໑. ມຫາໂມຄ຺ຄລ຺ລານຕ຺ເຖຣຄາຖາວຓ຺ຓນາ

ສຏ຺ຐິນິປາເຕ ອາຣຎ຺ຎິກາຕິອາທິກາ ອາຍສ຺ມໂຕ ມຫາໂມຄ຺ຄລ຺ລານຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ຕສ຺ສ ວຕ຺ຖຸ ຘມ຺ມເສນາປຕິວຕ຺ຖຸມ຺ຫິ ວຸຕ຺ຕເມວ. ເຖໂຣ ຫິ ປພ຺ພຊິຕທິວສໂຕ ສຕ຺ຕເມ ທິວເສ ມຄຘຣຏ຺ເຐ ກລ຺ລວາລຄາມກໍ ອຸປນິສ຺ສາຍ ສມຓຘມ຺ມໍ ກໂຣນ຺ໂຕ ຖິນມິທ຺ເຘ ໂອກ຺ກນ຺ເຕ ສຕ຺ຖາຣາ – ‘‘ໂມຄ຺ຄລ຺ລານ, ໂມຄ຺ຄລ຺ລານ, ມາ, ພ຺ຣາຫ຺ມຓ, ອຣິຍໍ ຕຸຓ຺ຫີຠາວໍ ປມາໂທ’’ຕິອາທິນາ (ສໍ. ນິ. ໒.໒໓໕) ສໍເວຊິໂຕ ຖິນມິທ຺ຘໍ ວິໂນເທຕ຺ວາ ຠຄວຕາ ວຸຈ຺ຈມານໍ ຘາຕຸກມ຺ມຏ຺ຐານໍ ສຸຓນ຺ໂຕ ເອວ ວິປສ຺ສນໍ ວຑ຺ເຒຕ຺ວາ ປຏິປາຏິຍາ ອຸປຣິມຄ຺ຄຕ຺ຕຍໍ ອຸປຄນ຺ຕ຺ວາ ອຄ຺ຄຜລກ຺ຂເຓ ສາວກປາຣມີຎາຓສ຺ສ ມຕ຺ຖກໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑.໓໗໕-໓໙໗) –

‘‘ອໂນມທສ຺ສີ ຠຄວາ, ໂລກເຊຏ຺ໂຐ ນຣາສໂຠ;

ວິຫາສິ ຫິມວນ຺ຕມ຺ຫິ, ເທວສງ຺ຆປຸຣກ຺ຂໂຕ.

‘‘ວຣຸໂຓ ນາມ ນາເມນ, ນາຄຣາຊາ ອຫໍ ຕທາ;

ກາມຣູປີ ວິກຸພ຺ພາມິ, ມໂຫທຘິນິວາສຫໍ.

‘‘ສງ຺ຄຓິຍໍ ຄຓໍ ຫິຕ຺ວາ, ຕູຣິຍໍ ປຏ຺ຐເປສຫໍ;

ສມ຺ພຸທ຺ຘໍ ປຣິວາເຣຕ຺ວາ, ວາເທສຸໍ ອຈ຺ຉຣາ ຕທາ.

‘‘ວຊ຺ຊມາເນສຸ ຕູເຣສຸ, ເທວາ ຕູຣານິ ວຊ຺ຊຍຸໍ;

ອຸຠິນ຺ນໍ ສທ຺ທໍ ສຸຕ຺ວານ, ພຸທ຺ໂຘປິ ສມ຺ປພຸຊ຺ຌຖ.

‘‘ນິມນ຺ເຕຕ຺ວານ ສມ຺ພຸທ຺ຘໍ, ສກໍ ຠວນຸປາຄມິໍ;

ອາສນໍ ປຎ຺ຎເປຕ຺ວານ, ກາລມາໂຣຈຍິໍ ອຫໍ.

‘‘ຂີຓາສວສຫສ຺ເສຫິ, ປຣິວຸໂຕ ໂລກນາຍໂກ;

ໂອຠາເສນ຺ໂຕ ທິສາ ສພ຺ພາ, ຠວນໍ ເມ ອຸປາຄມິ.

