໑໓. ເຕຣສນິປາໂຕ

໑. ໂສຓໂກຬິວິສຕ຺ເຖຣຄາຖາວຓ຺ຓນາ

ເຕຣສນິປາເຕ ຍາຫຸ ຣຏ຺ເຐຕິອາທິກາ ອາຍສ຺ມໂຕ ໂສຓສ຺ສ ໂກຬິວິສສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນິ. ອຍໍ ກິຣ ອໂນມທສ຺ສິສ຺ສ ຠຄວໂຕ ກາເລ ມຫາວິຠໂວ ເສຏ຺ຐິ ຫຸຕ຺ວາ ອຸປາສເກຫິ ສທ຺ຘິໍ ວິຫາຣໍ ຄນ຺ຕ຺ວາ ສຕ຺ຖຸ ສນ຺ຕິເກ ຘມ຺ມໍ ສຸຕ຺ວາ ປສນ຺ນມານໂສ ສຕ຺ຖຸ ຈງ຺ກມນຏ຺ຐາເນ ສຸຘາຍ ປຣິກມ຺ມໍ ກາເຣຕ຺ວາ ນານາວຓ຺ເຓຫິ ປຸປ຺ເຜຫິ ສນ຺ຖຣິຕ຺ວາ ອຸປຣິ ນານາວິຣາຄວຕ຺ເຖຫິ ວິຕານໍ ພນ຺ຘາເປສິ, ຕຖາ ສຕ຺ຖຸ ຠິກ຺ຂຸສງ຺ຆສ຺ສ ຈ ທີຆສາລໍ ກາເຣຕ຺ວາ ນິຍ຺ຍາເທສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ຫໍສວຕີນຄເຣ ເສຏ຺ຐິກຸເລ ນິພ຺ພຕ຺ຕິ, ສິຣິວຑ຺ໂຒຕິສ຺ສ ນາມໍ ອໂຫສິ. ໂສ ວຍປ຺ປຕ຺ໂຕ ວິຫາຣໍ ຄນ຺ຕ຺ວາ ສຕ຺ຖຸ ສນ຺ຕິເກ ຘມ຺ມໍ ສຸຓນ຺ໂຕ ສຕ຺ຖາຣໍ ເອກໍ ຠິກ຺ຂຸໍ ອາຣທ຺ຘວີຣິຍານໍ ອຄ຺ຄຏ຺ຐາເນ ຐເປນ຺ຕໍ ທິສ຺ວາ, ສຍມ຺ປິ ຕໍ ຐານນ຺ຕຣໍ ປຕ຺ເຖນ຺ໂຕ ສຕ຺ຕາຫໍ ມຫາທານໍ ປວຕ຺ເຕຕ຺ວາ ປຓິຘານມກາສິ. ສຕ຺ຖາປິ ຕສ຺ສ ປຕ຺ຖນາຍ ສມິຊ຺ຌນຠາວໍ ທິສ຺ວາ ພ຺ຍາກຣິຕ຺ວາ ປກ຺ກາມິ.

ໂສປິ ຍາວຊີວໍ ກຸສລໍ ກຕ຺ວາ ເທວມນຸສ຺ເສສຸ ສໍສຣນ຺ໂຕ ປຣິນິພ຺ພຸເຕ ກສ຺ສປທສພເລ ອນຸປ຺ປນ຺ເນ ອມ຺ຫາກໍ ຠຄວຕິ ພາຣາຓສິຍໍ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ຄງ຺ຄາຕີເຣ ປຓ຺ຓສາລໍ ກຣິຕ຺ວາ ເອກໍ ປຈ຺ເຈກພຸທ຺ຘໍ ເຕມາສໍ ຈຕູຫິ ປຈ຺ຈເຍຫິ ສກ຺ກຈ຺ຈໍ ອຸປຏ຺ຐຫິ. ປຈ຺ເຈກພຸທ຺ໂຘ ວຸຏ຺ຐວສ຺ໂສ ປຣິປຸຓ຺ຓປຣິກ຺ຂາໂຣ ຄນ຺ຘມາທນເມວ ຄໂຕ. ໂສປິ ກຸລປຸຕ຺ໂຕ ຍາວຊີວໍ ຕຕ຺ຖ ປຸຎ຺ຎານິ ກຕ຺ວາ ຕໂຕ ຈວິຕ຺ວາ ເທວມນຸສ຺ເສສຸ ສໍສຣນ຺ໂຕ ອມ຺ຫາກໍ ຠຄວໂຕ ກາເລ ຈມ຺ປານຄເຣ ອຸສຠເສຏ຺ຐິສ຺ສ ເຄເຫ ປຏິສນ຺ຘິໍ ຄຓ຺ຫິ. ຕສ຺ສ ປຏິສນ຺ຘິຄ຺ຄຫຓໂຕ ປຏ຺ຐາຍ ເສຏ຺ຐິສ຺ສ ມຫາໂຠຄກ຺ຂນ຺ໂຘ ອຠິວຑ຺ຒິ. ຕສ຺ສ ຊາຕທິວເສ ສກລນຄເຣ ມຫາສກ຺ກາຣສມ຺ປນ຺ໂນ ອໂຫສິ, ຕສ຺ສ ປຸພ຺ເພ ປຈ຺ເຈກພຸທ຺ຘສ຺ສ ສຕສຫສ຺ສຄ຺ຆນິກຣຕ຺ຕກມ຺ພລປຣິຈ຺ຈາເຄນ ສຸວຓ຺ຓວຓ຺ໂຓ ສຸຂຸມາລຕໂຣ ຈ ອຕ຺ຕຠາໂວ ອໂຫສິ, ເຕນສ຺ສ ໂສໂຓຕິ ນາມໍ ອກໍສຸ. ມຫຕາ ປຣິວາເຣນ ວຑ຺ຒຕິ, ຕສ຺ສ ຫຕ຺ຖປາທຕລານິ ພນ຺ຘຸຊີວກປຸປ຺ຜວຓ຺ຓານິ ອເຫສຸໍ, ສຕວິຫຕກປ຺ປາສສ຺ສ ວິຍ ສມ຺ຜສ຺ໂສ ປາທຕເລສຸ ມຓິກຸຓ຺ຑລາວຏ຺ຏວຓ຺ຓານິ ໂລມານິ ຊາຍິໍສຸ. ວຍປ຺ປຕ຺ຕສ຺ສ ຕສ຺ສ ຕິຓ຺ຓໍ ອຸຕູນໍ ອນຸຈ຺ຉວິເກ ຕໂຍ ປາສາເທ ກາເຣຕ຺ວາ ນາຏການິ ອຸປຏ຺ຐາເປສຸໍ. ໂສ ຕຕ຺ຖ ມຫຕິໍ ສມ຺ປຕ຺ຕິໍ ອນຸຠວນ຺ໂຕ ເທວກຸມາໂຣ ວິຍ ປຏິວສຕິ.

