໘. ຘມ຺ມສວປິຕຸຕ຺ເຖຣຄາຖາວຓ຺ຓນາ

ສ ວີສວສ຺ສສຕິໂກຕິ ອາຍສ຺ມໂຕ ຘມ຺ມສວປິຕຸຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ພຸທ຺ຘສຸຎ຺ເຎ ໂລເກ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ຠູຕຄເຓ ນາມ ປພ຺ພເຕ ວິຫຣນ຺ຕໍ ປຈ຺ເຈກສມ຺ພຸທ຺ຘໍ ທິສ຺ວາ ປສນ຺ນມານໂສ ຕິຓສູລປຸປ຺ເຜຫິ ປູຊໍ ອກາສິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິຕ຺ວາ ອປຣາປຣໍ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ມຄຘຣຏ຺ເຐ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ທາຣປຣິຄ຺ຄຫໍ ກຕ຺ວາ ຘມ຺ມສວໍ ນາມ ປຸຕ຺ຕໍ ລຠິຕ຺ວາ ຕສ຺ມິໍ ປພ຺ພຊິເຕ ສຍມ຺ປິ ວີສວສ຺ສສຕິໂກ ຫຸຕ຺ວາ, ‘‘ມມ ປຸຕ຺ໂຕ ຕາວ ຕຣຸໂຓ ປພ຺ພຊິ, ອຖ ກສ຺ມາ ນາຫໍ ປພ຺ພຊິສ຺ສາມີ’’ຕິ ສຎ຺ຊາຕສໍເວໂຄ ສຕ຺ຖຸ ສນ຺ຕິກໍ ຄນ຺ຕ຺ວາ ຘມ຺ມໍ ສຸຕ຺ວາ ປພ຺ພຊິຕ຺ວາ ວິປສ຺ສນໍ ປຏ຺ຐເປຕ຺ວາ ນຈິຣສ຺ເສວ ອຣຫຕ຺ຕໍ ສຈ຺ຉາກາສິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໖.໓໕-໓໘) –

‘‘ຫິມວນ຺ຕສ຺ສາວິທູເຣ, ຠູຕຄໂຓ ນາມ ປພ຺ພໂຕ;

ວສເຕໂກ ຊິໂນ ຕຕ຺ຖ, ສຍມ຺ຠູ ໂລກນິສ຺ສໂຏ.

‘‘ຕິຓສູລໍ ຄເຫຕ຺ວານ, ພຸທ຺ຘສ຺ສ ອຠິໂຣປຍິໍ;

ເອກູນສຕສຫສ຺ສໍ, ກປ຺ປໍ ນ ວິນິປາຕິໂກ.

‘‘ອິໂຕ ເອກາທເສ ກປ຺ເປ, ເອໂກສິໍ ຘຣຓີຣຸໂຫ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ສຎ຺ຊາຕໂສມນສ຺ໂສ ອຸທາເນນ຺ໂຕ –

໑໐໘. ‘‘ສ ວີສວສ຺ສສຕິໂກ, ປພ຺ພຊິໍ ອນຄາຣິຍໍ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນ’’ນ຺ຕິ. – ຄາຖໍ ອຠາສິ;

ຕຕ຺ຖ ສ ວີສວສ຺ສສຕິໂກຕິ ໂສ ວີສໍວສ຺ສສຕິໂກ, ໂສ ອຫໍ ຊາຕິຍາ ວີສາຘິກວສ຺ສສຕິໂກ ສມາໂນ. ປພ຺ພຊິນ຺ຕິ ປພ຺ພຊ຺ຊໍ ອຸປຄຈ຺ຉິໍ. ເສສໍ ວຸຕ຺ຕນຍເມວ. ອິທເມວ ຈ ອິມສ຺ສ ເຖຣສ຺ສ ອຎ຺ຎາພ຺ຍາກຣຓໍ ອໂຫສິ.

ຘມ຺ມສວປິຕຸຕ຺ເຖຣຄາຖາວຓ຺ຓນາ ນິຏ຺ຐິຕາ.