‘‘ອຸປວິຏ຺ຐໍ ມຫາວີຣໍ, ເທວເທວໍ ນຣາສຠໍ;

ສຠິກ຺ຂຸສງ຺ຆໍ ຕປ຺ເປສິໍ, ອນ຺ນປາເນນຫໍ ຕທາ.

‘‘ອນຸໂມທິ ມຫາວີໂຣ, ສຍມ຺ຠູ ອຄ຺ຄປຸຄ຺ຄໂລ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

‘‘ໂຍ ໂສ ສງ຺ຆໍ ອປູເຊສິ, ພຸທ຺ຘຎ຺ຈ ໂລກນາຍກໍ;

ເຕນ ຈິຕ຺ຕປ຺ປສາເທນ, ເທວໂລກໍ ຄມິສ຺ສຕິ.

‘‘ສຕ຺ຕສຕ຺ຕຕິກ຺ຂຕ຺ຕຸຎ຺ຈ, ເທວຣຊ຺ຊໍ ກຣິສ຺ສຕິ;

ປຖພ຺ຍາ ຣຊ຺ຊໍ ອຏ຺ຐສຕໍ, ວສຸຘໍ ອາວສິສ຺ສຕິ.

‘‘ປຎ຺ຈປຎ຺ຎາສກ຺ຂຕ຺ຕຸຎ຺ຈ, ຈກ຺ກວຕ຺ຕີ ຠວິສ຺ສຕິ;

ໂຠຄາ ອສງ຺ຂິຍາ ຕສ຺ສ, ອຸປ຺ປຊ຺ຊິສ຺ສນ຺ຕິ ຕາວເທ.

‘‘ອປຣິເມຍ຺ເຍ ອິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

‘‘ນິຣຍາ ໂສ ຈວິຕ຺ວານ, ມນຸສ຺ສຕ຺ຕໍ ຄມິສ຺ສຕິ;

ໂກລິໂຕ ນາມ ນາເມນ, ພ຺ຣຫ຺ມພນ຺ຘຸ ຠວິສ຺ສຕິ.

‘‘ໂສ ປຈ຺ຉາ ປພ຺ພຊິຕ຺ວານ, ກຸສລມູເລນ ໂຈທິໂຕ;

ໂຄຕມສ຺ສ ຠຄວໂຕ, ທຸຕິໂຍ ເຫສ຺ສຕິ ສາວໂກ.

‘‘ອາຣທ຺ຘວີຣິໂຍ ປຫິຕຕ຺ໂຕ, ອິທ຺ຘິຍາ ປາຣມິໍ ຄໂຕ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ.

‘‘ປາປມິຕ຺ໂຕປນິສ຺ສາຍ, ກາມຣາຄວສໍ ຄໂຕ;

ມາຕຣໍ ປິຕຣຎ຺ຈາປິ, ຆາຕຍິໍ ທຸຏ຺ຐມານໂສ.

‘‘ຍໍ ຍໍ ໂຍນຸປປຊ຺ຊາມິ, ນິຣຍໍ ອຖ ມານຸສໍ;

ປາປກມ຺ມສມງ຺ຄິຕາ, ຠິນ຺ນສີໂສ ມຣາມຫໍ.

‘‘ອິທໍ ປຈ຺ຉິມກໍ ມຍ຺ຫໍ, ຈຣິໂມ ວຕ຺ຕເຕ ຠໂວ;

ອິຘາປິ ເອທິໂສ ມຍ຺ຫໍ, ມຣຓກາເລ ຠວິສ຺ສຕິ.

‘‘ປວິເວກມນຸຍຸຕ຺ໂຕ, ສມາຘິຠາວນາຣໂຕ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

‘‘ຘຣຓິມ຺ປິ ສຸຄມ຺ຠີຣໍ, ພຫລໍ ທຸປ຺ປຘໍສິຍໍ;

ວາມງ຺ຄຸຏ຺ເຐນ ໂຂເຠຍ຺ຍໍ, ອິທ຺ຘິຍາ ປາຣມິໍ ຄໂຕ.

‘‘ອສ຺ມິມານໍ ນ ປສ຺ສາມິ, ມາໂນ ມຍ຺ຫໍ ນ ວິຊ຺ຊຕິ;

ສາມເຓເຣ ອຸປາທາຍ, ຄຣຸຈິຕ຺ຕໍ ກໂຣມຫໍ.

