໕໕. ອາສວກ຺ຂຍຎາຓນິທ຺ເທສວຓ຺ຓນາ

໑໐໗. ອາສວກ຺ຂຍຎາຓນິທ຺ເທເສ ອນຎ຺ຎາຕຎ຺ຎສ຺ສາມີຕິນ຺ທ຺ຣິຍາທີນິ ວຸຕ຺ຕຕ຺ຖານິ. ກຕິ ຐານານິ ຄຈ຺ຉຕີຕິ ເອເກກສ຺ສ ອຸປ຺ປຕ຺ຕິຏ຺ຐານນິຍມນຕ຺ຖໍ ປຸຈ຺ຉາ. ເອກໍ ຐານໍ ຄຈ຺ຉຕີຕິ ເອກສ຺ມິໍ ຐາເນ ອຸປ຺ປຊ຺ຊຕີຕິ ວຸຕ຺ຕໍ ໂຫຕິ. ອຸປ຺ປຕ຺ຕິໂອກາສຏ຺ຐານຎ຺ຫິ ຕິຏ຺ຐຕິ ເອຕ຺ຖາຕິ ຐານນ຺ຕິ ວຸຈ຺ຈຕິ. ຉ ຐານານີຕິ ຉ ມຄ຺ຄຜລກ຺ຂເຓ. ອິນ຺ທ຺ຣິຍານໍ ອນຎ຺ຎາຕຎ຺ຎສ຺ສາມີຕິນ຺ທ຺ຣິຍາທີສຸ ຕີສຸ ເອເກກເມວ ອຘິກໍ ໂຫຕີຕິ ທສ຺ສນຕ຺ຖໍ ສທ຺ຘິນ຺ທ຺ຣິຍໍ ອຘິໂມກ຺ຂປຣິວາຣໍ ໂຫຕີຕິອາທິ ວຸຕ຺ຕໍ. ຍຖາ ‘‘ສທ຺ຘິນ຺ທ຺ຣິຍສ຺ສ ອຘິໂມກ຺ຂຏ຺ໂຐ’’ຕິອາທີສຸ (ປຏິ. ມ. ໑.໑໒) ອຘິໂມກ຺ຂາທໂຍ ສທ຺ຘິນ຺ທ຺ຣິຍາທີນໍ ກິຈ຺ຈວເສນ ວຸຕ຺ຕາ, ເອວມິຘາປິ ‘‘ອຘິໂມກ຺ຂປຣິວາຣໍ ໂຫຕີ’’ຕິ ສທ຺ຘິນ຺ທ຺ຣິຍໍ ອຘິໂມກ຺ຂຕ຺ເຖນ ປຣິວາຣໍ ໂຫຕີຕິ ວຸຕ຺ຕໍ ໂຫຕິ. ເອສ ນໂຍ ເສເສສຸປິ. ປຣິວາຣນ຺ຕິ ຈ ລິງ຺ຄວິປລ຺ລາໂສ ກໂຕ. ປຎ຺ຎິນ຺ທ຺ຣິຍນ຺ຕິ ອນຎ຺ຎາຕຎ຺ຎສ຺ສາມີຕິນ຺ທ຺ຣິຍເມວ ປຊານນສຠາວທສ຺ສນຕ຺ຖໍ ວິສຸໍ ກຕ຺ວາ ວຸຕ຺ຕໍ. ອຠິຘມ຺ເມປິ (ວິຠ. ໒໑໙) ຫິ ປຎ຺ຎາຍ ກິຈ຺ຈວິເສສທສ຺ສນຕ຺ຖໍ ມຄ຺ຄກ຺ຂເຓ ຈ ຜລກ຺ຂເຓ ຈ ເອກາວ ປຎ຺ຎາ ອຏ຺ຐຘາ ວິຠຕ຺ຕາ. ອຠິສນ຺ທນປຣິວາຣນ຺ຕິ ນ຺ຫານິຍຈຸຓ຺ຓານໍ ອຸທກໍ ວິຍ ຈິຕ຺ຕເຈຕສິການໍ ສິເນຫນກິຈ຺ເຈນ ປຣິວາຣໍ ໂຫຕິ. ອິທໍ ໂສມນສ຺ສສມ຺ປຍຸຕ຺ຕມຄ຺ຄວເສເນວ ວຸຕ຺ຕໍ. ອຸເປກ຺ຂາສມ຺ປຍຸຕ຺ຕມຄ຺ເຄ ປນ ໂສມນສ຺ສິນ຺ທ຺ຣິຍຏ຺ຐາເນ ອຸເປກ຺ຂິນ຺ທ຺ຣິຍໍ ທຏ຺ຐພ຺ພໍ. ຕໍ ປນ ສມ຺ປຍຸຕ຺ຕານໍ ນາຕິອຸປພ຺ຣູຫນປຣິວາຣນ຺ຕິ ຄເຫຕພ຺ພໍ. ປວຕ຺ຕສນ຺ຕຕາຘິປເຕຍ຺ຍປຣິວາຣນ຺ຕິ ປວຕ຺ຕາ ສນ຺ຕຕິ ປວຕ຺ຕສນ຺ຕຕິ, ວຕ຺ຕມານສນ຺ຕານນ຺ຕິ ອຕ຺ໂຖ. ອຘິປຕິຠາໂວ ອາຘິປເຕຍ຺ຍໍ, ປວຕ຺ຕສນ຺ຕຕິຍາ ອາຘິປເຕຍ຺ຍໍ ປວຕ຺ຕສນ຺ຕຕາຘິປເຕຍ຺ຍໍ. ວຕ຺ຕມານຊີວິຕິນ຺ທ຺ຣິຍສ຺ສ ອຸປຣິປວຕ຺ຕິຍາ ຈ ປຈ຺ຈຍຕ຺ຕາ ປຸພ຺ພາປຣວເສນ ປວຕ຺ຕສນ຺ຕຕິຍາ ອຘິປຕິຠາເວນ ອນຎ຺ຎາຕຎ຺ຎສ຺ສາມີຕິນ຺ທ຺ຣິຍສ຺ສ ປຣິວາຣໍ ໂຫຕິ.

