໖. ປາຏິຫາຣິຍກຖາ

ປາຏິຫາຣິຍກຖາວຓ຺ຓນາ

໓໐. ອິທານິ ໂລກຕ຺ຖຈຣິຍາປຣິໂຍສານາຍ ຈຣິຍາກຖາຍ ອນນ຺ຕຣໍ ໂລກຕ຺ຖານຸສາສນປຣິໂຍສານໍ ປາຏິຫາຣິຍໍ ທສ຺ເສນ຺ເຕນ ກຖິຕາຍ ສຸຕ຺ຕນ຺ຕປຸພ຺ພງ຺ຄມາຍ ປາຏິຫາຣິຍກຖາຍ ອປຸພ຺ພຕ຺ຖານຸວຓ຺ຓນາ. ຕຕ຺ຖ ສຸຕ຺ຕນ຺ເຕ ຕາວ ປາຏິຫາຣິຍານີຕິ ປຈ຺ຈນີກປຏິຫຣຓວເສນ ປາຏິຫາຣິຍານິ. ອິທ຺ຘິປາຏິຫາຣິຍນ຺ຕິ ອິຊ຺ຌນວເສນ ອິທ຺ຘິ, ປຏິຫຣຓວເສນ ປາຏິຫາຣິຍໍ, ອິທ຺ຘິເຍວ ປາຏິຫາຣິຍໍ ອິທ຺ຘິປາຏິຫາຣິຍໍ. ອິຕເຣສຸ ປນ ອາທິສ຺ສນວເສນ ອາເທສນໍ, ອນຸສາສນວເສນ ອນຸສາສນີ. ເສສໍ ວຸຕ຺ຕນຍເມວ.

ອິຘາຕິ ອິມສ຺ມິໍ ໂລເກ. ເອກຈ຺ໂຈຕິ ເອໂກ ໂປໂສ. ອິທ຺ຘິປາຏິຫາຣິຍນິທ຺ເທໂສ ເຫຏ຺ຐາ ວຸຕ຺ຕຕ຺ໂຖເຍວ. ນິມິຕ຺ເຕນ ອາທິສຕີຕິ ອາຄຕນິມິຕ຺ເຕນ ວາ ຄຕນິມິຕ຺ເຕນ ວາ ຐິຕນິມິຕ຺ເຕນ ວາ ກເຖຕິ. ເອວມ຺ປິ ເຕ ມໂນຕິ ເອວມ຺ປິ ຕວ ມໂນ ໂສມນສ຺ສິໂຕ ວາ ໂທມນສ຺ສິໂຕ ວາ ກາມວິຕກ຺ກາທິສມ຺ປຍຸຕ຺ໂຕ ວາ. ອປິ-ສທ຺ໂທ ສມ຺ປິຓ຺ຑນຕ຺ໂຖ. ອິຕ຺ຖມ຺ປິ ເຕ ມໂນຕິ ໂສມນສ຺ສິຕາທິໂຕ ເອເກກວິເຘປິ ຈິຕ຺ເຕ ນານປ຺ປກາຣປຣິທີປນໍ. ອິຕິປິ ເຕ ຈິຕ຺ຕນ຺ຕິ ອິຕິປິ ຕວ ຈິຕ຺ຕໍ, ອິມຎ຺ຈ ອິມຎ຺ຈ ອຕ຺ຖໍ ຈິນ຺ຕຍມານໍ ປວຕ຺ຕຕີຕິ ອຕ຺ໂຖ. ພຫຸໍ ເຈປິ ອາທິສຕີຕິ ຈິຕ຺ຕໂຕ ອຎ຺ຎໍ ວາ ອິທຎ຺ຈ ອິທຎ຺ຈ ນາມ ອໂຫສິ ຠວຕິ ຠວິສ຺ສຕີຕິ ພຫຸກມ຺ປິ ກເຖຕິ. ຕເຖວ ຕໍ ໂຫຕິ, ໂນ ອຎ຺ຎຖາຕິ ຕໍ ສພ຺ພມ຺ປິ ຍຖາ ຍຖາ ກຖິຕໍ, ຕເຖວ ໂຫຕິ, ອຎ຺ຎຖາ ນ ໂຫຕິ.

