໔. ປຸຓ຺ຓຕ຺ເຖຣຄາຖາວຓ຺ຓນາ

ສພ຺ຠິເຣວ ສມາເສຖາຕິ ອາຍສ຺ມໂຕ ປຸຓ຺ຓຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍໍ ກິຣ ປທຸມຸຕ຺ຕຣສ຺ສ ທສພລສ຺ສ ອຸປ຺ປຕ຺ຕິໂຕ ປຸເຣຕຣເມວ ຫໍສວຕີນຄເຣ ພ຺ຣາຫ຺ມຓມຫາສາລກຸເລ ນິພ຺ພຕ຺ໂຕ ອນຸກ຺ກເມນ ວິຎ຺ຎຸຕໍ ປຕ຺ໂຕ ສຕ຺ຖຣິ ໂລເກ ອຸປ຺ປຊ຺ຊນ຺ເຕ ເອກທິວສໍ ພຸທ຺ຘານໍ ຘມ຺ມເທສນາກາເລ ເຫຏ຺ຐາ ວຸຕ຺ຕນເຍນ ມຫາຊເນນ ສທ຺ຘິໍ ວິຫາຣໍ ຄນ຺ຕ຺ວາ ປຣິສປຣິຍນ຺ເຕ ນິສີທິຕ຺ວາ ຘມ຺ມໍ ສຸຓນ຺ໂຕ ສຕ຺ຖາຣໍ ເອກໍ ຠິກ຺ຂຸໍ ຘມ຺ມກຖິການໍ ອຄ຺ຄຏ຺ຐາເນ ຐເປນ຺ຕໍ ທິສ຺ວາ ‘‘ມຍາປິ ອນາຄເຕ ເອວຣູເປນ ຠວິຕຸໍ ວຏ຺ຏຕີ’’ຕິ ຈິນ຺ເຕຕ຺ວາ ເທສນາວສາເນ ວຸຏ຺ຐິຕາຍ ປຣິສາຍ ສຕ຺ຖາຣໍ ອຸປສງ຺ກມິຕ຺ວາ ນິມນ຺ເຕຕ຺ວາ ເຫຏ຺ຐາ ວຸຕ຺ຕນເຍເນວ ມຫາສກ຺ກາຣໍ ກຕ຺ວາ ຠຄວນ຺ຕໍ ເອວມາຫ – ‘‘ຠນ຺ເຕ, ອຫໍ ອິມິນາ ອຘິກາຣກມ຺ເມນ ນາຎ຺ຎໍ ສມ຺ປຕ຺ຕິໍ ປຕ຺ເຖມິ. ຍຖາ ປນ ໂສ ຠິກ຺ຂຸ ອິໂຕ ສຕ຺ຕມທິວສມຕ຺ຖເກ ຘມ຺ມກຖິການໍ ອຄ຺ຄຏ຺ຐາເນ ຐປິໂຕ, ເອວໍ ອຫມ຺ປິ ອນາຄເຕ ເອກສ຺ສ ພຸທ຺ຘສ຺ສ ສາສເນ ຘມ຺ມກຖິການໍ ຠິກ຺ຂູນໍ ອຄ຺ໂຄ ຠເວຍ຺ຍ’’ນ຺ຕິ ປຕ຺ຖນໍ ອກາສິ. ສຕ຺ຖາ ອນາຄຕໍ ໂອໂລເກຕ຺ວາ ຕສ຺ສ ປຕ຺ຖນາຍ ສມິຊ຺ຌນຠາວໍ ທິສ຺ວາ ‘‘ອນາຄເຕ ກປ຺ປສຕສຫສ຺ສມຕ຺ຖເກ ໂຄຕໂມ ນາມ ພຸທ຺ໂຘ ອຸປ຺ປຊ຺ຊິສ຺ສຕິ, ຕສ຺ສ ສາສເນ ຕ຺ວໍ ປພ຺ພຊິຕ຺ວາ ຘມ຺ມກຖິການໍ ອຄ຺ໂຄ ຠວິສ຺ສສີ’’ຕິ ພ຺ຍາກາສິ.