ອຖ ອມ຺ຫາກໍ ສຕ຺ຖຣິ ສພ຺ພຎ຺ຎຸຕໍ ປຕ຺ວາ ປວຕ຺ຕິຕວຣຘມ຺ມຈກ຺ເກ ຣາຊຄຫໍ ອຸປນິສ຺ສາຍ ວິຫຣນ຺ເຕ ພິມ຺ພິສາຣຣຎ຺ຎາ ປກ຺ໂກສາປິໂຕ ອສີຕິຍາ ຄາມິກສຫສ຺ເສຫິ ສທ຺ຘິໍ ຣາຊຄຫໍ ອາຄໂຕ, ສຕ຺ຖຸ ສນ຺ຕິກໍ ຄນ຺ຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ມາຕາປິຕໂຣ ອນຸຊານາເປຕ຺ວາ ສາສເນ ປພ຺ພຊິຕ຺ວາ ລທ຺ຘູປສມ຺ປໂທ ສຕ຺ຖຸ ສນ຺ຕິເກ ກມ຺ມຏ຺ຐານໍ ຄເຫຕ຺ວາ, ຊນສໍສຄ຺ຄປຣິຫຣຓຕ຺ຖໍ ສີຕວເນ ວສນ຺ໂຕ ‘‘ມມ ສຣີຣໍ ສຸຂຸມາລໍ, ນ ຈ ສກ຺ກາ ສຸເຂເນວ ສຸຂໍ ອຘິຄນ຺ຕຸໍ, ກາຍໍ ກິລເມຕ຺ວາ ສມຓຘມ຺ມໍ ກາຕຸໍ ວຏ຺ຏຕີ’’ຕິ ຐານຈງ຺ກມເມວ ອຘິຏ຺ຐາຍ, ປຘານມນຸຍຸຎ຺ຊນ຺ໂຕ ປາທຕເລສຸ ໂຜເຏສຸ ອຸຏ຺ຐຫິເຕສຸປິ ເວທນໍ ອຊ຺ຌຸເປກ຺ຂິຕ຺ວາ ທຬ຺ຫໍ ວີຣິຍໍ ກໂຣນ຺ໂຕ ອຈ຺ຈາຣທ຺ຘວີຣິຍຕາຍ ວິເສສໍ ນິພ຺ພຕ຺ເຕຕຸໍ ອສກ຺ໂກນ຺ໂຕ, ‘‘ເອວໍ ວາຍມນ຺ໂຕປິ ອຫໍ ມຄ຺ຄໍ ວາ ຜລໍ ວາ ນິພ຺ພຕ຺ເຕຕຸໍ ນ ສກ຺ໂກມິ, ກິໍ ເມ ປພ຺ພຊ຺ຊາຍ, ຫີນາຍາວຕ຺ຕິຕ຺ວາ ໂຠເຄ ຈ ຠຸຎ຺ຊິສ຺ສາມິ, ປຸຎ຺ຎານິ ຈ ກຣິສ຺ສາມີ’’ຕິ ຈິນ຺ເຕສິ. ສຕ຺ຖາ ຕສ຺ສ ຈິຕ຺ຕາຈາຣໍ ຎຕ຺ວາ ຕຕ຺ຖ ຄນ຺ຕ຺ວາ ວີຓູປໂມວາເທນ ໂອວທິຕ຺ວາ ວີຣິຍສມຕາໂຍຊນວິຘິໍ ທສ຺ເສນ຺ໂຕ ກມ຺ມຏ຺ຐານໍ ໂສເຘຕ຺ວາ ຄິຊ຺ຌກູຏໍ ຄໂຕ. ໂສຓຕ຺ເຖໂຣປິ ສຕ຺ຖຸ ສມ຺ມຸຂາ ໂອວາທໍ ລຠິຕ຺ວາ ວີຣິຍສມຕໍ ໂຍເຊຕ຺ວາ ວິປສ຺ສນໍ ອຸສ຺ສຸກ຺ກາເປຕ຺ວາ ອຣຫຕ຺ເຕ ປຕິຏ຺ຐາສິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໕.໒໕-໕໓) –

‘‘ອໂນມທສ຺ສິສ຺ສ ມຸນິໂນ, ໂລກເຊຏ຺ຐສ຺ສ ຕາທິໂນ;

ສຸຘາຍ ເລປນໍ ກຕ຺ວາ, ຈງ຺ກມໍ ກາຣຍິໍ ອຫໍ.

‘‘ນານາວຓ຺ເຓຫິ ປຸປ຺ເຜຫິ, ຈງ຺ກມໍ ສນ຺ຖຣິໍ ອຫໍ;

ອາກາເສ ວິຕານໍ ກຕ຺ວາ, ໂຠຊຍິໍ ພຸທ຺ຘມຸຕ຺ຕມໍ.

‘‘ອຎ຺ຊລິໍ ປຄ຺ຄເຫຕ຺ວານ, ອຠິວາເທຕ຺ວານ ສຸພ຺ພຕໍ;

ທີຆສາລໍ ຠຄວໂຕ, ນິຍ຺ຍາເທສິມຫໍ ຕທາ.

‘‘ມມ ສງ຺ກປ຺ປມຎ຺ຎາຍ, ສຕ຺ຖາ ໂລເກ ອນຸຕ຺ຕໂຣ;

ປຏິຄ຺ຄເຫສິ ຠຄວາ, ອນຸກມ຺ປາຍ ຈກ຺ຂຸມາ.

‘‘ປຏິຄ຺ຄເຫຕ຺ວານ ສມ຺ພຸທ຺ໂຘ, ທກ຺ຂິເຓຍ຺ໂຍ ສເທວເກ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

‘‘ໂຍ ໂສ ຫຏ຺ເຐນ ຈິຕ຺ເຕນ, ທີຆສາລໍ ອທາສິ ເມ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

‘‘ອິມສ຺ສ ມຈ຺ຈຸກາລມ຺ຫິ, ປຸຎ຺ຎກມ຺ມສມງ຺ຄິໂນ;

ສຫສ຺ສຍຸຕ຺ຕສ຺ສຣໂຖ, ອຸປຏ຺ຐິສ຺ສຕິ ຕາວເທ.

‘‘ເຕນ ຍາເນນຍໍ ໂປໂສ, ເທວໂລກໍ ຄມິສ຺ສຕິ;

ອນຸໂມທິສ຺ສເຣ ເທວາ, ສມ຺ປຕ຺ເຕ ກຸລສມ຺ຠເວ.

‘‘ມຫາຣຫໍ ພ຺ຍມ຺ຫໍ ເສຏ຺ຐໍ, ຣຕນມຕ຺ຕິກເລປນໍ;

ກູຏາຄາຣວຣູເປຕໍ, ພ຺ຍມ຺ຫໍ ອຊ຺ຌາວສິສ຺ສຕິ.