ນ ເຫວ ໂຂ ນິມິຕ຺ເຕນ ອາທິສຕີຕິ ນິມິຕ຺ຕໍ ຊານນ຺ໂຕປິ ເກວລໍ ນິມິຕ຺ເຕເນວ ນ ກເຖຕິ. ອປິຈາຕິ ອປຣປຣິຍາຍທສ຺ສນໍ. ມນຸສ຺ສານນ຺ຕິ ຈິຕ຺ຕໍ ຊານນກມນຸສ຺ສານໍ. ອມນຸສ຺ສານນ຺ຕິ ສາວິຕານໍ ວາ ອສ຺ສາວິຕານໍ ວາ ຍກ຺ຂປິສາຈາທີນໍ. ເທວຕານນ຺ຕິ ຈາຕຸມຫາຣາຊິກາທີນໍ. ສທ຺ທໍ ສຸຕ຺ວາຕິ ອຎ຺ຎສ຺ສ ຈິຕ຺ຕໍ ຎຕ຺ວາ ກເຖນ຺ຕານໍ ສທ຺ທໍ ສຸຓິຕ຺ວາ. ປນາຕິ ນິປາໂຕ ປຸນ ອາຣມ຺ເຠ. ວິຕກ຺ກຍໂຕຕິ ຍໍ ວາ ຕໍ ວາ ວິຕກ຺ເກນ ວິຕກ຺ເກນ຺ຕສ຺ສ. ວິຈາຣຍໂຕຕິ ວິຕກ຺ກສມ຺ປຍຸຕ຺ເຕເນວ ວິຈາເຣນ ວິຈາເຣນ຺ຕສ຺ສ. ວິຕກ຺ກວິປ຺ຜາຣສທ຺ທໍ ສຸຕ຺ວາຕິ ວິຕກ຺ກເວຄວເສນ ອຸປ຺ປນ຺ນໍ ວິປ຺ປລປນ຺ຕານໍ ສຸຕ຺ຕປ຺ປມຕ຺ຕາທີນໍ ກູຊນສທ຺ທໍ ສຸຕ຺ວາ. ຍໍ ວິຕກ຺ກຍໂຕ ໂສ ສທ຺ໂທ ອຸປ຺ປນ຺ໂນ, ຕສ຺ສ ວເສນ ‘‘ເອວມ຺ປິ ເຕ ມໂນ’’ຕິອາທີນິ ອາທິສຕິ.

