກ຺ຂໍ ນ ປວຕ຺ຕຕິ ອຸຈ຺ຉິຊ຺ຊຕິ, ໂສ ນິໂຣໂຘຕິ ອຍໍ ຘມ຺ມຠູເຕຫິ ສມ຺ມາສມ຺ພຸທ຺ເຘຫິ ເທສິໂຕ ຘມ຺ໂມຕິ ໂຍຊນາ. ‘‘ເຠທາ’’ຕິອາທິນາ ‘‘ໂຣໂຄ ທິຏ຺ໂຐ’’ຕິ ທຸກ຺ຂປຣິຎ຺ຎາຍ ສູຈິຕໍ ອຕ຺ຕໂນ ອຣຫຕ຺ຕປ຺ປຕ຺ຕິໍ ສຣູປໂຕ ທສ຺ເສຕິ. ‘‘ຍສ຺ມິໍ ນິພ຺ພຕ຺ຕເຕ ທຸກ຺ຂ’’ນ຺ຕິ ປນ ປາເຐ ສກລຄາຖາຍ ຕຕ຺ຖາຍໍ ໂຍຊນາ – ຍສ຺ມິໍ ຂນ຺ຘາທິປຏິປາຏິສຎ຺ຎິເຕ ສໍສາເຣ ອິທໍ ອນນ຺ຕກໍ ຊາຕິອາທິທຸກ຺ຂໍ ນິພ຺ພຕ຺ຕໍ, ໂສ ອິໂຕ ທຸກ຺ຂປ຺ປຕ຺ຕິໂຕ ອຎ຺ໂຎ ປຸນປ຺ປຸນໍ ຠວນຠາວໂຕ ປຸນພ຺ຠໂວ. ອິມສ຺ສ ຊີວິຕິນ຺ທ຺ຣິຍສ຺ສ ສງ຺ຂຍາ ກາຍສງ຺ຂາຕສ຺ສ ຂນ຺ຘປຎ຺ຈກສ຺ສ ເຠທາ ວິນາສາ ອຸທ຺ຘໍ ນຕ຺ຖິ, ຕສ຺ມາ ສພ຺ພຘິ ສພ຺ເພຫິ ກິເລເສຫິ ສພ຺ເພຫິ ຠເວຫິ ສຸຏ຺ຐຸ ວິມຸຕ຺ໂຕ ວິສໍຍຸຕ຺ໂຕ ອມ຺ຫີຕິ.

ສຣຠງ຺ຄຕ຺ເຖຣຄາຖາວຓ຺ຓນາ ນິຏ຺ຐິຕາ.

ສຕ຺ຕກນິປາຕວຓ຺ຓນາ ນິຏ຺ຐິຕາ.