໘. ຣມຓີຍກຸຏິກຕ຺ເຖຣຄາຖາວຓ຺ຓນາ

ຣມຓີຍາ ເມ ກຸຏິກາຕິ ອາຍສ຺ມໂຕ ຣມຓີຍກຸຏິກຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ໂສປິ ກິຣ ປທຸມຸຕ຺ຕຣສ຺ສ ຠຄວໂຕ ກາເລ ກຸສລພີຊໂຣປນໍ ກຕ຺ວາ ເທວມນຸສ຺ເສສຸ ສໍສຣນ຺ໂຕ ອິໂຕ ອຏ຺ຐາຣສກປ຺ປສຕມຕ຺ຖເກ ອຕ຺ຖທສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ພຸທ຺ຘາຣຫໍ ອາສນໍ ຠຄວໂຕ ອທາສິ. ປຸປ຺ເຜຫິ ຈ ຠຄວນ຺ຕໍ ປູເຊຕ຺ວາ ປຎ຺ຈປຕິຏ຺ຐິເຕນ ວນ຺ທິຕ຺ວາ ປທກ຺ຂິຓໍ ກຕ຺ວາ ປກ຺ກາມິ. ເສສໍ ອຎ຺ຊນວນິຍຕ຺ເຖຣສ຺ສ ວຕ຺ຖຸມ຺ຫິ ວຸຕ຺ຕສທິສເມວ. ອຍໍ ປນ ວິເສໂສ – ອຍໍ ກິຣ ວຸຕ຺ຕນເຍນ ປພ຺ພຊິຕ຺ວາ ກຕປຸພ຺ພກິຈ຺ໂຈ ວຊ຺ຊິຣຏ຺ເຐ ອຎ຺ຎຕຣສ຺ມິໍ ຄາມກາວາເສ ກຸຏິກາຍໍ ວິຫຣຕິ, ສາ ໂຫຕິ ກຸຏິກາ ອຠິຣູປາ ທສ຺ສນີຍາ ປາສາທິກາ ສຸປຣິກມ຺ມກຕຠິຕ຺ຕິຠູມິກາ ອາຣາມໂປກ຺ຂຣຓິຣາມເຓຍ຺ຍາທິສມ຺ປນ຺ນາ ມຸຕ຺ຕາຊາລສທິສວາລິກາກິຓ຺ຓຠູມິຠາຄາ ເຖຣສ຺ສ ຈ ວຕ຺ຕສມ຺ປນ຺ນຕາຍ ສຸສມ຺ມຏ຺ຐງ຺ຄຓຕາທິນາ ຠິຍ຺ໂຍໂສມຕ຺ຕາຍ ຣມຓີຍຕຣາ ຫຸຕ຺ວາ ຕິຏ຺ຐຕິ. ໂສ ຕຕ຺ຖ ວິຫຣນ຺ໂຕ ວິປສ຺ສນໍ ປຏ຺ຐເປຕ຺ວາ ນຈິຣສ຺ເສວ ອຣຫຕ຺ເຕ ປຕິຏ຺ຐາສິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໑.໔໗-໕໒) –

‘‘ການນໍ ວນໂມຄ຺ຄຍ຺ຫ, ອປ຺ປສທ຺ທໍ ນິຣາກຸລໍ;

ສີຫາສນໍ ມຍາ ທິນ຺ນໍ, ອຕ຺ຖທສ຺ສິສ຺ສ ຕາທິໂນ.

‘‘ມາລາຫຕ຺ຖໍ ຄເຫຕ຺ວານ, ກຕ຺ວາ ຈ ນໍ ປທກ຺ຂິຓໍ;

ສຕ຺ຖາຣໍ ປຍິຣຸປາສິຕ຺ວາ, ປກ຺ກາມິໍ ອຸຕ຺ຕຣາມຸໂຂ.

