໒. ເສຕຸຈ຺ຉຕ຺ເຖຣຄາຖາວຓ຺ຓນາ

ມາເນນ ວຎ຺ຈິຕາເສຕິ ອາຍສ຺ມໂຕ ເສຕຸຈ຺ຉຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ຕິສ຺ສສ຺ສ ສມ຺ມາສມ຺ພຸທ຺ຘສ຺ສ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ຕິສ຺ສໍ ຠຄວນ຺ຕໍ ທິສ຺ວາ ປສນ຺ນມານໂສ ສຸມຘຸຣໍ ປນສຜລໍ ອຠິສງ຺ຂຕໍ ນາຬິເກຣສາຬວໍ ອທາສິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິຕ຺ວາ ອປຣາປຣໍ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ອຎ຺ຎຕຣສ຺ສ ມຓ຺ຑລິກຣຎ຺ໂຎ ປຸຕ຺ໂຕ ຫຸຕ຺ວາ ນິພ຺ພຕ຺ຕິ, ເສຕຸຈ຺ໂຉຕິສ຺ສ ນາມໍ ອໂຫສິ. ໂສ ປິຕຣິ ມເຕ ຣຊ຺ເຊ ປຕິຏ຺ຐິໂຕ ອຸສ຺ສາຫສຕ຺ຕີນໍ ອຠາເວນ ຣາຊກິຈ຺ຈານິ ວິຣາເຘນ຺ໂຕ ຣຊ຺ຊໍ ປຣຫຕ຺ຖຄຕໍ ກຕ຺ວາ ທຸກ຺ຂປ຺ປຕ຺ຕິຍາ ສໍເວຄຊາໂຕ ຊນປທຈາຣິກໍ ຈຣນ຺ຕໍ ຠຄວນ຺ຕໍ ທິສ຺ວາ ອຸປສງ຺ກມິຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ປຣິກມ຺ມໍ ກໂຣນ຺ໂຕ ຕທເຫວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໗.໑໓-໑໗) –

‘‘ຕິສ຺ສສ຺ສ ໂຂ ຠຄວໂຕ, ປຸພ຺ເພ ຜລມທາສຫໍ;

ນາຬິເກຣຎ຺ຈ ປາທາສິໍ, ຂຊ຺ຊກໍ ອຠິສມ຺ມຕໍ.

‘‘ພຸທ຺ຘສ຺ສ ຕມຫໍ ທຕ຺ວາ, ຕິສ຺ສສ຺ສ ຕຸ ມເຫສິໂນ;

ໂມທາມຫໍ ກາມກາມີ, ອຸປປຊ຺ຊິໍ ຍມິຈ຺ຉກໍ.

‘‘ທ຺ເວນວຸເຕ ອິໂຕ ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ອິໂຕ ເຕຣສກປ຺ປມ຺ຫິ, ຣາຊາ ອິນ຺ທສໂມ ອຫຸ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ກິເລເສ ຄຣຫນ຺ໂຕ –

໑໐໒. ‘‘ມາເນນ ວຎ຺ຈິຕາເສ, ສງ຺ຂາເຣສຸ ສໍກິລິສ຺ສມານາເສ;

ລາຠາລາເຠນ ມຖິຕາ, ສມາຘິໍ ນາຘິຄຈ຺ຉນ຺ຕີ’’ຕິ. – ຄາຖໍ ອຠາສິ;

ຕຕ຺ຖ ມາເນນ ວຎ຺ຈິຕາເສຕິ ‘‘ເສຍ຺ໂຍຫມສ຺ມີ’’ຕິອາທິນຍປ຺ປວຕ຺ເຕນ ມາເນນ ອຕ຺ຕຸກ຺ກໍສນປຣວມ຺ຠນາທິວເສນ ກຸສລຠຓ຺ຑຈ຺ເຉທເນນ ວິປ຺ປລທ຺ຘາ. ສງ຺ຂາເຣສຸ ສໍກິລິສ຺ສມານາເສຕິ ອຊ຺ຌຕ຺ຕິກພາຫິເຣສຸ ຈກ຺ຂາທີສຸ ເຈວ ຣູປາທີສຸ ຈ ສງ຺ຂຕຘມ຺ເມສຸ ສໍກິລິສ຺ສມານາ, ‘‘ເອຕໍ ມມ, ເອໂສຫມສ຺ມິ, ເອໂສ ເມ ອຕ຺ຕາ’’ຕິ ຕໍນິມິຕ຺ຕໍ ຕຓ຺ຫາຄາຫາທິວເສນ ສໍກິເລສໍ ອາປຊ຺ຊມານາ. ລາຠາລາເຠນ ມຖິຕາຕິ ປຕ຺ຕຈີວຣາທີນຎ຺ເຈວ ວຕ຺ຖາທີນຎ຺ຈ ລາເຠນ ເຕສໍເຍວ ຈ ອລາເຠນ ຕໍນິມິຕ຺ຕໍ ອຸປ຺ປນ຺ເນຫິ ອນຸນຍປຏິເຆຫິ ມຖິຕາ ມທ຺ທິຕາ ອຠິຠູຕາ. ນິທສ຺ສນມຕ຺ຕຎ຺ເຈຕໍ ອວສິຏ຺ຐໂລກຘມ຺ມານມ຺ເປຕ຺ຖ ສງ຺ຄໂຫ ທຏ຺ຐພ຺ໂພ. ສມາຘິໍ ນາຘິຄຈ຺ຉນ຺ຕີຕິ ເຕ ເອວຣູປາ ປຸຄ຺ຄລາ ສມາຘິໍ ສມຖວິປສ຺ສນາວເສນ ຈິຕ຺ເຕກຄ຺ຄຕໍ ກທາຈິປິ ນ ວິນ຺ທນ຺ຕິ ນ ປຏິລຠນ຺ຕິ ນ ປາປຸຓນ຺ຕິ ສມາຘິສໍວຕ຺ຕນິການໍ ຘມ຺ມານໍ ອຠາວໂຕ, ອິຕເຣສຎ຺ຈ ຠາວໂຕ. ອິຘາປິ ຍຖາ ມານາທີຫິ ອຠິຠູຕາ ອວິທ຺ທສຸໂນ ສມາຘິໍ ນາຘິຄຈ຺ຉນ຺ຕິ, ນ ເອວໍ ວິທ຺ທສຸໂນ. ເຕ ປນ ມາທິສາ ເຕຫິ ອນຠິຠູຕາ ສມາຘິໍ ອຘິຄຈ຺ຉນ຺ເຕວາຕິ ພ຺ຍຕິເຣກມຸເຂນ ອຎ຺ຎາພ຺ຍາກຣຓນ຺ຕິ ເວທິຕພ຺ພໍ.

ເສຕຸຈ຺ຉຕ຺ເຖຣຄາຖາວຓ຺ຓນາ ນິຏ຺ຐິຕາ.