ໂສ ຕຕ຺ຖ ຍາວຊີວໍ ກລ຺ຍາຓຘມ຺ມໍ ກຕ຺ວາ ຕໂຕ ຈຸໂຕ ກປ຺ປສຕສຫສ຺ສໍ ປຸຎ຺ຎຎາຓສມ຺ຠາຣໍ ສມ຺ຠຣນ຺ໂຕ ເທວມນຸສ຺ເສສຸ ສໍສຣິຕ຺ວາ ອມ຺ຫາກໍ ຠຄວໂຕ ກາເລ ກປິລວຕ຺ຖຸນຄຣສ຺ສ ອວິທູເຣ ໂທຓວຕ຺ຖຸນາມເກ ພ຺ຣາຫ຺ມຓຄາເມ ພ຺ຣາຫ຺ມຓມຫາສາລກຸເລ ອຎ຺ຎາສິໂກຓ຺ຑຎ຺ຎຕ຺ເຖຣສ຺ສ ຠາຄິເນຍ຺ໂຍ ຫຸຕ຺ວາ ນິພ຺ພຕ຺ຕິ. ຕສ຺ສ ນາມຄ຺ຄຫຓທິວເສ ‘‘ປຸຓ຺ໂຓ’’ຕິ ນາມໍ ອກໍສຸ. ໂສ ສຕ຺ຖຣິ ອຠິສມ຺ໂພຘິໍ ປຕ຺ວາ ປວຕ຺ຕວຣຘມ຺ມຈກ຺ເກ ອນຸປຸພ຺ເພນ ຣາຊຄຫໍ ຄນ຺ຕ຺ວາ ຕໍ ອຸປນິສ຺ສາຍ ວິຫຣນ຺ເຕ ອຎ຺ຎາສິໂກຓ຺ຑຎ຺ຎຕ຺ເຖຣສ຺ສ ສນ຺ຕິເກ ປພ຺ພຊິຕ຺ວາ ລທ຺ຘູປສມ຺ປໂທ ສພ຺ພໍ ປຸພ຺ພກິຈ຺ຈໍ ກຕ຺ວາ ປຘານມນຸຍຸຎ຺ຊນ຺ໂຕ ປພ຺ພຊິຕກິຈ຺ຈໍ ມຕ຺ຖກໍ ປາເປຕ຺ວາວ ‘‘ທສພລສ຺ສ ສນ຺ຕິກໍ ຄມິສ຺ສາມີ’’ຕິ ມາຕຸລຕ຺ເຖເຣນ ສທ຺ຘິໍ ສຕ຺ຖຸ ສນ຺ຕິກໍ ອຄນ຺ຕ຺ວາ ກປິລວຕ຺ຖຸສາມນ຺ຕາເຍວ ໂອຫີຍິຕ຺ວາ ໂຍນິໂສມນສິກາເຣ ກມ຺ມໍ ກໂຣນ຺ໂຕ ນຈິຣສ຺ເສວ ວິປສ຺ສນໍ ອຸສ຺ສຸກ຺ກາເປຕ຺ວາ ອຣຫຕ຺ຕໍ ປາປຸຓິ. ວຸຕ຺ຕມ຺ປິ ເຈຕໍ ອປທາເນ (ອປ. ເຖຣ ໑.໑.໔໓໔-໔໔໐) –

‘‘ອຊ຺ຌາຍໂກ ມນ຺ຕຘໂຣ, ຕິຓ຺ຓໍ ເວທານ ປາຣຄູ;

ປຸຣກ຺ຂໂຕມ຺ຫິ ສິສ຺ເສຫິ, ອຸປຄຈ຺ຉິໍ ນຣຸຕ຺ຕມໍ.

‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ມມ ກມ຺ມໍ ປກິຕ຺ເຕສິ, ສໍຂິຕ຺ເຕນ ມຫາມຸນິ.

‘‘ຕາຫໍ ຘມ຺ມໍ ສຸຓິຕ຺ວານ, ອຠິວາເທຕ຺ວານ ສຕ຺ຖຸໂນ;

ອຎ຺ຊລິໍ ປຄ຺ຄເຫຕ຺ວານ, ປກ຺ກມິໍ ທກ຺ຂິຓາມຸໂຂ.

‘‘ສໍຂິຕ຺ເຕນ ສຸຓິຕ຺ວານ, ວິຕ຺ຖາເຣນ ອຠາສຍິໍ;

ສພ຺ເພ ສິສ຺ສາ ອຕ຺ຕມນາ, ສຸຕ຺ວານ ມມ ຠາສໂຕ.

‘‘ສກໍ ທິຏ຺ຐິໍ ວິໂນເທຕ຺ວາ, ພຸທ຺ເຘ ຈິຕ຺ຕໍ ປສາທຍຸໍ;

ສໍຂິຕ຺ເຕນປິ ເທເສມິ, ວິຕ຺ຖາເຣນ ຕເຖວຫໍ.

‘‘ອຠິຘມ຺ມນຍຎ຺ຎູຫໍ, ກຖາວຕ຺ຖຸວິສຸທ຺ຘິຍາ;

ສພ຺ເພສໍ ວິຎ຺ຎາເປຕ຺ວານ, ວິຫຣາມິ ອນາສໂວ.

‘‘ອິໂຕ ປຎ຺ຈສເຕ ກປ຺ເປ, ຈຕຸໂຣ ສຸປ຺ປກາສກາ;

ສຕ຺ຕຣຕນສມ຺ປນ຺ນາ, ຈຕຸທີປມ຺ຫິ ອິສ຺ສຣາ.

‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ຕສ຺ສ ປນ ປຸຓ຺ຓຕ຺ເຖຣສ຺ສ ສນ຺ຕິເກ ປພ຺ພຊິຕາ ກຸລປຸຕ຺ຕາ ປຎ຺ຈສຕາ ອເຫສຸໍ. ເຖໂຣ ສຍໍ ທສກຖາວຕ຺ຖຸລາຠິຕາຍ ເຕປິ ທສຫິ ກຖາວຕ຺ຖູຫິ ໂອວທິ. ເຕ ຕສ຺ສ ໂອວາເທ ຐຕ຺ວາ ສພ຺ເພວ ອຣຫຕ຺ຕໍ ປຕ຺ຕາ. ເຕ ອຕ຺ຕໂນ ປພ຺ພຊິຕກິຈ຺ຈໍ ມຕ຺ຖກປ຺ປຕ຺ຕໍ ຎຕ຺ວາ ອຸປຊ຺ຌາຍໍ ອຸປສງ຺ກມິຕ຺ວາ ອາຫໍສຸ – ‘‘ຠນ຺ເຕ, ອມ຺ຫາກໍ ກິຈ຺ຈໍ ມຕ຺ຖກປ຺ປຕ຺ຕໍ, ທສນ຺ນຎ຺ຈມ຺ຫ ກຖາວຕ຺ຖູນໍ ລາຠິໂນ, ສມໂຍ, ທານິ ໂນ ທສພລໍ ປສ຺ສິຕຸ’’ນ຺ຕິ. ເຖໂຣ ເຕສໍ ວຈນໍ ສຸຕ຺ວາ ຈິນ຺ເຕສິ – ‘‘ມມ ທສກຖາວຕ຺ຖຸລາຠິຕໍ ສຕ຺ຖາ ຊານາຕິ ອຫໍ ຘມ຺ມໍ ເທເສນ຺ໂຕ ທສ ກຖາວຕ຺ຖູນິ ອມຸຎ຺ຈິຕ຺ວາວ ເທເສມິ, ມຍິ ຄຈ຺ຉນ຺ເຕ ສພ຺ເພປິເມ ຠິກ຺ຂູ ມໍ ປຣິວາເຣຕ຺ວາ ຄຈ຺ຉິສ຺ສນ຺ຕິ, ເອວໍ ຄຓສງ຺ຄຓິກາຍ ຄນ຺ຕ຺ວາ ປນ ອຍຸຕ຺ຕໍ ມຍ຺ຫໍ ທສພລໍ ປສ຺ສິຕຸໍ, ອິເມ ຕາວ ຄນ຺ຕ຺ວາ ປສ຺ສນ຺ຕູ’’ຕິ ເຕ ຠິກ຺ຂູ ອາຫ – ‘‘ອາວຸໂສ, ຕຸມ຺ເຫ ປຸຣໂຕ ຄນ຺ຕ຺ວາ ຕຖາຄຕໍ ປສ຺ສຖ, ມມ ວຈເນນ ຈສ຺ສ ປາເທ ວນ຺ທຖ, ອຫມ຺ປິ ຕຸມ຺ຫາກໍ ຄຕມຄ຺ເຄນາຄມິສ຺ສາມີ’’ຕິ. ເຕ ເຖຣາ ສພ຺ເພປິ ທສພລສ຺ສ ຊາຕິຠູມິຣຏ຺ຐວາສິໂນ ສພ຺ເພ ຂີຓາສວາ ສພ຺ເພ ທສກຖາວຕ຺ຖຸລາຠິໂນ ອຕ຺ຕໂນ ອຸປຊ຺ຌາຍສ຺ສ ໂອວາທໍ ສມ຺ປຏິຈ຺ຉິຕ຺ວາ ເຖຣໍ ວນ຺ທິຕ຺ວາ ອນຸປຸພ຺ເພນ ຈາຣິກໍ ຈຣນ຺ຕາ ສຏ຺ຐິໂຍຊນມຄ຺ຄໍ ອຕິກ຺ກມ຺ມ ຣາຊຄເຫ ເວຬຸວນມຫາວິຫາຣໍ ຄນ຺ຕ຺ວາ ທສພລສ຺ສ ປາເທ ວນ຺ທິຕ຺ວາ ເອກມນ຺ຕໍ ນິສີທິໍສຸ.