‘‘ອປຣິເມຍ຺ເຍ ອິໂຕ ກປ຺ເປ, ຍໍ ກມ຺ມມຠິນີຫຣິໍ;

ຕາຫໍ ຠູມິມນຸປ຺ປຕ຺ໂຕ, ປຕ຺ໂຕມ຺ຫິ ອາສວກ຺ຂຍໍ.

‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຖ ນໍ ສຕ຺ຖາ ອປຣຠາເຄ ເຊຕວນມຫາວິຫາເຣ ອຣິຍຄຓມຊ຺ເຌ ນິສິນ຺ໂນ ເຕນ ເຕນ ຄຸເຓນ ອຕ຺ຕໂນ ສາວເກ ເອຕທຄ຺ເຄ ຐເປນ຺ໂຕ ‘‘ເອຕທຄ຺ຄໍ, ຠິກ຺ຂເວ, ມມ ສາວການໍ ຠິກ຺ຂູນໍ ອິທ຺ຘິມນ຺ຕານໍ ຍທິທໍ ມຫາໂມຄ຺ຄລ຺ລາໂນ’’ຕິ (ອ. ນິ. ໑.໑໘໘, ໑໙໐) ອິທ຺ຘິມນ຺ຕຕາຍ ເອຕທຄ຺ເຄ ຐເປສິ. ເຕນ ເອວໍ ສຕ຺ຖາຣາ ເອຕທຄ຺ເຄ ຐປິເຕນ ສາວກປາຣມິຍາ ມຕ຺ຖກໍ ປຕ຺ເຕນ ມຫາເຖເຣນ ຕໍ ຕໍ ນິມິຕ຺ຕໍ ອາຄມ຺ມ ຕຕ຺ຖ ຕຕ຺ຖ ຠາສິຕາ ຄາຖາ, ຕາ ສງ຺ຄີຕິກາເລ ຘມ຺ມສງ຺ຄາຫເກຫິ –

໑໑໔໙. ‘‘ອາຣຎ຺ຎິກາ ປິຓ຺ຑປາຕິກາ, ອຸຎ຺ຉາປຕ຺ຕາຄເຕ ຣຕາ;

ທາເລມຸ ມຈ຺ຈຸໂນ ເສນໍ, ອຊ຺ຌຕ຺ຕໍ ສຸສມາຫິຕາ.

໑໑໕໐. ‘‘ອາຣຎ຺ຎິກາ ປິຓ຺ຑປາຕິກາ, ອຸຎ຺ຉາປຕ຺ຕາຄເຕ ຣຕາ;

ຘຸນາມ ມຈ຺ຈຸໂນ ເສນໍ, ນຬາຄາຣໍວ ກຸຎ຺ຊໂຣ.

໑໑໕໑. ‘‘ຣຸກ຺ຂມູລິກາ ສາຕຕິກາ, ອຸຎ຺ຉາປຕ຺ຕາຄເຕ ຣຕາ;

ທາເລມຸ ມຈ຺ຈຸໂນ ເສນໍ, ອຊ຺ຌຕ຺ຕໍ ສຸສມາຫິຕາ.

໑໑໕໒. ‘‘ຣຸກ຺ຂມູລິກາ ສາຕຕິກາ, ອຸຎ຺ຉາປຕ຺ຕາຄເຕ ຣຕາ;

ຘຸນາມ ມຈ຺ຈຸໂນ ເສນໍ, ນຬາຄາຣໍວ ກຸຎ຺ຊໂຣ.

໑໑໕໓. ‘‘ອຏ຺ຐິກງ຺ກລກຸຏິເກ, ມໍສນ຺ຫາຣຸປສິພ຺ພິເຕ;

ຘິຣຕ຺ຖຸ ປຸເຣ ທຸຄ຺ຄນ຺ເຘ, ປຣຄຕ຺ເຕ ມມາຍເສ.

໑໑໕໔. .

‘‘ຕວ ສຣີຣໍ ນວໂສຕໍ, ທຸຄ຺ຄນ຺ຘກຣໍ ປຣິພນ຺ຘໍ;

ຠິກ຺ຂຸ ປຣິວຊ຺ຊຍເຕ ຕໍ, ມີຬ຺ຫຎ຺ຈ ຍຖາ ສຸຈິກາໂມ.