‘‘ຕິໍສກປ຺ປສຫສ຺ສານິ, ເທວໂລເກ ຣມິສ຺ສຕິ;

ປຎ຺ຈວີສຕິ ກປ຺ປານິ, ເທວຣາຊາ ຠວິສ຺ສຕິ.

‘‘ສຕ຺ຕສຕ຺ຕຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ຠວິສ຺ສຕິ;

ຍໂສຘຣສນາມາ ເຕ, ສພ຺ເພປິ ເອກນາມກາ.

‘‘ທ຺ເວ ສມ຺ປຕ຺ຕີ ອນຸໂຠຕ຺ວາ, ວຑ຺ເຒຕ຺ວາ ປຸຎ຺ຎສຎ຺ຈຍໍ;

ອຏ຺ຐວີສຕິກປ຺ປມ຺ຫິ, ຈກ຺ກວຕ຺ຕີ ຠວິສ຺ສຕິ.

‘‘ຕຕ຺ຣາປິ ພ຺ຍມ຺ຫໍ ປວຣໍ, ວິສ຺ສກມ຺ເມນ ມາປິຕໍ;

ທສສທ຺ທາວິວິຕ຺ຕໍ ຕໍ, ປຸຣມຊ຺ຌາວສິສ຺ສຕິ.

‘‘ອປຣິເມຍ຺ເຍ ອິໂຕ ກປ຺ເປ, ຠູມິປາໂລ ມຫິທ຺ຘິໂກ;

ໂອກ຺ກາໂກ ນາມ ນາເມນ, ຣາຊາ ຣຏ຺ເຐ ຠວິສ຺ສຕິ.

‘‘ໂສຬສິຕ຺ຖິສຫສ຺ສານໍ, ສພ຺ພາສໍ ປວຣາ ຈ ສາ;

ອຠິຊາຕາ ຂຕ຺ຕິຍານີ, ນວ ປຸຕ຺ເຕ ຊເນສ຺ສຕິ.

‘‘ນວ ປຸຕ຺ເຕ ຊເນຕ຺ວານ, ຂຕ຺ຕິຍານີ ມຣິສ຺ສຕິ;

ຕຣຸຓີ ຈ ປິຍາ ກຎ຺ຎາ, ມເຫສິຕ຺ຕໍ ກຣິສ຺ສຕິ.

‘‘ໂອກ຺ກາກໍ ໂຕສຍິຕ຺ວານ, ວຣໍ ກຎ຺ຎາ ລຠິສ຺ສຕິ;

ວຣໍ ລທ຺ຘານ ສາ ກຎ຺ຎາ, ປຸຕ຺ເຕ ປພ຺ພາຊຍິສ຺ສຕິ.

‘‘ປພ຺ພາຊິຕາ ຈ ເຕ ສພ຺ເພ, ຄມິສ຺ສນ຺ຕິ ນຄຸຕ຺ຕມໍ;

ຊາຕິເຠທຠຍາ ສພ຺ເພ, ຠຄິນີຫິ ວສິສ຺ສເຣ.

‘‘ເອກາ ຈ ກຎ຺ຎາ ພ຺ຍາຘີຫິ, ຠວິສ຺ສຕິ ປຣິກ຺ຂຕາ;

ມາ ໂນ ຊາຕິ ປຠິຊ຺ຊີຕິ, ນິຂຓິສ຺ສນ຺ຕິ ຂຕ຺ຕິຍາ.

‘‘ຂຕ຺ຕິໂຍ ນີຫຣິຕ຺ວານ, ຕາຍ ສທ຺ຘິໍ ວສິສ຺ສຕິ;

ຠວິສ຺ສຕິ ຕທາ ເຠໂທ, ໂອກ຺ກາກກຸລສມ຺ຠໂວ.

‘‘ເຕສໍ ປຊາ ຠວິສ຺ສນ຺ຕິ, ໂກຬິຍາ ນາມ ຊາຕິຍາ;

ຕຕ຺ຖ ມານຸສກໍ ໂຠຄໍ, ອນຸໂຠສ຺ສຕິນປ຺ປກໍ.

‘‘ຕມ຺ຫາ ກາຍາ ຈວິຕ຺ວານ, ເທວໂລກໍ ຄມິສ຺ສຕິ;

ຕຕ຺ຣາປິ ປວຣໍ ພ຺ຍມ຺ຫໍ, ລຠິສ຺ສຕິ ມໂນຣມໍ.

‘‘ເທວໂລກາ ຈວິຕ຺ວານ, ສຸກ຺ກມູເລນ ໂຈທິໂຕ;

ອາຄນ຺ຕ຺ວານ ມນຸສ຺ສຕ຺ຕໍ, ໂສໂຓ ນາມ ຠວິສ຺ສຕິ.

‘‘ອາຣທ຺ຘວີຣິໂຍ ປຫິຕຕ຺ໂຕ, ປທຫໍ ສຕ຺ຖຸ ສາສເນ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ.

‘‘ອນນ຺ຕທສ຺ສີ ຠຄວາ, ໂຄຕໂມ ສກ຺ຍປຸງ຺ຄໂວ;

ວິເສສຎ຺ຎູ ມຫາວີໂຣ, ອຄ຺ຄຏ຺ຐາເນ ຐເປສ຺ສຕິ.

‘‘ວຸຏ຺ຐມ຺ຫິ ເທເວ ຈຕຸຣງ຺ຄຸລມ຺ຫິ, ຕິເຓ ອນິເລຣິຕອງ຺ຄຓມ຺ຫິ;

ຐຕ຺ວານ ໂຍຄສ຺ສ ປຍຸຕ຺ຕຕາທິໂນ, ຕໂຕຕ຺ຕຣິໍ ປາຣມຕາ ນ ວິຊ຺ຊຕິ.

‘‘ອຸຕ຺ຕເມ ທມເຖ ທນ຺ໂຕ, ຈິຕ຺ຕໍ ເມ ສຸປຓີຫິຕໍ;

ຠາໂຣ ເມ ໂອຫິໂຕ ສພ຺ໂພ, ນິພ຺ພຸໂຕມ຺ຫິ ອນາສໂວ.

‘‘ອງ຺ຄີຣໂສ ມຫານາໂຄ, ອຠິຊາໂຕວ ເກສຣີ;

ຠິກ຺ຂຸສງ຺ເຆ ນິສີທິຕ຺ວາ, ເອຕທຄ຺ເຄ ຐເປສິ ມໍ.

‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ອຸທານວເສນ ອຎ຺ຎາພ຺ຍາກຣຓວເສນ ຈ –

໖໓໒. ‘‘ຍາຫຸ ຣຏ຺ເຐ ສມຸກ຺ກຏ຺ໂຐ, ຣຎ຺ໂຎ ອງ຺ຄສ຺ສ ປທ຺ຘຄູ;

ສ຺ວາຊ຺ຊ ຘມ຺ເມສຸ ອຸກ຺ກຏ຺ໂຐ, ໂສໂຓ ທຸກ຺ຂສ຺ສ ປາຣຄູ.

໖໓໓. ‘‘ປຎ຺ຈ ຉິນ຺ເທ ປຎ຺ຈ ຊເຫ, ປຎ຺ຈ ຈຸຕ຺ຕຣິ ຠາວເຍ;

ປຎ຺ຈສງ຺ຄາຕິໂຄ ຠິກ຺ຂຸ, ໂອຆຕິຓ຺ໂຓຕິ ວຸຈ຺ຈຕິ.

໖໓໔. ‘‘ອຸນ຺ນຬສ຺ສ ປມຕ຺ຕສ຺ສ, ພາຫິຣາສສ຺ສ ຠິກ຺ຂຸໂນ;

ສີລໍ ສມາຘິ ປຎ຺ຎາ ຈ, ປາຣິປູຣິໍ ນ ຄຈ຺ຉຕິ.

໖໓໕. ‘‘ຍຎ຺ຫິ ກິຈ຺ຈໍ ອປວິທ຺ຘໍ, ອກິຈ຺ຈໍ ປນ ກຣີຍຕິ;

ອຸນ຺ນຬານໍ ປມຕ຺ຕານໍ, ເຕສໍ ວຑ຺ຒນ຺ຕິ ອາສວາ.

໖໓໖. ‘‘ເຍສຎ຺ຈ ສຸສມາຣທ຺ຘາ, ນິຈ຺ຈໍ ກາຍຄຕາ ສຕິ;

ອກິຈ຺ຈໍ ເຕ ນ ເສວນ຺ຕິ, ກິຈ຺ເຈ ສາຕຈ຺ຈກາຣິໂນ;

ສຕານໍ ສມ຺ປຊານານໍ, ອຕ຺ຖໍ ຄຈ຺ຉນ຺ຕິ ອາສວາ.

໖໓໗. ‘‘ອຸຊຸມຄ຺ຄມ຺ຫິ ອກ຺ຂາເຕ, ຄຈ຺ຉຖ ມາ ນິວຕ຺ຕຖ;

ອຕ຺ຕນາ ໂຈທຍຕ຺ຕານໍ, ນິພ຺ພານມຠິຫາຣເຍ.

໖໓໘. ‘‘ອຈ຺ຈາຣທ຺ຘມ຺ຫິ ວີຣິຍມ຺ຫິ, ສຕ຺ຖາ ໂລເກ ອນຸຕ຺ຕໂຣ;

ວີໂຓປມໍ ກຣິຕ຺ວາ ເມ, ຘມ຺ມໍ ເທເສຕິ ຈກ຺ຂຸມາ;

ຕສ຺ສາຫໍ ວຈນໍ ສຸຕ຺ວາ, ວິຫາສິໍ ສາສເນ ຣໂຕ.

໖໓໙. ‘‘ສມຖໍ ປຏິປາເທສິໍ, ອຸຕ຺ຕມຕ຺ຖສ຺ສ ປຕ຺ຕິຍາ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໖໔໐. ‘‘ເນກ຺ຂມ຺ເມ ອຘິມຸຕ຺ຕສ຺ສ, ປວິເວກຎ຺ຈ ເຈຕໂສ;

ອພ຺ຍາພຊ຺ຌາຘິມຸຕ຺ຕສ຺ສ, ອຸປາທານກ຺ຂຍສ຺ສ ຈ.

໖໔໑. ‘‘ຕຓ຺ຫກ຺ຂຍາຘິມຸຕ຺ຕສ຺ສ, ອສມ຺ໂມຫຎ຺ຈ ເຈຕໂສ;

ທິສ຺ວາ ອາຍຕນຸປ຺ປາທໍ, ສມ຺ມາ ຈິຕ຺ຕໍ ວິມຸຈ຺ຈຕິ.

໖໔໒. ‘‘ຕສ຺ສ ສມ຺ມາ ວິມຸຕ຺ຕສ຺ສ, ສນ຺ຕຈິຕ຺ຕສ຺ສ ຠິກ຺ຂຸໂນ;

ກຕສ຺ສ ປຕິຈໂຍ ນຕ຺ຖິ, ກຣຓີຍໍ ນ ວິຊ຺ຊຕິ.

໖໔໓. ‘‘ເສໂລ ຍຖາ ເອກຆໂນ, ວາເຕນ ນ ສມີຣຕິ;

ເອວໍ ຣູປາ ຣສາ ສທ຺ທາ, ຄນ຺ຘາ ຜສ຺ສາ ຈ ເກວລາ.

໖໔໔. ‘‘ອິຏ຺ຐາ ຘມ຺ມາ ອນິຏ຺ຐາ ຈ, ນປ຺ປເວເຘນ຺ຕິ ຕາທິໂນ;

ຐິຕໍ ຈິຕ຺ຕໍ ວິສຎ຺ຎຸຕ຺ຕໍ, ວຍຎ຺ຈສ຺ສານຸປສ຺ສຕີ’’ຕິ. – ອິມາ ຄາຖາ ອຠາສິ;

ຕຕ຺ຖ ຍາຫຸ ຣຏ຺ເຐ ສມຸກ຺ກຏ຺ໂຐຕິ ໂຍ ອຫຸ ອໂຫສິ ອງ຺ຄຣຏ຺ເຐ ອສີຕິຍາ ຄາມິກສຫສ຺ເສຫິ ໂຠຄສມ຺ປຕ຺ຕິຍາ ອິສ຺ສຣິຍສມ຺ປຕ຺ຕິຍາ ຈ ສມ຺ມາ ອຕິວິຍ ອຸກ຺ກຏ຺ໂຐ ເສຏ຺ໂຐ. ຣຎ຺ໂຎ ອງ຺ຄສ຺ສ ປທ຺ຘຄູຕິ ຈຕູຫິ ສງ຺ຄຫວຕ຺ຖູຫິ ປຣິສາຍ ຣຎ຺ຊນຏ຺ເຐນ ຣຎ຺ໂຎ ອງ຺ຄາຘິປຕິໂນ ພິມ຺ພິສາຣສ຺ສ ປຣິວາຣຠູໂຕ ຄຫປຕິວິເສໂສ ຕສ຺ສ ຣຏ຺ເຐ ກຸຏຸມ຺ພິໂກ ອຫູຕິ ໂຍເຊຕພ຺ພໍ. ສ຺ວາຊ຺ຊ ຘມ຺ເມສຸ ອຸກ຺ກຏ຺ໂຐຕິ ໂສ ໂສໂຓ ອຊ຺ເຊຕຣຫິ ໂລກຸຕ຺ຕຣຘມ຺ເມສຸ ອຸກ຺ກຏ຺ໂຐ ຊາໂຕ, ຄິຫິກາເລປິ ເກຫິຈິ ອຸກ຺ກຏ຺ໂຐເຍວ ຫຸຕ຺ວາ ອິທານິ ປພ຺ພຊິຕກາເລປິ ອຸກ຺ກຏ຺ໂຐເຍວ ໂຫຕີຕິ ອຕ຺ຕານເມວ ປຣໍ ວິຍ ທສ຺ເສຕິ. ທຸກ຺ຂສ຺ສ ປາຣຄູຕິ ສກລສ຺ສ ວຏ຺ຏທຸກ຺ຂສ຺ສ ປາຣໍ ປຣິຍນ຺ຕໍ ຄໂຕ, ເອເຕນ ຘມ຺ເມສຸ ອຸກ຺ກຏ຺ໂຐຕິ ອວິເສເສນ ວຸຕ຺ຕໍ ອຸກ຺ກຏ຺ຐຠາວໍ ວິເສເສຕິ ອຣຫຕ຺ຕາຘິຄມທີປນໂຕ.