ອວິຕກ຺ກໍ ອວິຈາຣໍ ສມາຘິນ຺ຕິ ວິຕກ຺ກວິຈາຣກ຺ໂຂຠວິຣຫິຕສນ຺ຕຈິຕ຺ຕສ຺ສາປິ ຊານນສມຕ຺ຖຕໍ ທສ຺ເສນ຺ເຕນ ວຸຕ຺ຕໍ, ເສສຈິຕ຺ຕຊານເນ ປນ ວຕ຺ຕພ຺ພເມວ ນຕ຺ຖິ. ເຈຕສາ ເຈໂຕ ປຣິຈ຺ຈ ປຊານາຕີຕິ ເຈໂຕປຣິຍຎາຓລາຠີ. ໂຠໂຕຕິ ຠວນ຺ຕສ຺ສ. ມໂນສງ຺ຂາຣາ ປຓິຫິຕາຕິ ຈິຕ຺ຕສງ຺ຂາຣາ ຐປິຕາ. ອມຸກໍ ນາມ ວິຕກ຺ກໍ ວິຕກ຺ກຍິສ຺ສຕີຕິ ກຸສລາທິວິຕກ຺ກໍ ວິຕກ຺ກຍິສ຺ສຕິ ປວຕ຺ຕຍິສ຺ສຕີຕິ ປຊານາຕິ. ປຊານນ຺ໂຕ ຈ ອາຄມເນນ ຊານາຕິ, ປຸພ຺ພຠາເຄນ ຊານາຕິ, ອນ຺ໂຕສມາປຕ຺ຕິຍໍ ຈິຕ຺ຕໍ ໂອໂລເກຕ຺ວາ ຊານາຕິ. ອາຄມເນນ ຊານາຕິ ນາມ ກສິຓປຣິກມ຺ມກາເລເຍວ ‘‘ເຍນາກາເຣເນສ ກສິຓຠາວນໍ ອາຣທ຺ໂຘ ປຐມຊ຺ຌານໍ ວາ ທຸຕິຍາທິຊ຺ຌານໍ ວາ ອຏ຺ຐ ສມາປຕ຺ຕິໂຍ ວາ ອຸປ຺ປາເທສ຺ສຕີ’’ຕິ ຊານາຕິ. ປຸພ຺ພຠາເຄນ ຊານາຕິ ນາມ ປຐມວິປສ຺ສນາຍ ອາຣທ຺ຘາຍ ເອວໍ ຊານາຕິ, ‘‘ເຍນາກາເຣເນສ ວິປສ຺ສນໍ ອາຣທ຺ໂຘ ໂສຕາປຕ຺ຕິມຄ຺ຄໍ ວາ ອຸປ຺ປາເທສ຺ສຕິ…ເປ… ອຣຫຕ຺ຕມຄ຺ຄໍ ວາ ອຸປ຺ປາເທສ຺ສຕີ’’ຕິ ຊານາຕິ. ອນ຺ໂຕສມາປຕ຺ຕິຍໍ ຈິຕ຺ຕໍ ໂອໂລເກຕ຺ວາ ຊານາຕິ ນາມ ‘‘ເຍນາກາເຣນ ອິມສ຺ສ ມໂນສງ຺ຂາຣາ ຐປິຕາ, ອິມສ຺ສ ນາມ ຈິຕ຺ຕສ຺ສ ອນນ຺ຕຣາ ອິມໍ ນາມ ວິຕກ຺ກໍ ວິຕກ຺ເກສ຺ສຕິ, ອິໂຕ ວຸຏ຺ຐິຕສ຺ສ ເອຕສ຺ສ ຫານຠາຄິໂຍ ວາ ສມາຘິ ຠວິສ຺ສຕິ, ຐິຕິຠາຄິໂຍ ວາ ວິເສສຠາຄິໂຍ ວາ ນິພ຺ເພຘຠາຄິໂຍ ວາ, ອຠິຎ຺ຎາໂຍ ວາ ອຸປ຺ປາເທສ຺ສຕີ’’ຕິ ຊານາຕິ. ພຫຸໍ ເຈປິ ອາທິສຕີຕິ ເຈໂຕປຣິຍຎາຓສ຺ສ ຈິຕ຺ຕເຈຕສິການໍເຍວ ອາຣມ຺ມຓກຣຓໂຕ ສຣາຄາທິໂສຬສປເຠທວເສເນວ ພຫຸໍ ເຈປິ ກເຖຕິ, ນ ອຎ຺ຎວເສນາຕິ ເວທິຕພ຺ພໍ. ຕເຖວ ຕໍ ໂຫຕີຕິ ອິທໍ ເອກໍເສນ ຕເຖວ ໂຫຕິ. ເຈໂຕປຣິຍຎາຓວເສນ ຎາຕຎ຺ຫິ ອຎ຺ຎຖາຠາວີ ນາມ ນຕ຺ຖິ.

