໙. ຕິສ຺ສຕ຺ເຖຣຄາຖາວຓ຺ຓນາ

ສຕ຺ຕິຍາ ວິຍ ໂອມຏ຺ໂຐຕິ ອາຍສ຺ມໂຕ ຕິສ຺ສຕ຺ເຖຣສ຺ສ ຄາຖາ. ກາ ອຸປ຺ປຕິ? ອຍມ຺ປິ ກິຣ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ຕິສ຺ສສ຺ສ ຠຄວໂຕ ໂພຘິຍາ ມູເລ ປຸຣາຓປຓ຺ຓານິ ນີຫຣິຕ຺ວາ ໂສເຘສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ກປິລວຕ຺ຖຸນຄເຣ ຠຄວໂຕ ປິຕຸຈ຺ຉາປຸຕ຺ໂຕ ຫຸຕ຺ວາ ນິພ຺ພຕ຺ຕິ ຕິສ຺ໂສ ນາມ ນາເມນ. ໂສ ຠຄວນ຺ຕໍ ອນຸປພ຺ພຊິຕ຺ວາ ອຸປສມ຺ປນ຺ໂນ ຫຸຕ຺ວາ ອຣຎ຺ຎາຍຕເນ ວິຫຣນ຺ໂຕ ຊາຕິໍ ປຏິຈ຺ຈ ມານໍ ກໂຣນ຺ໂຕ ໂກຘູປາຍາສພຫຸໂລ ຈ ອຸຊ຺ຌານພຫຸໂລ ຈ ຫຸຕ຺ວາ ວິຈຣຕິ, ສມຓຘມ຺ເມ ອຸສ຺ສຸກ຺ກໍ ນ ກໂຣຕິ. ອຖ ນໍ ສຕ຺ຖາ ເອກທິວສໍ ທິວາຏ຺ຐາເນ ວິວຏມຸຂໍ ນິທ຺ທາຍນ຺ຕໍ ທິພ຺ພຈກ຺ຂຸນາ ໂອໂລເກນ຺ໂຕ ສາວຕ຺ຖິໂຕ ອາກາເສນ ຄນ຺ຕ຺ວາ ຕສ຺ສ ອຸປຣິ ອາກາເສເຍວ ຐຕ຺ວາ ໂອຠາສໍ ຜຣິຕ຺ວາ ເຕໂນຠາເສນ ປຏິພຸທ຺ຘສ຺ສ ສຕິໍ ອຸປ຺ປາເທຕ຺ວາ ໂອວາທໍ ເທນ຺ໂຕ ‘‘ສຕ຺ຕິຍາ ວິຍ ໂອມຏ຺ໂຐ’’ຕິ ຄາຖໍ ອຠາສິ.

໓໙. ຕຕ຺ຖ ສຕ຺ຕິຍາຕິ ເທສນາສີສເມຕໍ, ເອກໂຕຘາຣາທິນາ ສຕ຺ເຖນາຕິ ອຕ຺ໂຖ. ໂອມຏ຺ໂຐຕິ ປຫໂຕ. ຈຕ຺ຕາໂຣ ຫິ ປຫາຣາ ໂອມຏ຺ໂຐ ອຸມ຺ມຏ຺ໂຐ ມຏ຺ໂຐ ວິມຏ຺ໂຐຕິ. ຕຕ຺ຖ ອຸປຣິ ຐຕ຺ວາ ອໂຘມຸຂໍ ທິນ຺ນປຫາໂຣ ໂອມຏ຺ໂຐ ນາມ, ເຫຏ຺ຐາ ຐຕ຺ວາ ອຸທ຺ຘມ຺ມຸຂໍ ທິນ຺ນປຫາໂຣ ອຸມ຺ມຏ຺ໂຐ ນາມ, ອຄ຺ຄຬສູຈິ ວິຍ ວິນິວິຊ຺ຌິຕ຺ວາ ຄໂຕ ມຏ຺ໂຐ ນາມ, ເສໂສ ສພ຺ໂພປິ ວິມຏ຺ໂຐ ນາມ. ອິມສ຺ມິໍ ປນ ຐາເນ ໂອມຏ຺ໂຐ ຄຫິໂຕ. ໂສ ຫິ ສພ຺ພທາຣຸໂຓ ທຸຣຸທ຺ຘຣຓສລ຺ໂລ ທຸຕ຺ຕິກິຈ຺ໂຉ ອນ຺ໂຕໂທໂສ ອນ຺ໂຕປຸພ຺ພໂລຫິໂຕວ ໂຫຕິ, ປຸພ຺ພໂລຫິຕໍ ອນິກ຺ຂມິຕ຺ວາ ວຓມຸຂໍ ປຣິໂຍນນ຺ຘິຕ຺ວາ ຕິຏ຺ຐຕິ. ປຸພ຺ພໂລຫິຕໍ ນີຫຣິຕຸກາເມຫິ ມຎ຺ເຈນ ສທ຺ຘິໍ ພນ຺ຘິຕ຺ວາ ອໂຘສິໂຣ ກາຕພ຺ໂພ ໂຫຕິ, ມຣຓໍ ວາ ມຣຓມຕ຺ຕໍ ວາ ທຸກ຺ຂໍ ປາປຸຓນ຺ຕິ. ຑຍ຺ຫມາເນຕິ ອຄ຺ຄິນາ ຌາຍມາເນ. ມຕ຺ຖເກຕິ ສີເສ. ອິທໍ ວຸຕ຺ຕໍ ໂຫຕິ – ຍຖາ ສຕ຺ຕິຍາ ໂອມຏ຺ໂຐ ປຸຣິໂສ ສລ຺ລຸພ຺ພາຫນວຓຕິກິຈ຺ຉນານໍ ອຕ຺ຖາຍ ວີຣິຍໍ ອາຣຠຕິ ຕາທິສໍ ປໂຍຄໍ ກໂຣຕິ ປຣກ຺ກມຕິ, ຍຖາ ຈ ຑຍ຺ຫມາເນ ມຕ຺ຖເກ ອາທິຕ຺ຕສີໂສ ປຸຣິໂສ ຕສ຺ສ ນິພ຺ພາປນຕ຺ຖໍ ວີຣິຍໍ ອາຣຠຕິ ຕາທິສໍ ປໂຍຄໍ ກໂຣຕິ, ເອວເມວໍ, ຠິກ຺ຂຸ, ກາມຣາຄປ຺ປຫານາຍ ສໂຕ ອປ຺ປມຕ຺ໂຕ ອຕິວິຍ ອຸສ຺ສາຫຊາໂຕ ຫຸຕ຺ວາ ວິຫເຣຍ຺ຍາຕິ.

