໗. (ອປຣ)-ໂຄຕມຕ຺ເຖຣຄາຖາວຓ຺ຓນາ

ວິຊາເນຍ຺ຍ ສກໍ ອຕ຺ຖນ຺ຕິອາທິກາ ອາຍສ຺ມໂຕ ອປຣສ຺ສ ໂຄຕມຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນິຕ຺ວາ ອມ຺ຫາກໍ ຠຄວໂຕ ອຸປ຺ປຕ຺ຕິໂຕ ປຸເຣຕຣເມວ ສາວຕ຺ຖິຍໍ ອຸທິຈ຺ຈພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ວຍປ຺ປຕ຺ໂຕ ຕິຓ຺ຓໍ ເວທານໍ ປາຣຄູ ຫຸຕ຺ວາ, ວາທມຄ຺ຄໍ ອຸຄ຺ຄເຫຕ຺ວາ ອຕ຺ຕໂນ ວາທສ຺ສ ອຸປຣິ ອຸຕ຺ຕຣິໍ ວທນ຺ຕໍ ອລຠນ຺ໂຕ ເຕຫິ ເຕຫິ ວິຄ຺ຄາຫິກກຖໍ ອນຸຍຸຕ຺ໂຕ ວິຈຣຕິ. ອຖ ອມ຺ຫາກໍ ຠຄວາ ໂລເກ ອຸປ຺ປຊ຺ຊິຕ຺ວາ ປວຕ຺ຕິຕວຣຘມ຺ມຈກ຺ໂກ ອນຸປຸພ຺ເພນ ຍສາທິເກ ເວເນຍ຺ເຍ ວິເນຕ຺ວາ ອນາຖປິຓ຺ຑິກສ຺ສ ອຠິຍາຈນາຍ ສາວຕ຺ຖິໍ ອຸປຄຈ຺ຉິ. ຕທາ ສຕ຺ຖຸ ເຊຕວນປຏິຄ຺ຄເຫ ປຏິລທ຺ຘສທ຺ໂຘ ສຕ຺ຖາຣໍ ອຸປສງ຺ກມິຕ຺ວາ ຘມ຺ມໍ ສຸຕ຺ວາ ປພ຺ພຊ຺ຊໍ ຍາຈິ. ສຕ຺ຖາ ອຎ຺ຎຕຣໍ ປິຓ຺ຑຈາຣິກໍ ຠິກ຺ຂຸໍ ອາຓາເປສິ – ‘‘ຠິກ຺ຂຸ, ອິມໍ ປພ຺ພາເຊຫີ’’ຕິ. ໂສ ເຕນ ປພ຺ພາຊິຍມາໂນ ຂຸຣຄ຺ເຄເຍວ ອຣຫຕ຺ຕໍ ປາປຸຓິຕ຺ວາ ໂກສລຊນປທໍ ຄນ຺ຕ຺ວາ ຕຕ຺ຖ ຈິຣໍ ວສິຕ຺ວາ ປຸນ ສາວຕ຺ຖິໍ ປຈ຺ຈາຄມິ. ຕໍ ພຫູ ຎາຕກາ ພ຺ຣາຫ຺ມຓມຫາສາລາ ອຸປສງ຺ກມິຕ຺ວາ ປຍິຣຸປາສິຕ຺ວາ ນິສິນ຺ນາ ‘‘ອິມສ຺ມິໍ ໂລເກ ພຫູ ສມຓພ຺ຣາຫ຺ມຓາ ສໍສາເຣ ສຸທ຺ຘິວາທາ, ເຕສຸ ກຕເມສໍ ນຸ ໂຂ ວາໂທ ນິຍ຺ຍານິໂກ, ກຖໍ ປຏິປຊ຺ຊນ຺ໂຕ ສໍສາຣໂຕ ສຸຊ຺ຌຕີ’’ຕິ ປຸຈ຺ຉິໍສຸ. ເຖໂຣ ເຕສໍ ຕມຕ຺ຖໍ ປກາເສນ຺ໂຕ –

໕໘໗. ‘‘ວິຊາເນຍ຺ຍ ສກໍ ອຕ຺ຖໍ, ອວໂລເກຍ຺ຍາຖ ປາວຈນໍ;

ຍຎ຺ເຈຕ຺ຖ ອສ຺ສ ປຕິຣູປໍ, ສາມຎ຺ຎໍ ອຊ຺ຌູປຄຕສ຺ສ.