ເອວໍ ວິຕກ຺ເກຖາຕິ ເອວໍ ເນກ຺ຂມ຺ມວິຕກ຺ກາທໂຍ ປວຕ຺ເຕນ຺ຕາ ວິຕກ຺ເກຖ. ມາ ເອວໍ ວິຕກ຺ກຍິຕ຺ຖາຕິ ເອວໍ ກາມວິຕກ຺ກາທໂຍ ປວຕ຺ເຕນ຺ຕາ ມາ ວິຕກ຺ກຍິຕ຺ຖ. ເອວໍ ມນສິ ກໂຣຖາຕິ ເອວໍ ອນິຈ຺ຈສຎ຺ຎເມວ, ທຸກ຺ຂສຎ຺ຎາທີສຸ ວາ ອຎ຺ຎຕຣໍ ມນສິ ກໂຣຖ. ມາ ເອວໍ ມນສາກຕ຺ຖາຕິ ເອວໍ ນິຈ຺ຈນ຺ຕິອາທິນາ ນເຍນ ມາ ມນສິ ອກຕ຺ຖ. ອິທໍ ປຊຫຖາຕິ ອິທໍ ປຎ຺ຈກາມຄຸຓຣາຄາທິໍ ປຊຫຖ. ອິທໍ ອຸປສມ຺ປຊ຺ຊ ວິຫຣຖາຕິ ອິທໍ ຈຕຸມຄ຺ຄຜລປ຺ປເຠທໍ ໂລກຸຕ຺ຕຣຘມ຺ມເມວ ປາປຸຓິຕ຺ວາ ນິປ຺ຜາເທຕ຺ວາ ວິຫຣຖ.

໓໑. ອິທານິ ອິທ຺ຘິປາຏິຫາຣິເຍ ອປຣໍ ປຣິຍາຍໍ ວິເສເສນ ທສ຺ເສນ຺ໂຕ ເນກ຺ຂມ຺ມໍ ອິຊ຺ຌຕີຕິ ອິທ຺ຘີຕິອາທິມາຫ. ຕຕ຺ຖ ກາມຈ຺ຉນ຺ທໍ ປຏິຫຣຕີຕິ ອຕ຺ຕໂນ ປຏິປກ຺ຂຠູຕໍ ກາມຈ຺ຉນ຺ທໍ ປຏິພລໍ ຫຸຕ຺ວາ ຫຣຕິ ປຊຫຕີຕິ ຕເທວ ເນກ຺ຂມ຺ມໍ ປາຏິຫາຣິຍໍ ນາມາຕິ ອຕ຺ໂຖ. ເຍ ເຕນ ເນກ຺ຂມ຺ເມນ ສມນ຺ນາຄຕາຕິ ເອວໍ ກາມຈ຺ຉນ຺ທປຏິຫາຣເກນ ເຕນ ເນກ຺ຂມ຺ເມນ ເຍ ປຸຄ຺ຄລາ ປຏິລາຠວເສນ ສມນ຺ນາຄຕາ. ວິສຸທ຺ຘຈິຕ຺ຕາຕິ ກາມຈ຺ຉນ຺ທາຠາວໂຕ ວິສຸທ຺ຘຈິຕ຺ຕາ. ອນາວິລສງ຺ກປ຺ປາຕິ ກາມສງ຺ກປ຺ເປນ ອນາລຸລິຕເນກ຺ຂມ຺ມສງ຺ກປ຺ປາ. ອິຕິ ອາເທສນາປາຏິຫາຣິຍນ຺ຕິ ປຣຈິຕ຺ຕກຸສເລນ ວາ ອຎ຺ເຎນ ວາ ສມ຺ມາສມ຺ພຸທ຺ເຘນ ວາ ພຸທ຺ຘສາວເກຫິ ວາ ເອວໍ ອາເທສນາ ປາຏິຫາຣິຍນ຺ຕິ ອຕ຺ໂຖ. ອຖ ວາ ອິຕິ ເອວໍ ອາທິສນໍ ອາເທສນາປາຏິຫາຣິຍນ຺ຕິ ອາເທສນສທ຺ໂທ ປາຐເສສໍ ກຕ຺ວາ ປຍຸຊ຺ຊິຕພ຺ໂພ. ເອວໍ ອາເສວິຕພ຺ພນ຺ຕິ ອິມິນາ ຈ ປກາເຣນ ອິມິນາ ຈ ປກາເຣນ ອາທິໂຕ ເສວິຕພ຺ພໍ. ເສສຕ຺ຕເຍປິ ເອເສວ ນໂຍ. ຕທນຸຘມ຺ມຕາ ສຕິ ອຸປຏ຺ຐເປຕພ຺ພາຕິ ຕສ຺ສ ເນກ຺ຂມ຺ມສ຺ສ ອນຸກູລຠູຕາ ສຕິ ຠຸສໍ ຐເປຕພ຺ພາ. ອິຕິ ອນຸສາສນີປາຏິຫາຣິຍນ຺ຕິ ເອຕ຺ຖ ອາເທສນາປາຏິຫາຣິຍໂຍຊນາຍ ວິຍ ໂຍຊນາ ກາຕພ຺ພາ. ອພ຺ຍາປາທາທີສຸປິ ເອເສວ ນໂຍ. ປາໂຐ ປນ ຌານາທີນິ ສງ຺ຂິປິຕ຺ວາ ອນ຺ເຕ ອຣຫຕ຺ຕມຄ຺ຄເມວ ທສ຺ເສຕ຺ວາ ລິຂິໂຕ. ຕຕ຺ຖ ຈຕູສຸປິ ມຄ຺ເຄສຸ ‘‘ເອວໍ ອາເສວິຕພ຺ໂພ’’ຕິອາທິ ເອກຈິຕ຺ຕກ຺ຂຓິກຕ຺ຕາ ມຄ຺ຄສ຺ສ ປຸພ຺ພຠາຄວເສນ ວຸຕ຺ຕນ຺ຕິ ເວທິຕພ຺ພໍ. ມຄ຺ຄສ຺ສ ຫິ ປຸພ຺ພຠາຄຠູຕາຍ ໂລກິຍມຄ຺ຄສງ຺ຂາຕາຍ ວຸຏ຺ຐານຄາມິນິຍາ ວິປສ຺ສນາຍ ມຄ຺ຄຸປ຺ປາທນຕ຺ຖໍ ອາເສວນາທີສຸ ກເຕສຸ ຕາຍ ອຸປ຺ປນ຺ໂນ ມຄ຺ໂຄປິ ອາເສວິໂຕ ຠາວິໂຕ ພຫຸລີກໂຕ ນາມ ໂຫຕີຕິ ເວທິຕພ຺ພໍ. ສພ຺ພຕ຺ຖິກວາທາຈຣິຍາ ປນ ‘‘ເອເກກມຄ຺ໂຄ ໂສຬສກ຺ຂຓິໂກ’’ຕິ ວທນ຺ຕິ. ຕທນຸຘມ຺ມຕາສຕິອຸປຏ຺ຐາປນໍ ປນ ປຸພ຺ພຠາເຄ ຍຸຊ຺ຊຕິເຍວາຕິ.

