໘. ສຎ຺ຊຍຕ຺ເຖຣຄາຖາວຓ຺ຓນາ

ຍໂຕ ອຫນ຺ຕິ ອາຍສ຺ມໂຕ ສຎ຺ຊຍຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ໂສປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ມຫຕິ ປູເຄ ສໍກິຕ຺ຕິວເສນ ວຕ຺ຖຸໍ ສງ຺ຆຣິຕ຺ວາ ຣຕນຕ຺ຕຍໍ ອຸທ຺ທິສ຺ສ ປຸຎ຺ຎໍ ກໂຣນ຺ໂຕ ສຍໍ ທລິທ຺ໂທ ຫຸຕ຺ວາ ເນສໍ ຄຓາທີນໍ ປຸຎ຺ຎກິຣິຍາຍ ພ຺ຍາວໂຏ ອໂຫສິ. ກາເລນ ກາລໍ ຠຄວນ຺ຕໍ ອຸປສງ຺ກມິຕ຺ວາ ວນ຺ທິຕ຺ວາ ປສນ຺ນມານໂສ ຠິກ຺ຂູນຎ຺ຈ ຕໍ ຕໍ ເວຍ຺ຍາວຈ຺ຈໍ ອກາສິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ໂຕ ອປຣາປຣໍ ປຸຎ຺ຎານິ ກຕ຺ວາ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ວິຠວສມ຺ປນ຺ນສ຺ສ ພ຺ຣາຫ຺ມຓສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ ສຎ຺ຊໂຍ ນາມ ນາເມນ, ໂສ ວຍປ຺ປຕ຺ໂຕ ພ຺ຣຫ຺ມາຍຸໂປກ຺ຂຣສາຕິອາທິເກ ອຠິຎ຺ຎາເຕ ພ຺ຣາຫ຺ມເຓ ສາສເນ ອຠິປ຺ປສນ຺ເນ ທິສ຺ວາ ສຎ຺ຊາຕປ຺ປສາໂທ ສຕ຺ຖາຣໍ ອຸປສງ຺ກມິ. ຕສ຺ສ ສຕ຺ຖາ ຘມ຺ມໍ ເທເສສິ. ໂສ ຘມ຺ມໍ ສຸຕ຺ວາ ໂສຕາປນ຺ໂນ ອໂຫສິ. ອປຣຠາເຄ ປພ຺ພຊິ. ປພ຺ພຊນ຺ໂຕ ຈ ຂຸຣຄ຺ເຄເຍວ ຉຬຠິຎ຺ໂຎ ອໂຫສີ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໐.໕໑-໕໕) –

‘‘ວິປສ຺ສິສ຺ສ ຠຄວໂຕ, ມຫາປູຄຄໂຓ ອຫຸ;

ເວຍ຺ຍາວຈ຺ຈກໂຣ ອາສິໍ, ສພ຺ພກິຈ຺ເຈສຸ ວາວໂຏ.

‘‘ເທຍ຺ຍຘມ຺ໂມ ຈ ເມ ນຕ຺ຖິ, ສຸຄຕສ຺ສ ມເຫສິໂນ;

ອວນ຺ທິໍ ສຕ຺ຖຸໂນ ປາເທ, ວິປ຺ປສນ຺ເນນ ເຈຕສາ.

‘‘ເອກນວຸຕິໂຕ ກປ຺ເປ, ເວຍ຺ຍາວຈ຺ຈໍ ອກາສຫໍ;

ທຸຄ຺ຄຕິໍ ນາຠິຊານາມິ, ເວຍ຺ຍາວຈ຺ຈສ຺ສິທໍ ຜລໍ.

‘‘ອິໂຕ ຈ ອຏ຺ຐເມ ກປ຺ເປ, ຣາຊາ ອາສິໍ ສຸຈິນ຺ຕິໂຕ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ຉຬຠິຎ຺ໂຎ ປນ ຫຸຕ຺ວາ ອຎ຺ຎໍ ພ຺ຍາກໂຣນ຺ໂຕ ‘‘ຍໂຕ ອຫໍ ປພ຺ພຊິໂຕ’’ຕິ ຄາຖໍ ອຠາສິ.

໔໘. ຕຕ຺ຖ ຍໂຕ ອຫໍ ປພ຺ພຊິໂຕຕິ ຍໂຕ ປຠຸຕິ ຍໂຕ ປຏ຺ຐາຍ ອຫໍ ປພ຺ພຊິໂຕ. ປພ຺ພຊິຕກາລໂຕ ປຏ຺ຐາຍ ນາຠິຊານາມິ ສງ຺ກປ຺ປໍ, ອນຣິຍໍ ໂທສສໍຫິຕນ຺ຕິ ຣາຄາທິໂທສສໍຫິຕໍ ຕໂຕ ເອວ ອນຣິຍໍ ນິຫີນໍ, ອຣິເຍຫິ ວາ ອນຣຓີຍຕາຍ ອນຣິເຍຫິ ອຣຓີຍຕາຍ ຈ ອນຣິຍໍ ປາປກໍ ອາຣມ຺ມເຓ ອຠູຕຄຸຓາທິສງ຺ກປ຺ປນໂຕ ‘‘ສງ຺ກປ຺ໂປ’’ຕິ ລທ຺ຘນາມໍ ກາມວິຕກ຺ກາທິມິຈ຺ຉາວິຕກ຺ກໍ ອຸປ຺ປາທິຕໍ ນາຠິຊານາມີຕິ, ‘‘ຂຸຣຄ຺ເຄເຍວ ມຍາ ອຣຫຕ຺ຕໍ ປຕ຺ຕ’’ນ຺ຕິ ອຎ຺ຎໍ ພ຺ຍາກາສິ.

ສຎ຺ຊຍຕ຺ເຖຣຄາຖາວຓ຺ຓນາ ນິຏ຺ຐິຕາ.