ອິທານິ ຍາຍ ປຏິປຕ຺ຕິຍາ ທຸກ຺ຂປາຣຄູ ຊາໂຕ, ອຎ຺ຎາປເທເສນ ຕໍ ທສ຺ເສນ຺ໂຕ ‘‘ປຎ຺ຈ ຉິນ຺ເທ’’ຕິ ຄາຖມາຫ. ຕສ຺ສຕ຺ໂຖ – ອປາຍກາມສຸຄຕິສມ຺ປາປການິ ປຎ຺ໂຈຣມ຺ຠາຄິຍານິ ສໍໂຍຊນານິ ປຸຣິໂສ ສຕ຺ເຖນ ປາເທ ພທ຺ຘຣຊ຺ຊຸກໍ ວິຍ ເຫຏ຺ຐິເມນ ມຄ຺ຄຕ຺ຕເຍນ ຉິນ຺ເທຍ຺ຍ, ຣູປາຣູປຠວສມ຺ປາປການິ ປຎ຺ຈ ອຸທ຺ຘມ຺ຠາຄິຍານິ ສໍໂຍຊນານິ ປຸຣິໂສ ຄີວາຍ ພທ຺ຘຣຊ຺ຊຸກໍ ວິຍ ອຄ຺ຄມຄ຺ເຄນ ຊເຫຍ຺ຍ, ຉິນ຺ເທຍ຺ຍ, ເຕສໍ ປນ ອຸທ຺ຘມ຺ຠາຄິຍສໍໂຍຊນານໍ ປຫານາຍ ປຎ຺ຈ ສທ຺ຘາທີນິ ອິນ຺ທ຺ຣິຍານິ ອຸຕ຺ຕຣິ ຠາວເຍ ຠາເວຍ຺ຍ. ເອວໍຠູໂຕ ປນ ຠິກ຺ຂຸ ຣາຄສງ຺ໂຄ ໂທສໂມຫມານທິຏ຺ຐິສງ຺ໂຄຕິ ປຎ຺ຈນ຺ນໍ ສງ຺ຄານໍ ອຕິກ຺ກມເນນ ປຎ຺ຈສງ຺ຄາຕິໂຄ ຫຸຕ຺ວາ, ກາໂມໂຆ, ຠໂວໂຆ, ທິຏ຺ໂຐໂຆ, ອວິຊ຺ໂຊໂຆຕິ ຈຕຸນ຺ນໍ ໂອຆານໍ ຕິຓ຺ຓຕ຺ຕາ ໂອຆຕິຓ຺ໂຓຕິ ວຸຈ຺ຈຕິ.

ອຍຎ຺ຈ ໂອຆຕຣຓປຏິປຕ຺ຕິສີລາທີນໍ ປາຣິປູຣິຍາວ ໂຫຕິ, ສີລາທໂຍ ຈ ມານາທິປ຺ປຫາເນນ ປາຣິປູຣິໍ ຄຈ຺ຉນ຺ຕິ, ນ ອຎ຺ຎຖາຕິ ທສ຺ເສນ຺ໂຕ ‘‘ອຸນ຺ນຬສ຺ສາ’’ຕິ ຄາຖມາຫ. ຕຕ຺ຖ ອຸນ຺ນຬສ຺ສາຕິ ອຸຄ຺ຄຕຕຸຈ຺ຉມານສ຺ສ. ມາໂນ ຫິ ອຸນ຺ນມນາກາຣວຸຕ຺ຕິຍາ ຕຸຈ຺ຉຠາເວນ ນໂຬ ວິຍາຕິ ‘‘ນໂຬ’’ຕິ ວຸຈ຺ຈຕິ. ປມຕ຺ຕສ຺ສາຕິ ສຕິໂວສ຺ສຄ຺ເຄນ ປມາທໍ ອາປນ຺ນສ຺ສ. ພາຫິຣາສສ຺ສາຕິ ພາຫິເຣສຸ ອາຍຕເນສຸ ອາສາວໂຕ, ກາເມສຸ ອວີຕຣາຄສ຺ສາຕິ ອຕ຺ໂຖ. ສີລໍ ສມາຘິ ປຎ຺ຎາ ຈ, ປາຣິປູຣິໍ ນ ຄຈ຺ຉຕີຕິ ຕສ຺ສ ສີລາທີນໍ ປຏິປກ຺ຂເສວິໂນ ໂລກິໂຍປິ ຕາວ ສີລາທິຄຸໂຓ ປາຣິປູຣິໍ ນ ຄຈ຺ຉຕິ, ປເຄວ ໂລກຸຕ຺ຕໂຣ.