໓໒. ປຸນ ເນກ຺ຂມ຺ມໍ ອິຊ຺ຌຕີຕິ ອິທ຺ຘີຕິອາທີນິ ‘‘ອິທ຺ຘິປາຏິຫາຣິຍ’’ນ຺ຕິປທສ຺ສ ກມ຺ມຘາຣຍສມາສຕ຺ຕທີປນຕ຺ຖໍ ວຸຕ຺ຕານິ. ສຸຕ຺ຕນ຺ເຕ ວຸຕ຺ເຕສຸ ຕີສຸ ອິທ຺ຘິປາຏິຫາຣິຍສ຺ເສວ ສມາສຕ຺ເຕ ວຸຕ຺ເຕ ເສສານໍ ທ຺ວິນ຺ນມ຺ປິ ວຸຕ຺ໂຕວ ໂຫຕີຕິ ອິມສ຺ມິໍ ປຣິຍາເຍ ມູລຠູຕສ຺ສ ອິທ຺ຘິປາຏິຫາຣິຍສ຺ເສວ ສມາສຕ຺ໂຖ ວຸຕ຺ໂຕຕິ ເວທິຕພ຺ພນ຺ຕິ.

ປາຏິຫາຣິຍກຖາວຓ຺ຓນາ ນິຏ຺ຐິຕາ.