໓. ວນວຈ຺ຉຕ຺ເຖຣຄາຖາວຓ຺ຓນາ

ອຈ຺ໂຉທິກາ ປຸຖຸສິລາຕິ ອາຍສ຺ມໂຕ ວນວຈ຺ຉຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລພີຊໍ ໂຣເປນ຺ໂຕ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ປຣສ຺ສ ກມ຺ມໍ ກຕ຺ວາ ຊີວນ຺ໂຕ ກສ຺ສຈິ ອປຣາຘໍ ກຕ຺ວາ ມຣຓຠເຍນ ຕຊ຺ຊິໂຕ ປລາຍນ຺ໂຕ ອນ຺ຕຣາມຄ຺ເຄ ໂພຘິຣຸກ຺ຂໍ ທິສ຺ວາ ປສນ຺ນມານໂສ ຕສ຺ສ ມູລໍ ສມ຺ມຊ຺ຊິຕ຺ວາ ປິຓ຺ຑິພນ຺ເຘຫິ ອໂສກປຸປ຺ເຜຫິ ປູຊໍ ກຕ຺ວາ ວນ຺ທິຕ຺ວາ ໂພຘິໍ ອຠິມຸໂຂ ນມສ຺ສມາໂນ ປລ຺ລງ຺ເກນ ນິສິນ຺ໂນ ມາເຣຕຸໍ ອາຄເຕ ປຈ຺ຈຕ຺ຖິເກ ທິສ຺ວາ ເຕສຸ ຈິຕ຺ຕໍ ອໂກເປຕ຺ວາ ໂພຘິໍ ເອວ ອາວຊ຺ເຊນ຺ໂຕ ສຕໂປຣິເສ ປປາເຕ ປປຕິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິຕ຺ວາ ອປຣາປຣໍ ປຸຎ຺ຎານິ ກຕ຺ວາ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ວິຠວສມ຺ປນ຺ນສ຺ສ ພ຺ຣາຫ຺ມຓສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ, ‘‘ວຈ຺ໂຉ’’ຕິສ຺ສ ນາມໍ ອໂຫສິ. ໂສ ວຍປ຺ປຕ຺ໂຕ ພິມ຺ພິສາຣສມາຄເມ ປຏິລທ຺ຘສທ຺ໂຘ ປພ຺ພຊິຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໖.໗-໑໔) –

‘‘ປຣກມ຺ມາຍເນ ຍຸຕ຺ໂຕ, ອປຣາຘໍ ອກາສຫໍ;

ວນນ຺ຕໍ ອຠິຘາວິສ຺ສໍ, ຠຍເວຣສມປ຺ປິໂຕ.

‘‘ປຸປ຺ຜິຕໍ ປາທປໍ ທິສ຺ວາ, ປິຓ຺ຑິພນ຺ຘໍ ສຸນິມ຺ມິຕໍ;

ຕມ຺ພປຸປ຺ຜໍ ຄເຫຕ຺ວານ, ໂພຘິຍໍ ໂອກິຣິໍ ອຫໍ.

‘‘ສມ຺ມຊ຺ຊິຕ຺ວານ ຕໍ ໂພຘິໍ, ປາຏລິໍ ປາທປຸຕ຺ຕມໍ;

ປລ຺ລງ຺ກໍ ອາຠຸຊິຕ຺ວານ, ໂພຘິມູເລ ອຸປາວິສິໍ.

‘‘ຄຕມຄ຺ຄໍ ຄເວສນ຺ຕາ, ອາຄຈ຺ຉຸໍ ມມ ສນ຺ຕິກໍ;

ເຕ ຈ ທິສ຺ວານຫໍ ຕຕ຺ຖ, ອາວຊ຺ຊິໍ ໂພຘິມຸຕ຺ຕມໍ.

‘‘ວນ຺ທິຕ຺ວານ ອຫໍ ໂພຘິໍ, ວິປ຺ປສນ຺ເນນ ເຈຕສາ;

ອເນກຕາເລ ປປຕິໍ, ຄິຣິທຸຄ຺ເຄ ຠຍານເກ.

‘‘ເອກນວຸຕິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ໂພຘິປູຊາຍິທໍ ຜລໍ.