໑໑໕໖. ‘‘ເອວຎ຺ເຈ ຕໍ ຊໂນ ຊຎ຺ຎາ, ຍຖາ ຊານາມິ ຕໍ ອຫໍ;

ອາຣກາ ປຣິວຊ຺ເຊຍ຺ຍ, ຄູຖຏ຺ຐານໍວ ປາວຸເສ.

໑໑໕໗. ‘‘ເອວເມຕໍ ມຫາວີຣ, ຍຖາ ສມຓ ຠາສສິ;

ເອຕ຺ຖ ເຈເກ ວິສີທນ຺ຕິ, ປງ຺ກມ຺ຫິວ ຊຣຄ຺ຄໂວ.

໑໑໕໘. ‘‘ອາກາສມ຺ຫິ ຫລິທ຺ທິຍາ, ໂຍ ມຎ຺ເຎຖ ຣເຊຕເວ;

ອຎ຺ເຎນ ວາປິ ຣງ຺ເຄນ, ວິຆາຕຸທຍເມວ ຕໍ.

໑໑໕໙. ‘‘ຕທາກາສສມໍ ຈິຕ຺ຕໍ, ອຊ຺ຌຕ຺ຕໍ ສຸສມາຫິຕໍ;

ມາ ປາປຈິຕ຺ເຕ ອາສາທິ, ອຄ຺ຄິຂນ຺ຘໍວ ປກ຺ຂິມາ.

໑໑໖໐. ‘‘ປສ຺ສ ຈິຕ຺ຕກຕໍ ພິມ຺ພໍ, ອຣຸກາຍໍ ສມຸສ຺ສິຕໍ;

ອາຕຸຣໍ ພຫຸສງ຺ກປ຺ປໍ, ຍສ຺ສ ນຕ຺ຖິ ຘຸວໍ ຐິຕິ.

໑໑໖໑. ‘‘ປສ຺ສ ຈິຕ຺ຕກຕໍ ຣູປໍ, ມຓິນາ ກຸຓ຺ຑເລນ ຈ;

ອຏ຺ຐິໍ ຕເຈນ ໂອນທ຺ຘໍ, ສຫ ວຕ຺ເຖຫິ ໂສຠຕິ.

໑໑໖໒. ‘‘ອລຕ຺ຕກກຕາ ປາທາ, ມຸຂໍ ຈຸຓ຺ຓກມກ຺ຂິຕໍ;

ອລໍ ພາລສ຺ສ ໂມຫາຍ, ໂນ ຈ ປາຣຄເວສິໂນ.

໑໑໖໓. ‘‘ອຏ຺ຐາປທກຕາ ເກສາ, ເນຕ຺ຕາ ອຎ຺ຊນມກ຺ຂິຕາ;

ອລໍ ພາລສ຺ສ ໂມຫາຍ, ໂນ ຈ ປາຣຄເວສິໂນ.

໑໑໖໔. ‘‘ອຎ຺ຊນີວ ນວາ ຈິຕ຺ຕາ, ປູຕິກາໂຍ ອລງ຺ກໂຕ;

ອລໍ ພາລສ຺ສ ໂມຫາຍ, ໂນ ຈ ປາຣຄເວສິໂນ.

໑໑໖໕. ‘‘ໂອທຫິ ມິຄໂວ ປາສໍ, ນາສທາ ວາຄຸຣໍ ມິໂຄ;

ຠຸຕ຺ວາ ນິວາປໍ ຄຈ຺ຉາມ, ກທ຺ທນ຺ເຕ ມິຄພນ຺ຘເກ.

໑໑໖໖. ‘‘ຉິນ຺ໂນ ປາໂສ ມິຄວສ຺ສ, ນາສທາ ວາຄຸຣໍ ມິໂຄ;

ຠຸຕ຺ວາ ນິວາປໍ ຄຈ຺ຉາມ, ໂສຈນ຺ເຕ ມິຄລຸທ຺ທເກ.

໑໑໖໗. ‘‘ຕທາສິ ຍໍ ຠິໍສນກໍ, ຕທາສິ ໂລມຫໍສນໍ;

ອເນກາກາຣສມ຺ປນ຺ເນ, ສາຣິປຸຕ຺ຕມ຺ຫິ ນິພ຺ພຸເຕ.