໕໘໘. ‘‘ມິຕ຺ຕໍ ອິຘ ຈ ກລ຺ຍາຓໍ, ສິກ຺ຂາ ວິປຸລໍ ສມາທານໍ;

ສຸສ຺ສູສາ ຈ ຄຣູນໍ, ເອຕໍ ສມຓສ຺ສ ປຕິຣູປໍ.

໕໘໙. ‘‘ພຸທ຺ເຘສຸ ສຄາຣວຕາ, ຘມ຺ເມ ອປຈິຕິ ຍຖາຠູຕໍ;

ສງ຺ເຆ ຈ ຈິຕ຺ຕີກາໂຣ, ເອຕໍ ສມຓສ຺ສ ປຕິຣູປໍ.

໕໙໐. ‘‘ອາຈາຣໂຄຈເຣ ຍຸຕ຺ໂຕ, ອາຊີໂວ ໂສຘິໂຕ ອຄາຣຍ຺ໂຫ;

ຈິຕ຺ຕສ຺ສ ຈ ສຓ຺ຐປນໍ, ເອຕໍ ສມຓສ຺ສ ປຕິຣູປໍ.

໕໙໑. ‘‘ຈາຣິຕ຺ຕໍ ອຖ ວາຣິຕ຺ຕໍ, ອິຣິຍາປຖິຍໍ ປສາທນິຍໍ;

ອຘິຈິຕ຺ເຕ ຈ ອາໂຍໂຄ, ເອຕໍ ສມຓສ຺ສ ປຕິຣູປໍ.

໕໙໒. ‘‘ອາຣຎ຺ຎການິ ເສນາສນານິ, ປນ຺ຕານິ ອປ຺ປສທ຺ທານິ;

ຠຊິຕພ຺ພານິ ມຸນິນາ, ເອຕໍ ສມຓສ຺ສ ປຕິຣູປໍ.

໕໙໓. ‘‘ສີລຎ຺ຈ ພາຫຸສຈ຺ຈຎ຺ຈ, ຘມ຺ມານໍ ປວິຈໂຍ ຍຖາຠູຕໍ;

ສຈ຺ຈານໍ ອຠິສມໂຍ, ເອຕໍ ສມຓສ຺ສ ປຕິຣູປໍ.

໕໙໔. ‘‘ຠາເວຍ຺ຍ ຈ ອນິຈ຺ຈນ຺ຕິ, ອນຕ຺ຕສຎ຺ຎໍ ອສຸຠສຎ຺ຎຎ຺ຈ;

ໂລກມ຺ຫິ ຈ ອນຠິຣຕິໍ, ເອຕໍ ສມຓສ຺ສ ປຕິຣູປໍ.

໕໙໕. ‘‘ຠາເວຍ຺ຍ ຈ ໂພຊ຺ຌງ຺ເຄ, ອິທ຺ຘິປາທານິ ອິນ຺ທ຺ຣິຍານິ ພລານິ;

ອຏ຺ຐງ຺ຄມຄ຺ຄມຣິຍໍ, ເອຕໍ ສມຓສ຺ສ ປຕິຣູປໍ.

໕໙໖. ‘‘ຕຓ຺ຫໍ ປຊເຫຍ຺ຍ ມຸນິ, ສມູລເກ ອາສເວ ປທາເລຍ຺ຍ;

ວິຫເຣຍ຺ຍ ວິປ຺ປມຸຕ຺ໂຕ, ເອຕໍ ສມຓສ຺ສ ປຕິຣູປ’’ນ຺ຕິ. –

ອິມາ ຄາຖາ ອຠາສິ.

