໗. ຘມ຺ມສວຕ຺ເຖຣຄາຖາວຓ຺ຓນາ

ປພ຺ພຊິໍ ຕຸລຍິຕ຺ວານາຕິ ອາຍສ຺ມໂຕ ຘມ຺ມສວຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍໍ ກິຣ ປທຸມຸຕ຺ຕຣສ຺ສ ຠຄວໂຕ ກາເລ ສຸວຈ຺ໂຉ ນາມ ພ຺ຣາຫ຺ມໂຓ ຫຸຕ຺ວາ ຕິຓ຺ຓໍ ເວທານໍ ປາຣຄູ ຆຣາວາເສ ໂທສໍ ທິສ຺ວາ ຕາປສປພ຺ພຊ຺ຊໍ ປພ຺ພຊິຕ຺ວາ ອຣຎ຺ຎາຍຕເນ ປພ຺ພຕນ຺ຕເຣ ອສ຺ສມໍ ກາເຣຕ຺ວາ ພຫູຫິ ຕາປເສຫິ ສທ຺ຘິໍ ວສິ. ອຖສ຺ສ ກຸສລພີຊໍ ໂຣເປຕຸກາໂມ ປທຸມຸຕ຺ຕໂຣ ຠຄວາ ອສ຺ສມສມີເປ ອາກາເສ ຐຕ຺ວາ ອິທ຺ຘິປາຏິຫາຣິຍໍ ທສ຺ເສສິ. ໂສ ຕໍ ທິສ຺ວາ ປສນ຺ນມານໂສ ປູເຊຕຸກາໂມ ນາຄປຸປ຺ຜານິ ໂອຈິນາເປສິ. ສຕ຺ຖາ, ‘‘ອລໍ ອິມສ຺ສ ຕາປສສ຺ສ ເອຕ຺ຕກໍ ກຸສລພີຊ’’ນ຺ຕິ ປກ຺ກາມິ. ໂສ ປຸປ຺ຜານິ ຄເຫຕ຺ວາ ສຕ຺ຖຸ ຄມນມຄ຺ຄໍ ໂອກິຣິຕ຺ວາ ຈິຕ຺ຕໍ ປສາເທນ຺ໂຕ ອຎ຺ຊລິໍ ປຄ຺ຄຍ຺ຫ ອຏ຺ຐາສິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິຕ຺ວາ ອປຣາປຣໍ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ມຄຘຣຏ຺ເຐ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ຘມ຺ມສໂວຕິ ລທ຺ຘນາໂມ ວິຎ຺ຎຸຕໍ ປຕ຺ໂຕ ເຫຕຸສມ຺ປຕ຺ຕິຍາ ໂຈທິຍມາໂນ ຆຣາວາເສ ອາທີນວໍ ປພ຺ພຊ຺ຊາຍ ອານິສໍສຎ຺ຈ ທິສ຺ວາ ທກ຺ຂິຓາຄິຣິສ຺ມິໍ ວິຫຣນ຺ຕໍ ຠຄວນ຺ຕໍ ອຸປສງ຺ກມິຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໖.໓໙-໔໕) –

‘‘ສຸວຈ຺ໂຉ ນາມ ນາເມນ, ພ຺ຣາຫ຺ມໂຓ ມນ຺ຕປາຣຄູ;

ປຸຣກ຺ຂໂຕ ສສິສ຺ເສຫິ, ວສເຕ ປພ຺ພຕນ຺ຕເຣ.

‘‘ປທຸມຸຕ຺ຕໂຣ ນາມ ຊິໂນ, ອາຫຸຕີນໍ ປຏິຄ຺ຄໂຫ;

ມມຸທ຺ຘຣິຕຸກາໂມ ໂສ, ອາຄຈ຺ຉິ ມມ ສນ຺ຕິກໍ.

‘‘ເວຫາສມ຺ຫິ ຈງ຺ກມຕິ, ຘູປາຍຕິ ຊລເຕ ຕຖາ;

ຫາສໍ ມມໍ ວິທິຕ຺ວານ, ປກ຺ກາມິ ປາຈິນາມຸໂຂ.

‘‘ຕຎ຺ຈ ອຈ຺ຉຣິຍໍ ທິສ຺ວາ, ອພ຺ຠຸຕໍ ໂລມຫໍສນໍ;

ນາຄປຸປ຺ຜໍ ຄເຫຕ຺ວານ, ຄຕມຄ຺ຄມ຺ຫິ ໂອກິຣິໍ.

‘‘ສຕສຫສ຺ສິໂຕ ກປ຺ເປ, ຍໍ ປຸປ຺ຜໍ ໂອກິຣິໍ ອຫໍ;

ເຕນ ຈິຕ຺ຕປ຺ປສາເທນ, ທຸຄ຺ຄຕິໍ ນຸປປຊ຺ຊຫໍ.

‘‘ເອກຕິໍເສ ກປ຺ປສເຕ, ຣາຊາ ອາສິ ມຫາຣໂຫ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ໂສມນສ຺ສປ຺ປຕ຺ໂຕ ອຸທານວເສນ –

໑໐໗. ‘‘ປພ຺ພຊິໍ ຕຸລຍິຕ຺ວານ, ອຄາຣສ຺ມານຄາຣິຍໍ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນ’’ນ຺ຕິ. – ຄາຖໍ ອຠາສິ;

ຕຕ຺ຖ ປພ຺ພຊິໍ ຕຸລຍິຕ຺ວານາຕິ ‘‘ສມ຺ພາໂຘ ຆຣາວາໂສ ຣຊາປໂຖ’’ຕິອາທິນາ (ທີ. ນິ. ໑.໑໙໑; ມ. ນິ. ໒.໑໐; ສໍ. ນິ. ໒.໑໕໔) ຆຣາວາເສ, ‘‘ອປ຺ປສ຺ສາທາ ກາມາ ພຫຸທຸກ຺ຂາ ພຫຸປາຍາສາ’’ຕິອາທິນາ (ປາຈິ. ໔໑໗; ມ. ນິ. ໑.໑໗໗) ກາເມສຸ ອາທີນວໍ ຕປ຺ປຏິປກ຺ຂໂຕ ເນກ຺ຂມ຺ເມ ຈ ອານິສໍສໍ ຕຸລຠູຕາຍ ປຎ຺ຎາຍ ວິຈາເຣຕ຺ວາ ວີມໍສິຕ຺ວາຕິ ອຕ຺ໂຖ. ເສສໍ ເຫຏ຺ຐາ ວຸຕ຺ຕນຍເມວ. ອິທເມວ ຈ ເຖຣສ຺ສ ອຎ຺ຎາພ຺ຍາກຣຓໍ ອໂຫສີຕິ.

ຘມ຺ມສວຕ຺ເຖຣຄາຖາວຓ຺ຓນາ ນິຏ຺ຐິຕາ.