໑໑໖໘. ‘‘ອນິຈ຺ຈາ ວຕ ສງ຺ຂາຣາ, ອຸປ຺ປາທວຍຘມ຺ມິໂນ;

ອຸປ຺ປຊ຺ຊິຕ຺ວາ ນິຣຸຊ຺ຌນ຺ຕິ, ເຕສໍ ວູປສໂມ ສຸໂຂ.

໑໑໖໙. ‘‘ສຸຂຸມໍ ເຕ ປຏິວິຊ຺ຌນ຺ຕິ, ວາລຄ຺ຄໍ ອຸສຸນາ ຍຖາ;

ເຍ ປຎ຺ຈກ຺ຂນ຺ເຘ ປສ຺ສນ຺ຕິ, ປຣໂຕ ໂນ ຈ ອຕ຺ຕໂຕ.

໑໑໗໐. ‘‘ເຍ ຈ ປສ຺ສນ຺ຕິ ສງ຺ຂາເຣ, ປຣໂຕ ໂນ ຈ ອຕ຺ຕໂຕ;

ປຈ຺ຈພ຺ຍາຘິໍສຸ ນິປຸຓໍ, ວາລຄ຺ຄໍ ອຸສຸນາ ຍຖາ.

໑໑໗໑. ‘‘ສຕ຺ຕິຍາ ວິຍ ໂອມຏ຺ໂຐ, ຑຍ຺ຫມາໂນວ ມຕ຺ຖເກ;

ກາມຣາຄປ຺ປຫານາຍ, ສໂຕ ຠິກ຺ຂຸ ປຣິພ຺ພເຊ.

໑໑໗໒. ‘‘ສຕ຺ຕິຍາ ວິຍ ໂອມຏ຺ໂຐ, ຑຍ຺ຫມາໂນວ ມຕ຺ຖເກ;

ຠວຣາຄປ຺ປຫານາຍ, ສໂຕ ຠິກ຺ຂຸ ປຣິພ຺ພເຊ.

໑໑໗໓. ‘‘ໂຈທິໂຕ ຠາວິຕຕ຺ເຕນ, ສຣີຣນ຺ຕິມຘາຣິນາ;

ມິຄາຣມາຕຸປາສາທໍ, ປາທງ຺ຄຸຏ຺ເຐນ ກມ຺ປຍິໍ.

໑໑໗໔. ‘‘ນຍິທໍ ສິຖິລມາຣພ຺ຠ, ນຍິທໍ ອປ຺ເປນ ຖາມສາ;

ນິພ຺ພານມຘິຄນ຺ຕພ຺ພໍ, ສພ຺ພຄນ຺ຖປໂມຈນໍ.

໑໑໗໕. ‘‘ອຍຎ຺ຈ ທຫໂຣ ຠິກ຺ຂຸ, ອຍມຸຕ຺ຕມໂປຣິໂສ;

ຘາເຣຕິ ອນ຺ຕິມໍ ເທຫໍ, ເຊຕ຺ວາ ມາຣໍ ສວາຫນໍ.

໑໑໗໖. ‘‘ວິວຣມນຸປຠນ຺ຕິ ວິຊ຺ຊຸຕາ, ເວຠາຣສ຺ສ ຈ ປຓ຺ຑວສ຺ສ ຈ;

ນຄວິວຣຄໂຕ ຌາຍຕິ, ປຸຕ຺ໂຕ ອປ຺ປຏິມສ຺ສ ຕາທິໂນ.

໑໑໗໗. ‘‘ອຸປສນ຺ໂຕ ອຸປຣໂຕ, ປນ຺ຕເສນາສໂນ ມຸນິ;

ທາຍາໂທ ພຸທ຺ຘເສຏ຺ຐສ຺ສ, ພ຺ຣຫ຺ມຸນາ ອຠິວນ຺ທິໂຕ.

໑໑໗໘. ‘‘ອຸປສນ຺ຕໍ ອຸປຣຕໍ, ປນ຺ຕເສນາສນໍ ມຸນິໍ;

ທາຍາທໍ ພຸທ຺ຘເສຏ຺ຐສ຺ສ, ວນ຺ທ ພ຺ຣາຫ຺ມຓ ກສ຺ສປໍ.