ຕຕ຺ຖ ວິຊາເນຍ຺ຍ ສກໍ ອຕ຺ຖນ຺ຕິ, ວິຎ຺ຎູຊາຕິໂກ ປຸຣິໂສ ອຕ຺ຕໂນ ອຕ຺ຖໍ ຍາຖາວໂຕ ວິຈາເຣຕ຺ວາ ຊາເນຍ຺ຍ. ວິຈາເຣນ຺ໂຕ ຈ ອວໂລເກຍ຺ຍາຖ ປາວຈນໍ ອິຘ ໂລເກ ປຸຖຸສມຓພ຺ຣາຫ຺ມເຓຫິ ສມ຺ມາສມ຺ພຸທ຺ເຘນ ຈ ປວຸຕ຺ຕໍ ປາວຈນໍ, ສມໂຍ. ຕຕ຺ຖ ຍໍ ນິຍ຺ຍານິກໍ, ຕໍ ໂອໂລເກຍ຺ຍ ປຎ຺ຎາຈກ຺ຂຸນາ ປສ຺ເສຍ຺ຍ. ອິເມ ຫິ ນານາຕິຕ຺ຖິຍາ ສມຓພ຺ຣາຫ຺ມຓາ ອນິຈ຺ເຈ ‘‘ນິຈ຺ຈ’’ນ຺ຕິ, ອນຕ຺ຕນິ ‘‘ອຕ຺ຕາ’’ຕິ, ອສຸທ຺ຘິມຄ຺ຄຎ຺ຈ ‘‘ສຸທ຺ຘິມຄ຺ໂຄ’’ຕິ ມິຈ຺ຉາຠິນິເວສິໂນ ອຎ຺ຎມຎ຺ຎຎ຺ຈ ວິຣຸທ຺ຘວາທາ, ຕສ຺ມາ ເນສໍ ວາໂທ ອນິຍ຺ຍານິໂກ. ສມ຺ມາສມ຺ພຸທ຺ໂຘ ປນ ‘‘ສພ຺ເພ ສງ຺ຂາຣາ ອນິຈ຺ຈາ, ສພ຺ເພ ຘມ຺ມາ ອນຕ຺ຕາ, ສນ຺ຕໍ ນິພ຺ພານ’’ນ຺ຕິ ສຍມ຺ຠູຎາເຓນ ຍຖາຠູຕໍ ອພ຺ຠຎ຺ຎາຍ ປເວເທຕິ, ຕສ຺ມາ ‘‘ຕສ຺ສ ວາໂທ ນິຍ຺ຍານິໂກ’’ຕິ ສຕ຺ຖຸ ສາສນມຫນ຺ຕຕໍ ໂອໂລເກຍ຺ຍາຕິ ອຕ຺ໂຖ. ຍຎ຺ເຈຕ຺ຖ ອສ຺ສ ປຕິຣູປໍ, ສາມຎ຺ຎໍ ອຊ຺ຌູປຄຕສ຺ສາຕິ, ສາມຎ຺ຎໍ ສມຓຠາວໍ ປພ຺ພຊ຺ຊໍ ອຸປຄຕສ຺ສ ກຸລປຸຕ຺ຕສ຺ສ ຍໍ ເອຕ຺ຖ ສາສເນ ປພ຺ພຊິຕຠາເວ ວາ ປຕິຣູປໍ ຍຸຕ຺ຕຣູປໍ ສາຣຸປ຺ປໍ ອສ຺ສ ສິຍາ, ຕມ຺ປິ ອປໂລເກຍ຺ຍ.

ກິໍ ປນ ຕນ຺ຕິ ອາຫ ‘‘ມິຕ຺ຕໍ ອິຘ ຈ ກລ຺ຍາຓ’’ນ຺ຕິອາທິ. ອິມສ຺ມິໍ ສາສເນ ກລ຺ຍາຓມິຕ຺ຕໍ ເສວິຍມານໍ ສມຓສ຺ສ ປຕິຣູປນ຺ຕິ ໂຍຊນາ. ເອສ ນໂຍ ອິຕເຣສຸປິ. ກລ຺ຍາຓມິຕ຺ຕຎ຺ຫິ ນິສ຺ສາຍ ອກຸສລໍ ປຊຫຕິ, ກຸສລໍ ຠາເວຕິ, ສຸທ຺ຘມຕ຺ຕານໍ ປຣິຫຣຕິ. ສິກ຺ຂາ ວິປຸລໍ ສມາທານນ຺ຕິ ວິປຸລໍ ສິກ຺ຂາສມາທານໍ, ມຫຕິຍາ ນິພ຺ພານາວຫາຍ ອຘິສີລາທິສິກ຺ຂາຍ ອນຸຏ຺ຐານນ຺ຕິ ອຕ຺ໂຖ. ສຸສ຺ສູສາ ຈ ຄຣູນນ຺ຕິ ຄຣູນໍ ອາຈຣິຍຸປຊ຺ຌາຍາທີນໍ ກລ຺ຍາຓມິຕ຺ຕານໍ ໂອວາທສ຺ສ ໂສຕຸກມ຺ຍຕາ ປາຣິຈຣິຍາ ຈ. ເອຕນ຺ຕິ ກລ຺ຍາຓມິຕ຺ຕເສວນາທິ.

