໙. ສງ຺ຆຣກ຺ຂິຕຕ຺ເຖຣຄາຖາວຓ຺ຓນາ

ນ ນູນາຍໍ ປຣມຫິຕານຸກມ຺ປິໂນຕິ ອາຍສ຺ມໂຕ ສງ຺ຆຣກ຺ຂິຕຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ໂສປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ອິໂຕ ຈຕຸນວຸເຕ ກປ຺ເປ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ປພ຺ພຕປາເທ ວສນ຺ເຕ ສຕ຺ຕ ປຈ຺ເຈກສມ຺ພຸທ຺ເຘ ທິສ຺ວາ ປສນ຺ນມານໂສ ກທມ຺ພປຸປ຺ຜານິ ຄເຫຕ຺ວາ ປູເຊສິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິຕ຺ວາ ອປຣາປຣໍ ປຸຎ຺ຎານິ ກຕ຺ວາ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ອິພ຺ຠກຸເລ ນິພ຺ພຕ຺ຕິ, ຕສ຺ສ ສງ຺ຆຣກ຺ຂິໂຕຕິ ນາມໍ ອໂຫສິ. ໂສ ວິຎ຺ຎຸຕໍ ປຕ຺ໂຕ ປຏິລທ຺ຘສທ຺ໂຘ ປພ຺ພຊິຕ຺ວາ ກມ຺ມຏ຺ຐານໍ ຄເຫຕ຺ວາ ອຎ຺ຎຕຣໍ ຠິກ຺ຂຸໍ ສຫາຍໍ ກຕ຺ວາ ອຣຎ຺ເຎ ວິຫຣຕິ. ເຖຣສ຺ສ ວສນຏ຺ຐານໂຕ ອວິທູເຣ ວນຄຸມ຺ເພ ເອກາ ມິຄີ ວິຊາຍິຕ຺ວາ ຕຣຸຓໍ ຉາປໍ ຣກ຺ຂນ຺ຕີ ຉາຕຊ຺ຌຕ຺ຕາປິ ປຸຕ຺ຕສິເນເຫນ ທູເຣ ໂຄຈຣາຍ ນ ຄຈ຺ຉຕິ, ອາສນ຺ເນ ຈ ຕິໂຓທກສ຺ສ ອລາເຠນ ກິລມຕິ. ຕໍ ທິສ຺ວາ ເຖໂຣ, ‘‘ອໂຫ ວຕາຍໍ ໂລໂກ ຕຓ຺ຫາພນ຺ຘນພທ຺ໂຘ ມຫາທຸກ຺ຂໍ ອນຸຠວຕິ, ນ ຕໍ ຉິນ຺ທິຕຸໍ ສກ຺ໂກຕີ’’ຕິ ສໍເວຄຊາໂຕ ຕເມວ ອງ຺ກຸສໍ ກຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໖.໓໐-໓໔) –

‘‘ຫິມວນ຺ຕສ຺ສາວິທູເຣ, ກຸກ຺ກຸໂຏ ນາມ ປພ຺ພໂຕ;

ຕມ຺ຫິ ປພ຺ພຕປາທມ຺ຫິ, ສຕ຺ຕ ພຸທ຺ຘາ ວສນ຺ຕິ ເຕ.

‘‘ກທມ຺ພໍ ປຸປ຺ຜິຕໍ ທິສ຺ວາ, ທີປຣາຊໍວ ອຸຄ຺ຄຕໍ;

ອຸໂຠ ຫຕ຺ເຖຫິ ປຄ຺ຄຍ຺ຫ, ສຕ຺ຕ ພຸທ຺ເຘ ສໂມກິຣິໍ.

‘‘ຈຕຸນ຺ນວຸຕິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

‘‘ທ຺ເວນວຸເຕ ອິໂຕ ກປ຺ເປ, ສຕ຺ຕາສຸໍ ປຸປ຺ຜນາມກາ;

ສຕ຺ຕຣຕນສມ຺ປນ຺ນາ, ຈກ຺ກວຕ຺ຕີ ມຫພ຺ພລາ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ທຸຕິຍກໍ ຠິກ຺ຂຸໍ ມິຈ຺ຉາວິຕກ຺ກພຫຸລໍ ວິຫຣນ຺ຕໍ ຎຕ຺ວາ ຕເມວ ມິຄິໍ ອຸປມໍ ກຣິຕ຺ວາ ຕໍ ໂອວທນ຺ໂຕ –

໑໐໙. ‘‘ນ ນູນາຍໍ ປຣມຫິຕານຸກມ຺ປິໂນ, ຣໂຫຄໂຕ ອນຸວິຄເຓຕິ ສາສນໍ;

ຕຖາຫຍໍ ວິຫຣຕິ ປາກຕິນ຺ທ຺ຣິໂຍ, ມິຄີ ຍຖາ ຕຣຸຓຊາຕິກາ ວເນ’’ຕິ. –

ຄາຖໍ ອຠາສິ.