‘‘ເຕນ ກມ຺ເມນ ທ຺ວິປທິນ຺ທ, ໂລກເຊຏ຺ຐ ນຣາສຠ;

ສນ຺ນິພ຺ພາເປມິ ອຕ຺ຕານໍ, ຠວາ ສພ຺ເພ ສມູຫຕາ.

‘‘ອຏ຺ຐາຣສກປ຺ປສເຕ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ສີຫາສນສ຺ສິທໍ ຜລໍ.

‘‘ອິໂຕ ສຕ຺ຕກປ຺ປສເຕ, ສນ຺ນິພ຺ພາປກຂຕ຺ຕິໂຍ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ເຖເຣ ຕຕ຺ຖ ວິຫຣນ຺ເຕ ກຸຏິກາຍ ຣມຓີຍຠາວໂຕ ວິຫາຣເປກ຺ຂກາ ມນຸສ຺ສາ ຕໂຕ ຕໂຕ ອາຄນ຺ຕ຺ວາ ກຸຏິໍ ປສ຺ສນ຺ຕິ. ອເຖກທິວສໍ ກຕິປຍາ ຘຸຕ຺ຕຊາຕິກາ ອິຕ຺ຖິໂຍ ຕຕ຺ຖ ຄຕາ ກຸຏິກາຍ ຣມຓີຍຠາວໍ ທິສ຺ວາ, ‘‘ເອຕ຺ຖ ວສນ຺ໂຕ ອຍໍ ສມໂຓ ສິຍາ ອມ຺ເຫຫິ ອາກຑ຺ຒນີຍຫທໂຍ’’ຕິ ອຘິປ຺ປາເຍນ – ‘‘ຣມຓີຍໍ ໂວ, ຠນ຺ເຕ, ວສນຏ຺ຐານໍ. ມຍມ຺ປິ ຣມຓີຍຣູປາ ປຐມໂຍພ຺ພເນ ຐິຕາ’’ຕິ ວຕ຺ວາ ອິຕ຺ຖິກຸຕ຺ຕາທີນິ ທສ຺ເສຕຸໍ ອາຣຠິໍສຸ. ເຖໂຣ ອຕ຺ຕໂນ ວີຕຣາຄຠາວໍ ປກາເສນ຺ໂຕ ‘‘ຣມຓີຍາ ເມ ກຸຏິກາ, ສທ຺ຘາເທຍ຺ຍາ ມໂນຣມາ’’ຕິ ຄາຖໍ ອຠາສິ.