ພຸທ຺ເຘສຸ ສຄາຣວຕາຕິ ສພ຺ພຎ຺ຎຸພຸທ຺ເຘສຸ ‘‘ສມ຺ມາສມ຺ພຸທ຺ໂຘ ຠຄວາ’’ຕິ ຄາຣວໂຍໂຄ ຄຣຸຈິຕ຺ຕີກາໂຣ. ຘມ຺ເມ ອປຈິຕິ ຍຖາຠູຕນ຺ຕິ ອຣິຍຘມ຺ເມ ຍາຖາວໂຕ ອປຈາຍນໍ ອາທເຣນ ອຠິປູຊນໍ. ສງ຺ເຆຕິ ອຣິຍສງ຺ເຆ. ຈິຕ຺ຕີກາໂຣຕິ ສກ຺ກາໂຣ ສມ຺ມານນໍ. ເອຕນ຺ຕິ ຣຕນຕ຺ຕຍຄຣຸກຣຓໍ.

ອາຈາຣໂຄຈເຣ ຍຸຕ຺ໂຕຕິ ກາຍິກວາຈສິກວີຕິກ຺ກມນສງ຺ຂາຕໍ ອນາຈາຣໍ, ປິຓ຺ຑປາຕາທີນໍ ອຕ຺ຖາຍ ອຸປສງ຺ກມິຕຸໍ ອຍຸຕ຺ຕຏ຺ຐານຠູຕໍ ເວສິຍາທິອໂຄຈຣຎ຺ຈ ປຫາຍ ກາຍິກວາຈສິກອວີຕິກ຺ກມນສງ຺ຂາເຕນ ອາຈາເຣນ ປິຓ຺ຑປາຕາທີນໍ ອຕ຺ຖາຍ ອຸປສງ຺ກມິຕຸໍ ຍຸຕ຺ຕຏ຺ຐານຠູເຕນ ໂຄຈເຣນ ຈ ຍຸຕ຺ໂຕ ສມ຺ປນ຺ໂນ, ສມ຺ປນ຺ນອາຈາຣໂຄຈໂຣຕິ ອຕ຺ໂຖ. ອາຊີໂວ ໂສຘິໂຕຕິ ເວຬຸທານາທິໍ ພຸທ຺ຘປຏິກຸຏ຺ຐໍ ອເນສນໍ ປຫາຍ ອນວຊ຺ຊຸປ຺ປາເທ ປຈ຺ຈເຍ ເສວນ຺ຕສ຺ສ ອາຊີໂວ ໂສຘິໂຕ ໂຫຕິ ສຸວິສຸທ຺ໂຘ, ໂສຘິຕຕ຺ຕາ ເອວ ອຄາຣຍ຺ໂຫ ວິຎ຺ຎູຫິ. ຈິຕ຺ຕສ຺ສ ຈ ສຓ຺ຐປນນ຺ຕິ ຍຖາ ຈກ຺ຂາທິທ຺ວາເຣຫິ ຣູປາທິອາຣມ຺ມເຓສຸ ອຠິຊ຺ຌາທໂຍ ນປ຺ປວຕ຺ຕນ຺ຕິ, ເອວໍ ທິຏ຺ເຐ ທິຏ຺ຐມຕ຺ຕາທິວເສນ ຈິຕ຺ຕສ຺ສ ສມ຺ມາ ຐປນໍ. ເອຕນ຺ຕິ ອາຈາຣໂຄຈຣສມ຺ປຕ຺ຕິ ອາຊີວປາຣິສຸທ຺ຘິ ອິນ຺ທ຺ຣິເຍສຸ ຄຸຕ຺ຕທ຺ວາຣຕາຕິ ເອຕໍ ຕຍໍ.