ໂສຕາປຕ຺ຕິມຄ຺ຄກ຺ຂເຓ ຊາຕາ ຘມ຺ມາຕິອາທິ ສພ຺ເພສໍ ມຄ຺ຄສມ຺ປຍຸຕ຺ຕການໍ ວຓ຺ຓຠຓນຕ຺ຖໍ ວຸຕ຺ຕໍ. ຕຕ຺ຖ ມຄ຺ຄກ຺ຂເຓ ຊາຕາຕິ ມຄ຺ຄສມຸຏ຺ຐິຕາ ເອວ, ນ ອຎ຺ເຎ. ຍສ຺ມາ ປນ ມຄ຺ຄສມຸຏ຺ຐິຕມ຺ປິ ຣູປໍ ກຸສລາທິນາມໍ ນ ລຠຕິ, ຕສ຺ມາ ຕໍ ອປເນນ຺ໂຕ ຐເປຕ຺ວາ ຈິຕ຺ຕສມຸຏ຺ຐານໍ ຣູປນ຺ຕິ ອາຫ. ສພ຺ເພວ ຫິ ເຕ ຘມ຺ມາ ກຸຈ຺ຉິຕານໍ ສລນາທີຫິ ອຕ຺ເຖຫິ ກຸສລາ. ເຕ ອາຣມ຺ມຓໍ ກຕ຺ວາ ປວຕ຺ຕມານາ ນຕ຺ຖິ ເອເຕສໍ ອາສວາຕິ ອນາສວາ. ວຏ຺ຏມູລໍ ຉິນ຺ທນ຺ຕາ ນິພ຺ພານໍ ອາຣມ຺ມຓໍ ກຕ຺ວາ ວຏ຺ຏໂຕ ນິຍ຺ຍນ຺ຕີຕິ ນິຍ຺ຍານິກາ. ກຸສລາກຸສລສງ຺ຂາຕາ ຈຍາ ອເປຕຕ຺ຕາ ອປຈຍສງ຺ຂາຕໍ ນິພ຺ພານໍ ອາຣມ຺ມຓໍ ກຕ຺ວາ ປວຕ຺ຕນໂຕ ອປຈຍໍ ຄຈ຺ຉນ຺ຕີຕິ ອປຈຍຄາມິໂນ, ປວຕ຺ຕໍ ອປຈິນນ຺ຕາ ວິທ຺ຘໍເສນ຺ຕາ ຄຈ຺ຉນ຺ຕີຕິປິ ອປຈຍຄາມິໂນ. ໂລເກ ອປຣິຍາປນ຺ນຠາເວນ ໂລກໂຕ ອຸຕ຺ຕຣາ ອຸຕ຺ຕິຓ຺ຓາຕິ ໂລກຸຕ຺ຕຣາ. ນິພ຺ພານໍ ອາຣມ຺ມຓໍ ເອເຕສນ຺ຕິ ນິພ຺ພານາຣມ຺ມຓາ.