໑໑໗໙. ‘‘ໂຍ ຈ ຊາຕິສຕໍ ຄຈ຺ເຉ, ສພ຺ພາ ພ຺ຣາຫ຺ມຓຊາຕິໂຍ;

ໂສຕ຺ຕິໂຍ ເວທສມ຺ປນ຺ໂນ, ມນຸສ຺ເສສຸ ປຸນປ຺ປຸນໍ.

໑໑໘໐. ‘‘ອຊ຺ຌາຍໂກປິ ເຈ ອສ຺ສ, ຕິຓ຺ຓໍ ເວທານ ປາຣຄູ;

ເອຕສ຺ສ ວນ຺ທນາເຍຕໍ, ກລໍ ນາຄ຺ຆຕິ ໂສຬສິໍ.

໑໑໘໑. ‘‘ໂຍ ໂສ ອຏ຺ຐ ວິໂມກ຺ຂານິ, ປຸເຣຠຕ຺ຕໍ ອຜສ຺ສຍິ;

ອນຸໂລມໍ ປຏິໂລມໍ, ຕໂຕ ປິຓ຺ຑາຍ ຄຈ຺ຉຕິ.

໑໑໘໒. ‘‘ຕາທິສໍ ຠິກ຺ຂຸໍ ມາສາທິ, ມາຕ຺ຕານໍ ຂຓິ ພ຺ຣາຫ຺ມຓ;

ອຠິປ຺ປສາເທຫິ ມນໍ, ອຣຫນ຺ຕມ຺ຫິ ຕາທິເນ;

ຂິປ຺ປໍ ປຎ຺ຊລິໂກ ວນ຺ທ, ມາ ເຕ ວິຊຏິ ມຕ຺ຖກໍ.

໑໑໘໓. ‘‘ເນໂສ ປສ຺ສຕິ ສທ຺ຘມ຺ມໍ, ສໍສາເຣນ ປຸຣກ຺ຂໂຕ;

ອໂຘຄມໍ ຊິມ຺ຫປຖໍ, ກຸມ຺ມຄ຺ຄມນຸຘາວຕິ.

໑໑໘໔. ‘‘ກິມີວ ມີຬ຺ຫສລ຺ລິຕ຺ໂຕ, ສງ຺ຂາເຣ ອຘິມຸຈ຺ຉິໂຕ;

ປຄາຬ຺ໂຫ ລາຠສກ຺ກາເຣ, ຕຸຈ຺ໂຉ ຄຈ຺ຉຕິ ໂປຏ຺ຐິໂລ.

໑໑໘໕. ‘‘ອິມຎ຺ຈ ປສ຺ສ ອາຍນ຺ຕໍ, ສາຣິປຸຕ຺ຕໍ ສຸທສ຺ສນໍ;

ວິມຸຕ຺ຕໍ ອຸຠໂຕຠາເຄ, ອຊ຺ຌຕ຺ຕໍ ສຸສມາຫິຕໍ.

໑໑໘໖. ‘‘ວິສລ຺ລໍ ຂີຓສໍໂຍຄໍ, ເຕວິຊ຺ຊໍ ມຈ຺ຈຸຫາຍິນໍ;

ທກ຺ຂິເຓຍ຺ຍໍ ມນຸສ຺ສານໍ, ປຸຎ຺ຎກ຺ເຂຕ຺ຕໍ ອນຸຕ຺ຕຣໍ.

໑໑໘໗. ‘‘ເອເຕ ສມ຺ພຫຸລາ ເທວາ, ອິທ຺ຘິມນ຺ໂຕ ຍສສ຺ສິໂນ.

ທສ ເທວສຫສ຺ສານິ, ສພ຺ເພ ພ຺ຣຫ຺ມປຸໂຣຫິຕາ;

ໂມຄ຺ຄລ຺ລານໍ ນມສ຺ສນ຺ຕາ, ຕິຏ຺ຐນ຺ຕິ ປຎ຺ຊລີກຕາ.

໑໑໘໘. ‘‘ນໂມ ເຕ ປຸຣິສາຊຎ຺ຎ, ນໂມ ເຕ ປຸຣິສຸຕ຺ຕມ;

ຍສ຺ສ ເຕ ອາສວາ ຂີຓາ, ທກ຺ຂິເຓຍ຺ໂຍສິ ມາຣິສ.