ຕຕ຺ຖ ກາຣຓມາຫ ‘‘ຍຎ຺ຫິ ກິຈ຺ຈ’’ນ຺ຕິອາທິນາ. ຠິກ຺ຂຸໂນ ຫິ ປພ຺ພຊິຕກາລໂຕ ປຏ຺ຐາຍ ອປຣິມາຓສີລກ຺ຂນ຺ຘໂຄປນໍ ອຣຎ຺ຎວາໂສ ຘຸຕງ຺ຄປຣິຫຣຓໍ ຠາວນາຣາມຕາຕິ ເອວມາທິ ກິຈ຺ຈໍ ນາມ. ເຍຫິ ປນ ອິທໍ ຍຖາວຸຕ຺ຕໍ ອຕ຺ຕໂນ ກິຈ຺ຈໍ, ຕໍ ອປວິທ຺ຘໍ ອກຣເຓນ ຉຑ຺ຑິຕໍ. ອກິຈ຺ຈນ຺ຕິ ປຕ຺ຕມຓ຺ຑນໍ ຈີວຣກາຍພນ຺ຘນອໍສພທ຺ຘຉຕ຺ຕຸປາຫນຕາລວຓ຺ຏຘມ຺ມກຣຓມຓ຺ຑນນ຺ຕິ ເອວມາທິ ປຣິກ຺ຂາຣມຓ຺ຑນໍ ປຈ຺ຈຍພາຫຸລິຍນ຺ຕິ ເອວມາທິ ຠິກ຺ຂຸໂນ ອກິຈ຺ຈໍ ນາມ, ຕໍ ກຍິຣຕິ, ເຕສໍ ມານນຬໍ ອຸກ຺ຂິປິຕ຺ວາ ຈຣເຓນ ອຸນ຺ນຬານໍ ສຕິໂວສ຺ສຄ຺ເຄນ ປມຕ຺ຕານໍ ຈຕ຺ຕາໂຣປິ ອາສວາ ວຑ຺ຒນ຺ຕິ.

ເຍສໍ ປນ ປຎ຺ຎາທິຄຸໂຓ ວຑ຺ຒຕິ, ເຕ ທສ຺ເສຕຸໍ ‘‘ເຍສ’’ນ຺ຕິອາທິ ວຸຕ຺ຕໍ. ຕຕ຺ຖ ສຸສມາຣທ຺ຘາຕິ ສຸຏ຺ຐຸ ປຄ຺ຄຫິຕາ. ກາຍຄຕາ ສຕີຕິ, ກາຍານຸປສ຺ສນາຠາວນາ. ອກິຈ຺ຈໍ ເຕຕິ ເຕ ເອຕໍ ປຕ຺ຕມຓ຺ຑນາທິອກິຈ຺ຈໍ. ນ ເສວນ຺ຕີຕິ ນ ກໂຣນ຺ຕິ. ກິຈ຺ເຈຕິ, ປພ຺ພຊິຕກາລໂຕ ປຏ຺ຐາຍ ກຕ຺ຕພ຺ເພ ອປຣິມາຓສີລກ຺ຂນ຺ຘໂຄປນາທິເກ. ສາຕຈ຺ຈກາຣິໂນຕິ ສຕຕກາຣິໂນ ເຕສໍ ສຕິຍາ ອວິປ຺ປວາເສນ ສຕານໍ ສາຕ຺ຖກສມ຺ປຊຎ຺ຎໍ, ສປ຺ປາຍສມ຺ປຊຎ຺ຎໍ, ໂຄຈຣສມ຺ປຊຎ຺ຎໍ, ອສມ຺ໂມຫສມ຺ປຊຎ຺ຎນ຺ຕິ ຈຕູຫິ ສມ຺ປຊຎ຺ເຎຫິ ສມ຺ປຊານານໍ, ຈຕ຺ຕາໂຣປິ ອາສວາ ອຕ຺ຖໍ ຄຈ຺ຉນ຺ຕິ ປຣິກ຺ຂຍໍ ອຠາວໍ ຄຈ຺ຉນ຺ຕີຕິ ອຕ຺ໂຖ.

ອິທານິ ອຕ຺ຕໂນ ສນ຺ຕິເກ ຐິຕຠິກ຺ຂູນໍ ໂອວາທໍ ເທນ຺ໂຕ ‘‘ອຸຊຸມຄ຺ຄມ຺ຫີ’’ຕິ ຄາຖມາຫ. ຕຕ຺ຖ ອຸຊຸມຄ຺ຄມ຺ຫິ ອກ຺ຂາເຕຕິ ອນ຺ຕທ຺ວຍປຣິວຊ຺ຊເນນ ກາຍວງ຺ກາທິປ຺ປຫາເນນ ຈ ອຸຊຸເກ ມຊ຺ຌິມປຏິປທາຠູເຕ ອຣິຍມຄ຺ເຄ ສຕ຺ຖາຣາ ຠາສິເຕ. ຄຈ຺ຉຖາຕິ ປຏິປຊ຺ຊຖ. ມາ ນິວຕ຺ຕຖາຕິ ອນ຺ຕຣາ ໂວສານໍ ມາປຊ຺ຊຖ. ອຕ຺ຕນາ ໂຈທຍຕ຺ຕານນ຺ຕິ ອິຘ ອຕ຺ຖກາໂມ ກຸລປຸຕ຺ໂຕ ອປາຍຠຍປຈ຺ຈເວກ຺ຂຓາທິນາ ອຕ຺ຕນາວ ອຕ຺ຕານໍ ໂຈເທນ຺ໂຕ. ນິພ຺ພານມຠິຫາຣເຍຕິ, ອຕ຺ຕານໍ ນິພ຺ພານໍ ອຠິຫເຣຍ຺ຍ ອຸປເນຍ຺ຍ, ຍຖາ ນໍ ສຈ຺ຉິກໂຣຕິ, ຕຖາ ປຏິປຊ຺ເຊຍ຺ຍາຕິ ອຕ຺ໂຖ.