ອິມານິ ອຏ຺ຐິນ຺ທ຺ຣິຍານີຕິອາທິ ປຸພ຺ເພ ວຸຕ຺ຕປຣິວາຣຠາວສ຺ສ ຈ ເຕນ ສຫຄຕາທິຠາວສ຺ສ ຈ ອາທິວຸຕ຺ຕອາກາຣານຎ຺ຈ ທີປນຕ຺ຖໍ ວຸຕ຺ຕໍ. ຕຕ຺ຖ ອຏ຺ຐິນ຺ທ຺ຣິຍານີຕິ ປຸພ຺ເພ ວຸຕ຺ຕນເຍນ ປຎ຺ຎິນ຺ທ຺ຣິເຍນ ສຫ ອຏ຺ຐ. ສຫຊາຕປຣິວາຣາຕິ ອຏ຺ຐສຸ ເອເກເກນ ສຫ ອິຕເຣ ອິຕເຣ ສຕ຺ຕ ສຫຊາຕາ ຫຸຕ຺ວາ ຕສ຺ສ ສຫຊາຕປຣິວາຣາ ໂຫນ຺ຕິ. ຕເຖວ ອຎ຺ຎໍ ອຎ຺ຎສ຺ສ ອຎ຺ຎໍ ອຎ຺ຎສ຺ສາຕິ ເອວໍ ອຎ຺ຎມຎ຺ຎປຣິວາຣາ ໂຫນ຺ຕິ. ຕເຖວ ອຎ຺ຎມຎ຺ຎໍ ນິສ຺ສຍປຣິວາຣາ ສມ຺ປຍຸຕ຺ຕປຣິວາຣາ ຈ ໂຫນ຺ຕິ. ສຫຄຕາຕິ ເຕນ ອນຎ຺ຎາຕຎ຺ຎສ຺ສາມີຕິນ຺ທ຺ຣິເຍນ ສຫ ເອກຸປ຺ປາທາທິຠາວໍ ຄຕາ. ສຫຊາຕາຕິ ເຕເນວ ສຫ ຊາຕາ. ສໍສຏ຺ຐາຕິ ເຕເນວ ສຫ ມິສ຺ສິຕາ. ສມ຺ປຍຸຕ຺ຕາຕິ ເຕເນວ ສມໍ ເອກຸປ຺ປາທາທິປກາເຣຫິ ຍຸຕ຺ຕາ. ເຕວາຕິ ເຕ ເອວ ອຏ຺ຐ ອິນ຺ທ຺ຣິຍຘມ຺ມາ. ຕສ຺ສາຕິ ອນຎ຺ຎາຕຎ຺ຎສ຺ສາມີຕິນ຺ທ຺ຣິຍສ຺ສ. ອາກາຣາຕິ ປຣິວາຣໂກຏ຺ຐາສາ.

ຜລກ຺ຂເຓ ຊາຕາ ຘມ຺ມາ ສພ຺ເພວ ອພ຺ຍາກຕາ ໂຫນ຺ຕີຕິ ຣູປສ຺ສປິ ອພ຺ຍາກຕຕ຺ຕາ ຈິຕ຺ຕສມຸຏ຺ຐານຣູເປນ ສຫ ວຸຕ຺ຕາ. ມຄ຺ຄສ຺ເສວ ກຸສລຕ຺ຕາ ນິຍ຺ຍານິກຕ຺ຕາ ອປຈຍຄາມິຕ຺ຕາ ຈ ຜລກ຺ຂເຓ ‘‘ກຸສລາ’’ຕິ ຈ ‘‘ນິຍ຺ຍານິກາ’’ຕິ ຈ ‘‘ອປຈຍຄາມິໂນ’’ຕິ ຈ ນ ວຸຕ຺ຕໍ. ອິຕີຕິອາທິ ວຸຕ຺ຕປ຺ປກາຣນິຄມນໍ. ຕຕ຺ຖ ອຏ຺ຐຏ຺ຐການີຕິ ອຏ຺ຐສຸ ມຄ຺ຄຜເລສຸ ເອເກກສ຺ສ ອຏ຺ຐກສ຺ສ ວເສນ ອຏ຺ຐ ອິນ຺ທ຺ຣິຍອຏ຺ຐການິ. ຈຕຸສຏ຺ຐິ ໂຫນ຺ຕີຕິ ຈຕຸສຏ຺ຐິ ອາກາຣາ ໂຫນ຺ຕິ. ອາສວາຕິອາທິ ເຫຏ຺ຐາ ວຸຕ຺ຕຕ຺ຖເມວ. ອິຘ ອຣຫຕ຺ຕມຄ຺ຄວຊ຺ເຌເຍວ ອາສເວ ອວຕ຺ວາ ເສສມຄ຺ຄຕ຺ຕຍວຊ຺ຌານມ຺ປິ ວຈນໍ ອາສວກ຺ຂຍວຈນສາມຎ຺ຎມຕ຺ເຕນ ວຸຕ຺ຕນ຺ຕິ ເວທິຕພ຺ພໍ. ອຣຫຕ຺ຕມຄ຺ຄຎາຓເມວ ຫິ ເກຈິ ອາສເວ ອເສເສຕ຺ວາ ອາສວານໍ ເຂປນໂຕ ‘‘ຂເຍ ຎາຓ’’ນ຺ຕິ ວຸຈ຺ຈຕິ. ຕສ຺ມາເຍວ ຈ ອຣຫາເຍວ ຂີຓາສໂວຕິ ວຸຈ຺ຈຕີຕິ.

ອາສວກ຺ຂຍຎາຓນິທ຺ເທສວຓ຺ຓນາ ນິຏ຺ຐິຕາ.