ຈາຣິຕ຺ຕນ຺ຕິ ຈຣິຕ຺ວາ ປຣິປູເຣຕພ຺ພສີລໍ. ວາຣິຕ຺ຕນ຺ຕິ ວິຣຕິຍາ ອກຣເຓນ ປຣິປູເຣຕພ຺ພສີລໍ. ອິຣິຍາປຖິຍໍ ປສາທນິຍນ຺ຕິ ປເຣສໍ ປສາທາວຫໍ ອາກປ຺ປສມ຺ປຕ຺ຕິນິມິຕ຺ຕໍ ອິຣິຍາປຖນິສ຺ສິຕໍ ສມ຺ປຊຎ຺ຎໍ. ອຘິຈິຕ຺ເຕ ຈ ອາໂຍໂຄຕິ ສມຖວິປສ຺ສນາສຸ ອນຸໂຍໂຄ ຠາວນາ.

ອາຣຎ຺ຎການີຕິ ອຣຎ຺ເຎ ປຣິຍາປນ຺ນານິ. ປນ຺ຕານີຕິ ວິວິຕ຺ຕານິ.

ສີລນ຺ຕິ ຈຕຸປາຣິສຸທ຺ຘິສີລໍ. ເຫຏ຺ຐາ ຫິ ຠິນ຺ທິຕ຺ວາ ວຸຕ຺ຕໍ, ອິຘ ອຠິນ຺ທິຕ຺ວາ ວທຕິ. ພາຫຸສຈ຺ຈນ຺ຕິ ພຫຸສ຺ສຸຕຠາໂວ. ໂສ ຫິ ຠາວນານຸໂຍຄສ຺ສ ພຫຸກາໂຣ, ໂພຊ຺ຌງ຺ຄໂກສລ຺ລອນຸຕ຺ຕຣສີຕິຠາວອຘິຈິຕ຺ຕຍຸຕ຺ຕຕາທີສຸ ສມ຺ມາ ປວິຈຍພຫຸລສ຺ສ ສມຖວິປສ຺ສນານຸໂຍໂຄ ສມ຺ປຊ຺ຊຕິ. ຘມ຺ມານໍ ປວິຈໂຍ ຍຖາຠູຕນ຺ຕິ ຣູປາຣູປຘມ຺ມານໍ ອວິປຣີຕສລກ຺ຂຓໂຕ ສາມຎ຺ຎລກ຺ຂຓໂຕ ຈ ປຣິວີມໍສາ. ອິມິນາ ອຘິປຎ຺ຎາຘມ຺ມວິປສ຺ສນມາຫ. ສຈ຺ຈານໍ ອຠິສມໂຍຕິ ທຸກ຺ຂາທີນໍ ອຣິຍສຈ຺ຈານໍ ປຣິຎ຺ຎາຠິສມຍາທິວເສນ ປຏິເວໂຘ.