ອິທານິ ມຍາປິ ເອວເມວ ປຏິປນ຺ນນ຺ຕິ, ອຕ຺ຕໂນ ປຏິປຕ຺ຕິໍ ທສ຺ເສຕຸໍ ‘‘ອຈ຺ຈາຣທ຺ຘມ຺ຫີ’’ຕິອາທິ ວຸຕ຺ຕໍ. ອຈ຺ຈາຣທ຺ຘມ຺ຫິ ວີຣິຍມ຺ຫີຕິ ວິປສ຺ສນໍ ຠາເວນ຺ເຕນ ມຍາ ສມາຘິນາ ວີຣິຍໍ ສມຣສໍ ອກຕ຺ວາ ອຕິວິຍ ວີຣິເຍ ປຄ຺ຄຫິເຕ. ອຈ຺ຈາຣທ຺ຘວີຣິຍຕາ ຈສ຺ສ ເຫຏ຺ຐາ ວຸຕ຺ຕາເຍວ. ວີໂຓປມໍ ກຣິຕ຺ວາ ເມຕິ ອາຍສ຺ມໂຕ ໂສຓສ຺ສ ‘‘ເຍ ໂຂ ເກຈິ ຠຄວໂຕ ສາວກາ ອາຣທ຺ຘວີຣິຍາ ວິຫຣນ຺ຕິ. ອຫໍ ເຕສໍ ອຎ຺ຎຕໂຣ, ອຖ ຈ ປນ ເມ ນານຸປາທາຍ ອາສເວຫິ ຈິຕ຺ຕໍ ວິມຸຈ຺ຈຕິ, ຕສ຺ມາຫໍ ວິພ຺ຠມິສ຺ສາມີ’’ຕິ ຈິຕ຺ເຕ ອຸປ຺ປນ຺ເນ ສຕ຺ຖາ ອິທ຺ຘິຍາ ຕສ຺ສ ສມ຺ມຸເຂ ອຕ຺ຕານໍ ທສ຺ເສຕ຺ວາ ‘‘ກສ຺ມາ ຕ຺ວໍ, ໂສຓ, ‘ວິພ຺ຠມິສ຺ສາມີ’ຕິ ຈິຕ຺ຕໍ ອຸປ຺ປາເທສິ, ກຸສໂລ ຕ຺ວໍ ປຸພ຺ເພ ອຄາຣິຍຠູໂຕ ວີຓາຍ ຕນ຺ຕິສ຺ສເຣ’’ຕິ ປຸຈ຺ຉິຕ຺ວາ ເຕນ ‘‘ເອວໍ, ຠນ຺ເຕ’’ຕິ ວຸຕ຺ເຕ ‘‘ຕໍ ກິໍ ມຎ຺ຎສິ, ໂສຓ? ຍທາ ເຕ ວີຓາຍ ຕນ຺ຕິໂຍ ອຈ຺ຈາຍຕາ ໂຫນ຺ຕິ, ອປິ ນຸ ເຕ ວີຓາ ຕສ຺ມິໍ ສມເຍ ສຣວຕີ ວາ ໂຫຕິ ກມ຺ມຎ຺ຎາ ວາຕິ? ໂນ ເຫຕໍ, ຠນ຺ເຕ! ຕໍ ກິໍ ມຎ຺ຎສິ, ໂສຓ, ຍທາ ເຕ ວີຓາຍ ຕນ຺ຕິໂຍ ອຕິສິຖິລາ ໂຫນ຺ຕິ, ອປິ ນຸ ເຕ ວີຓາ ຕສ຺ມິໍ ສມເຍ ສຣວຕີ ວາ ໂຫຕິ ກມ຺ມຎ຺ຎາ ວາຕິ? ໂນ ເຫຕໍ, ຠນ຺ເຕ. ຕໍ ກິໍ ມຎ຺ຎສິ, ໂສຓ, ຍທາ ປນ ເຕ ວີຓາຍ ຕນ຺ຕິໂຍ ເນວ ອຈ຺ຈາຍຕາ ໂຫນ຺ຕິ, ນາຕິສິຖິລາ ສເມ ຄຸເຓ ປຕິຏ຺ຐິຕາ, ອປິ ນຸ ເຕ ວີຓາ ຕສ຺ມິໍ ສມເຍ ສຣວຕີ ວາ ໂຫຕິ ກມ຺ມຎ຺ຎາ ວາຕິ? ເອວໍ, ຠນ຺ເຕ. ເອວເມວ ໂຂ, ໂສຓ, ອຈ຺ຈາຣທ຺ຘວີຣິຍໍ ອຸທ຺ຘຈ຺ຈາຍ ສໍວຕ຺ຕຕິ, ອຕິລີນວີຣິຍໍ ໂກສຊ຺ຊາຍ ສໍວຕ຺ຕຕິ, ຕສ຺ມາຕິຫ ຕ຺ວໍ, ໂສຓ, ວີຣິຍສມຕໍ ອຘິຏ຺ຐຫ, ອິນ຺ທ຺ຣິຍານຎ຺ຈ ສມຕໍ ປຏິວິຊ຺ຌາ’’ຕິ ເອວໍ ວີຓໍ ອຸປມໍ ກຕ຺ວາ ປວຕ຺ຕິເຕນ ວີໂຓປໂມວາເທນ ມຍ຺ຫໍ ຘມ຺ມໍ ເທເສສິ. ຕສ຺ສາຫໍ ວຈນໍ ສຸຕ຺ວາຕິ ຕສ຺ສ ຠຄວໂຕ ວຈນໍ ວີໂຓປໂມວາທໍ ສຸຕ຺ວາ ອນ຺ຕຣາ ອຸປ຺ປນ຺ນໍ ວິພ຺ຠມິຕຸກາມຕໍ ປຫາຍ ສຕ຺ຖຸ ສາສເນ ຣໂຕ ອຠິຣໂຕ ວິຫຣິໍ.

ວິຫຣນ຺ໂຕ ຈ ສມຖໍ ປຏິປາເທສິໍ ວີຣິຍສມຕໍ ໂຍເຊນ຺ໂຕ ສທ຺ຘາປຎ຺ຎານໍ ວິຍ ສມາຘິວີຣິຍານໍ ສມຣສຕໍ ອຸປ຺ປາເທນ຺ໂຕ ຌານາຘິຏ຺ຐານໍ ວິປສ຺ສນາສມາຘິໍ ສມ຺ປາເທສິໍ ວິປສ຺ສນໍ ອຸສ຺ສຸກ຺ກາເປສິໍ. ຕຕ຺ຖ ປໂຍຊນໍ ອາຫ ‘‘ອຸຕ຺ຕມຕ຺ຖສ຺ສ ປຕ຺ຕິຍາ’’ຕິ. ອຸຕ຺ຕມຕ຺ຖສ຺ສ ປຕ຺ຕິຍາຕິ ອຣຫຕ຺ຕາຘິຄມາຍາຕິ ອຕ຺ໂຖ.