ຕຕ຺ຖ ນ ນູນາຍນ຺ຕິ ນ-ອິຕິ ປຏິເສເຘ ນິປາໂຕ. ນູນາຕິ ປຣິວິຕກ຺ເກ. ນູນ ອຍນ຺ຕິ ປທຈ຺ເຉໂທ. ປຣມຫິຕານຸກມ຺ປິໂນຕິ ປຣມໍ ອຕິວິຍ, ປຣເມນ ວາ ອນຸຕ຺ຕເຣນ ຫິເຕນ ສຕ຺ເຕ ອນຸກມ຺ປນສີລສ຺ສ ຠຄວໂຕ. ຣໂຫຄໂຕຕິ ຣຫສິ ຄໂຕ, ສຸຎ຺ຎາຄາຣຄໂຕ ກາຍວິເວກຍຸຕ຺ໂຕຕິ ອຕ຺ໂຖ. ອນຸວິຄເຓຕີຕິ ເອຕ຺ຖ ‘‘ນ ນູນາ’’ຕິ ປທທ຺ວຍໍ ອາເນຕ຺ວາ ສມ຺ພນ຺ຘິຕພ຺ພໍ ‘‘ນານຸວິຄເຓຕິ ນູນາ’’ຕິ, ນ ຈິນ຺ເຕສິ ມຎ຺ເຎ, ‘‘ນານຸຍຸຎ຺ຊຕີ’’ຕິ ຕກ຺ເກມີຕິ ອຕ຺ໂຖ. ສາສນນ຺ຕິ ປຏິປຕ຺ຕິສາສນໍ, ຈຕຸສຈ຺ຈກມ຺ມຏ຺ຐານຠາວນນ຺ຕິ ອຘິປ຺ປາໂຍ. ຕຖາ ຫີຕິ ເຕເນວ ກາຣເຓນ, ສຕ຺ຖຸ ສາສນສ຺ສ ອນນຸຍຸຎ຺ຊນໂຕ ເອວ. ອຍນ຺ຕິ ອຍໍ ຠິກ຺ຂຸ. ປາກຕິນ຺ທ຺ຣິໂຍຕິ ມນຈ຺ຉຏ຺ຐານໍ ອິນ຺ທ຺ຣິຍານໍ ຍຖາສກໍ ວິສເຍສຸ ວິສ຺ສຊ຺ຊນໂຕ ສຠາວຠູຕອິນ຺ທ຺ຣິໂຍ, ອສໍວຸຕຈກ຺ຂຸທ຺ວາຣາທິໂກຕິ ອຕ຺ໂຖ. ຍສ຺ສ ຕຓ຺ຫາສງ຺ຄສ຺ສ ອຈ຺ຉິນ຺ນຕາຍ ໂສ ຠິກ຺ຂຸ ປາກຕິນ຺ທ຺ຣິໂຍ ວິຫຣຕິ, ຕສ຺ສ ອຸປມໍ ທສ຺ເສນ຺ໂຕ ‘‘ມິຄີ ຍຖາ ຕຣຸຓຊາຕິກາ ວເນ’’ຕິ ອາຫ. ຍຖາ ອຍໍ ຕຣຸຓສຠາວາ ມິຄີ ປຸຕ຺ຕສ຺ເນຫສ຺ສ ອຈ຺ຉິນ຺ນຕາຍ ວເນ ທຸກ຺ຂໍ ອນຸຠວຕິ, ນ ຕໍ ອຕິວຕ຺ຕຕິ, ເອວມຍມ຺ປິ ຠິກ຺ຂຸ ສງ຺ຄສ຺ສ ອຈ຺ຉິນ຺ນຕາຍ ປາກຕິນ຺ທ຺ຣິໂຍ ວິຫຣນ຺ໂຕ ວຏ຺ຏທຸກ຺ຂໍ ນາຕິວຕ຺ຕຕີຕິ ອຘິປ຺ປາໂຍ. ‘‘ຕຣຸຓວິຊາຕິກາ’’ຕິ ວາ ປາໂຐ. ອຠິນວປ຺ປສຸຕາ ພາລວຈ຺ຉາຕິ ອຕ຺ໂຖ. ຕໍ ສຸຕ຺ວາ ໂສ ຠິກ຺ຂຸ ສຎ຺ຊາຕສໍເວໂຄ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫຕ຺ຕໍ ປາປຸຓິ.

ສງ຺ຆຣກ຺ຂິຕຕ຺ເຖຣຄາຖາວຓ຺ຓນາ ນິຏ຺ຐິຕາ.