ສ຺ວາຍໍ ສຈ຺ຈາຠິສມໂຍ ຍຖາ ໂຫຕິ, ຕໍ ທສ຺ເສຕຸໍ ‘‘ຠາເວຍ຺ຍາ’’ຕິອາທິ ວຸຕ຺ຕໍ. ຕຕ຺ຖ ຠາເວຍ຺ຍ ຈ ອນິຈ຺ຈນ຺ຕິ ‘‘ສພ຺ເພ ສງ຺ຂາຣາ ອນິຈ຺ຈາ’’ຕິອາທິນາ (ຘ. ປ. ໒໗໗) ອວິຠາຄໂຕ ‘‘ຍໍ ກິຎ຺ຈິ ຣູປໍ ອຕີຕານາຄຕປຈ຺ຈຸປ຺ປນ຺ນ’’ນ຺ຕິອາທິນາ (ວິຠ. ໒; ສໍ. ນິ. ໓.໔໙) ວິຠາຄໂຕ ວາ ສພ຺ພສງ຺ຂາເຣສຸ ອນິຈ຺ຈສຎ຺ຎໍ ຠາເວຍ຺ຍ ອຸປ຺ປາເທຍ຺ຍ ເຈວ ວຑ຺ເຒຍ຺ຍ ຈາຕິ ອຕ຺ໂຖ. ອນຕ຺ຕສຎ຺ຎນ຺ຕິ, ‘‘ສພ຺ເພ ຘມ຺ມາ ອນຕ຺ຕາ’’ຕິ ປວຕ຺ຕໍ ອນຕ຺ຕສຎ຺ຎຎ຺ຈ ຠາເວຍ຺ຍາຕິ ໂຍຊນາ. ເອວໍ ເສເສສຸປິ. ອສຸຠສຎ຺ຎນ຺ຕິ, ກຣຊກາເຍ ສພ຺ພສ຺ມິມ຺ປິ ວາ ເຕຠູມກສງ຺ຂາເຣ ກິເລສາສຸຈິປຄ຺ຆຣຓໂຕ ‘‘ອສຸຠາ’’ຕິ ປວຕ຺ຕສຎ຺ຎໍ. ທຸກ຺ຂສຎ຺ຎາປຣິວາຣາ ຫິ ອຍໍ, ເອເຕເນວ ເຈຕ຺ຖ ທຸກ຺ຂສຎ຺ຎາປິ ຄຫິຕາຕິ ເວທິຕພ຺ພໍ. ໂລກມ຺ຫິ ຈ ອນຠິຣຕິນ຺ຕິ ສພ຺ພໂລເກ ເຕຠູມເກສຸ ສງ຺ຂາເຣສຸ ອນາຠິຣຕິສຎ຺ຎໍ. ເອເຕນ ອາທີນວານຸປສ຺ສນໍ ນິພ຺ພິທານຸປສ຺ສນຎ຺ຈ ວທຕິ.

ເອວໍ ປນ ວິປສ຺ສນາຠາວນໍ ອນຸຍຸຕ຺ໂຕ ຕໍ ອຸສ຺ສຸກ຺ກາເປນ຺ໂຕ ອິເມ ຘມ຺ເມ ວຑ຺ເຒຍ຺ຍາຕິ ທສ຺ເສນ຺ໂຕ ‘‘ຠາເວຍ຺ຍ ຈ ໂພຊ຺ຌງ຺ເຄ’’ຕິ ຄາຖມາຫ. ຕສ຺ສຕ຺ໂຖ – ໂພຘິຍາ ສຕິອາທິສຕ຺ຕວິຘຘມ຺ມສາມຄ຺ຄິຍາ, ໂພຘິສ຺ສ ວາ ຕໍສມງ຺ຄິໂນ ປຸຄ຺ຄລສ຺ສ ອງ຺ຄາຕິ ໂພຊ຺ຌງ຺ຄາ, ສຕິອາທໂຍ ຘມ຺ມາ. ເຕ ສຕິອາທິເກ ສຕ຺ຕໂພຊ຺ຌງ຺ເຄ, ຉນ຺ທອາທີນິ ຈຕ຺ຕາຣິ ອິທ຺ຘິປາທານິ, ສທ຺ຘາທີນິ ປຎ຺ຈິນ຺ທ຺ຣິຍານິ, ສທ຺ຘາທີນິເຍວ ປຎ຺ຈ ພລານິ, ສມ຺ມາທິຏ຺ຐິອາທີນໍ ວເສນ ອຏ຺ຐງ຺ຄອຣິຍມຄ຺ຄຎ຺ຈ. ຈ-ສທ຺ເທນ ສຕິປຏ຺ຐານານິ ສມ຺ມປ຺ປຘານານິ ຈ ຄຫິຕານີຕິ ສພ຺ເພປິ ສຕ຺ຕຕິໍສປ຺ປເຠເທ ໂພຘິປກ຺ຂິຍຘມ຺ເມ ຠາເວຍ຺ຍ ອຸປ຺ປາເທຍ຺ຍ ເຈວ ວຑ຺ເຒຍ຺ຍ ຈ. ຕຕ຺ຖ ຍເທເຕສໍ ປຐມມຄ຺ຄກ຺ຂເຓ ອຸປ຺ປາທນໍ, ອຸປຣິມຄ຺ຄກ຺ຂເຓ ຈ ວຑ຺ຒນໍ, ເອຕໍ ສມຓສ຺ສ ຠິກ຺ຂຸໂນ ສາຣຸປ຺ປນ຺ຕິ.