ອິທານິ ຍຖາ ປຏິປນ຺ນສ຺ສ ສມຖວິປສ຺ສນາ ສມ຺ປຊ຺ຊິໍສຸ, ຕໍ ອຎ຺ຎາປເທເສນ ທສ຺ເສນ຺ໂຕ ‘‘ເນກ຺ຂມ຺ເມ’’ຕິອາທິມາຫ. ຕຕ຺ຖ ເນກ຺ຂມ຺ເມຕິ ປພ຺ພຊ຺ຊາທິເກ ກາມນິສ຺ສຣເຓ. ອຘິມຸຕ຺ຕສ຺ສາຕິ ຕຕ຺ຖ ນິນ຺ນໂປຓປພ຺ຠາຣຠາເວນ ຍຸຕ຺ຕປ຺ປຍຸຕ຺ຕສ຺ສ, ປຐມໍ ຕາວ ປພ຺ພຊ຺ຊາຠິມຸໂຂ ຫຸຕ຺ວາ ກາເມ ປຫາຍ ປພ຺ພຊິຕ຺ວາ ຈ ສີລວິໂສຘນໍ ອຣຎ຺ຎວາໂສ ຘຸຕງ຺ຄປຣິຫຣຓໍ ຠາວນາຠິໂຍໂຄຕິ ເອວມາທີສຸ ອນວຊ຺ຊຘມ຺ເມສຸ ຍຸຕ຺ຕປ຺ປຍຸຕ຺ຕສ຺ສາຕິ ອຕ຺ໂຖ. ປວິເວກຎ຺ຈ ເຈຕໂສຕິ ເຈຕໂສ ປວິເວກຎ຺ຈ ອຘິມຸຕ຺ຕສ຺ສ ເອວໍ ເນກ຺ຂມ຺ມາຘິມຸຕ຺ຕສ຺ສ ສໂຕ ຈຕຸກ຺ກປຎ຺ຈກຊ຺ຌານານໍ ນິພ຺ພຕ຺ຕເນນ ວິເວເກ ຍຸຕ຺ຕສ຺ສ ປຍຸຕ຺ຕສ຺ສ. ອພ຺ຍາພຊ຺ຌາຘິມຸຕ຺ຕສ຺ສາຕິ ອພ຺ຍາພຊ຺ເຌ ນິທຸກ຺ຂຕາຍ ອຘິມຸຕ຺ຕສ຺ສ ຌານສມາປຕ຺ຕິໂຍ ນິພ຺ພຕ຺ເຕຕ຺ວາ ສມຖສຸເຂ ຍຸຕ຺ຕປ຺ປຍຸຕ຺ຕສ຺ສ. ອຸປາທານກ຺ຂຍສ຺ສ ຈາຕິ ຈຕຸນ຺ນມ຺ປິ ອຸປາທານານໍ ຂຍນ຺ເຕ ອຣຫຕ຺ເຕ ອຘິມຸຕ຺ຕສ຺ສ. ຠຸມ຺ມຕ຺ເຖ ຫິ ເອຕໍ ສາມິວຈນໍ. ຕໍ ຍຖາຘິຄຕໍ ຌານໍ ປາທກໍ ກຕ຺ວາ ອຣຫຕ຺ຕາຘິຄມາຍ ວິປສ຺ສນໍ ອນຸຍຸຎ຺ຊນ຺ຕສ຺ສາຕິ ອຕ຺ໂຖ.

ຕຓ຺ຫກ຺ຂຍາຘິມຸຕ຺ຕສ຺ສາຕິ ຕຓ຺ຫາ ຂີຍຕິ ເອຕ຺ຖາຕິ ຕຓ຺ຫກ຺ຂໂຍ, ນິພ຺ພານໍ, ຕສ຺ມິໍ ອຘິມຸຕ຺ຕສ຺ສ ອຸປາທິໍ ຠຍໂຕ, ອນຸປາທິຎ຺ຈ ເຂມໂຕ ທສ຺ສເນນ ນິໂຣເຘ ນິນ຺ນໂປຓປພ຺ຠາຣສ຺ສ. ອສມ຺ໂມຫຎ຺ຈ ເຈຕໂສຕິ ອສມ຺ໂມຫສມ຺ປຊຎ຺ຎວເສນ ຈິຕ຺ຕສ຺ສ ອສມ຺ໂມຫປວຕ຺ຕິໍ ສມ຺ໂມຫສມຸຈ຺ຉິນ຺ທເນນ ວາ ຈິຕ຺ຕສ຺ສ ອສມ຺ໂມຫຠູຕໍ ອຣິຍມຄ຺ຄໍ ອຘິມຸຕ຺ຕສ຺ສ. ທິສ຺ວາ ອາຍຕນຸປ຺ປາທນ຺ຕິ ຈກ຺ຂາທີນໍ ອາຍຕນານໍ ຍຖາສກປຈ຺ຈເຍຫິ ຂເຓ ຂເຓ ອຸປ຺ປາທໍ, ຕປ຺ປຏິປກ຺ຂໂຕ ນິໂຣຘຎ຺ຈ ວິປສ຺ສນາປຎ຺ຎາສຫິຕາຍ ມຄ຺ຄປຎ຺ຎາຍ ທິສ຺ວາ ທສ຺ສນເຫຕຸ ສມ຺ມາ ຈິຕ຺ຕໍ ວິມຸຈ຺ຈຕີຕິ ສມ຺ມາ ເຫຕຸນາ ຎາເຍນ ມຄ຺ຄປຏິປາຏິຍາ ສພ຺ພາສວໂຕ ຈິຕ຺ຕໍ ວິມຸຈ຺ຈຕິ.

‘‘ຕສ຺ສ ສມ຺ມາ ວິມຸຕ຺ຕສ຺ສາ’’ຕິອາທີສຸ ອຍໍ ສງ຺ເຂປຕ຺ໂຖ – ຕສ຺ສ ວຸຕ຺ຕນເຍນ ສມ຺ມເທວ ສພ຺ພສໍກິເລສໂຕ ວິມຸຕ຺ຕສ຺ສ, ຕໂຕ ເອວ ອຈ຺ຈນ຺ຕຸປສເມນ ສນ຺ຕຈິຕ຺ຕສ຺ສ ຂີຓາສວຠິກ຺ຂຸໂນ ກຕສ຺ສ ກຸສລສ຺ສ ອກຸສລສ຺ສ ວາ ອຸປຈໂຍ ນຕ຺ຖິ ມຄ຺ເຄເນວ ສມຸຄ຺ຆາຕິຕຕ຺ຕາ, ປຣິຎ຺ຎາທິເຠທໍ ກຣຓີຍໍ ນ ວິຊ຺ຊຕິ ກຕກິຈ຺ຈຕ຺ຕາ. ເອວໍ ຠູຕສ຺ສ ຍຖາ ເອກຆໂນ ເສໂລ ປພ຺ພໂຕ ປກຕິວາເຕນ ນ ສມີຣຕິ ນ ສໍກມ຺ປຕິ, ເອວໍ ອິຏ຺ຐາ ຈ ອນິຏ຺ຐາ ຈ ຣູປາທໂຍ ອາຣມ຺ມຓຘມ຺ມາ ຕາທິໂນ ຕາທິຠາວປ຺ປຕ຺ຕສ຺ສ ຐິຕໍ ອເນຊໍ ປຫີນສພ຺ພໂສກຕາຍ ວິສໍຍຸຕ຺ຕໍ ຈິຕ຺ຕໍ ນປ຺ປເວຘນ຺ຕິ ນ ຈາເລນ຺ຕິ. ອສ຺ສ ຈ ອາຣມ຺ມຓຘມ຺ມສ຺ສ ກາເລນ ກາລໍ ຜລສມາປຕ຺ຕິໍ ສມາປຊ຺ຊິຕ຺ວາ ວິປສ຺ສນ຺ໂຕ ວຍໍ ນິໂຣຘໍ ຂເຓ ຂເຓ ຠິຊ຺ຊນສຠາວໍ ອນຸປສ຺ສຕີຕິ ອຎ຺ຎໍ ພ຺ຍາກາສິ.

ໂສຓໂກຬິວິສຕ຺ເຖຣຄາຖາວຓ຺ຓນາ ນິຏ຺ຐິຕາ.

ເຕຣສນິປາຕວຓ຺ຓນາ ນິຏ຺ຐິຕາ.