ອາຈິຓ຺ຓໍ ໂຂ ປເນຕໍ ພຸທ຺ຘານໍ ຠຄວນ຺ຕານໍ ອາຄນ຺ຕຸເກຫິ ຠິກ຺ຂູຫິ ສທ຺ຘິໍ ປຏິສມ຺ໂມທິຕຸນ຺ຕິ ຠຄວາ ເຕຫິ ສທ຺ຘິໍ – ‘‘ກຈ຺ຈິ, ຠິກ຺ຂເວ, ຂມນີຍ’’ນ຺ຕິອາທິນາ ນເຍນ ມຘຸຣປຏິສນ຺ຖາຣໍ ກຕ຺ວາ ‘‘ກຸໂຕ ຈ ຕຸມ຺ເຫ, ຠິກ຺ຂເວ, ອາຄຈ຺ຉຖາ’’ຕິ ປຸຈ຺ຉິ. ອຖ ເຕຫິ ‘‘ຊາຕິຠູມິໂຕ’’ຕິ ວຸຕ຺ເຕ ‘‘ໂກ ນຸ ໂຂ, ຠິກ຺ຂເວ, ຊາຕິຠູມິຍໍ ຊາຕິຠູມການໍ ຠິກ຺ຂູນໍ ສພ຺ຣຫ຺ມຈາຣີນໍ ເອວໍ ສມ຺ຠາວິໂຕ ‘ອຕ຺ຕນາ ຈ ອປ຺ປິຈ຺ໂຉ ອປ຺ປິຈ຺ຉກຖຎ຺ຈ ຠິກ຺ຂູນໍ ກຕ຺ຕາ’’’ຕິ (ມ. ນິ. ໑.໒໕໒) ທສກຖາວຕ຺ຖຸລາຠິໍ ຠິກ຺ຂຸໍ ປຸຈ຺ຉິ. ເຕປິ ‘‘ປຸຓ຺ໂຓ ນາມ, ຠນ຺ເຕ, ອາຍສ຺ມາ ມນ຺ຕາຓິປຸຕ຺ໂຕ’’ຕິ ອາໂຣຈຍິໍສຸ. ຕໍ ກຖໍ ສຸຕ຺ວາ ອາຍສ຺ມາ ສາຣິປຸຕ຺ໂຕ ເຖຣສ຺ສ ທສ຺ສນກາໂມ ອໂຫສິ. ອຖ ສຕ຺ຖາ ຣາຊຄຫໂຕ ສາວຕ຺ຖິໍ ອຄມາສິ. ປຸຓ຺ຓຕ຺ເຖໂຣປິ ທສພລສ຺ສ ຕຕ຺ຖ ອາຄຕຠາວໍ ສຸຕ຺ວາ – ‘‘ສຕ຺ຖາຣໍ ປສ຺ສິສ຺ສາມີ’’ຕິ ຄນ຺ຕ຺ວາ ອນ຺ໂຕຄນ຺ຘກຸຏິຍໍເຍວ ຕຖາຄຕໍ ສມ຺ປາປຸຓິ. ສຕ຺ຖາ ຕສ຺ສ ຘມ຺ມໍ ເທເສສິ. ເຖໂຣ ຘມ຺ມໍ ສຸຕ຺ວາ ທສພລໍ ວນ຺ທິຕ຺ວາ ປຏິສລ຺ລານຕ຺ຖາຍ ອນ຺ຘວນໍ ຄນ຺ຕ຺ວາ ອຎ຺ຎຕຣມ຺ຫິ ຣຸກ຺ຂມູເລ ທິວາວິຫາຣໍ ນິສີທິ.

ສາຣິປຸຕ຺ຕຕ຺ເຖໂຣປິ ຕສ຺ສາຄມນໍ ສຸຕ຺ວາ ສີສານຸໂລກິໂກ ຄນ຺ຕ຺ວາ ໂອກາສໍ ສລ຺ລກ຺ເຂຕ຺ວາ ຕໍ ຣຸກ຺ຂມູເລ ນິສິນ຺ນໍ ອຸປສງ຺ກມິຕ຺ວາ ເຖເຣນ ສທ຺ຘິໍ ສມ຺ໂມທິຕ຺ວາ, ຕໍ ສຕ຺ຕວິສຸທ຺ຘິກ຺ກມໍ ປຸຈ຺ຉິ. ເຖໂຣປິສ຺ສ ປຸຈ຺ຉິຕປຸຈ຺ຉິຕໍ ພ຺ຍາກໂຣນ຺ໂຕ ຣຖວິນີຕູປມາຍ ຈິຕ຺ຕໍ ອາຣາເຘສິ, ເຕ ອຎ຺ຎມຎ຺ຎສ຺ສ ສຸຠາສິຕໍ ສມນຸໂມທິໍສຸ. ອຖ ສຕ຺ຖາ ອປຣຠາເຄ ຠິກ຺ຂຸສງ຺ຆມຊ຺ເຌ ນິສິນ຺ໂນ ເຖຣໍ ‘‘ເອຕທຄ຺ຄໍ, ຠິກ຺ຂເວ, ມມ ສາວການໍ ຠິກ຺ຂູນໍ ຘມ຺ມກຖິການໍ ຍທິທໍ ປຸຓ຺ໂຓ’’ຕິ (ອ. ນິ. ໑.໑໘໘, ໑໙໖) ຘມ຺ມກຖິການໍ ອຄ຺ຄຏ຺ຐາເນ ຐເປສິ. ໂສ ເອກທິວສໍ ອຕ຺ຕໂນ ວິມຸຕ຺ຕິສມ຺ປຕ຺ຕິໍ ປຈ຺ຈເວກ຺ຂິຕ຺ວາ ‘‘ສຕ຺ຖາຣໍ ນິສ຺ສາຍ ອຫຎ຺ເຈວ ອຎ຺ເຎ ຈ ພຫູ ສຕ຺ຕາ ສໍສາຣທຸກ຺ຂໂຕ ວິປ຺ປມຸຕ຺ຕາ, ພຫູປກາຣາ ວຕ ສປ຺ປຸຣິສສໍເສວາ’’ຕິ ປີຕິໂສມນສ຺ສຊາໂຕ ອຸທານວເສນ ປີຕິເວຄວິສ຺ສຏ຺ຐໍ ‘‘ສພ຺ຠິເຣວ ສມາເສຖາ’’ຕິ ຄາຖໍ ອຠາສິ.