ເອວໍ ຠຄວາ ຕສ຺ສ ເຖຣສ຺ສ ໂກຘູປາຍາສວູປສມາຍ ໂອວາທໍ ເທນ຺ໂຕ ຕເທກຏ຺ຐຕາຍ ກາມຣາຄປ຺ປຫານສີເສນ ເທສນໍ ນິຏ຺ຐາເປສິ. ເຖໂຣ ອິມໍ ຄາຖໍ ສຸຕ຺ວາ ສໍວິຄ຺ຄຫທໂຍ ວິປສ຺ສນາຍ ຍຸຕ຺ຕປ຺ປຍຸຕ຺ໂຕ ວິຫາສິ. ຕສ຺ສ ອຊ຺ຌາສຍໍ ຎຕ຺ວາ ສຕ຺ຖາ ສໍຍຸຕ຺ຕເກ ຕິສ຺ສຕ຺ເຖຣສຸຕ຺ຕໍ (ສໍ. ນິ. ໓.໘໔) ເທເສສິ. ໂສ ເທສນາປຣິໂຍສາເນ ອຣຫຕ຺ເຕ ປຕິຏ຺ຐາສິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໓.໖໖-໗໓) –

‘‘ເທວໂລເກ ມນຸສ຺ເສ ເຈ, ອນຸໂຠຕ຺ວາ ອຸໂຠ ຍເສ;

ອວສາເນ ຈ ນິພ຺ພານໍ, ສິວໍ ປຕ຺ໂຕ ອນຸຕ຺ຕຣໍ.

‘‘ສມ຺ພຸທ຺ຘໍ ອຸທ຺ທິສິຕ຺ວານ, ໂພຘິໍ ວາ ຕສ຺ສ ສຕ຺ຖຸໂນ;

ໂຍ ປຸຎ຺ຎໍ ປສວີ ໂປໂສ, ຕສ຺ສ ກິໍ ນາມ ທຸລ຺ລຠໍ.

‘‘ມຄ຺ເຄ ຜເລ ອາຄເມ ຈ, ຌານາຠິຎ຺ຎາຄຸເຓສຸ ຈ;

ອຎ຺ເຎສໍ ອຘິໂກ ຫຸຕ຺ວາ, ນິພ຺ພາຍາມິ ອນາສໂວ.

‘‘ປຸເຣຫໍ ໂພຘິຍາ ປຕ຺ຕໍ, ຉຑ຺ເຑຕ຺ວາ ຫຏ຺ຐມານໂສ;

ອິເມຫິ ວີສຕງ຺ເຄຫິ, ສມງ຺ຄີ ໂຫມິ ສພ຺ພຖາ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ເຖໂຣ ອຎ຺ຎໍ ພ຺ຍາກໂຣນ຺ໂຕ ສຕ຺ຖາຣໍ ປູເຊຕຸໍ ຕເມວ ຄາຖໍ ອຠາສິ.

ຕິສ຺ສຕ຺ເຖຣຄາຖາວຓ຺ຓນາ ນິຏ຺ຐິຕາ.