໑໑໘໙. ‘‘ປູຊິໂຕ ນຣເທເວນ, ອຸປ຺ປນ຺ໂນ ມຣຓາຠິຠູ;

ປຸຓ຺ຑຣີກໍວ ໂຕເຍນ, ສງ຺ຂາເຣນຸປລິມ຺ປຕິ.

໑໑໙໐. ‘‘ຍສ຺ສ ມຸຫຸຕ຺ເຕນ ສຫສ຺ສຘາ ໂລໂກ, ສໍວິທິໂຕ ສພ຺ຣຫ຺ມກປ຺ໂປ ວສິ;

ອິທ຺ຘິຄຸເຓ ຈຸຕຸປປາເຕ ກາເລ, ປສ຺ສຕິ ເທວຕາ ສ ຠິກ຺ຂຸ.

໑໑໙໑. ‘‘ສາຣິປຸຕ຺ໂຕວ ປຎ຺ຎາຍ, ສີເລນ ອຸປສເມນ ຈ;

ໂຍປິ ປາຣງ຺ຄໂຕ ຠິກ຺ຂຸ, ເອຕາວປຣໂມ ສິຍາ.

໑໑໙໒. ‘‘ໂກຏິສຕສຫສ຺ສສ຺ສ, ອຕ຺ຕຠາວໍ ຂເຓນ ນິມ຺ມິເນ;

ອຫໍ ວິກຸພ຺ພນາສຸ ກຸສໂລ, ວສີຠູໂຕມ຺ຫິ ອິທ຺ຘິຍາ.

໑໑໙໓. ‘‘ສມາຘິວິຊ຺ຊາວສິປາຣມີຄໂຕ, ໂມຄ຺ຄລ຺ລານໂຄຕ຺ໂຕ ອສິຕສ຺ສ ສາສເນ;

ຘີໂຣ ສມຸຈ຺ຉິນ຺ທິ ສມາຫິຕິນ຺ທ຺ຣິໂຍ, ນາໂຄ ຍຖາ ປູຕິລຕໍວ ພນ຺ຘນໍ.

໑໑໙໔. ‘‘ປຣິຈິຓ຺ໂຓ ມຍາ ສຕ຺ຖາ, ກຕໍ ພຸທ຺ຘສ຺ສ ສາສນໍ;

ໂອຫິໂຕ ຄຣຸໂກ ຠາໂຣ, ຠວເນຕ຺ຕິ ສມູຫຕາ.

໑໑໙໕. ‘‘ຍສ຺ສ ຈຕ຺ຖາຍ ປພ຺ພຊິໂຕ, ອຄາຣສ຺ມານຄາຣິຍໍ;

ໂສ ເມ ອຕ຺ໂຖ ອນຸປ຺ປຕ຺ໂຕ, ສພ຺ພສໍໂຍຊນກ຺ຂໂຍ.

໑໑໙໖. ‘‘ກີທິໂສ ນິຣໂຍ ອາສິ, ຍຕ຺ຖ ທຸສ຺ສີ ອປຈ຺ຈຖ;

ວິຘຸຣໍ ສາວກມາສຊ຺ຊ, ກກຸສນ຺ຘຎ຺ຈ ພ຺ຣາຫ຺ມຓໍ.

໑໑໙໗. ‘‘ສຕໍ ອາສິ ອໂຍສງ຺ກູ, ສພ຺ເພ ປຈ຺ຈຕ຺ຕເວທນາ;

ອີທິໂສ ນິຣໂຍ ອາສິ, ຍຕ຺ຖ ທຸສ຺ສີ ອປຈ຺ຈຖ;

ວິຘຸຣໍ ສາວກມາສຊ຺ຊ, ກກຸສນ຺ຘຎ຺ຈ ພ຺ຣາຫ຺ມຓໍ.

໑໑໙໘. ‘‘ໂຍ ເອຕມຠິຊານາຕິ, ຠິກ຺ຂຸ ພຸທ຺ຘສ຺ສ ສາວໂກ;

ຕາທິສໍ ຠິກ຺ຂຸມາສຊ຺ຊ, ກຓ຺ຫ ທຸກ຺ຂໍ ນິຄຈ຺ຉສິ.