໔. ຕຕ຺ຖ ສພ຺ຠິເຣວາຕິ ສປ຺ປຸຣິເສຫິ ເອວ. ສນ຺ໂຕຕິ ປເນຕ຺ຖ ພຸທ຺ຘາທໂຍ ອຣິຍາ ອຘິປ຺ເປຕາ. ເຕ ຫິ ອນວເສສໂຕ ອສຕໍ ຘມ຺ມໍ ປຫາຍ ສທ຺ຘມ຺ເມ ອຸກ຺ກໍສຄຕຕ຺ຕາ ສາຕິສຍໍ ປສໍສິຍຕ຺ຕາ ຈ ວິເສສໂຕ ‘‘ສນ຺ໂຕ ສປ຺ປຸຣິສາ’’ຕິ ຈ ວຸຈ຺ຈນ຺ຕິ. ສມາເສຖາຕິ ສມໍ ອາເສຖ ສຫ ວເສຍ຺ຍ. ເຕ ປຍິຣຸປາສນ຺ໂຕ ເຕສໍ ສຸສ຺ສູສນ຺ໂຕ ທິຏ຺ຐານຸຄຕິຎ຺ຈ ອາປຊ຺ຊນ຺ໂຕ ສມານວາໂສ ຠເວຍ຺ຍາຕິ ອຕ຺ໂຖ. ປຓ຺ຑິເຕຫຕ຺ຖທສ຺ສິຠີຕິ ເຕສໍ ໂຖມນາ. ປຓ຺ຑາ ວຸຈ຺ຈຕິ ປຎ຺ຎາ, ສາ ອິເມສໍ ສຎ຺ຊາຕາຕິ ປຓ຺ຑິຕາ. ຕໂຕ ເອວ ອຕ຺ຕຕ຺ຖາທິເຠທໍ ອຕ຺ຖໍ ອວິປຣີຕໂຕ ປສ຺ສນ຺ຕີຕິ ອຕ຺ຖທສ຺ສິໂນ. ເຕຫິ ປຓ຺ຑິເຕຫິ ອຕ຺ຖທສ຺ສີຠິ ສມາເສຖ. ກສ຺ມາຕິ ເຈ? ຍສ຺ມາ ເຕ ສນ຺ໂຕ ປຓ຺ຑິຕາ, ເຕ ວາ ສມ຺ມາ ເສວນ຺ຕາ ເອກນ຺ຕຫິຕຠາວໂຕ ມຄ຺ຄຎາຓາທີເຫວ ອຣຓີຍໂຕ ອຕ຺ຖໍ, ມຫາຄຸຓຕາຍ ສນ຺ຕຕາຍ ຈ ມຫນ຺ຕໍ, ອຄາຘຠາວໂຕ ຄມ຺ຠີຣຎາຓໂຄຈຣໂຕ ຈ ຄມ຺ຠີຣໍ, ຫີນຈ຺ຉນ຺ທາທີຫິ ທຏ຺ຐຸໍ ອສກ຺ກຸເຓຍ຺ຍຕ຺ຕາ ອິຕເຣຫິ ຈ ກິຈ຺ເຉນ ທຏ຺ຐພ຺ພຕ຺ຕາ ທຸທ຺ທສໍ, ທຸທ຺ທສຕ຺ຕາ ສຓ຺ຫນິປຸຓສຠາວຕ຺ຕາ ນິປຸຓຎາຓໂຄຈຣໂຕ ຈ ນິປຸຓໍ, ນິປຸຓຕ຺ຕາ ເອວໍ ສຸຂຸມສຠາວຕາຍ ອຓຸໍ ນິພ຺ພານໍ, ອວິປຣີຕຏ຺ເຐນ ວາ ປຣມຕ຺ຖສຠາວຕ຺ຕາ ອຕ຺ຖໍ, ອຣິຍຠາວກຣຕ຺ຕາ ມຫຕ຺ຕນິມິຕ຺ຕຕາຍ ມຫນ຺ຕໍ, ອນຸຕ຺ຕານສຠາວຕາຍ ຄມ຺ຠີຣໍ, ທຸກ຺ເຂນ ທຏ຺ຐພ຺ພໍ ນ ສຸເຂນ ທຏ຺ຐຸໍ ສກ຺ກາຕິ ທຸທ຺ທສໍ, ຄມ຺ຠີຣຕ຺ຕາ ທຸທ຺ທສໍ, ທຸທ຺ທສຕ຺ຕາ ຄມ຺ຠີຣນ຺ຕິ ຈຕຸສຈ຺ຈໍ, ວິເສສໂຕ ນິປຸຓໍ ອຓຸໍ, ນິໂຣຘສຈ຺ຈນ຺ຕິ ເອວເມຕໍ ຈຕຸສຈ຺ຈໍ ຘີຣາ ສມຘິຄຈ຺ຉນ຺ຕິ ຘິຕິສມ຺ປນ຺ນຕາຍ ຘີຣາ ຈຕຸສຈ຺ຈກມ຺ມຏ຺ຐານຠາວນໍ ອຸສ຺ສຸກ຺ກາເປຕ຺ວາ ສມ຺ມເທວ ອຘິຄຈ຺ຉນ຺ຕິ. ອປ຺ປມຕ຺ຕາຕິ ສພ຺ພຕ຺ຖ ສຕິອວິປ຺ປວາເສນ ອປ຺ປມາທປຏິປຕ຺ຕິໍ ປູເຣນ຺ຕາ. ວິຈກ຺ຂຓາຕິ ວິປສ຺ສນາຠາວນາຍ ເຉກາ ກຸສລາ. ຕສ຺ມາ ສພ຺ຠິເຣວ ສມາເສຖາຕິ ໂຍຊນາ. ປຓ຺ຑິເຕຫຕ຺ຖທສ຺ສິຠີຕິ ວາ ເອຕໍ ນິສ຺ສກ຺ກວຈນໍ. ຍສ຺ມາ ປຓ຺ຑິເຕຫິ ອຕ຺ຖທສ຺ສີຠິ ສມຸທາຍຠູເຕຫິ ຘີຣາ ອປ຺ປມຕ຺ຕາ ວິຈກ຺ຂຓາ ມຫນ຺ຕາທິວິເສສວນ຺ຕໍ ອຕ຺ຖໍ ສມຘິຄຈ຺ຉນ຺ຕິ, ຕສ຺ມາ ຕາທິເສຫິ ສພ຺ຠິເຣວ ສມາເສຖາຕິ ສມ຺ພນ຺ໂຘ. ເອວເມສາ ເຖຣສ຺ສ ປຏິເວຘທີປເນນ ອຎ຺ຎາພ຺ຍາກຣຓຄາຖາປິ ອໂຫສີຕິ.

ປຸຓ຺ຓຕ຺ເຖຣຄາຖາວຓ຺ຓນາ ນິຏ຺ຐິຕາ.