ເອວໍ ໂພຘິປກ຺ຂິຍສຕ຺ຕຕິໍສຘມ຺ເມ ຠາເວນ຺ໂຕ ຍຖາ ມຄ຺ຄສຈ຺ຈໍ ຠາວນາຠິສມຍວເສນ ອຠິສເມຕິ, ເອວໍ ສມຸທຍສຈ຺ຈໍ ປຫານາຠິສມຍວເສນ, ນິໂຣຘສຈ຺ຈໍ ສຈ຺ຉິກິຣິຍາຠິສມຍວເສນ ອຠິສເມຕີຕິ ທສ຺ເສນ຺ໂຕ ‘‘ຕຓ຺ຫໍ ປຊເຫຍ຺ຍາ’’ຕິ ໂອສານຄາຖມາຫ. ຕຕ຺ຖ ຕຓ຺ຫໍ ປຊເຫຍ຺ຍາຕິ, ກາມຕຓ຺ຫາທິປເຠທໍ ສພ຺ພໍ ຕຓ຺ຫໍ ອຣິຍມຄ຺ເຄນ ອນວເສສໂຕ ສມຸຈ຺ຉິນ຺ເທຍ຺ຍ, ໂມນໍ ວຸຈ຺ຈຕິ ຎາຓໍ, ເຕນ ສມນ຺ນາຄຕຕ຺ຕາ ມຸນິ. ສມູລເກ ອາສເວ ປທາເລຍ຺ຍາຕິ ກາມຣາຄານຸສຍາທິສມູລເກ ກາມາສວາທິເກ ສພ຺ເພປິ ອາສເວ ຠິນ຺ເທຍ຺ຍ ສມຸຈ຺ຉິນ຺ເທຍ຺ຍ. ວິຫເຣຍ຺ຍ ວິປ຺ປມຸຕ຺ໂຕຕິ ເອວໍ ສພ຺ພໂສ ກິເລສານໍ ປຫີນຕ຺ຕາ ສພ຺ພຘິ ວິມຸຕ຺ໂຕ ສພ຺ພູປຘິປຏິນິສ຺ສຄ຺ຄໍ ນິໂຣຘໍ ນິພ຺ພານໍ ສຈ຺ຉິກຕ຺ວາ ວິຫເຣຍ຺ຍ. ເອຕນ຺ຕິ ຍເທຕໍ ວິຫຣຓໍ, ເອຕໍ ສມຓສ຺ສ ສມິຕປາປສ຺ສ ຠິກ຺ຂຸໂນ ປຕິຣູປໍ ສາຣຸປ຺ປນ຺ຕິ ອຕ຺ໂຖ.

ເອວໍ ເຖໂຣ ສມຓສາຣຸປ຺ປປຏິປຕ຺ຕິກິຕ຺ຕນມຸເຂນ ສາສນສ຺ສ ນິຍ຺ຍານິກຠາວໍ ຕພ຺ພິໂລມໂຕ ພາຫິຣກສມຍສ຺ສ ອນິຍ຺ຍານິກຕຎ຺ຈ ວິຠາເວສິ. ຕໍ ສຸຕ຺ວາ ເຕ ພ຺ຣາຫ຺ມຓມຫາສາລາ ສາສເນ ອຠິປ຺ປສນ຺ນາ ສຣຓາທີສຸ ປຕິຏ຺ຐຫິໍສຸ.

(ອປຣ)-ໂຄຕມຕ຺ເຖຣຄາຖາວຓ຺ຓນາ ນິຏ຺ຐິຕາ.

ທສກນິປາຕວຓ຺ຓນາ ນິຏ຺ຐິຕາ.