໕໘. ຕຕ຺ຖ ຣມຓີຍາ ເມ ກຸຏິກາຕິ ‘‘ຣມຓີຍາ ເຕ, ຠນ຺ເຕ, ກຸຏິກາ’’ຕິ ຍໍ ຕຸມ຺ເຫຫິ ວຸຕ຺ຕໍ, ຕໍ ສຈ຺ຈໍ. ອຍໍ ມມ ວສນກຸຏິກາ ຣມຓີຍາ ມນຸຎ຺ຎຣູປາ, ສາ ຈ ໂຂ ສທ຺ຘາເທຍ຺ຍາ, ‘‘ເອວຣູປາຍ ມນາປໍ ກຕ຺ວາ ປພ຺ພຊິຕານໍ ທິນ຺ນາຍ ອິທໍ ນາມ ຜລໍ ໂຫຕີ’’ຕິ ກມ຺ມຜລານິ ສທ຺ທຫິຕ຺ວາ ສທ຺ຘາຍ ຘມ຺ມຈ຺ຉນ຺ເທນ ທາຕພ຺ພຕ຺ຕາ ສທ຺ຘາເທຍ຺ຍາ, ນ ຘເນນ ນິພ຺ພຕ຺ຕິຕາ. ສຍຎ຺ຈ ຕຖາທິນ຺ນານິ ສທ຺ຘາເທຍ຺ຍານິ ປສ຺ສນ຺ຕານໍ ປຣິຠຸຎ຺ຊນ຺ຕານຎ຺ຈ ມໂນ ຣເມຕີຕິ ມໂນຣມາ. ສທ຺ຘາເທຍ຺ຍຕ຺ຕາ ເອວ ຫິ ມໂນຣມາ, ສທ຺ຘາທີຫິ ເທຍ຺ຍຘມ຺ມໍ ສກ຺ກຈ຺ຈໍ ອຠິສງ຺ຂຣິຕ຺ວາ ເທນ຺ຕິ, ສທ຺ຘາເທຍ຺ຍຎ຺ຈ ປຣິຠຸຎ຺ຊນ຺ຕາ ສປ຺ປຸຣິສາ ທາຍກສ຺ສ ອວິສໍວາທນຕ຺ຖມ຺ປິ ປໂຍຄາສຍສມ຺ປນ຺ນາ ໂຫນ຺ຕິ, ນ ຕຸມ຺ເຫຫິ ຈິນ຺ຕິຕາກາເຣນ ປໂຍຄາສຍວິປນ຺ນາຕິ ອຘິປ຺ປາໂຍ. ນ ເມ ອຕ຺ໂຖ ກຸມາຣີຫີຕິ ຍສ຺ມາ ສພ຺ພໂສ ກາເມຫິ ວິນິວຕ຺ຕິຕມານໂສ ອຫໍ, ຕສ຺ມາ ນ ເມ ອຕ຺ໂຖ ກຸມາຣີຫິ. ກປ຺ປິຍກາຣກກມ຺ມວເສນປິ ຫິ ມາທິສານໍ ອິຕ຺ຖີຫິ ປໂຍຊນໍ ນາມ ນຕ຺ຖິ, ປເຄວ ຣາຄວເສນ, ຕສ຺ມາ ນ ເມ ອຕ຺ໂຖ ກຸມາຣີຫີຕິ. ກຸມາຣິຄ຺ຄຫຓຎ຺ເຈຕ຺ຖ ອຸປລກ຺ຂຓໍ ທຏ຺ຐພ຺ພໍ. ມາທິສສ຺ສ ນາມ ສນ຺ຕິເກ ເອວໍ ປຏິປຊ຺ຊາຫີຕິ ອຍຸຕ຺ຕກາຣິນີຫິ ຍາວ ອປຣທ຺ຘຎ຺ຈ ຕຸມ຺ເຫຫິ ສມານຊ຺ຌາສຍານໍ ປຸຣໂຕ ອຍໍ ກິຣິຍາ ໂສເຠຍ຺ຍາຕິ ທສ຺ເສນ຺ໂຕ ອາຫ ‘‘ເຍສໍ ອຕ຺ໂຖ ຕຫິໍ ຄຈ຺ຉຖ ນາຣິໂຍ’’ຕິ. ຕຕ຺ຖ ເຍສນ຺ຕິ ກາເມສຸ ອວີຕຣາຄານໍ. ອຕ຺ໂຖຕິ ປໂຍຊນໍ. ຕຫິນ຺ຕິ ຕຕ຺ຖ ເຕສໍ ສນ຺ຕິກໍ. ນາຣິໂຍຕິ ອາລປນໍ. ຕໍ ສຸຕ຺ວາ ອິຕ຺ຖິໂຍ ມງ຺ກຸຠູຕາ ປຕ຺ຕກ຺ຂນ຺ຘາ ອາຄຕມຄ຺ເຄເນວ ຄຕາ. ເອຕ຺ຖ ຈ ‘‘ນ ເມ ອຕ຺ໂຖ ກຸມາຣີຫີ’’ຕິ ກາເມຫິ ອນຕ຺ຖິກຠາວວຈເນເນວ ເຖເຣນ ອຣຫຕ຺ຕໍ ພ຺ຍາກຕນ຺ຕິ ທຏ຺ຐພ຺ພໍ.

ຣມຓີຍກຸຏິກຕ຺ເຖຣຄາຖາວຓ຺ຓນາ ນິຏ຺ຐິຕາ.