‘‘ອິໂຕ ຈ ຕຕິເຍ ກປ຺ເປ, ຣາຊາ ສຸສຎ຺ຎໂຕ ອຫໍ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ວິເວກາຠິຣຕິຍາ ວເນເຍວ ວສິ, ເຕນ ວນວຈ຺ໂຉຕິ ສມຎ຺ຎາ ອຸທປາທິ. ອຖ ກທາຈິ ເຖໂຣ ຎາຕິຊນານຸຄ຺ຄຫຕ຺ຖໍ ຣາຊຄຫໍ ຄໂຕ ຕຕ຺ຖ ຎາຕເກຫິ ອຸປຏ຺ຐິຍມາໂນ ກຕິປາຫໍ ວສິຕ຺ວາ ຄມນາກາຣໍ ສນ຺ທສ຺ເສຕິ. ຕໍ ຎາຕກາ, ‘‘ຠນ຺ເຕ, ອມ຺ຫາກໍ ອນຸຄ຺ຄຫຕ຺ຖໍ ຘຸຣວິຫາເຣ ວສຖ, ມຍໍ ອຸປຏ຺ຐຫິສ຺ສາມາ’’ຕິ ຍາຈິໍສຸ. ເຖໂຣ ເຕສໍ ປພ຺ພຕຣາມເຓຍ຺ຍກິຕ຺ຕນາປເທເສນ ວິເວກາຠິຣຕິໍ ນິເວເທນ຺ໂຕ –

໑໑໓. ‘‘ອຈ຺ໂຉທິກາ ປຸຖຸສິລາ, ໂຄນງ຺ຄຸລມິຄາຍຸຕາ;

ອມ຺ພຸເສວາລສຎ຺ຉນ຺ນາ, ເຕ ເສລາ ຣມຍນ຺ຕິ ມ’’ນ຺ຕິ. – ຄາຖໍ ອຠາສິ;

ຕຕ຺ຖ ອຈ຺ໂຉທິກາຕິ ອຈ຺ຉໍ ອພຫລໍ ສຸຂຸມໍ ອຸທກໍ ເອເຕສູຕິ ‘‘ອຈ຺ໂຉທກາ’’ຕິ ວຕ຺ຕພ຺ເພ ລິງ຺ຄວິປລ຺ລາເສນ ອຈ຺ໂຉທິກາ’’ຕິ ວຸຕ຺ຕໍ. ເອເຕນ ເຕສໍ ອຸທກສມ຺ປຕ຺ຕິໍ ທສ຺ເສຕິ. ປຸຖຸສິລາຕິ ປຸຖຸລາ ວິຕ຺ຖຕາ ມຸທຸສຸຂສມ຺ຜສ຺ສາ ສິລາ ເອເຕສູຕິ ປຸຖຸສິລາ. ເອເຕນ ນິສຊ຺ຊນຏ຺ຐານສມ຺ປຕ຺ຕິໍ ທສ຺ເສຕິ. ຄຸນ຺ນໍ ວິຍ ນງ຺ຄຸລໍ ນງ຺ຄຸຏ຺ຐໍ ເອເຕສນ຺ຕິ ໂຄນງ຺ຄຸລາ, ກາຬມກ຺ກຏາ, ‘‘ປກຕິມກ຺ກຏາ’’ຕິປິ ວທນ຺ຕິເຍວ. ໂຄນງ຺ຄຸເລຫິ ຈ ປສທາທິເກຫິ ມິເຄຫິ ຈ ຕຫໍ ຕຫໍ ວິຈຣນ຺ເຕຫິ ອາຍຸຕາ ມິສ຺ສິຕາຕິ ໂຄນງ຺ຄຸລມິຄາຍຸຕາ. ເອເຕນ ເຕສໍ ອມນຸສ຺ສູປຈາຣິຕາຍ ອຣຎ຺ຎລກ຺ຂຓູເປຕຕໍ ທສ຺ເສຕິ. ອມ຺ພຸເສວາລສຎ຺ຉນ຺ນາຕິ ປສວນໂຕ ສຕຕໍ ປຄ຺ຆຣມານສລິລຕາຍ ຕຫໍ ຕຫໍ ອຸທກເສວາລສຎ຺ຉາທິຕາ. ເຕ ເສລາ ຣມຍນ຺ຕິ ມນ຺ຕິ ຍຕ຺ຖາຫໍ ວສາມິ; ເຕ ເອທິສາ ເສລາ ປພ຺ພຕາ ວິເວກາຠິຣຕິຍາ ມໍ ຣມຍນ຺ຕິ, ຕສ຺ມາ ຕຕ຺ເຖວາຫໍ ຄຈ຺ຉາມີຕິ ອຘິປ຺ປາໂຍ. ອິທເມວ ຈ ເຖຣສ຺ສ ອຎ຺ຎາພ຺ຍາກຣຓໍ ອໂຫສິ.

ວນວຈ຺ຉຕ຺ເຖຣຄາຖາວຓ຺ຓນາ ນິຏ຺ຐິຕາ.